نص حديث الرئيس عبد الفتاح السيسي مع المشرفين والعمال خلال تفقده الأكاديمية العسكرية المصرية 4/5/2023

 

 

0:47

السيسي: (...) كل سنة وإنتو طيبين.. ها تلحقوا تخلصوا ولا لسه؟ ها تلحقوا تخلصوا ولا إيه؟ ربنا يوفقكو إن شاء الله. أنا شايف حاجة، حاجة جميلة قوي والله، وجهد كبير قوي اللي إنتو عاملينه. شدو حيلكو. متشكرين وكل سنة وإنتو طيبين.

1:34

مشرف 1: سيادتك مشرفنا في الإستاد الرياضي. المنطقة يا فندم على مسطح 115 فدان، إجمالي 15 منشأ. إجمالي نسبة تنفيذ المنشآت يا فندم بلغت 91%. تاريخ النهو المخطط إن شاء الله يا فندم 30/6

السيسي: طيب. هو دي المنشآت اللي إنت بتقول..

مشرف 1:تمام يا فندم.

السيسي: دي كدا..

مشرف 1:تمام.

السيسي: هانشوف، هو التحدي بتاعنا إن إحنا نخرج من هنا تماما على شهر 7 ، 8.

مشرف 1: بإذن الله يا فندم قبل العيد الكبير يا فندم كل منشآتنا إن شاء الله ها تكون نهوها 100% يا فندم وجاهزة للتشغيل إن شاء الله.

السيسي: إن شاء الله. متشكرين.

مشرف 1: أي أوامر يا فندم.

السيسي: شكرا. متشكرين.

...

2:20

مشرف 1: سيادتك بتشرفنا في القطاع التالت، اللي بيشمل كليات الدفاع الجوي. سيادتك موجود في النقطة أمام قبة التنشين. نسبة التنفيذ 85%. جاري أعمال رفع كفاءة التشطيبات الخارجية، واستكمال أعمال نهو التشطيبات الداخلية يا فندم.

السيسي: لأ قول لي التوقيت النهائي يا محمد اللي إنتو ها تخلصوا فيه.

مشرف 1: 20/6 بإذن الله يا فندم ها نكون مخلصين.

السيسي: كله.

مشرف 1: إن شاء الله يا فندم. إن شاء الله يا فندم.

السيسي: مش كدا؟

مشرف 1: إن شاء الله يا فندم.

السيسي: متشكرين.

...

السيسي: السلام عليكم. كل سنة وإنتو طيبين.

مشرف 2: المستشفى يا فندم سعة 120 سرير تتكون من 3 أدوار دور أرضي ودول أول ودور تاني. المستشفى يا فندم سعة 120 سرير، مخطط النهو يا فندم إن شاء الله في 15/7/2023

السيسي: 15/7

مشرف 2: 2023

السيسي: مش قبل كدا.

مشرف 2: إن شاء الله يا فندم إحنا ضاغطين إنها تخلص قبل كدا.

السيسي: متشكرين. متشكرين.

مشرف 2: العفو

...

3:35

السيسي: اسمك إيه؟

عامل 1: حمادة صديق من سوهاج من مركز البيلن

السيسي: أحسن ناس الصعايدة.

عامل 1: إنت اللي أحسن يا ريس.

السيسي: لا والله صحيح.

عامل 1: الله يكرمك.

السيسي: إيه عايز إيه يا حمادة؟ قول ما تتكسفش.

عامل 1: أتكلم بيني وبينك..

السيسي: يا ولا ما تتكلم في إيه؟

عامل 1: يعني في حاجات ناقصاني كتير يا ريس..

السيسي: عينينا الإتنين.

عامل 1: ربنا يبارك فيك. فنفسي أقعد معاك أنا قعدة..

السيسي: اللي إنت عايزه نعمله لك..

عامل 1: نفسي أقعد معاك.

السيسي: يا ولا يا حمادة..

عامل 1: أنا بحبك والله أنا إديتك في الانتخابات الأولى والانتخابات التانية..

السيسي: (يضحك الرئيس) ده ما لوش علاقة بإن أنا أعمل لك اللي إنت عايزه يا حمادة. يعني تنتخب ولا ما تنتخبش.. إسمع بس.. إنك تنتخب ولا ما تنتخبش مش دي القضية. القضية إنك إنسان ومصري، ولو في حاجة أقدر أعملها لك ها أعملها لك، بس.

عامل 2: السلام عليكم ورحمة الله وبركاته.

عامل 1: ده أخويا محمد.

السيسي: أهلا وسهلا. أهلا وسهلا إزيكو.

عامل 2: إزيك يا سعادة الباشا، عامل إيه يا باشا؟

السيسي: كل سنة وإنتو طيبين. ما تقلقش يا ولا يا حمادة. ها تشوف دلوقتي. سلامو عليكو.

عامل 1: عليكم السلام يا ريس.

عامل 2: ربنا يبارك فيك يا ريس.

السيسي: متشكرين.

 

...

ألقيت الكلمة في العاصمة الإدارية الجديدة، بمحافظة القاهرة، حيث قام الرئيس بجولة تفقدية في الأكاديمية العسكرية المصرية العليا، وتابع الموقف التنفيذي لعدد من المنشآت بمقر القيادة الإستراتيجية، ومواعيد الإنتهاء منها، كما تحدث مع عدد من المهندسين المشرفين على الأعمال الإنشائية، وحاور عددًا من العمال.

...