نص كلمة السيسي خلال حفل إفطار الأكاديمية العسكرية المصرية 5/3/2026

بسم الله الرحمن الرحيم،

الحمد لله رب العالمين.

اسمحوا لي إن أنا في البداية أوجه كل التحية و.. والتقدير والاحترام.. والاعتزاز.. بيكم جميعًا. كل الدارسين والدارسات، كل الأسر، أسرهم اللي موجودة معانا، أهلا وسهلا بيكم. وكل سنة وإنتو طيبين، و.. سعيد إن أنا ألقي بيكم في المناسبة الجميلة دي هنا في الأكاديمية مع أبناءنا وبناتنا آآ الطلبة اللي موجودين.

خليني أبدأ كلامي بحاجة مهمة قوي إن أنا عايز أقولها لينا كلنا هنا.. كان الموضوع قبل كدا عملية الاهتمام بالإنسان، موضوع كان شاغلنا كلنا، وكان كتير مننا يقول آآ إنتو لازم تهتموا بالإنسان في مصر، سواء كان في تعليمه أو في صحته، وده كلام مهم وكلام صحيح، و.. ومشروع كمان.

فـ.. كنا محتاجين إن إحنا نعمل الاهتمام ده نحوله لإجراء آآ عملي حقيقي. فـ.. عملنا جهد كبير جدًا في التعليم، ومستمرين فيه، وعملنا جهد كبير جدًا في الجامعات، ومستمرين فيها لما أضافنا الجامعات الأهلية والجامعات الخاصة ذات مستوى معين، بس كان مهم قوي إن إحنا نحاول نعمل تجربة أخرى موازية لده من خلال الأكاديمية هنا.

الأصل في الموضوع إن الأكاديمية دي أكاديمية عسكرية، كل الدارسين اللي فيها عسكريين يعني، الطلبة من ال.. في الغالب يعني.. من الشباب يعني.. فـ.. قلنا طيب آآ.. هاتوا المتخصصين، وإحنا عملنا كدا مع الطلبة بالمناسبة، يعني من 10 سنين، إحنا جبنا ال.. ال.. المتخصصين من آآ علماء الاجتماع، وآآ النفس، عشان يقولوا لنا خريطة طريق توصَّف الواقع، ثم توصَّف أنسب أسلوب لإعداد إنسان.. إنسان. وكان الإنسان ده بينطبق على ال.. الكلية أو.. في الوقت ده كانت الكلية الحربية.

أنا بحكي الحكاية دي لأن أنا سعيد جدًا النهار ده مش بس إن أنا بشوف الأسر اللي موجودة، لأ، من اللي أنا بسمعه، فيه أهالي طلبت مننا من 3 سنين إن إحنا يبقى فيه عندنا فرصة في كلية الطب العسكري إن إحنا ندخل أبناءهم وبناتهم، بس ماكناش مرتبين نفسينا كويس لده.. فرتبناه، فقلنا ناخد دفعة السنة دي، موجودة معانا النهار ده. فترة الإعداد والتحول إن شئتم تسموها كدا، بتاخد 3 شهور، إحنا بنعملها 3 شهور، طيب.. فـ.. الفريق أشرف كنا بنتكلم، فبيقول لي طيب الطلبة والطالبات المدنيين، هنعمل معاهم إيه؟ هنخليهم ينزلوا أجازاتهم هدية؟ كفية إن هم هيقعدوا الأسبوع. فقلت له أنا بيتهيألي إن هم مش هيبقوا.. مش هيبقوا سعداء بالطريقة دي، هم عايزين يخوصوا التجربة كاملة. وأنا بكلمكم النهار ده وهم موجودين معانا الشباب دول والشابات دول، بقى لهم دلوقتي يعني خلاص هم هينزلوا على ال .. يعني هيبقوا كملوا ال 89 يوم على 27 رمضان، يعني قعدوا 3 شهور معانا، ولاد أو شباب وشابات موجودين، مدنيين، هم جايين آآ بيتعلموا وكدا.

طيب.. الفكرة.. الفكرة هي بناء إنسان تم اختياره وانتقاؤه بتجرد وبشفافية وبحياد، الفكرة كدا. وأي حد عايز يعمل شخصية أو يبني بناء حقيقي للإنسان، لا بد إن هو وهو بيعمل له برنامج، يكون البرنامج ده على أساس أو أسس سليمة. لو عايز تعمل ده في كل جامعاتنا، ممكن، بس هيحتاج منك جهد ومثابرة، وهيحتاج منك إنك إنت، كلنا، نتكاتف في ده.

مش عارف لما، لو اتكلمت بتوسع شوية يمكن ما نركزش مع بعضنا، لكن أنا هحاول يكون كلامي واضح في النقطة دي، في فكرة بناء إنسان، إنسان متوازن، إنسان فاهم، إنسان متعلم، إنسان اختبر واختباراته طلعت نتيجته الحقيقية بلا مجاملة وبلا حتى ظلم. يعني مستواه بدقة بدون لا بيتجامل في هذا المستوى، ولا بيتظلم في مستواه. ثم رعاية كاملة باحترام شديد بينا وبين بعضنا.

احترام شديد بينا وبين بعضنا. أتصور إن التواجد هنا المدة دي كلها ما أفتكرش إن فيه دارس أو دارسة في الأكاديمية سمعت لفظ غير لائق.. أبدًا.. غير مقبول ولا غير مسموح بيه هنا، هنا احترام لبعضنا البعض عشان يبقى النسيج بتاع الناس اللي موجودة هنا نسيج قوي، أيًا ما كان التخصص، يعني هنا شباب من الخارجية، شباب من الرقابة الإدارية، شباب من المخابرات العامة، شباب من وزارة النقل، شباب من وزارة التربية والتعليم، شباب من ال.. المالية، وحتى بالمناسبة يعني، جه وزير المالية زال هنا وقال طب إيه، قعدوهم.. كان هو طلب إن هم يقعدوا شهر، وبعدين لما جه قال طب خلوهم 3 أشهر، خلوهم إيه يا دكتور؟ قلت له لأ خليهم 6 أشهر بقى.. يعني تبقى صح يعني. الفكرة إن إحنا بنحاول.. وطبعا آآ القضاء.

هنا.. هنا هو محاولة الاختيار، هذا الاختيار مافيش فيه أي شكل من أشكال المحاباة أو التمييز إلا بالمستوى الحقيقي. ولو إحنا قدرنا –أنا كلامي ده لينا كلنا، لمؤسسات الدولة- لو قدرنا نعمل كدا في كتير من منشآتنا التعليمية، صدقوني إحنا هنحقق نتايج في فترة زمنية أكتر كتير مما يعتقد اللي هو المعدلات الطبيعية اللي المفروض فيها يحصل التحول. التحول عشان تعمل تغيير في ال.. في الشخصية مع العوامل الكتير اللي موجودة في.. في المجتمع، والإعلام ومواقع التواصل والتقدم اللي حصل في الحكاية دي، ليه تأثير كبير.

بالمناسبة هنا هتجدوا مسجد وهتجدوا كنيسة، لا بنقول لحد خش، ادخل، ولا بنقول لحد ما تدخلش.. اللي عايز يتفضل، واللي مش عايز.. ده بناء، إحنا بنوري الناس تجربة، أنا نسيت الوعاظ عشان معانا ال.. الأوقاف.. طب، طب إنت جايب الناس بتوع الأوقاف ليه؟ يعني، فيه إيه إنت إيه اللي بتقدمه هنا؟

البرنامج المتخصص أنا ماليش دخل بيه، البرنامج المتخصص أو التخصصي يعني بتاع الأوقاف، بتاع المالية، بتاع النقل، بتاع التعليم، بتاع الزراعة، ده موضوع خاص بالوزارة المعنية، هي اللي بتحط البرنامج ده، أنا بدي بيئة، بحاول إن تكون بيئة صالحة للجميع، بحيث إن أنا لما كل من يتخرج من هنا ينضم على مؤسسات الدولة يبقى شوفنا بعضنا واتعاملنا مع بعض، أبقى أنا وأنا آآ.. واعظ.. عارف يعني إيه طبيب يعمل إيه، شوفته، عشت معاه واتعاملت معاه.. شوفت ظابط الجيش، شوفت بتاع ال.. النقل، فبقينا نسيج أكثر تماسكا وأكثر تفهما لبعضنا البعض.

أنا حبيت بس أقول لكم الحكاية دي عشان كتير من الناس كانوا بيقولوا يعني ليه.. ليه إنت يعني آآ جـ.. يعني بتعملوا الحكاية دي ليه؟ لأن أنا شوفت في 2011 عندما تتشرذم أمة متماسكة، الأمة دي قد لا تعود مرة تانية بإيدين ناسها، ده كلام آآ يعني كل الكلام ده آآ عبارة عن آآ دروس مستفادة من واقع شوفناه؟ أيوة.. هو كدا.. بنقول له خلي بالك، إوعى تهد جيشك، عيش معاه وشوفه، خلي بالك، احترم الدكتور في المستشفى، إنت عشت معاه وشوفته، خلي بالك، إنت شوفت ال.. زميلك اللي في المدرسة، احترمه وتعامل معاه بشكل كويس.

العدد مش كبير قوي.. العدد مش كبير قوي في إنك إنت عايز تعمل... لكن إن شئت إنك إنت تسمي إن كل سنة بيتخرج مثلا 10 ، 15 ألف كل 6 شهور نسبة كبيرة منهم، يبقى آآ.. وبنتمنى إن يكون اللي إحنا عملناه ده يصل إلى الأسر، أسر الدارسين.

اللي إنتو شوفتوه ده هو ده الأكل اللي كلنا بناكله، طب ليه؟ عشان إحنا أمة متوازنة، فإحنا بنحاول نعمل مثال تطبيقي على اللي إحنا بنتمناه في بناء الإنسان في مصر، وأرجو إن إحنا من أبناءنا وبناتنا الدارسين اللي إحنا قلناه هنا وعلمناه هنا، لأن إحنا مش بنعمل آآ تعليمات آآ جامدة، ده فيه نقاش كتير، وفيه آآ يعني كل يوم في الطوابير بتاعة على مدار اليوم ده فيه كلام كتير فين الدارسين وبعضهم البعض لنقل الفهم، لنقل المعاني اللي إحنا بنتكلم فيها، إن بلدنا عايزة ناس تحفظها وتخلي بالها منها وتبنيها وتعمرها ليها وللأجيال اللي بعد كدا.

فأنا بس حبيت أقول النقطة دي، وهنا أقول الأمر مش سهل، لما نيجي نتكلم على 30 مليون في التعليم برة، 25 مليون في التعليم الأساسي تقريبًا، و 5 أو أقل شوية في التعليم الجامعي، عايز تعمل معاهم ده؟ آه.. طب ده ممكن يتعمل؟ والله صدقوني، تصوروا إن المدرسة فيها آآ ابتدائي، فيها 600 طالب وطالبة مثلا، تخيلوا إن 10% من ال 600 يبقى 60.. 10% من ال 600 = 60، يكونوا مستعدين يبقوا مجلس أمنا مع المدرسة، ييجوا ويبصوا معانا عليها، ويتأكدوا إن ولادهم بيتعلموا كويس، يعني أنا قلت لو عندي 400 ولا 600 طالب، أنا بقول 10% بس، ده 60 كتير كمان، يعني ممكن يبقى.. مش عشرة.. 5%، يبقى 30%.. يتناوبوا على المدرسة، يبقوا جنب ال.. قيادة المدرسة، وجنب المدرسين، وجنب أبناءهم وبناتهم بفهم، ولو إنتم عايزين تعملوا كدا، أنا عندي برامج للي مستعد يقوم بالدور ده أفهمه هيعمل إيه في المدرسة.

إوعوا تفتكروا هنقدر نحل ونعمل تعليم كويس بإن إحنا نعمل مدرسة واتنين وتلاتة، ونطلع مدرسين وخلاص، إذا ماكانش المجتمع كله يحط إيده في إيدين بعض، وإحنا بنضيع أوقات كثيرة جدًا جدًا في أمور مختلفة.. ده أمر مهم قوي.. أنا بتكلم على المدارس. لو ما كانش في التعليم العالي يبقى فيه جدارة في التعليم وتبقوا متطمنين إن مستوى التعليم اللي بياخدوه الأبناء والبنات ومستوى الاختبارات اللي بتتعمل متجردة، إحنا مش هنحقق النتيجة اللي عايزينها، إحنا هنخرج ناس، لكن الناس دي مش هتبقى متعلمة كفاية.

هقول نموذج وأقفل بيه الحكاية دي..  هنا عنـ.. إحنا دايمًا نتكلم على إن مش عاجبنا التمريض في مستشفياتنا وكلام من هذا القبيل، فـ.. طيب.. فإحنا ممكن نقعد نحكي حكايات كدا، ومانعملش نتيجة.. نحكي كتير ونتكلم وندي توجيهات وتعليمات، ورئيس الوزرا يدي، ووزي التعليم ووزير الصحة يدي تعليمات وتوجيهات، ومدير المستشفى يدي تعليمات وتوجيهات.. لكن النتيجة مش زي ما إنتو عايزين.. إنت عايز الحد الأقصى يتعمل من كل حاجة، حتى لو كان الحجم اللي عندنا والمطلوب بتاعنا أقل من قدراتنا، بس هاتوا آخره، هاتوا آخره.

فـ.. قلت له شوف لي اللي هيخش الدفعة الجديدة من التمريض هاتهم لي واعملهم إنت اختبارات، ومسح كامل.. ماشي.. ده كان، خلاص، كان خلاص هيخشوا.. فال 4000 راحوا مصفصفين على في الآخر على 400.. 400.. ده بعد ما هم، دول اللي كانوا هيخشوا.

إنتو عايزين عدد ولا عايزين جودة؟ كم، ولا نوع؟ تقول إنت جاي تفطر معانا والكلام اللي إنت بتقوله ده لازمته إيه؟ لازمته إن دي بلدنا، وأديكو شايفين حوالينا الدنيا عاملة إزاي، إن ماكناش نجهز أجيال نحملها أمانة الدولة دي، وتبقى قادرة على إن هي يعني بوعي وفهم وعلم ورؤية تدير وتـ.. وتحافظ، يبقى إحنا آآ ظلمنا نفسنا، وظلمنا بلدنا.

أنا بقول.. اتكلمت على المدرسة، وقلت لو اتعمل مجلس أمنا، والكلام ده أنا قلته من 10 سنين، لو حد يفتكر، أنا قلت الكلام ده، بس ماكانش بال.. في مـ.. يعني ماكانش في مناسبة زي دي.. قلت لو إحنا النهار ده كل مدرسة في كل حي، شباب الحي وشابات الحي، يهتموا ويبقى بدل ما هقعد النهار ده لو عندي ساعة فراغ أخش هنا أخش أسند.. أسند.. وأساعد.. أساعد.. وأبني بحب وباحترام وبفهم، صدقوني.. صدقوني.. ده لو حصل، الدنيا هتبقى بتتغير في مدى زمني غير متوقع.

التجربة اللي أنا هنا.. ممكن تُستنسَخ.. ممكن تستنسخ، ممكن تتعمل في حتت كتير، مش نفس الطريقة يعني.. لكن المفردات اللي استخدمت.. عملية الانتقاء.. عملية الاختيار.. عملية التأهيل.. عملية الامتحانات والتقييم.. لو اتعملت صح، هنطلع شخصيات مختلفة خالص، تقدر تجابه التحديات المحتملة آآ لينا.

قعدت فترة كبيرة قوي أتكلم في الحاجات دي، ويعني.. فقلنا طب ما نـ.. ما نعمل إحنا تجربة ونشوف التجربة دي، طبعا كان فيه صعوبات.. فيه ناس عايزة تفهم إيه الحكاية، ليه كدا؟ طب جايب.. طب أنا جايب الوعاظ ليه؟ كل واحد حسب التعليم اللي اتعلمه، بتتشكل إلى حد كبير طريقة تفكيره، يعني إيه؟ يعني تلاقي الدكتور دايمًا بيبص من منظور العقلية الطبية. ال.. القانوني، محامي أو كدا، بيبص من منظور العقلية القانونية.. كل واحد، لأن هو ال.. الراجل بتاع الدين.. لأن هو ده ال.. البنية ال.. العلمية، مش بقول الفكرية، العلمية اللي عنده، مبنية كدا، فهو لما بيشوف، بيشوف في الإطار ده، بيشوف العقلية الدينية لما تشوف العقلية الطبية، ولما تشوف العقلية آآ الهندسية، ولما تشوف العقلية العسكرية، ولما تشوف العقلية القانونية بنبقى عاملين إزاي، عشان ننصهر كنا ونبقى معقولين وبنتكلم لغة واحدة، أو لغة متقاربة، أو لغة متفاهمة.. وبنقول له إنت بقيت مسؤول كتير قوي عن الحكاية دي كإنسان، أي بقى مسؤول من ال.. أو أي دارس أو دارسة موجودة هنا معانا.

فـ.. بنتمنى إن.. إن إحنا في .. كان زي ما قلت كدا أول ما بدأنا فكان كل الناس أقرا مقالات يقول لك إيه: عايزين التعليم التعليم التعليم.. وعايزين الصحة الصحة الصحة.. طيب ما حاضر.. إحنا بنعمل ده، بس إحنا بنتكلم في 30 مليون، عشان تعمل لهم برنامج يغطي كل المشاكل وال.. كدا.. محتاج وقت وجهد وأفكار.

 نفس الكلام، يقول لك الناس بتوع السكة الحديد بيسيبوا المزلقان والقطر مش عارف بيحصل له إيه، مش كدا يا كامل؟ طيب.. طب الحل إيه؟ إنك تقعد توجهه، ولا تحاكمه، ولا تطلع جيل جديد مختلف، مسؤول؟

 طب عشان تجيب تطلع جيل جديد، يبقى لازم يتنقى كويس، يبقى وزارة النقل تنقي، وبعد ما هي تنقي تجيبهم لنا، ننقي إحنا كمان، من غير أي شكل من أشكال المحاباة.

 المعلمين.. النهار ده لو إنتو شوفتو على مواقع التواصل هتجدوا إن فيه إعلانات لمراكز لإعداد المعلم للاختبار بتاع الأكاديمية.. هل ده حاجة مش كويسة؟ ده حاجة كويسة قوي.. يذاكروا ويجهزوا نفسهم، ويبقوا مترتبين لل.. ييجوا يقعدوا معانا 6 شهور، ولو نقدر نقعدهم سنة.. كدا.. وأنا عامل حسابي خلال سنة إن إحنا هناخد في حدود من 10 ل 15 ألف معلم في السنة نجهزه عشان نضخه في آآ في مدارسنا.

فـ..  هي دي الفكرة. طب الدارسين ال.. أو الطلبة العسكريين، بيقوموا بدورهم في هذا الأمر، بجلاء، بمنتهى القوة، بمنتهى الفهم، بمنتهى الاحترام، وأنا بشكرهم وبقول لهم: أنا أقحمتكم في حاجة يمكن تكون، يعني، لكن أنا.. لأن كان أملي فيكم إن إنتم آآ تساهموا معانا في آآ بناء إنسان ذو شأن يساهم في قيادة هذا الوطن معاكم، مع بعضكم البعض كلكم، دون تقليل من حد، أو آآ.. أو زيادة يعني.

فـ.. في معايير لكل حاجة هنا وال.. الميزة اللي في المعايير اللي هنا إنها معايير آآ.. يعني.. اتطمنوا يعني.. معايير آآ قوية، جيدة، بتُحتَرَم على كل الناس. ما فيش حد ليه تمييز وأتمنى إن إحنا نستمر في كدا يعني.

يبقى هنا إحنا بنعمل بناء وتفاهم للدولة الحديثة اللي إحنا بننشدها بهدوء من غير عنف ومن غير إيذاء ولا.. آآ كلام كتير ما.. فـ.. طب هل ممكن زي ما بقول كدا نكرر ده؟ آه طبعا.. في جامعة عين شمس ممكن تعمل ده؟ طبعا، وإحنا بنجيب ناس هنا، وبنجيبهم في كلية ال.. في أكاديمية الشرطة، يقعدوا أسبوع، وبنلاقي تجاوب عجيب، وبيعملوا نفس الحاجات اللي بتتعمل هنا، لا فيه تليفون، ونفس ال.. البرامج تقريبًا بتاع اليوم بتنطبق عليهم.

إذن شبابنا بخير قوي.. شبابنا بخير قوي، يبقى إحنا عندنا تحدي كمسؤولين في الدولة في التعليم العالي، وفي التربية والتعليم، وفي المجتمع المصري إن هو يحطوا إيديهم في إيدينا مع بعض عشان نعمل ونعمل آآ  أمر جيد جدًا لشبابنا وشاباتنا في كل حتة في مصر.

التخصصات اللي مالهاش لازمة، خدوا القرار وقولوا للناس إن إحنا آخر دفعة هتتخرج من التخصص ده السنة دي، والسنة الجاية مافيش.. لأنه مالوش شغل.. ولا إنتو لسه هنمسك في الشهادة اللي هي آآ ممم يعني.. أبقى معايا ليسانس أو بكرليوس وخلاص؟ لا لا.. إنت غالي قوي.. وإنتي غالية قوي، على إن إحنا تضيعي 4 سنين في التعليم، مايكونش ليهم أي مستقبل في العمل يعني.

فـ.. أتمنى إن إحنا يبقى فيه مبادرات، والإعلام يغطيها، ويبين للناس المدرسة الفلانية اتعملها مجلس أمنا، والمجلس أمنا ده تقضي يوم معاه، ونوري الناس إنها ممكن تعمل، الموضوع كله مش بنا مدرسة ومش موضوع كله مرتبات وبس، لا لا لا.. روح.. روح.. روح تبقى ننشرها في وسط، في وسطنا البعض ونلقي الضوء على التجربة الجيدة عشان الناس تكرر وتعمل.. يعني.

يتبقى جزء بسيط قوي، ولكن صعب، هو الأحداث اللي بتمر في منطقتنا، ودي آآ أنا قلت يعني في الإفطار بتاع القوات المسلحة إن إحنا حاولنا قوي آآ خلال الشهور اللي فاتت كلها إن الأمور ماتصلش أبدًا للي وصلت له دلوقتي.. أنا بتكلم هنا على الأزمة والحرب اللي دايرة دلوقتي آآ في منطقة.. منطقة الشرق الأوسط، وطبعا آآ في الخليج، وإيران، وكدا.

كنا حريصين جدًا جدًا لأن إحنا عارفين بتجربتنا اللي إحنا عشناها آآ في عمرنا كله إن الحروب ماورهاش غير الدمار والخراب وضياع مستقبل الشعوب، وماحدش بيطلع في الغالب كسبان من الحرب. فإحنا حاولنا، حاولنا كتير قوي إن إحنا يعني نـ.. يعني يبقى نعمل جهود وساطة زي ما قلت قبل كدا مخلصة وأمينة، ولكن مش كل اللي إحنا بنتمناه ممكن نناله يعني.

وقلت إن هيبقى فيه استمرار للحرب دي، هيبقى ليها تداعيات كبيرة قوي، وقلنا أيضًا إن خطأ الحسابات والخطأ في التقديرات، والكلام ده مش بنقوله، ده إحنا بنقوله لنفسنا، إن إحنا وإحنا بنتعامل مع كل القضايا، مهم قوي إن إحنا نبقى بنقدر الأمور بشكل جيد، حتى ل.. حتى لا نقع في أخطاء تضرنا وتضر بلادنا. لأن اللي إنتو بتشوفوه ده هو تقديرات خاطئة، تقديرات خاطئة.

لما.. يعني.. هل إحنا مثلا في مصر ما قابلناش خلال الفترة اللي إحنا كنا موجودين فيها مع بعض، وأنا كمسؤول ما قابلناش ظروف صعبة، وتحديات صعبة، وإساءات صعبة آآ ضد مصر؟ مش إساءات.. حتى لو قلنا مؤامرات.. بس خلي بالكم، ممكن تقرا في القرآن: "فصبر جميل"، فصبر إيه؟ جميل، الصبر الجميل مش بيبقى صبر على.. بيبقى على ال.. على الملمات، على المشاكل، على المصاعب، على التحديات.. فصبر جميل، سيدنا يعقوب قعد 40 سنة صبر جميل على ولاده اللي مخبيين عليه إنه، إن هم عملوا في سيدنا يوسف لي عملوه.. قعد 40 سنة يشكي لربنا بس.. إذن لو إحنا بنتعامل مع بعضنا البعض، مع دول جورنا على كدا، هتعرفوا ليه أنا كنت قبل كدا عندي صبر جميل. ويا ترى ربنا بينصر الصابرين ولا.. لما يقول: "إن الله مع الصابرين".. إن الله مع الصابرين.

فـ.. حاولنا، لكن ما آآ.. ما وفقناش، واللي بنتمناه دلوقتي إن إحنا، يعني، يعني لما طبول الحرب بتـ.. بتدق يعني بيبقى صعب جدًا إيقافها، لكن ده اللي إحنا بنتمناه إنها تقف قبل ما الأمور تستفحل أكتر من كدا وتبقى في منطقتنا ظروف أصعب، وهي الحقيقة آآ ما بتـ.. مابتخلصش، ده ظروف منطقتنا، وعشان كدا بقول للمصريين، وبقول للناس المسؤولين: الفهم مهم، والفهم مايجيش غير بالعلم، والدراسة، و.. غير كدا مش هيبقى فهم.. الفهم الحقيقي بالعلم الحقيقي وبالتقدير الحقيقي، وبالتالي كلنا كمصريين لما نبقى فاهمين كدا، وده ال.. أنا شوفته في آآ في 7 أكتوبر، بعدها يعني، لما حصلت الحرب على غزة، لو كان الكلام ده بيتعمل من 30 سنة فاتو عشان هم فاهمين وفهموا أكتر آآ يعني.. كان رد فعلهم متوازن قوي.

 طب هل الموضوع، ده أنا قلته المرة اللي فاتت وبكرره تاني، هيبقى ليه تداعيات؟ أيوة.. تداعيات ليه؟ لأن الدنيا كلها بتتغير، وفيه مؤثرات على إمدادات الطاقة، ال.. ال.. الغاز.. آآ.. ممكن آآ أسعار منتجات.. كلام من هذا القبيل.

أنا قلت ادرسوا إن إذا كان الأمر بيتطلب إحالة أي حد يتلاعب في سلع وأسعار والكلام ده، يتحال للقضاء العسكري، ويتـ.. على طول يتاخد معاه إجراء، وبالتالي إحنا مش هنسمح إن حد يتلاعب بأسعار المنتجات اللي إحنا.. آآ.. عندنا حاجتنا، وماتقلقوش من حاجة خالص، إنما الناس ماتستغلش الموقف ده ويقول لك: هنغلي. ده مش هنسمح بيه عشان لا يتم التلاعب بـ.. بحاجات الناس، بالسلع والخدمات المختلفة.

مش عايز أطيل عليكو أكتر من كدا، لكن اطمئنوا بفضل الله سبحانه وتعالى. إحنا بخير، وبنحاول في إطار الظروف الصعبة اللي بتمر دي، وأنا قلت لسه كنت بكلم يعني أحد المسؤولين كان بيكلمني من.. يعني من رؤساء الدول، بيقول لي.. قلت له إحنا فقدنا 10 مليار دولار من.. خلال السنتين اللي فاتو.. 10 مليار دولار.. يعني إحنا يا دوبك ابتدينا نـ.. يعني.. قلنا هانـ.. آآ.. هانشم يعني نفسنا.. الحمد لله.. الحمد لله.. الحمد لله.

كل سنة وإنتو طيبين.. شكرًا جزيلًا. (تصفيق)

---