نص كلمة الرئيس السيسي خلال حفل تخريج دفعة جديدة من طلاب كلية الشرطة 10/10/2023

1:01

السيسي: يا محمد... محمد أبو الخير..

محمد أبو الخير: تحت أمرك يا فندم.

السيسي: من فضلك بس جنبًا سلاح لو سمحت.

محمد أبو الخير: طابور الخريجين...

السيسي: اتفضلوا يا فندم.. اتفضلوا..

محمد أبو الخير: جنبًا سلاح!

السيسي: اسمح لي بس إن أنا أبدأ آآ.. بسم الله الرحمن الرحيم، و.. أقدم التهنئة والتحية لأسر أبناءنا الخريجين النهار ده، ومش بس الخريجين الحقيقة.. (تصفيق) وأيضًا أبناءنا اللي موجودين ضمن طلبة الكلية وطالبات الكلية.

ومهم أيضًا إن أنا أذكر إن إحنا دايما لكل أسر شهداءنا، شهداء مصر، كل التحية وكل التقدير وكل الاحترام لكم.

وعايز أقول لكم إن إحنا كلنا في الدنيا اللي إحنا، يعني ناس بتيجي وتذهب، لها ما لها وعليها ما عليها.. إلا الشهيد.. بتفضل ذكراه عطرة لما قدمه من تضحيات من أجل وطنه.

وأنا عايز أقول لكم، أنا شايف الأسر موجودة هنا، وأنا حرصت على إن دايما في كل الحفلات بتاعة آآ يعني الشرطة والجيش، إن يبقى نسبة من أسر الشهدا تبقى حاضرة معانا، أولًا تقديرًا واعتزازًا بهم، وامتنانًا لما قدموه لنا.

وفي اليوم اللي إحنا بنقعد فيه ده بقول لهم أو اللي إحنا موجودين فيه النهار ده، يعني.. إحنا يؤلمنا، يؤلمنا جدًا سقوط كل شهيد أو أي شهيد في مصر. سواء كان من الجيش أو من الشرطة، أو حتى من المواطنين العاديين. ولكن، عزاءنا كلنا، مش عزاءكم إنتم، عزاءنا كلنا إن ده كان تمن، تمن مش بسيط، عشان الوطن ده اللي فيه النهار ده 105 مليون، يبقى عايش بفضل الله سبحانه وتعالى، وبفضل تضحيات شهداء مصر، اللي قدموهم أسر مصر.

 وكل مرة بقول الكلام دوت عشان أذكر نفسي وأذكر كل الشعب المصري بالتضحية الكبيرة ديت. ما فيش أغلى من النفس، وما فيش عند أي أسرة مصرية أغلى من إن هي تقدم آآ أبناءها من أجل مصر. تمن عظيم، بس كمان من أجل وطن عظيم.. من أجل وطن عظيم.

فـ.. من فضلكم، كل التحية لكم، كل التقدير لكم، وذكرى عطرة في الدنيا إن شاء الله، وفي الآخرة إن شاء الله. لأبناءنا الخريجين بقول لهم: بتمنى لكو التوفيق، بهنيكم، بدأت آآ مهمتكم بعد تخرجكم وبعد ما تحصلتم على ما يلزم من تدريب وعلوم تؤهلكم لأداء مهمتكم بشكل مناسب وبشكل آآ يعني يسعدنا كلنا، زي ما إنتم شوفتم كدا، وزي ما بقول إن إحنا النهار ده بتخرج آآ طلبة وطالبات من خريجي الليسانس، معاهم الدبلوم والماجستير، وده معناه إيه؟ معناه إن إحنا بنطور في أداء ومستوى التأهيل العلمي، بالإضافة طبعًا للتأهيل البدني اللي بيتم.

المهم إن إنتم ها تتعاملوا مع، مع مواطني مصر، سواء المواطنين اللي هم، المواطنين العاديين، أو حتى المواطنين اللي بيخرجوا عن السياق. مهم جدًا جدًا إن إحنا نلتزم وننفذ ونحترم دولة القانون والمعايير اللي إنتم اتعلمتوها هنا في الكلية، مع كل الناس، وفي النهاية في قانون بيحكمنا جميعًا.

بتمنى لكم التوفيق، وربنا يحفظكم ويوفقكم إن شاء الله. شكرًا جزيلًا. (تصفيق) شكرًا يا محمد اتفضل.

ألقيت الكلمة في القاهرة بأكاديمية الشرطة، حيث ألقى الرئيس عبد الفتاح السيسي كلمته أمام الدفعة الجديدة من طلاب كلية الشرطة، وذلك بحضور الدكتور مصطفى مدبولي، رئيس مجلس الوزراء، واللواء محمود توفيق، وزير الداخلية.