نص تعليقات السيسي خلال تفقده أعمال تطوير بعض الطرق والمحاور بالقاهرة 9/9/2022
مهندس 1: سيادتك صدقت على إنشاء العديد من المحاور لتحسين وربط مناطق شرق القاهرة وجنوب القاهرة ومناطق غرب القاهرة بمناطق القاهرة الجديدة، ومنها إلى العاصمة الإدارية.
لو اتكلمنا يا فندم على محور ياسر رزق، محور ياسر رزق يا فندم الهدف من إنشاؤه هو نقل الكثافات المرورية وتوزيعها في مناطق وسط البلد، لأن الناس يا فندم بتمشي سيادتك على طريق صلاح سالم والأوتوستراد ويرجعوا إلى الطريق الدائلي، فخلقنا محور يا فندم جديد، بيبدأ من تقاطعه مع طريق صلاح سالم بطول 9 كيلومتر، تم الانتهاء من المرحلة الأولى يا افندم اللي سيادتك كنت مشرفنا عليها من شهرين بطول 2 كيلو متر، كانت قابلتنا فيها تحديات تم التنسيق مع كافة أجهزة الدولة.
بالنسبة للمرحلة التانية يا فندم دي طولها 7 كيلومتر، بتبدأ من نهاية شارع 9 وحتى الربط على محور سميرة موسى أسفل نفق الأسمرات.
محور ياسر رزق ده يا فندم بردو، إن شاء الله، جاري أعمال ربطه بكورنيش النيل، المعادي، عن طريق محور ربط الحضارات بكوبري الدكتور صلاح الشاذلي، يتم تنفيذ كوبري يا فندم في المنطقة دي بطول 900 متر، يصل ارتفاعه إلى 45 متر يا فندم من الأرض الطبيعية، ثم طريق سطحي حتى الربط على ياسر رزق.
بالنسب يا فندم لطريق كورنيش المقطم، بيبدأ من الأسمرات يا فندم وبيعتبر محور موازي لشارع 9 هايخفف الضغط عليه إن شاء الله. والطريق ده يا فندم بطول 7 كيلومتر حتى الربط على نهاية شارع 9، تم نهو الأعمال فيه يا فندم بنسبة 80%، متبقي بس يا فندم القطاعات اللي سيادتك إن شاء الله هاننفذ فيها الحوائط الساندة عشان نطمن إن هو هايبقى ما فيهوش أي مشكلة إن شاء الله.
طريق كورنيش المطقم ده يا فندم بدايته راعينا سيادتك إن هو يتربط بمحور حسب الله الكفراوي، ويا فندم تنفيذ محور ياسر رزق وتنفيذ طريق كورنيش المقطم بالعرض على سيادتك، سيادتك صدقت إن إحنا نوحد الاتجاهات بعرض 7 حارة مرورية يمين وشمال محور حسب الله الكفراوي، ويبقى في دوران واحد فقط أسفل طريق الدائري، ثم الربط على مناطق زهراء المعادي.
السيسي: إحنا حررنا، ومش حررنا بس.. حررنا وسهلنا الحركة في شرق القاهرة تمام الكلام اللي إحنا كنا قلنا عليه، ثم ابتدينا نقرب شوية بشوية، لغاية لما وصلنا إحنا بنتكلم على رمسيس وباب الخلق وعابدين وقصر القبة وشبرا الخيمة، اللي هي المناطق اللي مليانة زحمة.
طب إحنا عملنا كدا ليه؟ إحنا قلنا إن الناس هانحاول نيسر الحركة في القاهرة، مش كدا؟
مهندس 1: بإذن الله يا فندم.
السيسي: شرق وغرب. شرق القاهرة وجنوب القاهرة، وغرب القاهرة اللي بنعمله دلوقتي في فيصل والهرم والجيزة، مش كدا؟
مهندس 1: تمام سيادتك.
السيسي: والشيخ زايد.. طيب، هنا بنعمل كدا ليه؟ عشان كل الهم أو كل المصلحة اللي إحنا بنعملها إن حجم الحركة اللي داخل الكتلة السكانية الضخمة اللي جوة القاهرة اللي ما كانش في حل، لأن إحنا لو حبينا نعمل تحرير لحركتها بشكل زي اللي بنعمله هنا، هانشيل حجم ضخم جدا من المنشآت، صح كدا؟
مهندس 1: تمام يا فندم.
السيسي: فقلنا إيه.. نخلي، نحررلهم الحركة اللي رايحالهم، بحيث النهاردا اللي يخرج، يخرج بسرعة.. اللي يخرج إيه؟
مهندس 1: يخرج بسرعة.
السيسي: يخرج بسرعة، لما يخرج بسرعة يخلي، يخفف الضغط ما أمكن على الـ إيه؟ على المنطقة اللي في النص. مع الوضع في الاعتبار إن إحنا مش ساكتين، مش ساكتين يعني إيه؟ الـ.. إحنا بنتكلم على مدينة المقطم.
مهندس 1: أيوة يا فندم.
السيسي: مدينة المقطم كان بيخدمها شارع 9 بس.
مهندس 1: بالظبط يا فندم.
السيسي: وبالمناسبة يا أحمد..
مهندس 1: اتفضل يا فندم.
السيسي: أنا كنت قلت المرة اللي فاتت وإنتو في شارع 9، أنا عارف إنه صعب إن إنت تشيل حاجة فيه. لكن على الأقل حسنوا من خواص الشارع.
مهندس 1: تم نهو يا فندم أعمال التخطيط بالكامل وهايتم عرضها على سيادتك..
السيسي: طيب.
مهندس 1: باستغلال كل المسطحات المتاحة إن إحنا نحقق عرض بدل ما هو 5 حارة يبقى 6 حارة إن شاء الله..
السيسي: ما أمكن.
مهندس 1: بإذن الله.
السيسي: يبقى شارع 9 موجود، ثم بعد كدا لما نخلص إن شاء الله محور ياسر رزق والكورنيش هايبقى الحركة للمقطم إيه؟
مهندس 1: يسيرة إن شاء الله بإذن الله.
السيسي: بقت يسيرة. سواء كان للناس اللي في المقطم أو لل إيه، لل، للمارين من خلاله، مش كدا؟
مهندس 1: تمام يا فندم.
السيسي: آه. وبالمناسبة، أنا سعيد جدا إنكو إنتو بتعملوا التاكسيات الخرسانة ديت عشان ما يحصلش انهيارات بعد كدا.
مهندس 1: بالظبط يا فندم.
السيسي: مش كدا؟
مهندس 1: لحماية الأجناب يا فندم.
السيسي: الكلام ده مهم قوي إن الناس تعرفه.
مهندس 1: الظبط يا فندم.
السيسي: رغم إن دي تكاليف إيه؟
مهندس 1: كبيرة جدا يا فندم.
السيسي: كبيرة جدا، وأنا شايف إنه بيتعمل هنا بردو. مش كدا؟
مهندس 1: بالظبط يا فندم بيتعمل هنا عشان نربط كمان مناطق الهضبة الوسطى يا فندم بمناطق كورنيش المقطم.
السيسي: أنا عايز أقول حاجة..
مهندس 1: اتفضل يا فندم.
السيسي: للناس اللي بتسمعنا هنا.. أي حاجة إحنا بنعملها هنا إحنا بنعملها طبقا للأصول على أعلى مستوى..
مهندس 1: بالظبط يا فندم.
السيسي: مش بنعمل موضوع، يعني.. لأ، مش بنشوف الطريق؟ الناس لما بردو النهاردا عشان أعمل حوايط ساندة كيلو، دي أرقام..
مهندس 1: كبيرة جدا يا فندم.
السيسي: ما أنا عارف.. عشان في النهاية تيجي تجد الناس الحركة ديت سهلة ليها، يمكن الناس تقولك التكلفة دي كتير، يمكن، وهي كتير حقيقي. لكن في مقابل حجم الحركة وتخفيف الآثار بتاعة التلوث، الكلام اللي إحنا بنتكلم فيه. الدولة اشتغلت فيه من بدري قوي. وأنا عايز أقول إيه، الكتلة دي بالكامل، اللي كان يصعب الحركة فيها، أنا عايز أقول لناس يا ترى إحنا بنتحرك فيها إزاي؟ طب كان ممكن نتحرك فيها من غير الجهد اللي اتعمل ده والمشاريع اللي، مئات الكباري والطرق اللي اتعملت في المنطقة ديت وبتتعمل في كل حتة في القاهرة على الأقل عشان نخفف الأثر بتاع الزحام الـ 20 مليون مواطن اللي موجودين..
مهندس 1: تمام.. يا فندم كمان إحنا سيادتك بنستغل الفرصة دي بإن إحنا بنجدد جميع البنية التحتية الموجودة في المنطقة بالكامل.
السيسي: إحنا هانخلص إمتى؟
مهندس 1: إن شاء الله 30 – 12 هانخلصه كله يا فندم، بس ها نستأذن سيادتك إن القطاعات اللي فيها الحوايط الساندة بس أعمال التصميم جارية وهانقدم لسيادتك مخطط زمني في خلال يعني فترة قريبة إن شاء الله مش ها نتأخر كتير، ولكن إحنا ها نفتح الطريق إن شاء الله في التوقيت اللي سيادتك أمرت بيه، يعني 30 – 10 هايبقى في اتجاه مفتوح، حتى لو في بعض القطاعات فيها أعمال..
السيسي: فاهم..
مهندس 1: بنفصل عليها الحركة.
السيسي: طيب..
مهندس 1: عشان بس يبقى الطريق بردو شغال إن شاء الله ما يقفش.
السيسي: طب بردو دايما السؤال اللي بسأله لكم دايما وإحنا موجودين. هل إنتو شايفين بتواجدكم في المنطقة حاجة ممكن نعملها، نيسر أكتر على الناس في حركتهم؟ أو نفتح مجال لـ، لـ.. لأماكن، الأماكن دي الظروف الحالية ما تسمحلهمش الاستفادة منها؟
مهندس 1: هو يا فندم إن شاء الله، زي ما حضرتك قلت لسيادتك إن إحنا إن شاء الله شارع 9 ده بإذن الله خلاص في خلال فترة قريبة..
السيسي: خلاص..
مهندس 1: هايتعرض على سيادتك تطويره.. ويتم دراسة إن شاء الله يا فندم إنشاء محور موازي لشارع 9 ثم العرض على سيادتك في حالة التصديق.. المحور ده..
السيسي: اللي هو، اللي هو كدا؟ اللي هو.. (يشير الرئيس إلى الخريطة)
مهندس 1: بالظبط يا فندم، من أول سيادتك محور كوبري عمر سليمان، هايمشي سيادتك كان في مسارات قديمة بندرسها يا فندم دلوقتي.
السيسي: طيب.. طيب..
أنا بقول الكلام ده عشان الكلام ده لما بشوفه وبسمعه، بيقولك إيه، هايشيلوا المقبرة بتاعة فلان ويشيلوا مش عارف.. لا لا.. لا يمكن أبدا إن إحنا هانعمل ده تجاه مناطق فيها مقابر لشخصيات نقدرها ونحترمها
مهندس 1: اسمح لي سيادتك يا فندم أوضح لحضرتك إحنا إن شاء الله بمجرد نهو أعمال ياسر رزق ده قدرنا نبدأ بمحور موازي كامل طوله 21 كيلومتر يا فندم موازي للطريق الدائري بيربط يا فندم ما بين مناطق جنوب شرق، جنوب القاهرة آسف، ومناطق شرق القاهرة يا فندم، ومنها للقاهرة الجديدة، طوله 21 كيلو، كيلومتر يا فندم، موازي كامل. وده يا فندم هايساعدنا إن شاء الله إن إحنا أولا نخفف زمن وصول الرحلات من مناطق العباسية ومناطق كورنيش النيل سيادتك وفي نفس الوقت هايقلل استهلاك المحروقات يا فندم معانا، لأن يا فندم كان القاهرة يا فندم سيادتك مدروس إن في سنة 2020 لو ماكانش حصل التطوير اللي إحنا فيه يا فندم دلوقتي كانت القاهرة السرعة فيها لن تزيد عن 10 كيلومتر في الساعة.
السيسي: طب أنا بردو يهمني في النقطة دي حاجة هاقولها لك.
مهندس 1: اتفضل يا فندم.
السيسي: إحنا الكلام ده المرة اللي فاتت لما اتكلمنا وقلنا يا جماعة خلي بالكم، المحاور اللي إحنا بنعملها ديت الهدف منها إن أنا أخفف الحركة على صلاح سالم.
مهندس 1: تمام سيادتك.
السيسي: مش كدا؟ وأنا عارف إن في تطوير لصلاح سالم.
مهندس 1: إن شاء الله.
السيسي: وهنا، يهمني أقول لكل الناس اللي بتسمعني، اللي ليهم تواجدات على الـ، على محور الحركة بتاعتنا. سواء كانت مقابر ذات قيمة لشخصيات إحنا بنقدرها وبنحترمها، أو ذات أثر تاريخي.
أنا بقول الكلام ده عشان الكلام ده لما بشوفه وبسمعه، بيقولك إيه، هايشيلوا المقبرة بتاعة فلان ويشيلوا مش عارف.. لا لا.. لا يمكن أبدا إن إحنا هانعمل ده تجاه مناطق فيها مقابر لشخصيات نقدرها ونحترمها، أو للمناطق الـ إيه؟ الأثرية.
بنعالج ده يا إما بكباري، مش كدا يا أحمد؟
مهندس 1: تمام يا فندم.
السيسي: أنا ده مهم إن إنتوا تقولوه..
مهندس 1: تمام سيادتك.
السيسي: عشان الناس تبقى، ما تدوش فرصة لحد إن هو، يعني..
مهندس 1: أيوة يا فندم.
السيسي: يشوه الجهد اللي إنتوا بتعملوه.
مهندس 1: في بعض المحاور يا فندم تم نهوها بالفعل اسمح لي سيادتك أشرحها لسيادتك بصورة مختصرة: اولا يا فندم محور عمر سليمان، محور عمر سليمان يا فندم بيبدأ بتقاطعه مع محور الشهيد، ثم أعلى محور المشير محمد علي فهمي، وحتى الربط على محور جمال عبد الناصر عن طريق كوبري أعلى الطريق الدائري.
محور جيهان السادات يا فندم، واللي تم تنفيذه بالتعاون مع الهيئة الهندسية للقوات المسلحة وجهاز التعمير واللي بيبدأ من تقاطعه مع شارع رمسيس، والهدف منه نقل تخفيف الكثافة المرورية في الكتلة السكانية المزدحمة في وسط البلد والعباسية، وسيادتك بيمر يا فندم أسفل طريق صلاح سالم ثم أعلى محور الأوتوستراد وأعلى محور امتداد المشير طنطاوي، ثم أعلى محور الشهيد، وحتى وصولا إلى محور الميثاق.
محور الميثاق سيادتك يا فندم بيمر بدءًا من بداية محور جيهان السادات وأعلى شارع الحسن المأمون، ثم أعلى محور شنزو آبي عن طريق كوبري، ثم أعلى ثم يتقاطع مع بداية محور المشير محمد علي فهمي، وحتى الربط بمناطق القاهرة الجديدة عن طريق محور نجيب محفوظ.
محور شنزو آبي يا فندم اللي بيبدأ من تقاطعه مع محور الشهيد، ثم يمر أسفل شارع حسن المأمون وأسفل محور الميثاق، ثم يمر أسفل شارع مصطفى النحاس وكوبري طوله كيلو و200 متر يا فندم بيمر داخل مدينة الأمل، ثم موازيًا لطريق السويس، وتم مراعاة تحرير الحركة المرورية في المحور الموازي لطريق السويس عن طريق تنفيذ عدد 3 كوبري والربط على محور نجيب محفوظ، مناطق القاهرة الجديدة، عن طريق كوبري الفنان سمير غانم.
لو اتكلمنا يا فندم عن المحاور اللي جاري تنفيذها حاليًا، بنتكلم يا فندم على محور سميرة موسى، محور الدكتورة سميرة يا فندم بيبدأ من تقاطعه مع شارع جمال محمد علي اللي تم ربطه بمناطق القاهرة الجديدة عن طريق كوبري فريال عبد العزيز، تم تنفيذ على المحور يا فندم عدد واحد نفق، وجاري تنفيذ عدد 2 نفق يا فندم في منطقة أرض شمال محور المشير، ويمر المحور أيضًا فوق محور المشير عن طريق كوبري المونوريل اللي وصل ارتفاعه لـ 25 متر، ثم يمر بكوبري أعلى محور عمر سليمان، ثم يمر يا فندم بكوبري أعلى محور المشير محمد علي فهمي وكوبري أعلى محور الشهيد، وينتهي المحور عند ربطه بمحور ياسر رزق اللي سيادتك مشرفنا عليه عن طريق نفق الأسمرات اللي أمام سيادتك.
السيسي: إحنا هانخلص إمتى؟
مهندس 1: تمام يا فندم.. إحنا إن شاء الله يا فندم، طبعا الأول تم نهو المرحلة الأولى الحمد لله في ياسر رزق 100%
السيسي: ماشي.
مهندس 1: المرحلة التانية سيادتك نسبة تنفيذها دلوقتي 64%. إن شاء الله الاتجاه الجنوبي القادم من صلاح سالم وحتى سميرة موسى، الاتجاه ده إن شاء الله هانخلصه في 30 – 10 بإذن الله بالكامل.
السيسي: في حاجة تانية يا أحمد؟
مهندس 1: أوامر سيادتك يا فندم.
السيسي: متشكر وانا عايز أقولك على حاجة..
مهندس 1: اتفضل يا فندم.
السيسي: وبقولها إن يمكن في الأول وإحنا بنشتغل الكلام ده خلال الـ 5، 6 سنين اللي فاتت، الناس ما كانتش متصورة إيه اللي إحنا بنعمله.. النهار ده الناس بالـ، بـ.. بالـ.. بالاستخدام الفعلي والممارسة العملية عرفت إن اللي إحنا بنعمله ده نتايجه عاملة إزاي.
مهندس 1: بإذن الله يا فندم.
السيسي: بشكرك واشكر لي رجالتك على اللي إنتو بتعملوه..
مهندس 1: أوامر يا فندم.
السيسي: وشدوا حيلكم.
مهندس 1: أوامر يا فندم.
متشكرين يا أحمد.
مهندس 2: أعمال تنفيذ وإنشاء طرق ومحاور جنوب القاهرة وربطها بعواصم المحافظات مع العاصمة الإدارية الجديدة، وبعد الانتهاء بنسبة تنفيذ 100% من محور حسب الله الكفراوي الذي يربط طريق الأوتوستراد القادم من مصر القديمة والقادم من حلوان بالطريق الدائري ومنه إلى شارع 9 والهضبة الوسطى وحي الأسمرات بالمقطم ومحور ياسر رزق وطريق الكورنيش الذي تم تنفيذه حاليا يا فندم.
سيادتك صدقت يا فندم بإنشاء وتطوير شبكة طرق بمنطقة زهراء المعادي بإجمالي أطوال 35 كيلومتر. ومنها طريق ومحور س ص الذي يربط طريق الأوتوستراد بمحور حسب الله الكفراوي، وتنفيذ محور محمد عزت عادل بإجمالي أطوال 12 كيلومتر، 5 حارة مرورية لكل اتجاه.
سيادتك يا فندم تم حل مشكلة، المشكلة المرورية لتقاطع الطريق الدائري بمنطقة كارفور، سيادتك صدقت بتنفيذ كوبري للقادم من المنيب والقادم من، للقادم من المنيب والقادم من القاهرة الجديدة إلى المعادي.
سيادتك يا فندم تم ربط نفق السخنة ومحور الشهيد بمحور محمد عزت عادل عن طريق إنشاء شبكة الطرق الداخلية، 5 حارة مرورية لكل اتجاه.
النقطة اللي سيادتك مشرفنا عليها يا فندم هي تقاطع محور محمد عزت عادل مع طريق العين السخنة، والمتضمنة إنشاء نفق بطول 160 متر، 5 حارة مرورية لكل اتجاه، وإنشاء اللوبات والرمبات اللازمة لتحرير الحركة في ذلك التقاطع، وبالفعل يا فندم تم الانتهاء من أعمال الرمبات، وذلك لضمان استمرار المرور فوق طريق العين السخنة من القاهرة وإلى العين السخنة والعاصمة الإدارية الجديد، والعكس.
كدا يا فندم إحنا قدرنا نربط محور محمد عزت عادل ومنطقة جنوب القاهرة بالمحاور نفق محور الشهيد ومنه إلى القاهرة الجديدة والعاصمة الإدارية الجديدة.
إحنا يا فندم إن شاء الله تاريخ نهو الأعمال الإنشائية بالنفق خلال شهر يناير، وبعدها يا فندم هاننزل أعمال الطرق. هنا يا فندم ارتفاع قطع طريق السخنة يصل إلى 30 متر.
السيسي: بردو الكلام اللي أنا بقوله يا إيهاب وبقوله للزميل محمود.. لو إنتو في الـ، بعد وجودكم في المنطقة ديت خلا فترة الأعمال بتاعتها، شايفين حاجة تانية تتعمل وما.. يعني..
مهندس 3: تمام يا فندم. دي تعليمات سيادتك..
السيسي: اطرحوها علينا وقولولنا. إمتى بقى هانخلص كدا بالطريقة ديت؟
مهندس 3: سيادتك بإذن الله نفق الخرسانة بإذن الله آخر السنة دي، آخر شهر 1. من فوق 30 متر بإذن الله آخر شهر 2 هايكون خلصان الطريق والكوبري.
السيسي: معلش ما دام إحنا هانفتح، كدا كدا هانفتح، بدل ما نخليه 5 حارات، نخليه 6 حارات.
مهندس 3: تمام سيادتك.
السيسي: عشان بحيث إن إحنا لو حد، لو في فرصة لحاجة، يبقى ده..
مهندس 3: تمام سيادتك.
السيسي: مش 5..
مهندس 3: تمام سيادتك.
السيسي: مش 5.
مهندس 3: 6 يا فندم.
السيسي: يبقى 6 و6.
مهندس 3: تمام يا فندم.
السيسي: ماشي؟
مهندس 3: أوامر.
السيسي: متشكرين.
ألقيت الكلمة أثناء تفقد الرئيس أعمال تنفيذ محور ياسر رزق، والذي يربط بين جنوب القاهرة وصولاً لطريق صلاح سالم ومحور الاوتوستراد، كما تفقد سير العمل في محور محمد عزت عادل والذي يربط جنوب القاهرة والقادم من حلوان بدايةً من طريق الأوتوستراد إلى طريق العين السخنة والعاصمة الإدارية الجديدة. وذلك بحضور المهندسين المشرفين على الأعمال الإنشائية.