نص حوار السيسي أثناء تفقده أعمال تطوير طريق القاهرة السويس 22/4/2022
السيسي: لا إحنا خلصنا ده كله، مش كدا؟ خلصناهم، عدا الجزء الأسمنتي، يعني إنت عملت الطريق الرئيسي، لكن الخدمة لسه شغالين فيها، مش كدا؟
مهندس 1: تمام سيادتك.. تمام يا فندم.
السيسي: إحنا هانخلص إمتى؟
مهندس 1: بالنسبة للطريق الرئيسي يا فندم إن شاء الله إحنا هانخلص الأعمال السطحية بالكامل بإذن الله نهاية الأسبوع الجاي وهايبقى جاهز للافتتاح إن شاء الله قبل العيد. بالنسبة يا فندم لطريق الخدمة إن شاء الله الاتجاه القادم في القاهرة في اتجاه السويس، بإذن الله 30 يونيو. الاتجاه القادم في السويس يا فندم في اتجاه القاهرة خلال شهر أغسطس.
السيسي: يعني شهر 8
مهندس 1: بإذن الله يا فندم.
السيسي: طيب، أنا وأنا طالع عندك دلوقتي لقيت بس إنت عامل حارتين للوصلة اللي جاية من..
مهندس 1: من أم قمر.
السيسي: من أم قمر.. لأ مش هاينفع كدا.. خليها 3 حارات، 4.. كدا يعني.. وشايف السور يساعدك يعني.
مهندس 1: أوامر يا فندم.. حاضر يا فندم.
السيسي: طيب، اتفضل.
مهندس 1: الطريق قبل التطوير كان عبارة عن 3 حارة مرورية لكل اتجاه للطريق الرئيسي والجزيرة الوسطى، و2 حارة مرورية رصف أسفلتي، تمام سيادتك، (كلمة غير واضحة) يا فندم للأحمال المرورية المتوقعة لصالح حركة نقل البضائع اللي هي مستخدمة في حركة التجارة الداخلية بين الـ..
السيسي: والمحاجر والـ...
مهندس 1: بالظبط يا فندم، وحركة التجارة الخارجية اللي مؤدية للمواني يا فندم، لقينا إن إحنا لازم نزود سيادتك لرصف خرساني، يتحول الطريق من رصف أسفلتي لرصف خرساني، وزيادة عدد الحارات بتاعته لـ3 حارة مرورية وإن هو يتحمل بدل ما كان بيتحمل قبل التطوير 60 طن بقى بيتحمل 160 طن.
السيسي: ونفس الكلام للي جاي.. رايح جاي هايبقى كدا.. مش كدا؟
مهندس 1: بالظبط. قابلنا سيادتك مجموعة من العوائق أثناء تنفيذ الأعمال. من ضمنها يا فندم مجموعة ضغط عالي كانت متعارضة معانا في المسار، وتم التسيق مع وزارة الكهربا يا فندم بالقيام بأعمال مناورة لفصل التيار الكهربائي دون التأثير على شبكة الكهرباء أثناء تنفيذ الأعمال بتاعتنا، وفي نفس الوقت البدء في زراعة أعمدة الكهرباء الجديدة خارج حدود التطوير.
إن شاء الله يا فندم بردو الطريق ده يا فندم بعد نهيه هايساعد في تقليل الازدحام المروري وتسهيل الحركة على المواطنين مما يؤدي إلى توفير الطاقة وتقليل الانبعاثات الضارة بالبيئة.
السيسي: أيوة.. إنت بردو أنا دايما السؤال ده بسأله للزملا وإحنا موجودين، بقولهم يا جماعة هل إنتم شايفين، بعد خدمكتوا هنا، شغلكوا يعني، الكام شهر دول، في حاجة ممكن نعملها بدل ما نعمل إعادة تمركز تاني أو (جملة غير واضحة)
مهندس 1: إن شاء الله يا فندم في الوقت الحالي إحنا الحمد لله مغطيين ربط جميع المحاور الطولية بالعرضية مافيش مشكلة. إن شاء الله يا فندم العاصمة الإدارية بصفة طريق السويس يعتبر مدخل الشمال الرئيسي ليها، إحنا دلوقتي بنخلص المرحلة الأولى في العاصمة الإدارية، بمجرد بدء أعمال المرحلة التانية هانبدأ يا فندم إن شاء الله ندرس ونعرض على سيادتك إمكانية ربط محاور العاصمة الإدارية بمحاور طريق السويس.
السيسي: بردو بالمناسبة، وأنا جاي دلوقتي شوفت المطار بتاع العاصمة. فأنا قلت بصوا عليه كويس، إزاي نخليه ليه مدخل من على طريق السويس، وإذا كان محتاج إن إحنا نعمله لاند سكيب كويس.
مهندس 1: تمام سيادتك يا فندم.
السيسي: ادرسوه وتجهزهولي في تخطيط و(جملة غير واضحة)
مهندس 1: تمام يا فندم. وبردو يا فندم بعد إذن سيادتك إحنا طريق السويس في الوصلة دي من الإقليمي لحد وصلة نفق الشهيد أحمد حمدي كان فيها مشكلة جامدة جدًا بتحصل وقت الشتا في السيول والأمطار، فتم دراسة أعمال الحماية لمخاطر السيول دراسة دقيقة عن طريق مكاتب استشارية تم تحديدها من مكتب الشركة الهندسية للقوات المسلحة، ونفذنا يا فندم عدد 16 (كلمة غير واضحة) صندوقي لاستيعاب كافة المياه المتوقعة.
السيسي: عشان تعدي تحت الطريق يعني.
مهندس 1: لمدة يا فندم 50 سنة لقدام إن شاء الله، بإذن الله.
مهندس 2: أعمال ضبط الجودة للطرق يا فندم بتم طبقا لمعايير جودة عالمية ومواصفات الهيئة العامة للطرق والكباري. هنا في المشروع يا فندم نفذنا مخطط تنفيذ 4500 اختبار معملي للطرق اتنفذ منهم لحد دلوقتي 3700 وجاري تنفيذ الباقي يا فندم إن شاء الله. ودي بعض وثائق الجودة، ضبط الجودة اللي موجودة يا فندم.
السيسي: متشكرين.. متشكرين.. متشكرين.. كل سنة وإنتوا طيبين.
ألقيت الكلمة في القاهرة حيث تفقد الرئيس أعمال التطوير على امتداد طريق القاهرة السويس، بحضور عدد من المهندسين المشرفين على المشاريع.