نص كلمة السيسي في حفل الإفطار السنوي للقوات المسلحة 2025/3/17

2:00

السيسي: الحمد لله رب العالمين إن إحنا بخير وسلام، و.. بنتحرك بفضل الله سبحانه وتعالى بخطوات ثابتة، مستقرة، مدروسة، في كل المجالات. ويمكن إحنا اتكلمنا في الموضوعات دي قبل كده إن في الدول بتاخد وقت كتير لما يكون في تخطيط وربنا يوفق في التخطيط ده القائمين عيه إن هم ينفذوه، لكن نتايجه مابتبانش في.. زي ما كتير مننا يتصور إنها ممكن بسرعة، لا بتاخد وقت، خاصة لو كانت المشاكل والظروف الصعبة اللي مرت على، علينا، أو على مصر أقصد يعني، كانت أقدر أقول في الـ 15 سنة اللي فاتوا كانت الظروف صعبة قوي، وأنا لما بذكره ما بقصد شبيها أبدًا غير إن إحنا ما ننساش، ونبقى دايما آآ ماسكين ومتشبثين بالواقع اللي ربنا سبحانه وتعالى يعني أفاء علينا بيه في ظل اللي بقول عليه إن المنطقة والعالم بيعاني من حالة صعبة.

فـ.. حد يمكن يقول طب ده الظروف الاقتصادية صعبة، أقول له تخيل إن إحنا بقى لنا دلوقتي تقريبًا، يعني، بنفقد تقريبًا كل، كل شهر، من 800 لـ 900 مليون دولار، مش كل المبلغ ده عشان أكون صادق يعني، لكن آآ 60 ، 70% منه بنفقده نتيجه الظروف اللي بتمر بالمنطقة، والتعرض للمجرى الملاحي، وبالرغم من كده لما بكلم السيد محافظ البنك المركزي وأقول له أخبارك إيه و.. لأن ده كان، المبلغ ده كان دخل مباشر للدولة و.. أموال سايلة بتخش بشكل مباشر للبنك، فيقولي لا الحمد لله إحنا بخير والأمور ماشية كويس، و.. ويمكن خلال ال.. اليومين تلاتة اللي فاتوا صندوق النقد وافق على إجراءات الخطة اللي إحنا ماشيين بيها في اجتماعه اللي تم. فده مؤشر جيد. وأيضًا.. أقول كده يا حسن ولا ما أقولش؟ وبرضه كلام المحافظ كلام جيد، ويطمنا إن رغم كل الظروف اللي أنا بقول عليها دي إنما ربنا سبحانه وتعالى بيساعدنا.

و.. الشعب المصري بيساعدنا، الشعب المصري بيساعدنا، فـاا.. مطمنين، طبعًا، وااا.. بمؤسسات الدولة مطمنين طبعًا، و.. ما بخصش حد، يعني لما بقول الجيش والشرطة ما أقصدش إن هم دول فقط، لكن أنا بعتبرهم إن هم في الظروف دي هم يعني محوري الارتكاز لأمن واستقرار الدولة المصرية.

بنبص على اتجاهات، يعني، في الجنوب مع أهلنا في السودان، وطبعًا إحنا كلنا متابعين، ومع أهلنا في ليبيا، وحتت تانية كتير، فليها، كل ده ليها تأثيرات يعني، ولكن إحنا بفضل الله سبحانه وتعالى، يعني، آآ في وضع كويس، و.. بطمن المصريين ويمكن دي تالت مرة أقولها، عشان يعني لمست خلال الشهرين تلاتة اللي فاتوا نوع من ال.. من القلق ويمكن الخوف، وده مش وحش بالمناسبة إن إحنا نبقى، يعني، عندنا قلق أو خوف على بلدنا، ده أمر، أمر محمود الحقيقة، لأن ده معناه إن إحنا هنتشبث ب.. باللي إحنا فيه، ونتحمل أيضًا الظروف اللي إحنا بنمر بيها.

كانت الظروف خلال يمكن دولة الرئيس لما نتكلم، دولة رئيس الوزرا، يعني خلال السنتين اللي فاتوا كانت الظروف صعبة قوي اقتصاديًا؛ بفضل الله سبحانه وتعالى، بس إحنا مش عايزين نتعجل لسه يعني إحنا في بداية الـ.. التحسن يعني، في بداية التحسن، رغم الرقم الـ 7 ، 8 مليار دولار اللي إحنا.. ده رقم بالنسبة لينا مش بسيط، يعني وزير المالية لما تتكلموا معاه، يقول لك المبلغ ده لو معانا دلوقتي إحنا كنا هنـ.. هنعمل حاجات كتير، وهنبقى في ظرف أحسن من كده.

لكن، الحمد لله، إحنا ماشيين وهنستمر بفضل الله سبحانه وتعالى، والأحوال هتتحسن بفضل الله وبفضل المصريين، وعمل كل المؤسسات، و.. ما تتوقفوش وتـ.. وتنظروا للخلف، ما تبصوش وراكوا، إلا لل.. للعلم وللدرس وللفهم عشان ما تتكررش أخطاء وقعنا فيها قبل كده، إنما غير كده إحنا باصين قدامنا وبنتحرك زي ما قلت كده في كل المجالات بهدوء شديد، وبتخطيط مدروس، ربنا يا رب يوفقنا فيه ويطرح البركة.

مش عارف آآ مش عايز أخرج عن السياق يعني، لكن المفروض إن إحنا نزود جهدنا أكتر، أنا بكلم نفسي، وبكلم مؤسسات الدولة، وبكلم كل الناس، كل ما الظروف تبقى صعبة، كل ما نشتغل أكتر، كل ما الأمور تقسى علينا، نشتغل أكتر، ونبقى مطمنين إن لا يمكن أبدًا ربنا سبحانه وتعالى هيضيع جهد العمل المخلص الأمين الشريف، العمل المخلص الأمين الشريف، لا يمكن يضيع، دي سنن ربنا سبحانه حطها في الوجود، ما دام في عمل، وما دام في إخلاص، وما دام في أمانة، وما دام في شرف... دي كلها يعني مبررات وركائز للنجاح.

فـ... سعيد إن أنا ألتقي بيكم، كل سنة وإنتوا طيبين.

كنت، ما أعرفش كنت.. قالوا لي كتير عن شاب بيعمل آآ برنامج، أنا بس لية ملحوظة واحدة مش، مش على.. إحنا بندي الفرصة في تليفزيونا وفي قنواتنا وفي مسلسلاتنا للعمل الإيجابي اللي فيه جدية وفيه التزام ويعني ما إحنا اللي بنضحك عليه كتير، والدراما في رمضان عاملة حاجات كتير، فما يجراش إن يبقى في حاجة، يعني حاجة كده تبقى جد شوية، فـ.. ما أعرفش آآ حد موجود من... لو عندك حاجة قلها لنا، عشان نقول للناس في مصر إوعوا ترعوا الغث فقط، وترعوا الهزل فقط، وترعوا الكلام اللي ما يبنيش أمة فقط، دوروا عالصالح، اتفضل حلينا بقى.

سامح حسين: هو البرنامج يا فندم إحنا كان أولًا وأخيرًا والله كان نجاحه فضل من ربنا سبحانه وتعالى ثم الشعب المصري اللي لسة سيادتك بتقول إن هم بيتفرجوا على الشيء الجيد، إحنا لما عملنا الحلقات عملناها أنا وأصدقائي وبشكرهم جدًا عليها لوجه الله، فربنا سبحانه وتعالى كرمنا من وسع قوي قوي قوي يعني، وكانت أول حلقة يا فندم إلا من أتى الله بقلب سليم، ووجودي هنا يا فندم ده عظيم الشرف لينا، وحسينا إن فعلًا يعني الجمهور المصري متذوق جدا، وشغوف جدًا جدًا إن هو يلاقي منتج محترم وجيد، هتلاقيه هو، هو يا فندم إحنا ما دفعناش جنيه عالبرنامج ده دعاية، هو اللي عم الدعاية، فجزيل الشكل للشعب المصري العظيم اللي نفسه يتفرج على حاجة محترمة وأول ما شافها احتفى بيها.

السيسي: ربنا يوفقك ويوفقك كل الناس اللي زيك، كل سنة وإنتوا طيبين.

سامح حسين: وسيادتك طيب.

السيسي: طولت عليكم بس حبيت إن إحنا نخلي في الآخر بجملة من من سامح، وعشان برضه أقول للمعنيين بالأمر، المجتمع بيقوم على البيت، البيت، وبيقوم على الإعلام، وبيقوم على المسجد والكنيسة، وبيقوم على التعليم، لو في حاجة فاتتني قولوا لي، لو في حاجة فاتتني لأي مجتمع عايز يطمن على ركائز ثبات وقوة مجتمعه وقدرته على الصلابة والصمود، يا ترى الـ 5 عناصر أو الـ 4 عناصر دول يا ترى موقفهم إيه؟ مع الوضع في الاعتبار إن هم بيأثروا على بعض، بيأثروا على بعض، المدرسة والجامعة بتأثر على البيت، والتنشئة بتأثر على... الجامع والكنيسة بخطابهم بيأثر على الشخصية.. فـ.. الإعلام واللي بيقدمه، لما يبقى صوتنا عالي وإيدينا دايمًا.. أنا مش بهاجم حد، دي بلدكم، وده مجتمعكم، بتعلموهم إيه؟ هو مش في جامعات فيها أساتذة علم نفس واجتماع يقولوا لنا إيه الخلطة تبقى عاملة إزاي؟ والكلام ده يتاخد للمؤسسات الإعلامية المطلوبة، والناس اللي بتعمل دراما عشان تشتغل عليه؟ ولا إحنا الأمور مش كده؟ دي بلدنا وده ولادنا وده مجتمعنا ودي أسرنا ودي قيمنا ودي أخلاقياتنا، ما حدش هيتكلم في المواضيع دي كتير، يقولك لا لا لا لحسن الناس تزعل. لو إحنا بنزعل من الحق، لا نتوقف بقى.

فـ.. سعيد إن أنا التقي بيكم، كل سنة وإنتوا طيبين. (تصفيق) شكرًا جزيلًا.

ألقيت الكلمة في القاهرة تزامنًا مع الاحتفال بذكرى الاحتفال بيوم العاشر من رمضان ويوم الشهيد والمحارب القديم، حيث حضر الرئيس عبد الفتاح السيسي حفل الإفطار السنوي الذي أقامته القوات المسلحة، وذلك بحضور المستشار حنفي جبالي، رئيس مجلس النواب، والمستشار عبد الوهاب عبد الرازق، رئيس مجلس الشيوخ، والدكتور مصطفى مدبولي، رئيس مجلس الوزراء، والدكتور أحمد الطيب، شيخ الأزهر الشريف، وقداسة البابا تواضروس الثاني بابا الإسكندرية، وعدد من الوزراء.