نص كلمة السيسي خلال متابعته سير العمل في مشروعات المحاور والطرق بمحافظة الجيزة 24/2/2023
السيسي: بالحل اللي إحنا عملناه ده، إحنا أوجدنا شبكة طرق جديدة تحل المسألة دي خالص منطقة الجيزة بالكامل، أو لمحافظة الجيزة بالكامل.
خلي بالك، هنا كان في كتلة سكانية ضخمة جدا، في المنيل والزمالك والمهندسين، واخد بالك، وتقولي كمان مدينة الشيخ زايد ومدينة 6 أكتوبر وامتدادها حتى والقرية الذكية، ثم بقية المحافظات.
ونقول إن الكتلة ديت كانت حجم الحركة اللي موجود فيها كان بيعاني خلال الفترة اللي فاتت والسنين اللي فاتت من قلة المحاور اللي بتتحرك عليها، لما نقول كدا، نقول إيه؟ نقول طب الـ200 كيلو دول، ها يحلوا ويقللوا كثافة الحركة على بقية المحاور اللي كانت قبل كدا بقد إيه؟ وحجم التلوث الل كان موجود نتيجة الزحمة دي قد إيه؟ وحجم استهلاك الوقت والوقود قد إيه؟
طيب، ده كان، أنا بردو يهمني إن إحنا وإحنا بنتكلم دايما نقول للناس إحنا مش بنتكلم على منطقة المنشية ولا صفط اللبن، لأ ده إحنا بنتكلم ده هي هي واقعة المحاور دي في المنطقة ديت، لكن هي بتربط كتل سكانية ضخمة جدًا وبتحل المسائل كمان للكتل دي.
الـ200 كيلو دول حكاية تانية خالص، وتكلفتهم تكلفة كبيرة جدًا جدًا جدًا ليه، لأن إحنا وإحنا بنعمل ده إحنا مش بنعمل في أرض فاضية، إحنا يا إما بنعمل في أرض كان فيها مشغولة يا بزراعة يا بمباني، وبنضطر إن إحنا نعوض الزراعة وبنعوض المباني اللي موجودة.
مهندس 1: وعايز أضيف لسيادتك بس حاجة يا فندم إن بالاستعانة بالمكتب الاستشاري للهيئة الهندسية وعدد مكاتب المصرية التخصصية الانشائية، الاستشارية آسف، لإعادة استخدام المواد المحجرية يا فندم من قطاعات الحفر.
السيسي: آه كنا إحنا قلنا الحكاية دي، آه طبعًا.
مهندس 1: آه باستخدام المعدات الحديثة اللي سيادتك أمرت بتواجدها يا فندم، وده طبعا يا فندم بيقلل التكلفة المالية اللي.
السيسي: وبيقلل التلوث.
مهندس 1: وبيقلل التلوث يا فندم.
مهندس 2: بالنسبة سيادتك لطريق الكابلات اللي سيادتك يا فندم مشرفنا عليه جاري يا فندم إنشاء كوبري علوي بطول 400 متر وعرض 4 حارة مرورية لكل اتجاه لتحرير الحركة المرورية عند نقطة تقاطعه يا فندم مع محور 26 يوليو، والكوبري ده يا فندم تم تنفيذه قطاعين منفصلين بالتنسيق مع وزارة النقل المونوريل عشان ما يتعارضش مع أعمال المونوريل اللي بتنفذها وزارة النقل يا فندم.
بالنسبة سيادتك اللي بنقوم بتنفيذها يا فندم، شارك في الأعمال 70 شركة وطنية، بأكتر من 70 ألف عامل ومهندس، و35 مكتب استشاري هندسي مصري يا فندم.
السيسي: طيب.
مهندس 2: أي أوامر يا فندم.
السيسي: إحنا كلامنا كله النهار ده إن إحنا بنتكلم على إن كل اللي إحنا بنتكلم عليه ده بالكتير على آخر السنة، مش كدا؟
مهندس 2: بإذن الله يا فندم. إن شاء الله.
السيسي: متشكرين.
ألقيت الكلمة في القاهرة، حيث تفقد الرئيس خطة تطوير الطرق ومحاور القاهرة الكبرى والطرق المؤدية لمناطق محافظة الجيزة.