نص كلمة السيسي لدى وصوله مطار القاهرة قادمًا من نيويورك 27/9/2019

هتافات: سيسي سيسي

مذيعة سي بي سي: حمدالله على سلامتك.

السيسي: الله يسلمك.

المذيعة: حمدالله على السلامة ﻷرض الوطن. النهاردة أكبر ثبوت لصفعة للإرهابيين وأعوانهم وعملائهم. حضرتك تقول إيه؟

السيسي: هقول صباح الخير اﻷول، وبعدين ايه اللي مصحيكم بدري النهاردة الجمعة يعني. الموضوع مش مستاهل خالص. الموضوع مش مستاهل صحيح خالص. لازم تعرفوا كلكم إن الشعب المصري بقى واعي قوي، ازاي الصورة تترسم، يزيفوا الواقع ويخدعوا الناس، ويضحكوا عليهم.

الكلام ده المصريين بقوا أوعى منه بكتير، واللي اتعمل قبل كده مفيش خوف منه تاني. ليه؟ علشان ربنا وعلشان انتم. فمتقلقوش من حاجة، متقلقوش من حاجة، متقلقوش من حاجة.

المذيعة: حضرتك لسه جاي من زيارة ناجحة جدًا من نيويورك، ومشاركة مصر في اجتماعات الجمعية العامة للأمم المتحدة، وكان في احترام ملحوظ جدًا من زعماء والدول اﻷخرى. مصر الجديدة في نظر الزعماء أخبارها ايه؟

السيسي: زي الفل وكل حاجة ماشية كويس قوي، أنا شايفكم يعني، يعني انتو تسمعوا كلامهم وتصدقوه وتتعاملوا معاه على إنه حقيقة؟ أنا شايف كده. الموضوع مش كده خالص. ده صورة بتترسم زي ما اتعمل قبل كده، عبارة عن كذب وافتراء وتشويه، وكتائب إلكترونية شغالة وشوية إعلام يشتغل علشان نقدم صورة مش حقيقية، انتو لازم تكونوا واعيين لكده. احنا جامدين قوي إن شاء الله. البلد جامدة قوي بيكو.

مواطن: بيك يا ريس.

السيسي: البلد جامدة قوي بيكو. البلد جامدة قوي بيكو.

المذيعة: الدعوات للتظاهرات، والشغل للأسف اللي ممكن نعبّر بيه بإنه شغل رخيص شوية من قِبل اﻹرهابيين، رسالتك للمصريين إيه؟

السيسي: أصل الرسالة دي لسه كنا احنا بنتكلم من أسبوع في الموضوع دوت قبل ما نسافر، وقلنا يا مصريين خلوا بالكم مش هيسيبوكوا. مش هيسيبوكوا. لا هيسيبوكوا تنجحوا ولا هيسيبوكوا تتهنوا على حاجة. دي حرب بينا وبينهم. مجموعة قد كده والشعب كله، تتصدولهم ازاي؟

واﻹعلام عليه واجب كبير، وعوا الناس أكتر واتصدوا للشائعات اللي بتتقال، والتزموا باللي هو (كلمة غير واضحة) في كل حتة. والناس البساط متسيبوهمش ﻷن هما ناس طيبين قوي وبيبقوا فاهمين كويس. مصر مكانها كبير قوي، مش عشان حاجة، بشعبها. مكانة مصر بشعبها بيكم يعني.

قس: (غير واضح).. وبنشكرك إنك وافقت تحكم مصر وشايل شيلتنا. كتر خيرك وربنا يحافظ عليك. 

السيسي: لا لا ازاي بقى، دانا ليا الشرف والله. متشكرين متشكرين. 

شيخ: سيادة الريس.

السيسي: نعم؟

الشيخ: عايز أقول لحضرتك "فأما الزَبَدُ فيذهب جفاء، وأما ما ينفع الناس فيمكث في اﻷرض"، نفعت الناس وعمرت وحفظت اﻷمان. حفظك الله لنا وحفظ مصر بك.

السيسي: اللهم آمين. يحفظنا بيه هو. متشكرين.

المذيعة: أنا بس عايزة أعرف رد فعلك لما شفت الزغاريط والهتافات، ودعم كل..

السيسي: هقولك وأقول للمصريين يوم ما هطلب يوم ما هطلب من المصريين زي يوم التفويض كده، في 2013.

المذيعة: 3/ 7

السيسي: يوم ما هطلب من المصريين رسالة للعالم كله، ينزل الملايين، آه مش أقل من كده. شكرا جزيلا شكرا جزيلا. 

..........

القيت الكلمة في مطار القاهرة، بحضور عدد من المواطنين.

.........

خدمة الخطابات الكاملة للسيسي تجدونها في هذا الرابط.