نص كلمة وحوار السيسي مع مقاتلي القوات المسلحة المصرية شرق قناة السويس 1/4/2023
السيسي: أخباركو إيه؟ سلامو عليكو.
الجنود: وعليكم السلام يا فندم.
جندي 1: تمام يا فندم، (...) محمد حلمي عبد الغني، اللوا 116 الفرقة 23. أنا يا فندم قائد الكمين. تمام يا فندم.
السيسي: كل سنة وإنتو طيبين.
الجنود: وإنت طيب يا فندم.
جندي 2: تمام يا فندم رقيب مقاتل باسل مجدي عبد العزيز، من قيادة اللوا 116 فرقة 23، الجيش التالت الميداني، تمام يا فندم، تسليحي الشخصي بندقية آلية. تمام يا فندم.
السيسي: إنت قعد في معهد تدريب ضباط الصف قد إيه؟
جندي 2: سنة و8 شهو يا فندم.
السيسي: سنة و8 شهور. بتنزل أجازة كل قد إيه؟
جندي 2: كل 16 يوم يا فندم.
السيسي: بتنزل قد إيه؟
جندي 2: بنزل 8 أيام سيادتك.
السيسي: 16 و 8.
جندي 2: تمام يا سيادتك.
السيسي: أنا كنت في نقطة ز يدي وأنا صغير كدا في سنك كدا، كنت بقعد 40 يوم وأنزل 5 أيام. أقعد كام يوم؟
جندي 2: 40 يوم سيادتك.
السيسي: وأنزل كام يوم؟
جندي 2: 5 أيام.
السيسي: آه، ولا كان في عربيات بتتحرك ولا كان في طرق ولا كان في أي حاجة. متجوز؟
جندي 2: لا يا فندم لسه على وش خطوبة.
السيسي: (يضحك الرئيس) على وش خطوبة. ها تخطب يعني؟
جندي 2: ها أخطب سيادتك.
السيسي: إن شاء الله.عندك شقة ولا لأ.
جندي 2: تمام سيادتك يا فندم.
السيسي: عندك شقة فين؟
جندي 2: في البساتين سيادتك.
السيسي: ده في الجيش ولا..
جندي 2: تمام سيادتك
السيسي: بتدفع كام قسطها الشهري.
جندي 2: بدفع 800 ج سيادتك.
السيسي: كتير ولا كويس؟
جندي 2: حلو يا فندم.
السيسي: لا صحيح.
جندي 2: حلو والله.
السيسي: متشكر..متشكر.. كل سنة وإنت طيب.
جندي 2: وحضرتك طيب يا فندم.
السيسي: سلامو عليكو.
جندي 2: عليكم السلام ورحمة الله وبركاته.
السيسي: اسمك إيه؟
جندي 3: تمام يا فندم جندي مقاتل (...) على قوة اللوا 116 فرقة 23 سلاحي الشخصي (...) عيار 40 ملي، تمام يا فندم.
السيسي: طيب، إنت منين؟
جندي 3: شبرا الخيمة يا فندم.
السيسي: شبرا الخيمة.. بقالك قد إيه في الجيش؟
جندي 3: سنتين يا فندم.
السيسي: وفاضل لك قد إيه؟
جندي 3: 10 شهور يا فندم.
السيسي: 3 سنين؟ هممم؟
جندي 3: 3 سنين يا فندم.
السيسي: 3 سنين؟ بتشتغل إيه؟
جندي 3: شغال مع والدي..
السيسي: هه؟
جندي 3:شغال مع والدي بساعده في السيراميك
السيسي: همممم. طب بتقرا وتكتب ولا مافيش خالص؟
جندي 3: بقرا وبكتب يعني على قدي، اللي هو بمسك تليفون بعرف أتعامل على التليفون.
السيسي: (يضحك الرئيس) عايزين نقرا ونكتب.
جندي 3: إن شاء الله يا فندم، الحمد لله.
السيسي: طيب، مين هنا من زمايلك بيحاول يساعدك.
جندي 3: كتير يا فندم زمايلي كتير.
السيسي: وبعدين؟
جندي 3: الحمد لله اتحسنت أحسن من الأول كتير.
السيسي: بتعمل كام في اليوم مع والدك؟
جندي 3: والدي بيديني 120 مثلًا 150 في اليوم.
السيسي: ما تتكسفش من.. بس لازم نقرا ونكتب كويس.
جندي 3: أكيد يا فندم.
السيسي: وال 10 أشهر دول.. يا باسل..
جندي 2: أفندم.
السيسي: الراجل ده مسؤوليتك إنت.
جندي 2: أكيد طبعا يا فندم.
السيسي: فين محمد؟
جندي 1: أفندم.
السيسي: يا محمد، الراجل ده لازم ياخد شهادة قبل ما يطلع في ال 10 شهور.
جندي 1: أكيد يا فندم.
السيسي: شكلك نبيه يا ولا، شكلك نبيه. وإنت قاعد هنا بنقعد كام يوم (جملة غير واضحة) الوقت ده ما تضيعش ساعة منك في إنك تتعلم فيها وتاخش شهادة، لازم...
جندي 3: تلامذة سيادتك يا فندم.
السيسي: لأ، تلامذة سيادتك إيه،أنا ها أسأل عليه. ها شوف يا محمد بقى.. أنا بتكلم بجد.. ها أجيبك معاه، ومش ها يخرج.. مش كدا؟ مش عايز حاجة؟
جندي 3: ربنا يخليك يا فندم.
السيسي: اسمك إيه؟
جندي 4: تمام يا فندم. جندي مقاتل النمر أحمد فراج، على قوة اللوا 116 فرقة 23 مشاة ميكانيكي، التسليح الشخصي بندقية آلية. تمام يا فندم.
السيسي: منين يا نمر؟
جندي 4: من سوهاج يا فندم.
السيسي: الناس بتوع سوهاج دول ناس طيبين قوي والصعايدة.
جندي 4: تسلم لا فندم.
السيسي: بقى لك قد إيه؟
جندي 4: بقى لي سنة وشهرين يا فندم.
السيسي: فاضل لك قد إيه؟
جندي 4: 10 شهور يا فندم.
السيسي: سنتين يعني؟
جندي 4: سنتين يا فندم.
السيسي: معاك إيه دبلوم؟
جندي 4: ثانوية يا فندم.
السيسي: طيب مش عايز حاجة؟
جندي 4: سلامتك يا فندم.
جندي 5: تمام يا فندم. جندي مقاتل إسلام (...) باللوا 116 فرقة 23 تسليحي الشخصي بندقية ألية.
السي سي: منين يا إسلام؟
جندي 5: من الشرقية يا فندم.
السيسي: بتشتغل إيه؟
جندي 5: شغال في فرن يا فندم.
السيسي: بتعمل كام في اليوم؟
جندي 5: 150 جنيه في اليوم يا فندم.
السيسي: متجوز؟
جندي 5: متجوز يا فندم.
السيسي: معاك تعليم إيه؟
جندي 5: دبلوم تجارة يا فندم.
السيسي: دبلوم تجارة.. عايش مع والدك؟
جندي 5: آه يا فندم.
السيسي: والدك بيشتغل إيه؟
جندي 5: شغال يا فندم فلاح يا فندم.
السيسي: عندكو أرض؟
جندي 5: آه يا فندم.
السيسي: كام فدان؟
جندي 5: فدانين يا فندم.
السيسي: ما بتشتغلش معاه؟
جندي 5: بشتغل معاه يا فندم بردو يا فندم.
السيسي: كدا وكدا يعني.
جندي 5: آه.
السيسي: عندك كام إخوات؟
جندي 5: أخين يا فندم.
السيسي: بس؟
جندي 5: أنا وأخويا بس يا فندم.
السيسي: إنتو اتنين بس.
جندي 5: آه يا فندم.
السيسي: ما شاء الله. وأخوك أكبر منك ولا أصغر؟
جندي 5: لا أنا اللي أكبر يا فندم.
السيسي: أكبر منه بقد إيه؟
جندي 5: أكبر منه ب 3 سنين يا فندم.
السيسي: وهو في التعليم ولا؟
جندي 5: تمام يا فندم لسه في التعليم.
السيسي: تمام. مش عايز حاجة؟
جندي 5: شكرًا يا فندم.
السيسي: صحيح؟
جندي 5: شكرًا يا فندم.
السيسي: سلامو عليكو.
جندي 6: تمام يا فندم جندي مقاتل كرولوس منصور جرجس على قوة اللوا 116 مشاة ميكانيكي الفرقة 23 مشاة ميكانيكي، تسليحي الشخصي بندقية آلية.
السيسي: في حد بيدخن يا ولاد؟ حد بيدخن؟ أبو السعود؟
جندي 7: تمام يا فندم.
السيسي: بتدخن؟
جندي 7: لا يا فندم.
السيسي: صحيح؟
جندي 7: والله ما بندخن يا فندم.
السيسي: عايز أصدقك. أبو السعود؟
جندي 7: تمام يا فندم.
السيسي: بتدخن؟
جندي 7: لا والله يا فندم.
السيسي: تعالى يا كرولوس جنبي هنا، تعالوا جنبي وحوالين مني يا ولاد. تعالى، تعالى.. أول ما اتخرجت من الكلية، جيت هنا.. وعشت فيها أحلى أيامي. عايز أقول لكو كلكو، إوعوا تفتكروا إن الأزمة دي ها تفضل كدا.. شوفوا، افتكروا كويس قوي إن ال.. من 10 سنين، مش كدا؟ 10 سنين، كان كله بيقول لك إمتى الإرهاب يخلص؟ إمتى إيه؟
الجنود: الإرهاب يخلص.
السيسي: الإرهاب خلص ولا ما خصلش؟
الجنود: خلص يا فندم.
السيسي: بمين؟
الجنود: بينا يا فندم.
السيسي: بيكو إنتو. وبردو الأزمة اللي إحنا فيها دي ها تخلص بمين.
الجنود: بينا يا فندم.
السيسي: آه أومال إيه. بيكو. وزي ما أنا قلت كدا بفضل الله سبحانه وتعالى إن ها ييجي يوم وها يبقى الموضوع ده تاريخ. أنا بقول لكو الأزمة دي قريبًا بفضل الله سبحانه وتعالى ها تبقى تاريخ بردو. حتى الدولار اللي الناس كلها بيقول لك آآ.. ده بفضل الله سبحانه وتعالى وبجهدكو ها يبقى إيه؟ ها يبقى إيه؟ ها يبقى إيه؟
الجنود: تاريخ يا فندم.
السيسي: تاريخ! ها يبقى إيه؟
الجنود: تاريخ يا فندم.
السيسي: بس لازم نعرق ونشقى لغاية ما نخلص المسائل ديت. زي ما خلصنا الإرهاب وخلصنا حاجات تانية كتير، ده ها يخلص بفضل الله سبحانه وتعالى.
الهدف كله اللي أنا عايز اقوله لكو إنتو مع بعضكو هنا ومعاكو الظابط محمد ومعاكم باسل.. يبقى في موضوعات تتكلموا فيها مع بعض، موضوعات مهمة، تعرفوا لو ف أزمة الأزمة دي ليه؟ والأزمة دي ممكن تتحل إزاي؟ لو في حد من زمايلنا عنده مشكلة نساعده إزاي؟ زي، طبعا إوعى تزعل يا شوقي (يقصد الجندي الأمي) زي مثلًا أخونا شوقي كدا.. نبقى إحنا قاعدين هنا ومعانا أخونا ونسيبه؟! هه؟
الجنود: لا يا فندم.
السيسي: كل سنة وإنتو طيبين.
الجنود: وإنت طيب يا فندم.
السيسي: مش عايزين حاجة؟
الجنود: شكرًا يا فندم.
السيسي: أخبار رمضان إيه بتاكلوا كويس؟
الجنود: تمام يا فندم.
السيسي: صحيح
الجنود: تمام يا فندم.
السيسي: أنا سعيد إن أنا شوفتكو.
الجنود: وإحنا أسعد يا فندم.
السيسي: كل سنة وإنتو طيبين.
الجنود: وإنت طيب يا فندم.
السيسي: خلي بالكو من نفسكو.
الجنود: تمام يا فندم.
السيسي: لازم بردو نبقى منتبهين، إوعو، إوعو تضيعوا وقت غير في إنك تبني جسمك، تبني عقلك، تفهم، تتدرب كويس، طول ما إنت قاعد كدا، عشان تخرج من هنا يبقى أنا لما أقعد لي سنتين استفادت ولا ما استفادتش؟
الجنود: استفادت يا فندم.
السيسي: طيب ها أقول لكو على حاجة. ها أقعد ساعتين خدمة، الخدمة دي تدريب. لما ييجي حد أنا صاحي له قوي. لكن أقف كدا بس؟ ده مش كويس. والكلام ده أنا كنت قلته وأنا وزير عشان أبني رجال مقاتلين أشداء من ضمن البناء بناء الجسم، بناء عقل، بناء إيه؟
الجنود: عقل.
عقله. نتكلم كلام مفيد مع بعضنا، ما نخافش من حد، أبدًا، ما نخافش إيه يا ولاد؟
الجنود: من حد يا فندم.
السيسي: طبعًا، أومال ها نقاتل إزاي؟ زي ما قاتلتوا قبل كدا. كل سنة وإنتو طيبين.
الجنود: وإنت طيب يا فندم.
السيسي: متشكرين.
ألقيت الكلمة شرق قناة السويس حيث تفقد الرئيس أحد كمائن القوات المسلحة وأجرى حديثا مع الجنود المقاتلين.