نص كلمة السيسي أثناء تفقده الأعمال الإنشائية لتطوير عدد من الطرق والمحاور بالقاهرة الكبرى 1/7/2022
مهندس 1: محور ياسر رزق يا فندم اللي سيادتك مشرفنا عليه، واللي بيبدأ يا فندم من تقاطعه مع طريق صلاح سالم، وحتى نفق الأسمرات بطول أسفل محور حسب الله الكفراوي بطول 9 كيلو متر، إن شاء الله يا فندم جاري التخطيط، ربطه على كوبري دكتور صلاح الدين الشاذلي، ثم كوبري العاشر، والربط على كورنيش النيل.
اسمح لي سيادتك نتكلم بالتفصيل عن محور ياسر رزق اللي سيادتك مشرفنا عليه.. إحنا دلوقتي يا فندم واقفين في النقطة اللي هي تعتبر المرحلة التانية من محور ياسر رزق اللي بتبدأ من صلاح سالم وحتى آخر شارع 9 بطول 2 كيلو متر. الطريق ده يا فندم قبل التطوير كان عبارة عن 2 حارة مرورية لكل اتجاه، وكان فيه منحنيات تصميمية غير آمنة وخطرة، نظرا للطبيعة الجبلية يمين وشمال سيادتك.. صدرت توجيهات سيادتك إن إحنا نشتغل ونحول الطريق إلى 5 حارة مرورية لكل اتجاه، مع ضبط المناسيب والمنحنيات والميول الأفقية لتطابق السرعات والمواصفات.
كما قمنا بتنفيذ كميات حفر يا فندم في الصخور في المرحلة دي وصلت لمليون متر حفر، وقللت الميول الجانبية للحفاظ وضمان سلامة المرور أعلى الطريق بعد افتتاحه.
إن شاء الله يا فندم بمجرد نهو المشروع ده بإذن الله يبقى خلقنا محور موازي كامل للطريق الدائري بيبدأ من صلاح سالم، ووصولًا إلى محور جمال محمد علي، ثم القاهرة الجديدة.. وبكدا يبقى ربطنا يا فندم مناطق جنوب القاهرة بمناطق شرق القاهرة، ووصولًا إلى العاصمة الإدارية الجديدة.. وأي أوامر يا فندم. السيسي: شكرًا يا أحمد.
مهندس 1: أوامر سيادتك.
السيسي: طيب، أنا بس جاتلي، يعني، شكوى كدا إن أنتم الشغل هنا مخلي في إعاقة للحركة.
مهندس 1: إن شاء الله يا فندم إحنا شغالين 24 ساعة، فطبعًا يا فندم ما كانش ينفع يبقى الطريق شغال وفي عربيات ماشية، عشان لا قدر الله لو في حاجة وقعت ما تحصلش مشكلة، وبالتالي يا فندم إحنا ضغطنا 24 ساعة وبإذن الله يا فندم المشروع ده بمجرد ما يتفتح، كل شكاوى المواطنين إن شاء الله هاتتلاشى، وبإذن الله هاتبقى تتقلب لشكر إن شاء الله بإذن الله.
السيسي: طب إحنا هانخلصها إمتى؟ الـ9 كيلو دول.
مهندس 1: إن شاء الله يا فندم إحنا، الـ9 كيلو، إحنا سيادتك مقسمينهم مرحلتين زي ما قلت لسيادتك، الأسبقية العاجلة دلوقتي يا فندم اللي هي من صلاح سالم وحتى شارع 9، دي 30/8 بإذن الله. المرحلة الأولى يا فندم زي ما وضحت لسيادتك من قبل اللي هي طولها 7 كيلو متر، إن شاء الله 30/12 بإذن الله نهو عملها.
السيسي: طيب، إمتى الإعاقة دي تقل، أو تنتهي، مش هاقول إن المشروع كله يكون خلص يعني..
مهندس 1: تمام سيادتك.
السيسي: لكن على الأقل اللي هم المرحلة الأولى دي تكون لما خلصت تريح الناس، تريح الناس خالص.
مهندس 1: إن شاء الله يا فندم.. بإذن الله يا فندم.. بإذن الله.
السيسي: طيب.
مهندس 1: وبردو يا فندم بعد إذن سيادتك، إحنا جاري دلوقتي تنفيذ مشروع كورنيش المقطم اللي بيبدأ من حي الأسمرات بطول 7 كيلو متر، وحتى ميدان النافورة آخر شارع 9، والكورنيش ده يا فندم تقريبا ما كانش موجود منه غير مسافة كيلو متر واحد وعرض 8 متر، دلوقتي خليناه 2 حارة و2 حارة بعرض 15 متر، بطول 7 كيلو متر، وده يعتبر أعلى محور ياسر رزق، وجاري الدراسة والعرض على سيادتك إن إحنا إزاي نربط الكورنيش بمحور ياسر رزق إن شاء الله. يبقى أنا قدرت أنقل الحركة كاملة المرورية من كورنيش النيل لكورنيش المقطم يا فندم في مدة تتجاوز لا 10 دقايق.
السيسي: طيب، شارع 9 هايكون أخباره إيه؟
مهندس 1: أيوة يا فندم، إحنا سيادتك دلوقتي جاري تنفيذ كوبري في بداية شارع 9 يا فندم..
السيسي: آه شوفته..
مهندس 1: الكوبري ده إن شاء الله هانخلصه 30/7 بإذن الله، وهانعمل، هانفتح حركة مرورية تحتيه يا فندم إن شاء الله، بحيث المنطقة دي كلها كانت منطقة اختناق مروري، إن شاء الله هاتتفك بنهاية شهر 7 بإذن الله.
السيسي: أيوة.. طيب والمحور بقى نفسه؟
مهندس 1: المحور يا فندم نفسه هاندرسه يا فندم ونخططه ونعرض على سيادتك الأسلوب الأمثل ليه.
السيسي: يعني لسه إنتوا ما.. في مرحلة التخطيط يعني.. مش كدا؟
مهندس 1: لسه يا فندم.. أيوة يا فندم.
السيسي: طيب.. أنا، يعني، طبعا بشكرك على، على الشرح ده.. لكن أنا يهمني إن الناس في مصر تعرف، وتحديدًا في القاهرة اللي فيها أكبر كتلة، كتلة حركة يعني.. في مصر كلها بالكامل..
مهندس 1: تمام.. تمام..
السيسي: إن إحنا اشتغلنا بخطة متكاملة في النهاية نقدر نقول إن القاهرة سواء شرق القاهرة أو غرب القاهرة، إحنا حلينا فيها حركة العربيات، يمكن لغاية 5-10 سنين قادمين.
مهندس 1: بالظبط يا فندم.
السيسي: فالناس لازم تبقى بس عارفة وسامعة مني الكلام ده دلوقتي، إن إحنا لما نيجي نتكلم، يعني كان الطريق الدايري، اللي هو بيربط.. اللي هو الفاصل ما بين القاهرة الجديدة وشرقًا، وبقية القاهرة.
مهندس 1: تمام سيادتك.
السيسي: لما خلصناها كلها بالكامل عملنا المحاور اللي هي 16 محور اللي أنتوا بتشوفوهم، اللي هو في النهاية ربطّ، ربطّ شرق القاهرة، مش كدا؟ بالجزء اللي هو غرب، غرب الطريق الدائري بالكامل.
ثم لما خلصنا ده اشتغلنا بقى في كل المحاور الداخلية فيها، وظبطناها، وخلينا الحركة فيها يسيرة.
أنا بس عايز أقولكوا.. إن الكلام ده لو ما كانش اتعمل خلال ال 4-5 سنين اللي فاتوا، كانت القاهرة أصيبت بالشلل الكامل، كاملا.. وحجم العمل اللي اتعمل في هذا المجال، غير مسبوق، وبتكلفة كبيرة جدًا جدًا، ولكن في النهاية نتايجه في الحركة، في التلوث وقلته، في توفير وقت الناس، في توفير الوقود، في تيسير على الناس الحركة.. بقت ضخمة جدًا.
لما خلصنا القاهرة الجديدة، ثم محاور الربط، ثم المنطقة اللي غرب الدايري، اللي هي الميثاق وسميرة موسى وعمر سليمان والكلام ده كله، دخلنا كمان في اتجاه الجنوب.. الجنوب زحمة، الجنوب زحمة، يعني أحمد كان مهم يقول قوي إن المقطم اللي إحنا بنتكلم عليه ده فيه كتلة سكانية كبيرة، الكتلة دي كانت بتتحرك إزاي؟ بتتحرك، لكن فرق إنها بتتحرك ببطء شديد، وفرق إنها بتتحرك بانسيابية.
اللي إحنا بنعمله دهب يعمل حاجتين: بنكمل ربط وسط القاهرة بشرق القاهرة. مش كدا؟ اشتغلنا بمراحل.. إحنا بالمناسبة وإحنا شغالين كدا، شغالين في غرب القاهرة، في الجيزة، عشان نعمل نفس الكلام ده، بس غرب القاهرة. بحيث إن في النهاية الكتلة اللي موجودة جوة القاهرة دي، نتيجة حجم المحاور اللي تم شقها في الشرق وغرب القاهرة، يتيح للناس الحركة ويخلي جوة القاهرة نفسها الحركة تبقى سريعة شوية.
وأنتوا لازم تتكلموا مع الناس، تقولولهم إن إحنا بنعمل ده، هايعمل واحد اتنين تلاتة، بنقولهم إيه، ماتتعجلوش النتايج، لما يخلص المشروع، هاتجدوا نفسكوا زي كل المشاريع اللي اتعملت، لما اتعملت المشاريع كلها، الناس كلها حست قد إيه اللي اتعمل ده كان إضافة كبيرة جدا، وعمل لهم تيسير كبير. تحملونا وإحنا بنحاول بقدر الإمكان إن في أضيق وقت ممكن، ننجز المشروع.
النقطة التانية اللي أنا عايز أقولهالكم هنا حاجة.. ده المحور ده موازي لطريق صلاح سالم يا جماعة.. يعني أنا النهارده عشان أخليك تطلع على طريق السيدة عيشة، كوبري السيدة عيشة على القلعة، وتروح داخل على صلاح سالم لغاية الآخر، أو تخش على طريق السكة البيضا، مش كدا؟
مهندس 1: أيوة يا فندم.
السيسي: لا ده أنا عملتلك محور جديد، أخليك تقدر تخش منه لغاية القاهرة الجديدة، من المحور ده. فده حاجة تانية خالص، وإضافته وتيسيره للحركة، غير مسبوق.
أنا بقول الكلام ده لكم عشان، يعني ما بيبقاش في فرصة قوي إن إحنا نشرح الكلام ده بشكل مباشر.. الكلام ده بيتعمل بتكاليف كبيرة، التكاليف ديت بحجم الحركة اللي هاتيسرها، بحجم الوقود اللي هايتخفض، بحجم التلوث اللي هاينتهي، بحجم الفرص اللي هاتتنشئ.. هاتلاقي في أراضي كانت هنا غير متاحة، بقت متاحة، ممكن يتعمل عليها خدمات للناس اللي موجودة في الـ.. زي طريق الكورنيش لما قالولنا، قلتلهم لا وسعوا على الناس واعملوا كورنيش جميل، خلوا الناس اللي موجودة في المقطم تسعد بيه.
مهندس 1: بإذن الله يا فندم.
السيسي: هنا بس أنا عايز أقول، عايزين ننجز ما أمكن المشروع دوت، واعرضوا عيا التقرير بتاع شارع 9، ونكمل كدا.. عايز تقولي إيه؟ مهندس 1: هو بس بوصل لسيادتك، استكمالا للي سيادتك اتفضلت قلته بالنسبة لموضوع ضيق الحركة المرورية في بعض الأوقات، إحنا في أوقات الثانوية العامة والاختبارات، بنحاول دايما إن إحنا نوقف أي أعمال لينا أثناء امتحانات الثانوية العامة قبل البدء بساعتين وبعد النهو بساعتين، بحيث إن الطلبة يقدروا يوصلوا مدارهم بسهولة، وده إحنا مراعينه تماما يا فندم. غير كدا أي حاجة تانية داخل الجبل بنشتغلها 24 ساعة.
السيسي: طيب... يتبقى موضوع تاني، وأنا بقوله عشان ما حدش تعرض له بالشكل ده.. يعني أنا بسمع، أنا متابع أي شكوى من أي، من أي شكل من الأشكال.. زي الطريق الساحلي.. أنا بس عايز أقول إيه.. المفروض إن الطريق ده يخلص 30/7، نص 8.. هو ما خلصش.. وده أمر انتبهوله كويس.. لأن هو لما ينتهي الطريق، الطريق بينتهي بكل الشغل الفني اللي عليه، ثم بيتعمله الإرشاد اللازم، ثم بتتحط عليه عناصر الشرطة لضبطه زي ما إحنا عايزين، وبالتالي بقى معقول طريق كان حارتين ولا 3، هايقارن بطريق عرضه 6-7 حارات؟ ويبقى ده فيه مشكلة؟ لأ، بس انتظروا لما الموضوع يخلص، ويتشرح لكم، وأنا ببقى مستغرب جدًا إن القائمين على الطريق مش قادرين يوصلوا إن الطريق ما خلصش، إن الإرشاد بتاعه لسه ما انتهاش، التخطيط بتاعه لسه ما انتهاش، وبالتالي هايبقى حكم مش مظبوط.
وبالمناسبة، هو إحنا هانعمل الطريق، وانتبهوا للكلمة اللي بقولها دي للي بيسمعني، هانعمل الطريق على قواعد المرور ولا هانعمله على أسلوب الناس في الحركة؟
مهندس 1: قواعد المرور يا فندم.
السيسي: لأ قواعد المرور يا جماعة، ولازم كلنا نتفق على كدا، واللي بيتحرك على الطريق، بعد إنت ما كنت بتتحرك وتيجي تعمل دوران للخلف، تروح تتحرك سطحي، تعمل حادثة مع المقابل، يتعمل كوبري، تطلع فوق منه، مش قاد تهدي شوية، عشان تسمح لغيرك زي ما إنت بتتحرك هو يتحرك؟
وبعدين إنتوا لازم تنتبهوا، إن كل الشغل ما بيتعمل، في ناس بتقعد الهدف منها إنها تشكك، وأنا بقول الكلام ده دلوقتي، تشكك في اللي بيتعمل وتسيء إليه، بعد كل الجهد ده وكل التكلفة ديت.
لا يا جماعة.. ده ناس بتحاول تحطلكوا تراب على شغلكوا.. مش شغلكوا اللي هي، مش الهيئة الهندسية ولا وزارة النقل، لأ.. على مصر.. وكأن إحنا مش عارفين نعمل.. الداخلية هاتبقى موجودة، التخطيط بتاع الطريق هايتعمل طبقا لمعايير..
مهندس 1: الجودة العالمية.
السيسي: الجودة العالمية، يبقى إذن إحنا كمواطنين بنستخدم الطريق، نستخدمه طبقا لإيه؟ للقواعد دي.. القواعد دي. مهندس 1: أوامر سيادتك.
مهندس 2: فوق سيادتك بنهذب الكورنيش ونظبطه لأنه كان منطقة عشوائية جدا وطبقا لتعليمات سيادتك، ونظبط الكورنيش فوق. بعد كدا سيادتك في نازلة هاتبقى نازلة من هنا بكوبري على محور الحضارات، يوصل يكمل قدام محور الحضارات لغاية كورنيش النيل، بحيث إن المحور ده سيادتك يكون موازي كامل الدايري.. جزء منه طالع من صاح سالم وجزء جاي من كورنيش النيل موازي للدايري بالكامل وواصل لغاية محور جمال محمد علي.
سيادتك وإحنا شغالين على الهضبة دي سيادتك، إحنا لاحظنا إن الـ، وإحنا شغالين بأن بقى، إن كل المناطق فيها ردم، ردم قديم، وردم عشوائي، يعني مش معروف له classification، مش معروف له وصفة.. فسيادتك إحنا حاليا بنشوف الكلام ده وهانظبطه، لو في تعديل بسيط أو حاجة، بعد إذن سيادتك يعني لو هشام ها يعرض على سيادتك الموقع..
السيسي: طيب.. طيب..
مهندس 2: بحيث ما يحصلش بعد كدا في المستقبل أي حاجة..
السيسي: أي انهيارات..
مهندس 2: أي انهيارات زي زمان.
السيسي: يعني هو عبارة عن تأهيل للجبل يعني.
مهندس 2: ده اللي فوق ده تأهيل للجبل، عشان نوصل لحاجتين، نوصل تحت لطريق ياسر رزق اللي هو هاييجي يكمل المحور كله من طريق صلاح سالم لغاية ما نوصل لجمال محمد علي، مرورًا أسفل محور المهندس حسب الله الكفراوي، من هنا.
السيسي: شكرًا يا إيهاب.. مهندس 2: أوامر يا فندم. السيسي: شكرًا.
ألقيت الكلمة على محور ياسر رزق بالقاهرة، خلال تفقد الرئيس الأعمال الإنشائية لتطوير عدد من الطرق والمحاور بالقاهرة الكبرى.