نص كلمة السيسي خلال تناوله الإفطار مع أهالي قرية المعصرة بمركز ملوي بالمنيا 2/3/2023

0:59

السيسي: كل سنة وإنتو طيبين.

الأهالي: وحضرتك طيب.

السيسي: سعيد إني أشوفكم والله.

مواطنة 1: باسم المرأة الصعيدية في قرية المعصرة، بنرحب بفخامة معاليك في قرية المعصرة، حضرتك أول مرة تنزل محافظة المنيا، تشريف لينا ولأهالينا ولكل شمال الصعيد إن إنت حضرتك معانا في القرية (تصفيق)

السيسي: متشكر جدا.

مواطنة 1: وشكرا، وشكرا كمان على مشروع حياة كريمة اللي أضاف ليما مزيد من التطورات. (تصفيق وزغاريد)

السيسي: متشكر.

مواطن 2: أهلا وسهلا بسيادة الرئيس المحترم.

السيسي: متشكر.

مواطن 2: سيدي ورئيسي عبد الفتاح السيسي، أهلا وسهلا في مركز ملوي، وإحدى قرى مركز ملوي التابع لمحافظة المنيا، فشكرا يا سعادة الريس، وربنا يحفظك من أمامك ومن خلفك ومن يمينك ومن شمالك ومن فوقك وتحت الأرض يا سعادة الريس. (تصفيق)

السيسي: متشكر جدا، شكرا، ربنا يسمع منك... الدعوات دي دعوات جميلة، والاستقبال ده استقبال يسعدني ويشرفني. والله استقبالكم ده، والكلام الحلو اللي إنتو بتقولوه، اللي هو أكيد طالع من قلبكو يعني إن شاء الله، حاجة تفرحني وتشرفني جدا. ويا رب، يعني، أختنا من المعصرة بتقول لي، أو من القرية بتقول لي إنت أول مرة تنزل المنيا، ده صحيح. أنا عايز أقولك، وأنا قلت الكلام ده في ال.. يعني في سوهاج وفي.. في ال.. في المحافظات اللي أنا بنزلها دلوقتي يعني.. أنا بتمنى، بتمنى إن أنا أنزل وأشوف كل الناس، صدقوني يعني، لأن أنا بحب الناس، وأنا كمان زي الناس، زيكو كدا. (هتافات وتصفيق) آه، آآآه، صحيح يعني.. يعني.. مش آآ، مش في برج كبير ولا حاجة. (مواطنة تتكلم بصوت غير واضح) ربنا يجبر بخاطرك إنتي، ربنا يجبر خاطرك إنتي. (تصفيق)

...

السيسي: إحنا مش ها ننسى، يعني أختي بتقول أنا والدة شهيد، وإنتو قلتو الاستقرار اللي حصل، الاستقرار اللي حصل ده تمنه ولاد كتير من ولاد مصر، وبنات كمان من بنات مصر، وإنتو شوفتو هنا في المنيا وفي كتير من محافظات مصر إزاي إن هم عملوا الفتنة عشان يخربوا بلادنا ويخلونا إن إحنا نخش مع بعضنا في حاجة والبلد كلها تسعنا كلنا وتسع قدنا 10 مرات.

لكن اللي دفع التمن في الاستقرار مش الإرادة بتاعتنا، لأ، كل أسرة مصرية زي أختي اللي قدمت ابنها، وما حدش شافها، يعني ما نعرفهاش، إحنا عرفناها بس... (تتحدث بصوت غير واضح) أنا أتشرف بيكي.. ربنا، ده أنا اللي أتشرف بيكي، مهما كرمنا، مهما كرمنا ما عملناش حاجة.. ويديكي العافية والصحة ويصبرك ويراضيكي.

...

مواطنة 3: أنا واحدة من المجتمع المدني وإيدي في الأرض زي ما بيقولوا، حياة كريمة ناجحة عندنا بطريقة حلوة جدا، التحالف الوطني عمل شغل جامد قوي في أرض الميدان، كمان برنامج فرصة اللي ها يبدأ يتنفذ الفترة اللي جاية في المنيا، بصراحة يا ريس تصقيفة كبيرة للريس على البرامج... (تصفيق)

أنا نفسي، نفسي أوصي حضرتك في الرقابة والمتابعة، إحنا شغالين حلو قوي بس محتاجين بردو نأكد شوية على الرقابة والمتابعة وإحنا جوة المنيا. شكرا يا ريس.

السيسي: طب بصي يا.. يا.. يا أخت فاطمة.. أنا عايز أقول لك على حاجة، إنتي بتتكلمي، إوعي، الرقابة على مين، ومتابعة على مين؟ ورقابة من مين ومتابعة من مين؟ ما اللي شغالين دول مين؟ مييين؟

مواطنة 3: إحنا يا ريس.

السيسي: إحنا، يعني اللي بيتكلموا، اللي إحنا بنتكلم عليهم دول.. وده مش معناه إن ما يبقاش في رقابة ومتابعة، لا لا ما أقصدش، لكن أقصد أقول انتبهوا..

مواطنة 3: بالظبط كدا يا ريس.

السيسي:  إحنا كلنا محتاجين ننتبه إن إحنا اللي بنشتغل واهالينا اللي بيشتغلوا، فإن قصروا، فمش الحكومة، لأن الحكومة مش الناحية التانية، الحكومة مش الناحية التانية، وده كان أمر خطير جدا اتعمل خلال السنين اللي فاتت قوي، وهو ده اللي أدى إن البلد دي يحصل فيها مشكلة كبيرة في 2011 إن هو خلى الحكومة في حتة وخلى بقية الشعب في حتة، فعمل الحكومة عدو، خلي بالك يا أخت فاطمة، عمل الحكومة إيه؟

مواطنة 3: عدو.

السيسي: عدو. فالعدو نعمل فيه إيه؟ نهده. أيوi. ما هي الحكاية اتعملت كدا. فلو إحنا ما خدناش بالنا إن اللي إحنا.. هو الجهاز الإداري في الدولة فيه كام مليون؟ 6 مليون. يعني ال 6 مليون دول كام أسرة؟ 6 مليون أسرة. يعني كام؟ 30 مليون. 30 مليون تقريبا لو الأسرة دي 5. زوج وزوجة ومعاه من اتنين لتلاتة أو أكتر. 30 مليون. طب النهار ده لو هم.. في هنا موظفين قاعدين معانا طبعا، مش كدا؟

مواطنة 3: تمام.

السيسي: في هنا.. مسؤولين؟ أكيد. فالنهار ده تقولي لي إيه، أنا هانتهز الفرصة إنك موجود، وها أكد على كل مسؤول معانا في المنيا يخلي باله من شغله.

مواطنة 3: تمام يا ريس.

السيسي: يخلي باله إيه؟ من شغله (تصفيق) يبقى إحنا كدا.. يبقى إحنا كدا بنتكلم كلام إيه، مناسب لل، لل، للظروف الحياة بتاعتنا. طب ليا تقولي لي كدا بردو؟ آه أسمع منك، ويا رب أقدر أعمل.

مواطنة 3: يا رب يا ريس.

السيسي: لكن كمان نقول لبعضنا هنا، ونقول في كل حتة في مصر، اللي أخويا ولا أبويا أو ابني اللي شغال في مكان ما من فضلك البلد محتاجة 3 حاجاة منك: محتاجة منك إخلاصك، ومحتاجة منك أمانتك، ومحتاجة منك عملك. محتاجة منك إخلاصك، لإيه؟ لشغلك. ومحتاجة منك أمانتك في إيه؟ في شغلك. محتاجة منك إيه عملك، في إيه، في شغلك اللي بتشتغله.

وإنتو بتشوفوا دول كبيرة أكبر مننا، وأغنى مننا، بتعاني من ده، إحنا بنتمنى من الله سبحانه وتعالى إن إحنا نفضل متماسكين شعب ودولة. شعب وإيه؟ ودولة. وإحنا من جانبنا بردو كدولة بنحاول نخفف ما أمكن على الناس، بإجراءات كتير بنعملها، مش إحنا اللي بنعملها بس، إحنا مع بعض بنعملها. طول ما إحنا بخير وسلام، خلي بالك من الكلمة دي، ليكو كلكو يا مصريين، طول ما إحنا بخير وسلام وأمان كدا، الحمد لله رب العالمين. الحمد لله رب العالمين. (تصفيق)

متشكرين، كل سنة وإنتو طيبين . (تصفيق) سعيد بيكم واتشرفت بيكم، ويا دينا، اطمني على بلدنا، بيكو، اطمنوا على مصر بيكو إنتو. مصر قايمة بيكو إنتو، وبتطلع لقدام بيكو انتو، وها تطلع قدام بفضل الله بيكو انتو. شكرا. شكرا. شكرا. (تصفيق)

...

ألقيت الكلمة في قرية المعصرة، بمركز ملوي، محافظة المنيا، حيث شارك الرئيس أهالي القرية في تناول الإفطار.

...