نص كلمة السيسي خلال افتتاح المؤتمر الطبي الثالث لكلية الطب بالقوات المسلحة 8/11/2026
كلمة السيسي خلال افتتاح المؤتمر الطبي الثالث لكلية الطب بالقوات المسلحة، 8 نوفمبر 2026
السيسي: بسم الله الرحمن الرحيم، الحمد لله رب العالمين، اسمحوا لي في البداية إن أنا أرحب بكل الضيوف اللي موجودين وأوجه لهم كل التحية والتقدير والاحترام، والحقيقة أنا كنت حريص على إن أنا يعني أشارككم الاحتفال أو الحضور بفعاليات المؤتمر التالت، أولًا عشان نأكد إن إحنا يعني إن شاء الله ماشيين على الطريق الـ.. السليم، الطريق الصحيح، الطريق اللي إحنا بنتمناه لبلدنا، وإن جهدنا آآ.. إحنا متأكدين إنه بفضل الله سبحانه وتعالى يعني هيؤتي الثمار اللي إحنا بنتمناها.
لما.. أنا مش هتكلم كتير عن الـ.. يعني بعد كلام الدكتور مجدي يعقوب والدكتور وسيم وكل.. والدكتور خالد عن الموضوع أو يعني المسيرة الطبية في مصر والتاريخ.. تاريخ مصر في هذا الموضوع، لكن أنا هكلمكم على الـ زي ما إنتم سمعتوني مرة بتكلم هنا على موضوع فيروس سي، أنا بردو كان يعني كان عندي حلم كبير جدًا لقطاعين مهمين جدًا في أي دولة، وهم القطاعين اللي بيقودوا تقدم أي دولة في الدنيا، وهو القطاع الصحي والقطاع التعليمي. لو إحنا وااا.. عايزين يبقى مصر ليها مكانتها أو تستعيد مكانتها المرموقة في كل شيء فالقطاعين دول آآ.. ليهم أولوية عندنا.
ويمكن كتير مننا يسأل يقول طب يعني هو الموضوع ده آآ.. في أولوياته آآ.. مبانش ليه قوي في 2013 و14 وكدا، وده صحيح، وده صحيح هي كان فيه جهود بتتبذل في الدولة للقطاعين، ولكن كانت حجم آآ.. التحديات اللي موجودة في الدولة كانت كتيرة جدًا لدرجة إن كان الـ.. الجهد ده مش ملموس، مش مرصود، مش ملحوظ، كان عندنا تحديات كتير، ولكن لما بفضل الله سبحانه وتعالى ابتدينا نتجاوز هذه التحديات كان فيه فرصة إن الكلام ده يبتدي يبان أكتر، وزي ما كان الدكتور خالد اتكلم على المسيرة من 2014 لـ26 حجم الإنفاق اللي تم، وحجم المستشفيات والأسرة اللي اتحطت، وحجم حتى الخريجين من 6000 بنتكلم في 27000 ولا أكتر.
إحنا مش بنتكلم في أعداد حتى في المستشفيات مش بنتكلم في إن إحنا بنعمل آآ.. أسرة إضافية 1000 ولا 2000 ولا، لا، إحنا بنتكلم في جدارة وجودة. وده يمكن ده أحد النقاط اللي إحنا كنا يعني حريصين عليها من خلال آآ.. التوأمة مع آآ.. جامعات عريقة في العالم. إحنا لما جينا نتكلم على موضوع التعليم وعلى موضوع الصحة قلنا إحنا محتاجين يبقى فيه توأمة مع جامعات ومستشفيات عريقة جدًا تبقى موجودة معانا، نتعلم منهم ونقدر نطور من نفسنا في وقت زمني قصير.
أي طبيب أو طالب بيخش كلية الطب هتقدر تحس بيه يمكن بعد 15، 20 سنة من دخوله كلية الطب، ياخد له 7 سنين في كلية الطب ويمكن من 10 لـ12 سنة ولا أكتر عشان نحس بكفاءته وأداؤه، لأن ده موضوع حساس وخطير جدًا جدًا، والعلم تقدم جدًا فيه.
الخلاصة اللي أنا عايز أقولها لكم إن النهاردا بالحضور ده وبالتوقيع اللي إنتم شفتوه ده.. ده أحد خطوات الدولة، مش القوات المسلحة بس، في إن هي تعمل دايمًا تحسين في آآ.. مناهجها العلمية، ويبقى الجدارة اللي فيها.. أنا بتكلم على التعليم هنا.. الجدارة اللي فيها تحقق المستوى المطلوب. يبقى إحنا اهتمينا بالإنسان في مصر، اهتمامنا بيه بإن إحنا نجهزه ونعلمه كويس في كل القطاعات.
أنا يمكن كنت اتكلمت مرة قبل كدا على موضوع كلية الطب العسكري، وكان من.. من كام سنة حوالي 4 سنين كدا طلبوا مننا القطاع المدني إن هم يلتحقوا بالكلية دي، وساعتها قلت لهم أنا يعني.. أدونا فرصة إن إحنا بس يعني نجهز نفسينا لهذا الأمر، وبعد كدا سمحنالهم السنة اللي فاتت إن هم يدخلوا، وبعدين جت السنة دي أعداد كبيرة تقدمت أكتر، لما تقدم العدد اللي تقدم أكتر، في القطاع المدني أنا بتكلم، لأن القطاع العسكري إحنا كنا قادرين نلبي احتياجاته بسهولة، لكن لما لقينا فيه إقبال من الـ.. الطلبة وأولياء الأمور على إنهم يلتحقوا بكلية الطب قلنا طب ما نطور الفكرة شوية، طب ما نعمل 6 كليات في جامعة كيان اللي إحنا بنتكلم عليها، فيها طب وفيها أسنان وفيها علاج طبيعي وفيها هندسة وفيها حاسبات وفيها صيدلة، مش كدا؟ وفيها صيدلة حيوية يعني، بس إحنا قلنا وإحنا بنعمل الـ6 كليات دول إن إحنا هنحط فيهم يعني أكثر البرامج آآ.. تقدمًا اللي وصلت لها العلوم في مصر والعالم يعني، وبالتالي قلنا إن إحنا هنبقى محتاجين نعمل توأمة مع جامعات عريقة جدًا جدًا لجامعة كيان.
طب أنا إيه اللي يهمني اللي أنا عايز أقوله لكم فيما يخص الموضوع ده؟ أنا كنت لسه بسأل الفريق أشرف بقول له إحنا حجم الطلبة اللي ممكن تخش في جامعة كيان قد إيه قال لي يعني حتى 10000 طالب، ولو إنتو شفتوا إن في الأكاديمية العسكرية فيه كمان تقريبًا 10000 تقريبًا يعني.. يعني 20000. ولو تشوفوا إن الكلية الحربية القديمة، الكلية الحربية القديمة اللي قالوا إن إحنا مجرد ما هننقل هناك هنبيعها أرض، هنبيعها أرض عشان آآ.. كدا، لا لا، إحنا الحمد لله رب العالمين بنستفيد من الأدوات والموارد اللي عندنا أكثر استفادة، في الكلية الحربية بياخد 5000، يعني إحنا تقريبًا 25000.. تقريبًا 25000، طبعًا مش كلهم اللي هيخشوا في سنة واحدة اللي هم في جامعة كيان يعني، لكن ده العدد المستهدف في النهاية يعني.
طب إيه اللي أنا بطلبه أولًا من القائمين على.. على التعليم بصفة عامة والقائمين على الصحة بصفة عامة، الدكتور خالد قال إحنا بنصرف 500 وشوية مليار جنيه في 27 أو 26-27، وأنا بقول لكم أنا دايمًا ببص على النص الفاضي مش النص المليان، طب ليه كدا؟ لأني عشان أملاه، يعني ببص على الجانب اللي هو محتاج جهد وشغل لأن اللي إحنا أنجزناه خلص، لو فيه عندنا موضوع نجحنا فيه طب ده خلص، طب عايزين نتكلم اللي منجحناش فيه اللي محتاج جهد أكتر.
فأنا بقول لينا هنا وأكيد الناس في مصر هتسمعني، لو إحنا عايزين نعمل خدمة صحية جيدة الرقم اللي قال عليه الدكتور خالد ده يتضاعف مرة أو مرتين، ويردني الدكتور خالد والدكتور مصطفى، يا دكتور مش كدا يا فندم؟ يعني إذا كنا بنتكلم على ده.. على إن إحنا نقدم خدمة طبية لـ110 مليون تقريبًا آآ.. تليق بالإنسان، وهي الموضوع مش بعد اقتصادي فقط، هو بعد أخلاقي وإنساني وديني يمكن.. الرعاية الطبية اللي نقدمها لمواطنينا ولأي حد يلجأ لنا.. ده فيه بعد إنساني وأخلاقي وديني لأن هي أغلى حاجة في الإنسانية هي صحة الإنسان.
نرجع تاني فأقول لو الرقم اللي إحنا بنتكلم عليه 500 وشوية مليار، لا إحنا بنتكلم في أكتر من كدا بكتير، بنتكلم يمكن في مضاعفة الرقم ده مرة أو مرتين على الأقل عشان نقدر نقدم، لأن هو اتكلم على التأمين الصحي الشامل.. التأمين الصحي الشامل ده برنامج ضخم جدًا جدًا، وإحنا كنا حطينا يعني 15 سنة مدى زمني لتنفيذه، وبنتمنى إن إحنا، كنا نتمنى إن إحنا نبقى في زمن أو في مدى زمني أقل من كدا.
طيب.. إيه اللي أنا بقوله، اللي هقوله النهاردا لكم دلوقتي إن الـ.. صندوق تحيا مصر هيتكفل بتعليم النابهين.. النابهين في جامعة كيان في الكليات الستة دول. بس طبعًا هيبقى فيه اختبارات آآ.. علاوة طبعًا على يعني تحصيلهم العلمي في الثانوية العامة، لكن هيتم اختبارات لهم بحيث إن هم يحققوا المعايير العلمية المطلوبة ويلتحقوا، لكن صندوق تحيا مصر هو اللي يتكفل بتقديم أو تغطية نفقات التعليم دي للمتفوقين، بشرط إن هم يستمروا في تفوقهم في السنوات الدراسية اللي بعد كدا.
إحنا آآ.. خدنا القرار بتاع الجامعة دي السنة اللي فاتت، وبقول لكم إن بفضل الله سبحانه وتعالى فبراير مارس هنكون بنفتتح اللي إنتو شفتوه الـ.. في الفيلم الـ.. اللي تم عرضه، هنكون بنفتتح الجامعة دي وتبقى جاهزة لاستقبال… طلباتي من أولياء الأمور، طلباتي أو توصيتي لأولياء الأمور وللطلبة: متحرموش نفسكم من برنامج إحنا حرصنا على إن إحنا، وفيه متابعة دقيقة من وزير التعليم لعالي ومن وزير الدفاع ومن رئيس الوزراء ومني شخصيًا.. الموضوع النهاردا مبقاش فكرة إن إحنا بنقول مسار طبي أو مسار علمي، آآ.. ده بقى محل اهتمام من كل أجهزة ومؤسسات الدولة. بس أنا بقى عايز أطمنهم إن البرنامج اللي موجود ده هيخلي مع آآ.. بقية البرامج اللي بتعملها وزارة التعليم العالي ووزارة الصحة، إحنا بفضل الله سبحانه وتعالى ومش عارف الدكتور مجدي هيسمح لي أقول كدا ولا لأ، إحنا لن يكفينا.. لن يكفينا بفضل الله سبحانه وتعالى.. حلمنا يبقى عندنا 1000.. 1000 قليل.. 10000 دكتور مجدي يعقوب في يوم من الأيام. (تصفيق)
طب ليه؟ لأنه هذا الرمز الجميل والقدوة المحترمة في عالم الطب قدام العالم وقدامنا هنا في مصر بيدفعنا إن إحنا نقول أسباب هذا النبوغ إحنا نـ.. نعمل لها كل ما يلزم حتى يعني نحقق لها الفرصة الحقيقية. أنا بتكلم هنا على شبابنا وشاباتنا اللي موجودين، فـ.. بوعدكم إن شاء الله إن من خلال البرامج اللي بتتعمل بين وزارة التعليم العالي وبين القوات المسلحة وبين وزارة الصحة، إن إحنا بفضل الله سبحانه وتعالى والجامعات، وهتشوفوا يعني فيه.. إحنا فيه جامعة آآ.. هتفتتح آآ.. على طريق السخنة، مش كدا يا دكتور عبد العزيز؟ مش كدا يا فندم؟ بردو عشان بس ميبقاش الكلام هنا كله على الـ.. كدا يعني على الـ.. جامعة كيان. الجامعة دي هتبقى، ممكن تتكلم عنها شوية؟
دكتور عبد العزيز: آآ.. بشكر سيادتك يا فندم، الجامعة اللي موجودة على طريق السخنة هي صرح كبير جدًا تم إنشاءه كله بالكامل، إحنا حاليًا في مرحلة بتوجيه من سيادتك، مرحلة الفرش والتجهيز، وجاهزين نبدأ على الفصل الدراسي التاني. الجامعة دي بالأساس تعاونا مع جامعة عين شمس، وهي بينقسم التعليم فيها على 3 أقسام رئيسيين، إحنا بنتكلم على جزء من البرامج، برامج دولية، تعاونا مع جامعات عالمية مرموقة بتدي درجات بالتعاون مع جامعة عين شمس، بالإضافة لاستضافة أحد أفرع الجامعات العالمية الكبيرة، جامعة إكستر، وهي جامعة إنجليزية إحدى جامعات راسل جروب، من الجامعات العريقة داخل إنجلترا. واستضافتها في هذا الفرع وفي هذا المكان في هذه الجامعة على طريق السخنة. هي الحقيقة عمل آآ.. غير مسبوق، عمل كبير جدًا، لأن التوأمة والشراكة بين جامعة عين شمس وجامعة إكستر في هذا الفرع ليس استهدافًا لمصر فقط، ولكن هتخرج هذه الشراكة إلى دول أخرى خارجية. بالإضافة إن إحنا عندنا الكثير من البرامج الأخرى هتكون موجودة داخل هذه الجامعة، والسعة الإجمالية للجامعة تقترب من حوالي 50 ألف طالب، فهي نموذج يا رب يكون نموذج رائد للتعليم إن شاء الله برعاية سيادتك وتوجيه سيادتك، وإضافة كبيرة لمنظومة التعليم العالي في مصر والمنطقة بإذن الله، تمزج بين البرامج المحلية والبرامج العالمية بما يتيح للطالب جدارات يستطيع أن ينافس بها على المستوى المحلي والعالمي.
السيسي: أنا بشكرك جدًا يا دكتور عبد العزيز… (تصفيق) وأنا بس أنا بلفت نظركم للرقم اللي الدكتور عبد العزيز قاله، الكلام ده كان بيتعمل بقاله 3، 4 سنين، وآآ.. يعني بيتعمل، بس مبنتكلمش، لما خلاص هيخش أو هيبقى يسمح بقى بالـ.. بالدراسة فيها، كان لا بد إن إحنا نقول لكم عليها، عشان نقول لكل الناس في مصر إن إحنا بفضل الله وبفضل مسؤولينا كمان، جهدنا مستمر، ويعني وإصرارنا على إن إحنا يعني في القطاعين اللي أنا بتكلم فيهم، اللي أنا بعتبرهم هم الـ.. يعني الأداة الحقيقية لتقدم أي دولة في الدنيا. الأداة الحقيقية في أي دولة من الدنيا هو التعليم والقطاع الصحي، لو إحنا قدرنا نحقق فيهم معايير دولية وعالمية، أنا بتصور إن ده في خلال مدى زمني مش كبير قوي هنحقق لبلدنا اللي إحنا بنتمناها. أنا بتكلم في 30 و35 ألف وبيقول لي 40 و50 ألف في جامعة واحدة، بمعايير دولية، بمعايير دولية، عشان النهاردا يبقى حجم… بالمناسبة، كل العلوم اللي بتقدم في الجامعات الجديدة هي علوم حديثة جدًا جدًا جدًا تتناسب مع متطلبات سوق العمل والعصر اللي إحنا موجودين فيه، يعني عايز أقول مش دراسات تقليدية مالهاش فرصة عمل جيدة.
دكتور عبد العزيز: هي يا فندم هي برامج، البرامج دي لها جدارات لخريجين، برامج بينية بتخاطب لغة العصر، تخرج خريج قادر على المنافسة على المستوى المحلي والإقليمي والعالمي، ده الهدف الرئيسي من البرامج.
السيسي: فإن شاء الله بردو دي هتبقى يعني إن شاء الله خلال مارس؟
دكتور عبد العزيز: إن شاء الله يا فندم.
السيسي: خلال مارس بردو هنكون بنفتتح الـ.. يعني هيكون في فرصة لالتحاق أبنائنا وبناتنا لهذه الكليات. اتفضل دكتور عبد العزيز اتفضل.
أرجع بقى مرة تانية وأقول فيه نقطة مهمة عايز أقولها لكم كمان، كان بيكلمني وزير الأوقاف بيقول لي يا فندم إحنا يعني بنطور في وزارة الأوقاف وبنطور في كذا، وأنا بشوف إن فيه الجمعيات الأهلية بتعمل جهد كبير في هذا المجال. طيب يا سادة يعني النهاردا عايزين نطور من الأوقاف، أو وقف التعليم ووقف الصحة. وأنا متصور إن ده موضوع محتاج نشتغل عليه، دولة الرئيس، بين وزارة التعليم ووزارة الصحة ووزارة العدل مع وزارة الأوقاف عشان نطلع شكل قانوني آآ.. موثوق فيه، مقدر، يسمح للناس في مصر اللي هي تقدر يقول لك أنا هعمل وقف تعليمي مثلًا هحط رقم معين لصالح الوقف ده، ويبقى الرقم ده بيتحط في البنوك مثلًا أو في أصول، والأصول دي بتجيب موارد والموارد دي بيتم الإنفاق عليها في المجالات دي.
طبعًا أنا بتكلم على.. لأن الناس في.. الأوقاف المصرية على سبيل المثال يعني بادئة من سنين طويلة مضت، مئات السنين، ولكن الحقيقة حصل توقف في المجال ده، فلما كان في نقاش في الموضوع ده مع الدكتور أسامة قلت له لأ، إحنا نطور موضوع الأوقاف ده عشان نعظم من قدراتنا وندي فرصة للناس الخيرين في مصر اللي هي بيبقى عايز يقول إن أنا عايز أعمل آآ.. أوقاف أو صدقات جارية تستمر في حياتي وبعد كدا. فالبرنامج ده لو قدرنا نعمله بين زي ما قلت كدا يا دكتور مصطفى بين وزارة الأوقاف ووزارة الصحة ووزارة العدل ووزارة التعليم العالي ووزارة التربية والتعليم أيضًا عشان نطلق للناس مبادرة وقف آآ.. تقدر الناس اللي هي عايزة تعمل ده تقدم أعمال خير لهذه الأوقاف، تبقى عمل مؤسسي مسيطر عليه منضبط مؤمن تماما، يتيح فرصة لأن إحنا أولًا نفتح باب خير للناس، وثانيًا ندي فرصة لـ.. إن ده يكون له أداة من أدوات التمويل في قطاعين التعليم والصحة أو أي قطاعات أخرى لو إنتم شايفينها.
أطلت عليكم لكن أنا سعيد جدًا باللي إحنا فيه، وهبقى سعيد أكتر بيوم الافتتاح الجامعتين، عشان بس إحنا بنتكلم على الصحة والتعليم، وأنا اتكلمت في النقطة دي قبل كدا وفي المنتدى قلت إن إحنا واخدين 5 جامعات.. جامعة القاهرة، جامعة عين شمس، إسكندرية، المنصورة، أسيوط، مش كدا يا دكتور؟ والدكتور عبد العزيز قال لي طب ندخل كمان 3 جامعات أخرى. أولًا الـ5 جامعات لوحدهم هيكلفوا 50 مليار جنيه، الـ3 جامعات التانيين تقريبًا 30 كمان؟
دكتور عبد العزيز: تقريبًا يا فندم.
السيسي: يعني 80 مليار جنيه، إنت مش بتتكلم إنك بتنشئ جامعة جديدة إنت بتعمل يعني تطوير شامل… اتفضل يا دكتور.
دكتور عبد العزيز: أه بنعمل تطوير شامل في الـ5 جامعات…
السيسي: الـ8 بقى
دكتور عبد العزيز: هتكلم عن الـ8 فندم حاضر، بنعمل تطوير شامل في الـ8 جامعات، بدأنا بالخمس جامعات. الهدف من هذا التطوير إحنا جامعاتنا قريبة من لما نتكلم عليها ووجودها بالنسبة للوضع العالمي وتصنيفها العالمي، إحنا جامعاتنا قريبة.. الحقيقة، جامعاتنا الكبيرة اللي بدأت منذ عقود طويلة من الزمن هذه الجامعات قريبة إنها تكون من الجامعات الفئة الأولى الرائدة عالميًا، ومن هنا كانت مبادرة سيادة الرئيس إن إحنا ناخد مجموعة من هذه الجامعات ونختار الـ5 جامعات الرائدة المصرية الكبيرة، نعمل على تطوير منظومة التعليم فيها ومنظومة البحث العلمي، بحيث إن هذه الجامعات تكون مجموعة من الجامعات الرائدة عالميًا. اتعملت الخطة الكاملة واتعرضت على سيادته، والخطة حاليًا في إطار التنفيذ الكامل بحيث إن هذه الجامعات يحصل فيها تطور كامل في كافة المناحي بدءًا من العملية التعليمية إلى العملية البحثية حتى استهدفنا لكافة مرافق الجامعة وانتهاء بالجزء الخاص بالرقمنة، بحيث إن كل العمليات داخل الجامعة هتكون عملية مرقمنة كاملة من النواحي الإدارية ومن النواحي التعليمية. وبالإضافة للخمس جامعات هنضيف 3 جامعات أخرى، بالإضافة إلى العمل على 17 جامعة من الجامعات الأهلية الجديدة في الجزء الخاص بالرقمنة والجزء الخاص بالأوتوميشن.
السيسي: الـ3 جامعات ممكن تذكرهم عشان أنا قلت بس الخمسة اللي هم الـ.. الأولانيين.
دكتور عبد العزيز: الـ3 جامعات يا فندم إحنا قلنا جامعة حلوان، وجامعة طنطا، وبنفاضل بين جامعتين اتنين هنعرضهم على سيادتك بحيث نختار التالتة إن شاء الله.
السيسي: طيب.. طيب. أنا بشكرك مرة تانية، ولكن أنا بقى..حبيت إن إحنا، اتفضل استريح، إن إحنا وإحنا موجودين في يوم زي ده نتكلم لأن إحنا مهم قوي إن إحنا نستمر في التواصل مع مواطنينا، ونتكلم معاهم على جهود الدولة، مش جهود حد بعينه، دي جهود الدولة المصرية، حكومة، آآ.. مؤسسات أجهزة.. الهدف منها إن إحنا بنقول إن الدولة دي بفضل من الله سبحانه وتعالى ماشية في طريقها الصحيح اللي في نهايته بفضل الله، وربنا ميجيبش شر لينا أبدًا، هتصل إلى المستهدفات لدولة آآ.. إن شاء الله ذات شأن آآ.. يعني بس بعد سنوات مش قليلة يعني.. مش سنة ولا 2 ولا 3 زي ما الناس متصورة.. الدول بتتقدم بتاخد عشرات السنين حتى تاخد مكانها الحقيقي، بشرط، بشرط.. خطط، وإرادة عمل، وإصرار ومتابعة، وتصويب وتصحيح، وأيضًا استقرار واستمرار.. استقرار واستمرار.. استقرار واستمرار، شكرًا جزيلًا. (تصفيق)
ألقيت الكلمة في مركز الصفوة للمؤتمرات الدولية بمقر القيادة الاستراتيجية بالعاصمة الإدارية الجديدة، حيث شهد الرئيس عبد الفتاح السيسي الجلسة الافتتاحية للمؤتمر الطبي الثالث لكلية الطب بالقوات المسلحة، وتضمن الحدث توقيع بروتوكول تعاون طبي دولي، مع تأكيد الرئيس في كلمته على أولوية قطاعي الصحة والتعليم وتطلعه لإعداد آلاف النماذج المشرفة مثل العالم الجليل مجدي يعقوب. وذلك بحضور أبرز الحضور ومنهم رئيس مجلس الوزراء الدكتور مصطفى مدبولي، والقائد العام للقوات المسلحة وزير الدفاع والإنتاج الحربي الفريق أول أشرف سالم زاهر، وجراح القلب العالمي الدكتور مجدي يعقوب، إلى جانب لفيف من الوزراء وقادة القوات المسلحة والعلماء.