نص كلمة السيسي خلال احتفالية مصر وطن السلام 25/10/2025
بسم الله الرحمن الرحيم،
خلوني أبدأ ال.. كلامي بال.. بالحمد، الحمد لله.. الحمد لله.. (تصفيق) أيوة.. الشكر..
أحد الحضور: بنحبك يا ريس
السيسي: متشكر متشكر
أحد الحضور: ربنا بيحبك ومعاك
يا رب يكون كده صحيح.. متشكر.. (تستمر الهتافات) لا بلاش.. (يضحك الرئيس) طب استنوا طيب عايز أقول لكو كلمة.. عايز أقول لكو كلمة.. (تستمر الهتافات) طيب إدوني فرصة بس.. إدوني فرصة لو سمحتوا.. طيب.. متشكر.. طب آآ.. طب هقولكو حاجة.. عايز أوضح لكو نقطة مهمة.. نقطة مهمة..
أولًا خليني أرحب بيكو كلكم، أهلًا وسهلًا (تصفيق) أهلًا وسهلًا، أهلًا بيكم، وخليني من خلالكم كمان أوجه كل التحية والتقدير للمصريين وأوجه التحية والتقدير للضيوف اللي موجودين معانا هنا في الاحتفالية دي، وأوجه الشكر لكل من شارك وخلى اليوم ده، وخلى اللحظات دي لحظات جميلة، السادة الفنانين والفنانات اللي موجودين على المسرح، متشكر جدًا (تصفيق) متشكر جدًا.
(كلنا معاك يا ريس) متشكرين.. متشكرين.. طيب أكمل كلامي.. لو عايزين نشكر.. نشكر صاحب الفضل.. وصاحب الفضل مش أنا.. مش من دلوقتي بس.. من كتير فات.. صاحب الفضل ربنا (تصفيق) و... وأنا عايز أقولكو على حاجة.
من سنتين، من سنتين.. لما حصل اللي حصل، بقيت أقول، الأيام اللي جاية هتبقى أيام صعبة يعني، ورد الفعل هيبقى في القطاع في غزة مع أشقاءنا الفلسطينيين هيبقى ضخم وهايل.
لكن بصراحة كل الدعوات اللي كانت بتطلب إن إحنا أولا نقبل إنهم يمشوا من القطاع، صعب قوي عليك إنك إنت تلاقي نفسك أحيانًا لوحدك، وبتفكر لوحدك، وحتى الناس مختلفة، يتهجروا ويمشوا والا إيه ولا ما يتهجروش.
أنا بقولكو الكلام ده بعد ما عدى سنتين، عشان نبقى دايمًا عارفين إن.. القرار مسؤولية.. القرار مسؤولية (تصفيق) وكل ما.. وكل ما المسؤولية تكون كبيرة، كل ما القرار يبقى خطير، لأنه تأثيره هيبقى كبير قوي.
مش عايز أطول معاكو في النقطة دي، لكن عايز أقول.. إنت، يعني كنا متأكدين إن إحنا ربنا سبحانه وتعالى في يوم من الأيام هتنتهي، والمشكلة يبقى لها مخرج يعني ولا إيه؟ اللي كان بيطمني حاجة واحدة، يا ترى إحنا اللي بنعمله ده.. اللي بنعمله ده في مصلحة السلام، في مصلحة الناس، في مصلحة الفلسطينيين؟ والا ضدهم؟
فكان الأمر واضح، إن الأمر ده حتى لو كنا إحنا مش في مصر بس في العالم كله شايفين المعاناة اللي موجودة واللي كلنا كنا بنسعى وبنجتهد إن نقلل منها ونخفف عنها، لكن كل أمر ليه حساباته، كل أمر ليه حساباته، وال.. وزي ما قلت كده.. الحسابات بتبقى دقيقة، لكن قبل كل ده، إذا كان ربنا هيساعد ويسند، الأمور هتمشي وتعدي.
وزي ما إنتو شوفتو، اللي حصل في شرم الشيخ ده فضل كبير من ربنا.. من ربنا (تصفيق) وأنا لما بقولكو كده عشان توجهوا الشكر لصاحب الشكر، أيوة، أيوة، ولينا الشرف.. لينا الشرف.. ولينا الفخر إن ربنا هو اللي يساعدنا (تصفيق) عارف لما ربنا يساعدك يعني إيه؟ يعني قضيتك، قضيتك عادلة.. لما ربنا يساعدك معناه إن قضيتك عادلة، مافيش فيها ظلم، مافيش فيها افترا، مافيش فيها تعدي على حقوق الآخرين.
فـ.. مش عايز أطول عليكو عشان... (هتافات من الحضور) قبل ما أنسى.. قبل ما أنسى. أنا شوفت ال.. كلام جميل اتقال في الفعاليات كلها وال.. إحنا لازم الجامعات والمدارس، أنا كنت قلت الكلام ده قبل كده، لو سمحتم الدولة بتنسيق مع يعني وزارة التربية والتعليم مع وزارة الشباب مع الوزارات المختلفة، ننسق وننظم زيارات لشبابنا وشاباتنا، وأولادنا وبناتنا الصغيرين (تصفيق) لسينا.
وإحنا ربطنا سينا للي يعني للي ممكن يكون ماياخدش باله شوية، ده فيه 6 أنفاق موجودين تحت القنال عشان تخليكو تبقوا سينا ومصر أو سينا والدلتا حتة واحدة.. حتة واحدة (تصفيق) لازم نرحب بـ.. بريتاج وكل الي زي ريتاج.. نرحب بريتاج وكل اللي زي ريتاج.
مرة تانية، يوم.. أكتوبر شهر جميل، وشهر النصر، وأنا عايز أقول لكم إن النصر ماجاش بس بالجيش، والنصر مابيجيش بس بالقوة، قوة الجيش، النصر بييجي أولا بقوة الشعب، الشعب اللي بيرفض الهزيمة (تصفيق) الشعب اللي بيرفض الهزيمة.. الشعب اللي بيرفض الهزيمة.. ربنا سبحانه وتعالى بيعينه على النصر.
فـ.. (هتافات) كل سـ.. (هتافات) (ضحك الرئيس) كل سنة وإنتو طيبين والحمد لله الحمد لله الحمد لله ودايمًا يا رب.. دايمًا يا رب.. تحيا مصر تحيا مصر تحيا مصر (تصفيق) والسلام عليكم ورحمة الله وبركاته.
ألقيت الكلمة في القاهرة، بمدينة الفنون والثقافة بالعاصمة الإدارية الجديدة، حيث شهد الرئيس عبد الفتاح السيسي الاحتفالية الوطنية الكبرى التي أقيمت تحت عنوان "وطن السلام"، وذلك في إطار الذكرى الثانية والخمسين لانتصارات السادس من أكتوبر.