نص كلمة السيسي خلال المؤتمر الصحفي مع الرئيس الصومالي 14/8/2024

اتفضلوا استريحوا.. اتفضلوا.

بسم الله الرحمن الرحيم،

فخامة الرئيس دكتور حسن شيخ محمود، اسمح لي أرحب بيك أهلا وسهلا وبالوفد المرافق ليك، ضيوف أعزاء على مصر.

واسمحوا لي إن أنا أبدأ حديثي بإن أنا، يعني، أقدم لفخامة الرئيس وللشعب الصومالي التعازي في الحادث اللي، الإرهابي المزدوج اللي تم في 2 من هذا الشهر في مقديشو، فـ.. تعازيا في الضحايا والأماني الطيبة للمصابين.

الحقيقة العلاقات بين مصر وبين الصومال يعني علاقات تاريخية ممتدة منذ سنوات طويلة، ويمكن على المستوى ال.. العصر الحديث من، من الستينات، وكانت دايما العلاقات بين مصر والصومال علاقات بتتسم بالاستقرار والأخوة والتعاون، وده أمر مستمر حتى الآن.

وإحنا حريصين جدا في علاقتنا مع أشقائنا في الصومال إن إحنا نكون عامل إيجابي كبير في التعاون والتنمية بين البلدين.

واسمح لي فخامة الرئيس إن أنا قبل ما أتكلم على، يعني، المباحثات الثنائية اللي تمت خلال لقائنا وأعضاء الوفدين، إن أنا أهنيك شخصيا وأهني الصومال بالنجاح اللي تحقق خلال وجودكم وبحكمتكم في إدارة الأمور.

نجحتم في رفع العقوبات عن الصومال والحظر اللي كان مفروض، وده أمر رائع ومهم جدا. أيضا إن شاء الله تتولوا مقعد في مجلس الأمن، وده أمر مهم وبيعكس مدى الثقة ومدى الاحترام اللي بتتمتع بيه الصومال، إن شاء الله في 2025 و2026، وبتمنى لكم دايما التوفيق، وأيضا بتمنى لكم في، يعني، جهودكم اللي بتتم في مكافحة الإرهاب وتأمين البلاد واستقرارها، ولازم تكونوا متأكدين وأنا بقول الكلام ده عشان يبقى مسموع لأعضاء الوفدين وأيضا للشعبين المصري والصومالي إن إحنا حريصين، حريصين على إن استقرار الصومال ومكافحتها للإرهاب تتم بنجاح، حتى تعود الصومال أفضل مما كانت.

تحدثت مع فخامة الرئيس على الإجراءات اللي إحنا قمنا بيها خلال الفترة اللي فاتت، و.. من جانبنا.. إحنا، يعني، السفارة المصرية كانت.. رجعت للعمل في مقديشو مرة تانية، واستأنفت أعمالها.. خطوط مصر للطيران بين القاهرة وبين مقديشو تم استئنافها، وده أمر طبعا ال.. في بنك مصري موجود دلوقتي موجود أيضا في الصومال.. كل الجهود ال.. كل اللي أنا بقول عليه ده هي عبارة عن إجراءات الهدف منها تأكيد التعاون وتأكيد الأخوة اللي بينا وبين الصومال. ثم النهار ده زي ما شوفنا بال.. يعني.. بالتعاون العسكري والاتفاق اللي تم بين وزيري الدفاع المصري والصومالي، يصب في هذا الإطار.

واللي أنا عايز أأكده هنا إن إحنا تعاوننا دائما بيهدف إلى البناء والتنمية والتعمير. ولا نتدخل أبدا في شؤون الدول، ودايما اللي بيحكم مسارات سياستنا هي احترام القانون الدولي والأعراف الدولية وسيادة الدول، وده اللي إحنا بنقوله فيما يخص آآ الصومال. مهم جدا إن إحنا كدول، دول جوار، دول الإقليم، دول القرن الأفريقي، إن إحنا نحترم سيادة دولنا ونحافظ على استقلالها، ويبقى اللي بيحكمنا هو التعاون فيما بيننا، وليس أكتر من ذلك.

نحن مع الصومال واستقرارها وسيادتها، ولكم في مصر هنا فخامة الرئيس أشقاء وأصدقاء حريصين جدا جدا على العلاقة ديت وعلى تطويرها.

مش عايز أطيل عليكم، لكن أنا بقول الكلام دوت عشان تبقى رسالة للجميع. نحن مع.. أنا بتكلم على قانون دولي، بتكلم على أعراف دولية، بتكلم على سيادة، نحن مع الصومال والتعاون.

بالمناسبة، مصر ستتولى في أكتوبر القادم إن شاء الله قيادة أو مسؤولية مجلس السلم والأمن الأفريقي، وده ها يبقى فرصة لينا إن إحنا يكون لينا جهد بالنوايا الطيبة اللي أنا بتكلم عليها دي من أجل أمن واستقرار مش بس الصومال، لأ كل الدول الأفريقية، وده ها يبقى جهدنا الإيجابي في هذا الأمر.

في نقطة مهمة قوي عايز أذكرها هنا، وتحدثت فيها مع فخامة الرئيس، نحن بما إننا أعضاء في الاتحاد الأفريقي، وطبعا خلال هذا العام أو على نهاية هذا العام سيتم تجديد البعثة، بعثة حفظ السلام في الصومال، وإحنا كأعضاء سنتقدم بإن إحنا نشارك في هذه ال.. في هذه البعثة والأمر في الآخر بيبقى متروك للدولة المضيفة، الدولة اللي بيبقى القوات موجودة عندها، إن كانت ترغب إن إحنا نبقى موجودين، ها نبقى موجودين، ما ترغبش، ما فيش حاجة، ها نفضل أخوات وأشقاء ونبقى متعاونين بردو ما فيش حاجة.

مرة تانية برحب بيك فخامة الرئيس، دكتور حسن، بتمنى لك كل التوفيق، لكم في مصر أشقاء وأصدقاء تستطيعوا أن تعتمدوا عليهم. شكرا جزيلا.

ألقيت الكلمة في قصر الاتحادية بالقاهرة، حيث استقبل الرئيس عبد الفتاح السيسي الرئيس الصومالي حسن شيخ محمود، وشهد الرئيسان مراسم توقيع بروتوكول تعاون عسكري للبلدين.