نص كلمة السيسي خلال احتفالية عيد الميلاد المجيد 6/1/2026

بسم الله الرحمن الرحيم، آآآ طب ممكن نقعد بقى عشان أنا هقولكوا كل سنة وإنتو طيبين، و ويعني.. فمش عايز أعمل إزعاج لكم أكتر من كدا.. اتفضلوا استريحوا.. اتفضلوا استريحوا لو سمحتوا.. اتفضلوا، اتفضلوا..

بسم الله الرحمن الرحيم،

الحقيقة، خلوني أبدأ كلامي بإن أنا أحمد ربنا على إن إحنا إن شاء الله منذ عام 2015.. 2015.. وإحنا بنيجي نحتفل مع بعضنا بالعيد، بهني قداسة البابا، وبهني الكنيسة، وبهني كل المواطنين، أهلنا المسيحيين والمصريين، وكل الناس اللي في العالم.. كل سنة وإنتوا طيبين، وعيد سعيد علينا كلنا، وربنا يحفظنا، ويجعل دايمًا أيامنا كلها أعياد وأفراح، اللهم آمين. (تصفيق)

كنت بقول إن إحنا.. في 2015 كان أول مرة أتشرف بالزيارة دية، وأحتفل وأشوف.. المحبة اللي بينا.. المحبة اللي بينا، وعـ.. وفي الفترة من 2015 للنهاردا، حصل حاجات كتير.. حصل حاجات كتير وأحداث كتير.. وأيام صعبة كتير، لكن آآ كل مرة أنا بقول الكلام دوة، إن إحنا بنقول إن كل ما يكون شعب مصر، كلنا مع بعض، بنحب بعض، بنخاف على بعض، بنحترم بعض.. بنحترم بعض.. (تصفيق)

ومنسمحش مش هقول لحد، ما نسمحش لأنفسنا أبدًا إن إحنا علاقتنا كشعب مصر بلا أي تمييز تفضل علاقة طيبة، ونحافظ عليها ونطورها ونعززها، هو ده الرصيد اللي إحنا لازم نخلي بالنا منه ونحافظ عليه، ومنديش فرصة لحد أبدًا إنه يتدخل بينا.. مش عايز أقول بينا، لا لا.. مفيش بينا، مفيش إنتوا وإحنا، مفيش إنتوا وإحنا، فيه إحنا، إحنا كلنا، واحد. (تصفيق)

فا.. كل مرة أقولكوا الكلمة دية عشان آآ.. مرة تانية بقولكوا إن قداسة البابا له تقدير خاص في نفسي، واحترام شديد جدًا لشخصه العظيم، وليكوا كلكوا، وربنا يحفظكوا.. وربنا يحفظكوا، ويحفظ بلدنا، و..عمع.. مش عايز آخد الوقت بتاع قداسة البابا من بدري ويعني حرام عليكوا يعني.. فا.. عام سعيد، عام سعيد.. عام سعيد عليكوا، وعلينا كلنا، وعلى الدنيا كلها، ونقول يا رب إن العام ده، ونقول يا رب إن 2026 يبقى عام.. بفضل الله أفضل علينا وعلى كل الدنيا.

وبقول للمصريين، إوعوا تقلقوا أبدًا، إوعوا تقلقوا أبدًا، بس بشرط، خليكوا دايمًا مع بعض، خليكوا دايمًا مع بعض، وإوعى حد يحاول أبدًا يخلينا أبدًا نختلف أو حتى نإذي نفسنا وبلدنا، دي وصيتي ليكم، لينا كلنا، لينا كلنا، أي مشكلة بفضل الله سبحانه وتعالى... (تصفيق) أي مشكلة بفضل الله سبحانه وتعالى بتتحل، بس تفضل مصر.. بخير وسلام، وشعبها بخير وسلام.

مرة تانية، مش عايز أطول عليكم، كل عام وإنتم بخير وسلام وسعادة (تصفيق وهتافات) وقداسة البابا بخير وسلام وسعادة، وإحنا.. بنبقى فرحانين أوي وإحنا موجودين معاكم، وربنا يفرحكوا دايمًا، ويفرح مصر، ويفرح الدنيا كلها، اللهم آمين. كل سنة وإنتوا طيبين.. كل سنة وإنتوا طيبين، متشكر جدًا. (تصفيق وهتافات)

أُلقيت الكلمة في القاهرة، بكاتدرائية ميلاد المسيح بالعاصمة الإدارية الجديدة، حيث شارك الرئيس عبد الفتاح السيسي في الاحتفال بعيد الميلاد المجيد، وذلك بحضور قداسة البابا تواضروس الثاني بابا الإسكندرية وبطريرك الكرازة المرقسية، ولفيف من أحبار الكنيسة، وجموع المصلين.