نص كلمة السيسي خلال اجتماعه مع قادة القوات المسلحة بمقر القيادة الاستراتيجية 21/11/2024
1:06
السيسي: الحقيقة أنا طبعًا متابع الأنشطة كلها، وأنا مطمئن يعني، ولكن، عايز أوضح لكو نقطة مهمة جدًا.. القوات المسلحة كانت دايما هي ركيزة الاستقرار في مصر. وزي ما إنتو شايفين، المنطقة مضطربة جدًا، وبتمر بأحداث صعبة، ومصر هي عنصر الاستقرار المهم على مدى السنين اللي فاتت، وإن شاء الله السنين القادمة، من خلال سياسة متوازنة تتسم بالاعتدال والصبر في مواجهة الأحداث اللي بتتم والتطورات اللي بتتم، وزي ما إنتو شايفين على الاتجاهات الاستراتيجية التلاتة، الغربية والجنوبية، وحتى الشرقية أو الشمال الشرقي زي ما إحنا دايما بنتكلم عليه.
لكن آآ إدارتنا ال.. المتزنة ديت، كانت ساهمت مساهمة كبيرة جدًا في الحفاظ على الاستقرار، وده مش كلامي بالمناسبة، اللي أنا بقوله لكو ده ده مش كلام معنوي ليكو يعني، لأ، ده كلام الدنيا كلها دلوقتي، الدنيا كلها النهار ده عارفة إن مصر بتوازنها وباستقرارها، المنطقة رغم الظروف الصعبة اللي بتمر بيها، آآ مصر عامل ثقل كبير جدًا في هذا الاستقرار.
فـ.. إحنا كل مؤتمر كنا بنجيب نسبة من القادة ال.. في الرتب المتوسطة يعني، اللي هم بيبقوا الأمل والمستقبل القادم إن شاء الله لبلدنا، وإحنا موجودين معانا النهار ده أتصور نسبة أنا قلت تبقى كبيرة شوية عشان نتكلم وندردش مع بعضنا، وكمان أسمع منهم آآ يعني، وجهة نظرهم ورؤيتهم في الأحداث اللي بتمر، لأن إحنا كعسكريين، الناس متصورة إن إحنا فقط مهتمين بـ.. آآ بالتدريب و، وقدراتنا العسكرية، وده صحيح، ده المهمة الأساسية للقوات المسلحة، لكن ده مش معناه إن إحنا يعني في معزل عن ما يدور حولنا، سواء كان في الداخل أو في الخارج، وكان دايما القوات المسلحة بهذا ال، التوازن الكبير اللي بتحققه في إدارتها لأمورها وفهمها للواقع السياسي والأمني، سواء كان داخل الدولة أو خارجها، كانت بتبقى هي عامل الاستقرار وبقولها مرة تاني عامل الاستقرار المهم.
من فضلكم ال.. يعني السادة قادة الفرق اللي موجودين معانا وقادة الألوية، يعني بلغوا تحياتي وسلامي وطبعا أكيد من خلال الكلمة دي تصل إلى أبناءنا، وبقول لهم: خلي بالكم، دايما مستمرين في العمل، والتدريب، والاستعداد، للحفاظ على كفائتكم، وجاهزيتكم، لأن آآ أمن مصر، وسلامتها، أمانة في رقبتنا كلنا، وطبعًا في رقبتكم إنتم، كخط آآ خط المواجهة الأول يعني. ربنا يا رب يحفظنا ويحفظكم من كل شر وسوء.
4:44
أحد القادة 1: أنا بطمن سيادتك يا فندم إن إن شاء الله القوات البحرية إن شاء الله تبقى درع لمصر، أحد الدروع لمصر إن شاء الله يا فندم.
السيسي: إن شاء الله، اللي أنا عايز أقوله ليك بس في مقابل يعني التطمنة دي، إوعى إوعى تغر حاجتك، تخليك تاخد قرار تضيع بيه اللي إنت عملته كله واللي إنت جبته، اللي إنت جبته ده جبناه في عشر سنين.
أحد القادة 1: تمام.
السيسي: جبناه في كام؟
أحد القادة 1: عشر سنين.
السيسي: هممم، ودور على اللي مش موجود.
أحد القادة 2: أنا حضرتك يا فندم بطمن سيادتك، جاهزين في أي وقت يا فندم لتنفيذ أي مهمة. دايما يا فندم رجالة اللوا آآ بيتدربوا أحسن تدريبات، سواء تدريبات داخلية، أو تدريبات مع الألوية ال.. الموجودة في القوات الجوية، تدريبات مشتركة، عشان يوصلوا لأحسن خارج موجود، وأحسن خارج ممكن وفي نفس الوقت زي محاكاة للي ممكن يشوفوه في العمليات، فده يا فندم رجالة اللوا 203، جاهزين لتنفيذ أي مهمة سيادتك تطلبها.
السيسي: ربنا يوفقكو، وأنا بما إنك إنت موجود، وأنا ها أقول لك على حاجة، وعايز بما إنك إنت قائد لوا دلوقتي، فإنت محتك احتكاك حقيقي.. إوعى يابني تستخف، أو تسخر من غيرك، إوعى إيه؟ تسخفـ.. تستخف أو تسخر إيه، من غيرك، وتعتبر نفسك إنك إنت في مستوى، حتى لو كان المعرفة اللي عندك القدرة اللي عندك فعلًا تخليك تعمل كدا.
أحد القادة 3: إحنا يا فندم بنشكر سيادتك على التواصل، طبعًا أنا استفدت من توجيهات سيادتك، وأوعد سيادتك إن شاء الله إن إحنا ها ننقل توجيهات سيادتك دي لقادة الكتايب، ورئيس أركان اللوا، وحتى مستوى الجندي.
السيسي: تنصحني بإيه؟
المتحدث العسكري: آآ.. بصراحة يا فندم؟
السيسي: آه.
المتحدث العسكري: يعني، هَوِّن على سيادتك يا فندم.
السيسي: هَوِّن؟
المتحدث العسكري: آه.
السيسي: طيب. شوف اسمع، هم يومين على وش الدنيا، وبعد كدا هانموت، وتحت بقى.. يا رب يقبلني. عارف يا غريب لما تعرف وتفهم الحكاية اللي هي إحنا موجودين على وش الأرض عليها، مش هاتهوّن عليك أبدًا.
لما سيدنا النبي عليه الصلاة والسلام، وإحنا طبعًا بنقول نموذج يعني نتمنى إن إحنا نبقى حاجة من ريحته يعني.
المتحدث العسكري: إن شاء الله.
السيسي: لما جات ستنا فاطمة وهو بيتوفى، قالت له: وا كرباه! قال لها: لا كرب بعد اليوم على أبيكِ. وهو إيه؟ وهو بينتقل إلى الرفيق الأعلى، فبتقول: وا كرباه، فقال لها: لا كرب بعد اليوم على أبيكِ.
فـ.. أنا بشكرك طبعا على ال.. كتر خيرك. كل سنة وإنتو طيبين، متشكرين.
ألقيت الكلمة في مقر القيادة الاستراتيجية بالعاصمة الإدارية الجديدة، حيث اجتمع الرئيس عبد الفتاح السيسي مع عدد من قادة القوات المسلحة، وذلك بحضور الفريق أول عبد المجيد صقر، القائد العام للقوات المسلحة، وزير الدفاع والإنتاج الحربي، والفريق أحمد خليفة رئيس أركان حرب القوات المسلحة، وقادة الأفرع الرئيسية.