نص كلمة السيسي خلال جلسة "التنمية الحضرية والعمرانية" ضمن أعمال منتدى مصر 20/10/2026
كلمة السيسي خلال جلسة "التنمية الحضرية والعمرانية" ضمن أعمال منتدى مصر، 20 أكتوبر 2026
بسم الله الرحمن الرحيم، الحمد لله رب العالمين، أنا هبدأ كلامي بأن أنا أقول إن الطرح المثالي، الطرح المثالي.. ده بيظلم الطرح نفسه، وده إن.. كتير من الـ.. من اللي بيتكلموا على.. يعني.. بينتقد موضوع معين.. فيقدم له طرح آآ.. مثالي، يعني إيه الكلام ده؟ يعني إنتو بتتكلموا في إن إحنا كنا 7% على دولة تقريبا 80 مليون، الحجم ده من البشر عشان يعيش فقط على 7%، 7% من الأرض، ده هيبقى ليه تداعيات كتيرة جدًا، تداعيات اجتماعية وأمنية وثقافية، وأيضًا استثمارية، اقتصاد وتجارة واستثمار، فـ.. لكن ده اللي كان موجود.
إذن لو أنا بقول النهار ده الـ7% اللي هم حوالي كان 50، 60 ألف كم مربع بتعيش عليهم الدولة المصرية قبل كدا، طب والناس اللي كانت بتتحرك، بتتحرك جواهم وبتعيش جواهم، طب بشكل مناسب؟ لأ، طب بشكل إنساني؟ لأ، طب بشكل ينفع إن الدولة دي تنمو وتخلق فرص لشعبها مستقبلًا؟ لأ. إذن لما أنا بقول إن الحكومة بدأت من الصفر ما أقصدش بيها أسيء لأي حد، لكن عايز أقول إن الواقع اللي إنتو اتعودتوا عليه ده كان واقع صفري لدولة بحجم مصر، الدولة كبرت ونمت وهي ناسية إنها بتكبر وبتنمو، ما اتعملش تخطيط عمراني متكامل للنمو ده كله، القاهرة كانت 4 مليون، مش كدا؟ 4 مليون، طب إنت فين دلوقتي؟ طب ده هيترتب عليه إيه؟العشوائيات المحيطة بالقاهرة وحركة النقل اللي مش مظبوطة و.. آآ.. يعني الممارسات اللي ممكن ما تكونش جيدة.. بقى إنت قاعد على 6% ولا 7% من مصر، وغيرك قاعد على 60 و70%، مش عايز يكون لده تداعيات؟ في كل حاجة؟ لا هيبقى فيه تداعيات، لما يكون بدايتك إنك عايز تحل كل حاجة في وقت واحد بشكل مثالي إنت بتظلم الطرح.
طيب، أنا هسألكو كلكو سؤال، تفتكروا الرسوم اللي بتتاخد على محطات الرسوم تغطي استثمارات الطرق بكام في المية؟ أنا بكلم زمايلي أو أهلي اللي موجودين معانا من شعب مصر، تفتكروا كام؟ قسمًا بالله ما تكفي الصيانة بتاعتها، إيه؟ الصيانة بتاعتها، الرسوم دي اللي إنت بتقول ده 5 جنيه و10 جنيه و20 جنيه، ما تكفي الصيانة بتاعتها. طيب، ممكن دول مواردها كتير، أكتر مننا، تقدر ما تبقاش عندها مشكلة في الحكاية دي، حتى من غير محطات (كلمة غير واضحة) خالص.. دي مثلًا على سبيل المثال، ليه عملت الكهربا؟ عشان التنمية بس؟ لأ، عشان تثبيت الدولة المصرية كان أحد الاستراتيجيات بتاعتنا.
طيب، فيه عندك دولة وفيها ناس 90 مليون، 100 مليون عايزين يعيشوا، ومش مستحملين ده، وأول ما تحصل أزمة الكهربا يبقى الأستاذ جمال يقول لك الكهربا اتقطعت ليه، ويبقى الإعلام يتكلم في الجرنان يقول لك الكهربا بتنقطع ليه، يا وزير الكهرباء إنت وعدت، يا.. يا رئيس الوزراء انت قلت الكهربا مش هتنقطع إلا ساعتين دي بتتقطع 3 ساعات. لأ، الطرح المثالي أحيانًا قد يتعارض مع الواقع السياسي الاجتماعي الثقافي الإنساني الأخلاقي اللي موجود في الدولة.
يعني لو إنتو نزلتوا مثلًا الحتة بتاعت القاهرة القديمة في القلعة والسيدة نفيسة والسيدة زينب والإمام الشافعي والحتت دي، المقابر كانت المية.. المية داخلة في نسبة كبيرة منها، أنا آسف يعني، كانوا ييجوا يدفنوا يروحوا حاطين شوية رمل وطوبتين ويحطوا الجثمان ويمشوا، عشان خايف إن الناس تقول إيه إنتو.. إنتو عايزين تشيلوا المقابر ليه من هنا؟ قلت لهم طب انزلوا وهاتوا الإعلام معاكم، وخشوا صوروا المقابر وفيها المية.. الـ.. المية الجوفية ناشعة، وفي نسبة كبيرة جدًا من المقابر دي، فـ.. الطرح المثالي إنك ما تقربش من المكان، لكن الطرح الواقعي إنك إنت ما يصحش لا شرعًا ولا إنسانيًا ولا لدولة بتحترم ناسها إنها تقبل إن هم يسـ.. يرموا جثمان في المية كدا ويسيبوه، هيعملوا إيه يعني ما هو دي المقبرة بتاعتهم.
اتعمل.. اتعمل تقريبًا كدا كام يا.. كام مقبرة لغاية دلوقتي؟ لا، في الميكروفون لو سمحت... يعني 30 ألف.. أنا عايز أقول ومحافظ القاهرة موجود، أنا الكلام ده قريب هنا، في العاشر والـ.. وحلوان، مش كدا؟ العاشر وحلوان، أنا بقول طب ده.. ده الحلول اللي أنا بطرحها عليكم دي ده موضوع ما.. ما فيش فيه مصلحة يعني، ما فيش فيه مصلحة للـ.. لحد غير إن احنا بنحاول نحل مسائل، فيه بعضها بتعرفوه وفيه بعضها حجمه ما بتعرفوهوش، ولا تكلفته، الـ 10 آلاف مقبرة بتتكلف كام؟ هي المقبرة بتكلف 1000 جنيه؟ بتكلف 100 ألف جنيه، 200 ألف جنيه، 300 ألف جنيه، بس أنا ما بعملش يعني.. ما بعملش الحاجة اللي أنا بعملها آآ.. يعني كدا، لو رحت وشوفت تقول ياه إنتو عاملين الحاجة بالطريقة دي؟ أه.
العمدة وفائي.. خليك مستريح، خليك مستريح، أنا بقول للعمده وفائي إحنا جبناه في.. أو استضفناه أو استقبلناه آآ.. في.. من حوالي شهر كدا، مش كدا؟ وبعدين تجربته تجربة طيبة تتقال، حد يقول لك يا عم إنت.. إنت يعني إيه اللي.. اللي إنت بتقوله ده؟ قلت لهم ده أنا عندي 4500 قرية، لو كل عمدة قرية عمل زي العمده وفائي ما عمل، يحول الدنيا في بلده لحاجة تانية خالص، وفي نفس الوقت شال من على الدولة مش أعباء مالية، أنا عمري ما كانت اللي أنا بقلق منه الأعباء الناجمة عن مسارنا، أنا اللي أنا بقلق منه وعايزكم تقلقوا منه البناء.. الانطباع اللي هيتشكل في وعي الناس ويؤدي إلى الشحن المستمر، ما هو مش إنت بس، إنت والإعلام وده وده بيتكلموا، فهم بيبنوا انطباع، انطباع، انطباع، يقوم زي ما حصل، وبعدين ما هو إنت بتبني وفيه آخرين يعني مش.. مش.. مش حسني النية.
فنرجع مرة تانية، آآ.. أنا بشكر آآ.. دكتور مصطفى، و.. والفريق كامل، و.. و.. و.. والاستاذة رندا المنشاوي أو المهندسة رندا المنشاوي وزيرة الإسكان، وأنا بطالبها مع صندوق حياة كريمة بـ 200 ألف وحدة سكنية، 200 ألف وحدة سكنية... (تصفيق)
إحنا ممكن.. ممكن لما بدأنا، أختم كلامي بس، لما بدأنا قلنا إن إحنا نعمل قانون الإيجارات، كان الهدف منه إن إحنا نعمل اختراق لفكرة.. فكرة التمليك، قبل.. أنا من الجيل اللي شاف شقق للإيجار، أنا من الجيل اللي شاف كدا، شوفت كتير في مصر، وكانت إيجار الشقة مش محتاج حاجة خالص إنك تدفع ال 4، 5 ، 7 جنيه في الإيجار، وكان كل واحد بياخد إيجار الشقة اللي على قدة، اللي يقدر يدفع 4 جنيه يدفع، اللي يقدر يدفع 7 جنيه يدفع، اللي يقدر يدفع أكتر من كدا يدفع.
طيب، ما أقصدش حاجة، الطرح المثالي إني أخفض الإيجار، إيه يا دكتور؟ أخفض الإيجار، طرح مثالي، طرح إيه؟ أنا كنت بدفع 7 جنيه هدفع 3 جنيه ونص، كويس؟ كويس، إديتني 3 جنيه ونص، فهو طرح إيه؟ مثالي، ترتب عليه أكبر أزمة عشوائيات وإسكان غير مخطط في الدولة المصرية، إيه؟ أكبر أزمة عشوائيات وإسكان غير مخطط في الدولة المصرية، لأن الدولة ما قدرتش تحل محل القطاع المدني أو المجتمع المدني في إنشاء وحدات تلبي مطالب الناس.
الفكرة كانت رائعة، لأن في النهاية كان حس.. زود لكل واحد.. كل إنسان أو كل أسرة عايشة في شقة إداهم تقريبا 20، 25% من الدخل اللي بييجي، لأن كان مرتبات الناس من 8 ل 12 جنيه، من 8 ل 12 جنيه في الوقت ده، فهو إداله 3 جنيه، لو أنا واخد شقة بـ 7 جنيه أنا أخدت 3 جنيه فإداني أكتر من 20، 25% كدا بقرار طلعته، فهو قرار إيه؟ مثالي، ده جميل قوي، وكلنا في الوقت ده كنا سعداء قوي، لكن تداعيات القرار مع أزمة 67، مع أزمة اليمن 62 ما مكنتش الحكومة إن هي تقدر تحل الفراغ اللي هيترتب عن تقاعس، تراجع، رفض المواطنين إن هم يبنوا، لأن هو بقى مش اقتصادي.
فـ.. مش كل اللي إحنا بنتمناه نقدر نعمله في ظل إن الدولة المصرية آآ.. دولة كبيرة وحجم التحديات اللي كان فيها كان ضخم جدًا جدًا، وحجم التردي في كل مؤسسات الدولة ومسارها، الدول بتنمو وتكبر وتاخد مكانها في 50 لـ 100 سنة، إنت بأمارة إيه متصور إن الكلام ده ممكن يخلص في 10 و12 سنة؟ أنا ما قلتلكمش كدا.. خالص، ولما بقول 20، 30 سنة ده أقصى ما ربنا وفقنا فيه، وننهيه في 2030 بفضل من الله، على إننا يعني أرجو من الله إن أنا أكون وفقت في وضع الدولة المصرية على أعتاب تقدم حقيقي واستثمار حقيقي وتنمية حقيقية تاخد الشعب المصري إلى آفاق أفضل يقوم بيها بفضل من الله سبحانه وتعالى آآ.. زملاء لينا، وأتمنى لهم بكل الحب والأماني الطيبة اللي بحبها للناس في مصر إنه يوفق أكتر وينجز أكتر أكتر ويصلح أكتر بعد كدا.
والله ولا 30 سنة يتعمل اللي اتعمل ده... (تصفيق) أنا بحلف بالله... (تصفيق)
ألقيت الكلمة في العاصمة الإدارية الجديدة حيث شهد الرئيس فعاليات جلسة "التنمية الحضرية والعمرانية" ضمن أعمال منتدى مصر 2026 وذلك بحضور الدكتور مصطفى مدبولي رئيس مجلس الوزراء ووزيرة الإسكان والمرافق والمجتمعات العمرانية، وعدد من المسؤولين والوزراء.