نص كلمة وتعليقات الرئيس السيسي خلال افتتاح محطة تحيا مصر بميناء الإسكندرية 15/6/2023
https://www.youtube.com/watch?v=XI4garUBoWw 45:10
السيسي: هل يا كامل لو اتدخلت تزعل؟
وزير النقل: تحت أمر حضرتك.
السيسي: لو اتدخلت تزعل؟
وزير النقل: يا فندم تحت أمرك.
السيسي: ارجع تاني.
وزير النقل: ارجع تاني.
السيسي: أنا عايز أقول لكو على حاجة مهمة هنا جدًا. الفريق كامل بيحكي الموضوع، فـ.. مش هو دي اللي إحنا ممكن نوصل بيها للناس إحنا عملنا إيه، ومش الهدف إن إحنا نوريهم إحنا بنعمل إيه، لكن نوريهم إن الرؤية عشان تتحقق ورا منها مش بس أفكار ولا جهد، لأ، ده حاجة كتير على بعضها، ونرجّع التاريخ، نقول إيه، إحنا الجزء الأولاني من المينا اللي كان موجود استمر على كدا بدون تغيير 25 سنة؟
وزير النقل: بالظبط يا فندم.
السيسي: طيب، أنا بس بقول كدا ليه؟ لأن إنتم مهم قوي تبقوا عارفين إن تحويل الدولة من حالة لحالة تانية، وعشان تاخد مكانها وتستفيد من موقعها، لا بد من بذل جهد، مش بـ، مش جهد آآ تخطيط، لأ، تنفيذ وأرقام كبيرة جدًا من الأموال تُضخ هنا.
بدليل إيه؟ إن المسار اللي كان موجود قبل كدا، إحنا طرحنا مينا السخنة قبل كدا الجزء اللي هو الأولاني ده لمستثمر يعمله، صح كدا؟
وزير النقل: تمام يا فندم.
السيسي: وبالتالي.. واتعمل، و.. و.. والحقيقة ده اتنفذ.. لكن، تطوير المينا علشان اللي إحنا نعمله كدولة، ونحققه ده كدولة، الـ، الـ.. كان لا بد إن الحكومة تخش تبتدي تعمل برنامج ضخم جدًا في بناء قدرات حقيقية للاستفادة من موقعنا اللي إحنا بنتكلم عليه.
المينا اللي بيتكلم عليه كامل، اللي بيتحول من، لـ، عشان نضيف له 10، 12 كيلو أرصفة..
وزير النقل: 18 يا فندم.
السيسي: 18 كيلو أرصفة تاني، ده.. في كام سنة؟ كام سنة؟
وزير النقل: بدأت، في كام سنة سيادتك؟ أقل من سنتين.
السيسي: خلوا بالكو.. فإنت، إنت بتضغط على نفسك وبتضغط على مواردك علشان تعمل كدا، بس إنت محتاج مضطر تعمل ده عشان تحط نفسك على خريطة بتقول فيها إن الدنيا بتتغير، وبتقول فيها إن في محاور بتُخلق أخرى، ومن حل الناس كلها إنها تطور وتستفيد من موقعها، ومش بس من موقعها، ومن قدراتها. أنا عندي قدرات مالية وعندي فوايض، من حقي إن أنا، مش أنا مصر، أنا أي إنسان، أنا أي دولة.. طب إحنا ها نقعد من غير ما نتحرك ونـ، ونسيب بلدنا، ونسيب إيه يا كامل؟
وزير النقل: بلدنا.
السيسي: بلدنا. أنا كان ممكن وهو كامل بيـ، بيقول كدا، ما هو ده الفكرة وخلاص كفاية. لكن إحنا لازم نقول "ليه"، ونشير إن 25 سنة ما زودناش. طب هي في عمر الدول حجم التطور يقعد بالـ25 سنة؟
وزير النقل: لا طبعًا؟
السيسي: طيب. وكامل قال إيه، إحنا زودنا 4 مليون متر، مش كدا؟
وزير النقل: تمام يا فندم.
السيسي: كام منهم عالبحر؟
وزير النقل: كلهم عالبحر.
السيسي: أنا بقول كدا عشان بس أفكر.. مش أفكر كامل.. إن الحتة دي، والحتة دي، دي ما كانتش موجودة قبل كدا خالص. مش كدا؟
وزير النقل: تمام يا فندم.
السيسي: طيب، بكام المتر؟
وزير النقل: كأرض؟
السيسي: آه.
وزير النقل: لا يقل، لا يقل عن 3000 لـ4000 دولار.
السيسي: طيب، في كام متر؟
وزير النقل: 4 مليون متر؟
السيسي: في 3000 بكام؟
وزير النقل: يبقى سيادتك تقريبًا 12 مليار
السيسي: بالمناسبة، ده اللي الكراكات والعربيات اللي شالته وجابته هنا.
وزير النقل: أيوة يا فندم، بالظبط كدا.
السيسي: بدل ما نرميه برة أو نرميه، أنا آسف، في عمق البحر المتـ، الأحمر، صح كدا؟
وزير النقل: أيوة يا فندم.
السيسي: لما اتطرح الموضوع عليا، قلت له يا كامل ما تعمله أرض، أنا قلت.. مش قلت كدا؟
وزير النقل: صح يا فندم، تمام يا فندم.
السيسي: طيب، يعني بتقول إنك تضيف 5، 6 مليار دولار، مش 12 بقى، نص الرقم. طب أنا عملت ده كله بكام؟
وزير النقل: كل ده يا فندم ب 60 مليار جنيه مصري.
السيسي: ماشي. يعني الـ5 مليار مش الـ12، أنا جبتهم.
وزير النقل: أيوة يا فندم.
السيسي: أنا جبتهم بالطريقة ديت.
وزير النقل: ده أنا جبتهم سيادتك بطرق أخرى كمان.
السيسي: إذن، واحد: المسار اللي إحنا مشينا بيه 25 سنة، كان مسار جيد، لكن فيه كمان حاجات ممكن تبقى أكتر من كدا. إتنين: إذا كنا عايزين نستفيد من موقعنا الجغرافي اللي هو موجود وعلى محور شريان رئيسي للتجارة العالمية، بيشيل 12، 13% من التجارة بتعدي قام مننا، طب أنا بعمل إيه؟ قاعد بقالي كتير، سنين كتير، اتفرج على ده وساكت، وأن إما أقصدش باللي أنا بقوله ده إن أنا، يعني، أتـ، أتـ، أتهم أي حد، لا لا، لا والله. لكن لما جت الفرصة بنـ إيه؟
وزير النقل: بنعملها.
السيسي: بنعملها. الكلام ده اتعمل هنا، ونروح عالبحر المتوسط تلاقوا جرجوب زيه، وتروح عالبحر المتوسط تلاقوا إسكندرية اللي إحنا بنتكلم فيه زيه، وتروح عالبحر المتوسط تلاقوا أبو قير أكتر منه، صح كدا؟
وزير النقل: سيادتك جاي كله..
السيسي: ما أنا عارف. أنا بقول علشان بس الصورة تبقى واصلة للمهتم، وللناس اللي في مصر تعرف إن المهم، المهم، ده. ده المستقبل. كان في شاب في البحيرة إمبارح بيقول لي أنا عايز أطمن على بكرة بتاعي، قلت له صحيح. كل اللي بنعمله مش عشانا إحنا.
وزير النقل: لبكرة.
السيسي: مش عشانا إحنا.
وزير النقل: للشباب وبكرة.
السيسي: عشان ولاد مصر وأحفادهم.
وزير النقل: إن شاء الله.
السيسي: فـ.. إحنا كنا، كان نفسي إن إحنا نقول خلاص الـ80% دول ولا خلاص إحنا بنفتتح ونشوف المينا زي آآ مينا السخنة يعني، اللي هو بقى مينا عالمي..
وزير النقل: سيادتك بعد سنة من النهار ده، وأنا بعلن لحضرتك قدام كل...
السيسي: كتير..
وزير النقل: بعد سنة سيادتك هتلاقي محطة هناك شغالة زي اللي سيادتك ها تشوفها في CMA النهارده.
السيسي: كتيييير يا كامل.. كتييير...
وزير النقل: ما هو سيادتك اللي أنا، أنا خلصت، ولكن هاتيشسون عايزة سنة عشان تعمل المينا الفوقية، اللي أنا عملتها في 6 شهور هنا، ولكن هم ده الناس ليهم نظامهم.
السيسي: طيب.. طبعًا طبعًا طبعًا.. أنا أقول على كل حاجة، آدي، أدي أول نقطة كان مهم إن أنا وكامل بيتكلم إن أنا يعين أدردش معاك فيها.
نقطة تانية مهمة تعرفوا.. إحنا قبل كدا كنا بنعمل، نقول للمستثمر خش، اعمل الحاجة، وندي له آآ صرف، مش إيه، فلما صرف بياخد..
وزير النقل: حق انتفاع.
السيسي: حق انتفاع. إحنا ما عملناش كدا في النموذج ده.
وزير النقل: لأ طبعا.
السيسي: النموذج ده إحنا قلنا لكل الناس إحنا ها نعمل حاجتنا ونطرحها، تيجي تشغلها، صح كدا؟
وزير النقل: تمام يا فندم.
السيسي: وندي الفرصة للجميع، ليه؟ لما أنا كنت بطلب من مستثمر واحد أو مستثمر أقنعه إن هو ييجي ويشتغل ويعمل الحاجة، شيء. وإن أنا أقول للناس أنا عندي مكان جاهز للشغل حاجة تانية، صح كدا؟
وزير النقل: تمام يا فندم.
السيسي: فإحنا اللي إحنا عملناه، لأ، مشينا بنموذج تاني. آه مكلف علينا، آه إيه؟
وزير النقل: مكلف شوية.
السيسي: مكلف علينا شوية، ولكن في النهاية بقيت أدي الفرصة لمشغلين آخرين، إن هم لو كانوا مهتمين إن هم ييجوا هنا يـ إيه؟
وزير النقل: يتفضلوا.
السيسي: يتفضلوا، وده اللي حصل. الكلام ده ها تلاقوه في إسكندرية، وها تلاقوه في أبو قير، وهاتلاقوه في العريش، وها تلاقوه في جرجوب، مش كدا يا كامل؟
وزير النقل: تمام يا فندم.
السيسي: وهتلاقوه في السخنة. اتفضل.
...
59:07
السيسي: معلش يا كامل ها نرجع تاني.
وزير النقل: تحت أمرك.
السيسي: إنت ال.. ده النهار ده بتاعنا مش كدا؟
وزير النقل: تحت أمرك يا فندم.
السيسي: أنا بس عايز أقول لكو حاجة على مينا إسكندرية، وأفكر الناس بإن إحنا لما كنا بنيجي نـ، يعني، نعيد ضبط الموضوعات في، في بلادنا، كان منها مثلًا مينا إسكندرية، وممكن أتكلم على مينا دمياط بردو. إحنا ما كناش بنعمل مينا في أرض فاضية، إحنا كنا بنعمل مينا أُهدرت آآ حدودها، وضاعت معالمها، أنا بقول كدا كلام آآ يعني معقول؟
وزير النقل: تمام يا فندم.. بالظبط كدا.
السيسي: طيب، إنت شيلت هنا خدت كام شقة في بشاير الخير عشان تفضي إيه؟
وزير النقل: عشان أفضي يا فندم منطقة أصلًا دي، نجع إسو والألمونيوم دول، 900 شقة، عشان أفضيهم من المكانين دول وأنقلهم في بشاير الخير.
السيسي: بكام؟
وزير النقل: بمليار جنيه يا فندم.
السيسي: طيب، الكلام ده بيتعمل في العريش دلوقتي؟
وزير النقل: أيوة يا فندم.
السيسي: أنا بقول للناس اللي في مصر كلها تعرف إحنا بدأنا نعمل حاجة مش في ظروف عادية خالص، لو قلت لكامل قول لي التاريخ بتاع مينا مثلًا دمياط وحجم قضايا التحكيم، قضايا التحكيم، اللي إحنا دخلنا فيها نتيجة الأحداث بتاعة 2011، أنا بقول كلام معقول؟
وزير النقل: تمام يا فندم.
السيسي: طب أنا بقول كدا ليه؟ ما هو في مستثمرين موجودين ما لهمش دعوة بالكلام ده خالص، مش كدا يا كامل؟
وزير النقل: ده صميم شغلهم يا فندم.
السيسي: يعني بقول لهم، بقول لهم اللي إحنا، بصوا إنتو بتحطوا إيديكو في إيدين دولة بتكافح علشان تحط نفسها على خريطة الدنيا، على خريطة إيه؟ الدنيا. واللي بقوله ده اللي قبل كدا اللي بيقول كامل من أيام سنين طويلة جدًا، الناس بنت ودخلت، ده الناس كانت بانية عمارة جوة، ومدرسة جوة المينا..
وزير النقل: سيادتك ها تشوفها دلوقتي.
السيسي: ما أنا عارف.. أنا بقول للناس الكلام ده مفكر ليه، لأن كامل ها يحاول بس عشان الوقت ما يبقاش كتير إن هو يتكلم على المستحدثات، لكن أنا اللي يهمني أقول التاريخ، طب أقول التاريخ ليه؟ عشان تعرفوا إزاي لما روحت جرجوب أنا ما شوفتش ده كله.. ما شوفتش ده إيه؟
وزير النقل: أرض فاضية.. أرض فاضية..
السيسي: لما روحت برنيس ما عملـ، ما اتعذبتش، ولا صرفت أكتر من إن أنا أعمل المنشأ نفسه، وأصعب حاجة إنك إنت تخش على مكان حصل فيه، يعني، تشويه كبير قوي، وفي تواجد لناس، وإنت مضطر إنك إنت تمشيهم، وعشان تمشيهم وماتظلمهمش، تقوم تصرف كمان.
عشان مينا إسكندرية يبقى مينا بالمستوى ده، وكامل يقول يبقى هو درة مصر، إحنا بنتكلم في أرقام كبيرة جدًا جدًا أنفقت عشان بس لـ، تسوية الموضوع.
هو النهار ده المنطقة اللوجوستية اللي كامل بيقول عليها دي، دي منطقة سبخية..
وزير النقل: سيادتك ها تشوفها دلوقتي..
السيسي: حاضر..
وزير النقل: آه..
السيسي: يعني أنا مش، مش هاممني، إنتو، ما هو النسب ها تتعمل كدا، بس ها تتعمل بكام؟ ها تتعمل بكام؟ عشان في الآخر وزير النقل يتكلم في محور لوجستي من السخنة لإسكندرية، في تفاصيل كتيرة جدًا جدًا جدًا، يعني كامل ما اتكلمش مثلًا على طريق السخنة اللي إحنا بنعمله عشان يخدم على، على المينا، صح كدا؟
وزير النقل: تمام يا فندم.
السيسي: ده بكام ومساحته قد، كام حارة، وقد إيه؟ يا جماعة، أنا لما بكلمكو كدا يا مصريين مش بكلم الناس بتوع النقل، فاهم يا حسن؟ أنا بكلم الناس بتوع مصر، تعرفوا يعني إيه دولة. الدولة مش أكل وشرب. الدولة مش أكل وشرب. الدولة دولة حاجة تانية خاااالص غير اللي إحنا بنتكلم فيه. وعشان كدا باجي إيه، أكتّر في الكلام.. أكتر إيه يا كامل؟
وزير النقل: في الكلام.
السيسي: اتفضل..
وزير النقل: بس هم سيادتك قايلين لي نص ساعة، فأنا، أنا ممكن أتكلم ساعتين تلاتة، بس قايلين لي نص ساعة.
السيسي: لا لا لا لا.. لأ اشرح.. لا لا اشرح.
...
1:13:44
السيسي: نرجع خطوة وسيبني أقول التعليق ده.
وزير النقل: إرجع تاني.. تحت أمرك يا فندم.
السيسي: أنا بس عايز أقول لكو إيه، هو كامل بيقول إيه، هنا ها تبقى المنطقة دي ها يتعمل فيها بعض الصناعات، صناعات لينا، وصناعات لشركات.
وزير النقل: تمام.
السيسي: يعني إيه؟ يعني عايز يقول لكو إن هنا ها تيجي حاويات من دول صناعية كبيرة تنزل حاجتها هنا، نعمل عليها إحنا شغل، وبعضها نعيد تغليفه، نعيد تنظيمه، عشان مراكب صغيرة تانية تشيله، أنا بقول كلام معقول؟
وزير النقل: بالظبط يا فندم.
السيسي: أنا بس بقول ليه لينا؟ مش للناس اللي عارفة الشغلة دي، أنا بقول للمصريين، إنت كنت فاكر إن أنا ممكن أعمل شغل للناس إزاي؟ أخلي الناس تشتغل في الحتة دي إزاي؟ أوفر فرص عمل هنا، مش باللي بيتعمل دلوقتي، اللي ها يتعمل بعد كدا، إزاي؟ إنك إنت تقول إن أنا آآ معلش ها أخرج عن السياق شوية، أنا كنت بقول دايما إن أفريقيا البنية الأساسية اللي فيها محتاجة إلى آلاف المليارات من الدولارات عشان تبقى دول، عشان تبقى إيه؟
وزير النقل: دول.
السيسي: دول. والـ، عشان الناس اللي فيها تعيش صحيح، وعشان تبطل اقتتال، وعشان الناس بتتقاتل ليه؟ ما فيش أمل، و... وعشان تعمل الأمل عايز تبني كتير قوي، مش تبني طريق، زي ما الناس كلها فاكرة إن إحنا بنعمل طريق. أنا بشرح الشرح ده ليا وللمسؤولين وللناس في مصر، وللناس اللي مهتمة في العالم تعرف الدول ليه مش مسـ، مش مستقرة، الناس عايزة تعيش، الناس عايزة إيه يا كامل؟
وزير النقل: تاكل وتعيش.
السيسي: عايزة تعيش، طب إزاي؟ فحد يقول لك إيه، إحنا بس عايزين نعمل ندي للناس فرصة للحريات أكتر، تتكلم. صح.. بس خلي بالك الناس مش ها تفضل تتكلم وتتفرج عليك..
وزير النقل: لازم يشتغل الأول.
السيسي: ها يسيبك، لا لا، ها يسيبك ويطلع عالبحر يهاجر، إن ما كنتش تعمله ده. الفريق كامل الموازنة أو الفلوس اللي اتخصصت له خلال الـ، فترة وزارة النقل، كام؟
وزير النقل: 1.9 ترليون.
السيسي: لأ قول رقم يتحفظ بقى.
وزير النقل: 2 ترليون.
السيسي: 2 ترليون. 2000 مليار جنيه. حد يقول لي على مدى الـ30 سنة اللي فاتوا وزارة النقل خدت كام؟ كام؟ أنا بقول لكو الكلام دوت عشان تعرفوا إن إحنا بنحفر آآ مستقبل بلدنا، مستقبل مين؟
وزير النقل: بلدنا، وإن شاء الله ها نعمله يا فندم.
السيسي: آه طبعا، وأنا.. أنا ما عنديش أي شك، خالص، زي ما أنا شايفك كدا.. بس أنا بحكي الحكاية ديت وللناس في مصر اسمعوني كويس، أنا مش آآ.. كل طوبة بتتعمل.. طوبة.. بتتعمل في البلد دي، أنا معاها وشايفها وورا الراجل، البيت اللي بيقول عليه العمارة اللي طلعت دي.. كلام قوي صعب أقوله.. قلت يتقبض عليه وما يخرجش إلا لما يسيب الأرض، كدا ولا.. ولا نسيت؟
وزير النقل: صح يا فندم.. لا يا فندم تمام.
السيسي: مش كدا؟ يعني معناه الرئيس قاعد واخد باله إن الفساد اللي اتعمل لا يمكن يسيبه؟
وزير النقل: طبعًا.
السيسي: واللي خد الأرض جوا المينا لا يمكن يسيبه حتى لو عمل ورق..
وزير النقل: مضروب.
السيسي: في غفلة من الزمان.. لو ما عملتش كدا.. إوعى تزعل يا كامل..
وزير النقل: لا يا فندم.
السيسي: يقدر المحافظ يعني كدا؟ لأ، خايف. يقدر وزير النقل يعمل كدا؟ مش إنت. لأ، خايف. لأ إيه؟ (تصفيق) خايف! اللي عايز يبني بلده ما بيخافش أبدًا إلا من ربنا سبحانه وتعالى اللي ها يحاسبه. أنا بقول الكلام ده وبشرح فيه كتير أكتر كتير من اللي إنت بتقول عليه، عشان إيه، عشان في كتير يقول لك إيه: إنتو بتعملوا ده ليه؟ الطريق ده بتعملوه ليه؟ إنت بتعمل الرمل، بتردم هنا ليه؟ بردم هنا ليه؟! المستقبل بتاع البلد دي إن ما كانش في بنية أساسية تليق بدولة، إنتو مش بتعملوا مستقبل خالص. مش بتعملوا إيه؟
وزير النقل: مستقبل.
السيسي: خالص. وبتقول إيه الأكل والشرب وبتاع، هو ده.. أقول حاجة صعبة؟ هو إحنا حرمنا الناس عشان نعمل ده يا كامل؟
وزير النقل: لا طبعًا.
السيسي: لأ. إحنا بنقسى على نفسنا شوية؟ أيوة. أرجو إن الضيوف اللي موجودين عندنا ما يتضايقوش من كلامي.. أرجو الضيوف اللي عندنا ما تضيقوش من كلامي.. أنا بكلم الناس في بلدنا، إنتم حاجة في بلادكم، وإحنا حاجة تانية، إحنا بنمثل الـ، جنوب المتوسط بتحدياته ومشاكله، وإنتو هناك في بلادكم خلصتوا الكلام ده من زمان، عندكوا شبكة سكك حديد، تربط القارة الأوروبية كاملة، عندكو شبكة طرق تربط القارة الأوروبية كاملة، عندكو مصانع، عندكو عندكو ده.. إحنا بنحاول نعمل حاجة عشان نعيش إحنا كمان.. عشان إحنا كمان نعيش.. اتفضل يا كامل.
...
1:23:09
وزير النقل: بدأنا يا فندم المحطة بتطهير الحوض المائي من المنتشلات. كان في سيادتك أجسام كتير جدًا غارقة، تقريبا 370 هدف كانوا غرقانين في منطقة الحوض. بمعاونة هيئة قناة السويس، وبشكرهم على كدا، الفريق أسامة ربيع مشرفنا النهار ده، وتعاون معايا، وطلعنا يا فندم كل الأجسام الغارقة دي، عشان...
السيسي: لا لا لا لا، لا يا كامل.. الموضوع ده، معلش يعني..
وزير النقل: أنا عارف.
السيسي: لأ ما أنا عارف إنك عارف يا كامل، أنا عارف إنك عارف.. كنت أنا والمهندس محلب بنزور هنا إسكندرية بافتتاح حاجة، فقلت له إيه الـ..
وزير النقل: 2016
السيسي: إيه اللي موجود في البحر ده؟ إيه المينا دي؟ إيه ده؟ إيه البلد دي؟ إوعى حد يزعل مني.. إيه ده إيه ده إيه ده؟! شيلوا الكلام ده! واتجاب هيئة قناة السويس وحاجات تانية، واتشالت الـ.. ومنها كانت...
وزير النقل: مركب رز غرقانة بالكامل.
السيسي: وفي بعضها كان فيها متفجرات تحت في البحر، صح كدا؟
وزير النقل: تمام يا فندم.
السيسي: أنا بقول كدا ليه؟ إنت النهار ده بتشوفها كدا، بس عشان يتشالوا دول، بفلوس، مش كدا يا كامل؟
وزير النقل: تمام يا فندم
السيسي: وعشان يتعمل ده كله بفلوس، عشان تبقى المينا مينا، مش "اسمها مينا"، تبقى إيه؟
وزير النقل: مينا حقيقي.
السيسي: مش "اسمها مينا". كان الأول اسمها مينا. طب لسه الحلم... دي خطوة من ألف خطوة..
وزير النقل: إن شاء الله.
السيسي: اتفضل.
...
1:42:54
وزير النقل: (...) محطة تحيا مصر 1، ودي يا فندم شكلها دلوقتي، دي اللي حضرتك أشرت ليها من شوية، دي اللي كان عليها شركة KGL الكويتية، وكان فيها قضية تحكيم، ودفعنا 260 مليون دولار من هيئة مينا دمياط، دفعناهم خدناهم قرض وبندفعهم دلوقتي من إيراد هيئة مينا دمياط، بندفع تقريبًا كل شهر تقريبا في حدود ما بين 8 لـ9 مليون دولار من عائد مينا إسكندرية، لو كان ده مش موجود، كانت الدولارات دي كلها كانت اتوفرت للبلد ولكن يعني قدر الله وما شاء فعل.
حلينا المشكلة مع أشقاءنا الكوايتة. دفعنا المبلغ. دخّلنا شركتين مصريتين وطنيتين، سيادتك ها تشوفهم دلوقتي، شركة المقاولين العرب وأركيريدون، بتشطب في هذه المحطة دلوقتي، متعاقدين مع يورو جيت وهابا جلويد وكونت شيب تحالف عالمي أيضًا، إن شاء الله بإذن الله ها نوري سيادتك الصور بتاعتها. إحنا بنسلم، ها نكون بنسلم في شهر 9 القادم المحطة دي ليورو جيت، ها تاخد أيضًا سنة بعد سنة ونص في التنفيذ البنية الفوقية، هم فعلًا اتعاقدوا على المعدات، اتعاقدوا على كل حاجة ها يخشوا في شهر 9 يشتغلوا معانا، يعني في 9 / 24 إن شاء الله، وكلام بقوله قدامكو نتحاسب عليه. هاتلاقي يورو جيت يا فندم مع كونت شيب مع هابا جلويد بيشتغلوا على هذه المحطة. طبعًا دي محطة البضايع العامة و...
السيسي: لا لا، بس يا كامل.. بص.. بص..
وزير النقل: تحت أمرك.
السيسي: أنا بس عايز أتكلم على محطة الحاويات ديت بتاعة تحيا مصر، اللي هو قال إن إحنا ده يعني كان في قضية تحكيم، والحقيقة أشقاءنا في الكويت وأنا بحييهم على إن هم يعني كانوا آآ..
وزير النقل: من 700 مليون دولار لـ260
السيسي: آه طبعا، الحقيقة هم يعني يعني تجاوبوا معانا. بش انا ها أقول لكو على حاجة، إحنا على مدى، يعني، الـ.. عمر الاتفاق ما اتعملش جزء كبير من الشغل، وكان، ما أعرفش كامل لو كان عنده صور من اللي كان موجود، والحديد اللي كان موجود مركون على جنب والكلام دوت، وشركة المقاولين وإيه اللي حصل فيها.
أنا بقول التاريخ ده مش عشان حاجة، عايز أقول إيه، إنت بتطرح الفرصة، وبتيجي ناس، لكن إحنا ممكن نكون إحنا السبب أيضًا في التعثر، يعني..
وزير النقل: أيوة يا فندم.
السيسي: إحنا مش بنجلد نفسينا ولا حاجة يا كامل، لكن بقول لكم، ليه؟ ليه المينا دي رغم إن إحنا اتعاقدنا، ما اتعملش؟ الحتة ديت يعني. طيب، وعشان كدا بقول إيه، ها تلاقوني دايمًا بحب أعمل أنا، مش كدا يا كامل؟
وزير النقل: تمام يا فندم.
السيسي: أحب أقول إيه: لأ أنا ها أعملها.. الناس تستغرب، يا عم ما تجيب ناس تعمل يعني..
وزير النقل: مستثمر يعمل.
السيسي: أقول ما أنا خايف إن إحنا وإحنا بنعمل ده، ويبقى في التزام تعاقدي مع المستثمرين، إحنا يعني الـ.. الناس اللي شغالة ممكن ما تمشيش..
وزير النقل: العقود يعني..
السيسي: مش كدا؟ ها أفكر كامل بحاجة وأفكر الناس وأقول لكو.. وإحنا في الحتة دي.. دي.. الأرض الزراعية دي..
وزير النقل: أيوة يا فندم.
السيسي: فكامل قلت له يا كامل ما تشوف مع أشقاءنا في دمياط إن هم يدونا، نشتري منهم الأرض دي، فكامل دخل معاهم فقال لي يا فندم هم عايزين 5 مليون جنيه في الفدان، مش كدا يا كامل ولا أنا نسيت؟
وزير النقل: ده ده في البداية، وبدأوا بعد كدا طموحهم وسقفهم زاد لـ15 مليون جنيه.
السيسي: (يضحك الرئيس) على كل حال.. فلما بيقول لي، قلت له لا لا لا، سي لهم الأرض بتاعتهم، واردم قدام، صح كدا يا كامل؟ مش كدا؟
وزير النقل: تمام يا فندم، أيوة يا فندم.
السيسي: أنا بقول للناس البلاد بتتعمل إزاي.. البلاد بتتعمل إزاي، لكل التنفيذيين يعرفوا البلاد ما بتتعملش بإنك تدي توجيه للموظف اللي عندك وتسيبه، تؤ تؤ تؤ تؤ، إنت قاعد معاه تحل له حتة حتة وتشجعه عشان يخلص لك شغلك، شغلك اللي هو إيه؟ شغل مصر، عشان المينا دي في النهاية في 24 زي ما كان بيقول كدا، اللي بقالها 20 سنة ما اتعملتش، تخلص في 24.
وزير النقل: إن شاء الله.
السيسي: مش كدا؟
وزير النقل: إن شاء الله يا فندم.
السيسي: أنا بقول الكلام دوت لأن إنتو المفروض إن هو ها يقول لكو المخطط بتاع المنطقة ديت، واللي إحنا كمان حطينا فيها منطقة آآ نستفيد باللي إحنا ردمناه، لأن إحنا قلنا لا يمكن نعمل حواجز عرضها.. ما أنا بعمل الحاجز بدل ما أعمله 50 متر، طب ما أعمله 300 متر، ما أنا كدا كدا بحط الـ..
وزير النقل: الدبش والصخور.
السيسي: الدبش والصخور، طب يبقى الردم ده أردمه، ويبقى خلقت حتة في البحر عمقها 2، 3 كيلو أقدر أستفيد منها، تغطي لي جزء من التكلفة اللي أنا عملتها هنا.
لما أنا اتكلمنا هنا على 50، 60 فدان، 100 فدان، في 5 بـ500 مليون جنيه. قلت له الردم يكلفنا كام؟ ونسيب الناس تزرع أرضها، ونسيب إيه؟
وزير النقل: الناس تزرع أرضها.
السيسي: وسيب الناس تزرع أرضها، وردمنا الأرض، شكرًا خلاص. يلا يا كامل.
...
1:56:05
السيسي: ها أقاطعك كمان مرة..
وزير النقل: تحت أمرك يا فندم.
السيسي: طيب، أنا بس ها أفكر كامل وأفكر نفسي وأفكر الناس، بيقول لك إيه: هو إنت عملت طريق طابا الـ، النفق ليه، 350 كيلو، مش كدا يا كامل؟
وزير النقل: تمام يا فندم.
السيسي: كويس، وعملت ليه عرضي 1 من بورسعيد للسويس، صح كدا يا كامل؟
وزير النقل: تمام يا فندم.
السيسي: أنا بقول الكلام ده لأن إحنا بنعمله كان كتير من الناس إحنا عملنا عرضي 1 ده..
وزير النقل: 1 و3 و4
السيسي: آه، لأ أنا بتكلم ساعة لما كنا بنعمله وإحنا بنعمل قناة السويس.
وزير النقل: تمام يا فندم.
السيسي: وإنت كنت يا كامل رئيس الهيئة ساعتها، وقلت لكو ما تعملوا عرضي 1 بالمرة مع الردم اللي بيطلع، صح كدا؟
وزير النقل: بالظبط يا فندم.
السيسي: طيب، أنا بقول بقى، لو أنا النهار ده كنت عايز أنقل من طابا لغاية بورسعيد، كنت ها أنقل إزاي؟
وزير النقل: ما كانش عندي طريق.
السيسي: كنت ها أنقل إزاي؟ مش كدا؟
وزير النقل: تمام يا فندم.
السيسي: أنا بـ، بقول الكلام دلوقتي ليه؟ لأن هو وقته دلوقتي الناس تعرف ليه إحنا بنعمل ده. ليه عملنا طابا النفق، وعملنا ليه العرضي 1 وعرضي 2 وعرضي 3، وبقية المحاور الأخرى شرم الشيخ النفق بردو اللي اتعمل الـ350.
وزير النقل: 350 كيلو بردو بالمناسبة.
السيسي: أيوة طبعا. اتفضل يا كامل.
...
2:00:20
السيسي: خليني أتكلم ما دام إنت اتكلمت على اليخوت أقول للمصريين، لأن الناس فاكرة إن موضوع اليخوت ده موضوع ترف. إحنا موجود في البحر المتوسط تقريبًا 500 ألف يخت. حصتنا فيهم يعني مش عايز أقول ما فيش يعني. في دول تانية بتاخد 30% من الكلام دوت، وده حقها، اللي يشتغل، يـ إيه يا كامل؟
وزير النقل: ياخد.
السيسي: ياخد، واللي ما يشتغلش وينام، خليه نايم بقى. فإنت عشان تعمل ده، كان قبل كدا مدة اليخت في مصر عشان.. قد إيه يا كامل؟
وزير النقل: كان سيادتك لما يقعد ياخد تصديق، 28 لـ30 يوم.
السيسي: خلي بالكو، آخر مرة قالوا لي ده وزارة الاتصالات مش عارف بتاخد إيه، قلت لهم لا لا لا، 30 دقيقة زي العالم ما بيشتغل، زي إيه؟
وزير النقل: العالم كله ما بيشغل؟
السيسي: عشان إيه؟ إنتو بتتكلموا على تشغيل ناس؟ طب ها تشغلهم إزاي إن ماكانش يبقى عندك 20، 30 مارينا مظبوطين، زي على أفضل أنساق ومستويات الـ، الـ، المراين في العالم، وتدي له نفس الاشتراطات اللي هو بيشوفها في أي دولة تانية. إزاي يعني، ها تاخد إزاي؟ وتشغل ناس في الموضوع وتدرب وتعلم ناس ما كانتش عندها الخبرة اللازمة للـ، للشغلانة ديت؟
فـ، طب، في العريش، اللي كان المينا القديم المثلث دوت، عشان أعمل ده كله، أقوم ألاقي في ظهير، يعني، ناس موجودة، فنعوضها، مش كدا يا كامل؟
وزير النقل: تمام يا فندم.
السيسي: نعوضها، وأنا بقول لهم وهم دلوقتي سامعيني.. إحنا مش بنعمل ده ضدكو، إحنا بنعم لده لأجل بلدنا ولأجلكو، عشان تلاقوا شغل ليكو ولأولادكو ومستقبل يليق بالـ.. بالعريش، وكل سينا يعني.
وزير النقل: إن شاء الله.
...
2:22:21
السيسي: طب بس اسمحوا لي إن أنا أقول كلمتين، أشكر فيهم الفريق كامل ووزارة النقل، وكل أجهزة الدولة اللي شاركت معانا في إن إحنا.. اتفضل يا كامل، اتفضل.. في إن إحنا نشوف اللي إحنا بنشوفه واللي لـ.. إن شاء الله اللي إحنا ها نشوفه كمان مش ها يفوتني إن أنا أرحب بكل الضيوف اللي موجودين معانا. اللي موجودين معانا من الشركات إذا كان هيتشسون أو CMA أو كل شركة أخرى من غير ما أذكر أساميها، إنتو مرحب بيكم في مصر، ومستعدين إن إحنا نتعاون معاكم، تعاون جاد ومخلص من أجل العمل ومن أجل التنمية لينا وليكم والفايدة المشتركة لينا وليكو.
إحنا في مصر جادين جدًا جدًا في كل شيء بنعرضه عليكم، وفي كل التزام بنلتزم بيه قدامكم. برحب بيكم أهلًا وسهلًا، وسعداء إن إنتم موجودين معانا، ومتشرفين إن إنتو موجودين معانا، وبنتعلم منكم، و.. بنتمنى إن إحنا باللي إحنا شوفتوه النهار ده، تعرفوا الخريطة اللي إحنا شغالين بيها، ومدى الجدية اللي إحنا بنتحرك فيها في تنفيذ، مش ها أقول حلمنا، لكن اللي هو الفكرة بتاعة تحويل مصر إلى مركز عالمي للتجارة العالمية.
ما تنسوش قناة السويس، ما تنسوش البحر الأحمر والبحر المتوسط، شبكة المواني موجودة على البحر الأحمر، شبكة المواني موجودة على البحر المتوسط، بالإضافة طبعًا لكل الخدمات أو البنية الأساسية اللازمة اللي تقدر تساهم في إنجاح الفكرة اللي إحنا بنتكلم عليها.
مرة تانية بشكركم، وبقول للمصريين، ها نفضل نشتغل.. واللي إنتو بتشوفوه ده عبارة عن خطوة في وزارة النقل، لكن كل وزارة من وزارات الدولة فيها شغل بالمستوى ده، مش على قد آآ يعني وزارة النقل بس. شكرًا جزيلًا. (تصفيق)
...
3:14:30
السيسي: اسمح لي بس نرجع تاني للخطوة اللي فاتت، وأنا عايز أقول في النقطة ديت وإحنا بنتكلم فيها وشغالين فيها قلنا إن الحوكمة وموضوع إن يبقى في نظم إلكترونية شغالة معانا، ها تخليكو شايفين كويس قوي، مش كدا يا دكتور معيط؟
وزير المالية: مظبوط يا فندم.
السيسي: وحتى اللي إنت بتتكلم عليهم الـ4 بنود دول، إحنا شوفناهم كدا، شوفناهم من خلال المنظومة الإلكترونية، وريتنا هل المعايير والشروط تنطبق على دول ولا لأ، إذا كنت أنا فاهم.
وزير المالية: مظبوط، وهو ده السبب إنه يا إما المعايير والشروط ما انطبقتش عليه، يا إما إنه خالف المعايير والشروط، يعني هو سجل وفقًا لمعايير وشروط، لما جه جاب الحاجة مصر، ما لقانهوش عن هو نفذ وفقًا للي هو التزم بيها.
...
ألقيت الكلمة في محافظة الإسكندرية، حيث افتتح الرئيس محطة تحيا مصر متعددة الأغراض بميناء الإسكندرية، وذلك بحضور الفريق كامل الوزير، وزير النقل، والدكتور محمد معيط، وزير المالية، وعدد من الوزراء والمستثمرين.
...