نص حوار السيسي مع المواطنين والمهندسين أثناء تفقده سير الأعمال بالقاهرة التاريخية 18/3/2022
السيسي: الفرن ولا المحل
مواطن 1: الفرن
السيسي: الفرن.. بتبيع عيش حر ولا عيش...
مواطن 1: (جملة غير واضحة)
السيسي: الحر بيكلف كام؟
مواطن 1: الحر إحنا بنبيعه بنص جنيه، والعادي بنبيعه بشلن.
السيسي: لأ أبو شلن ده خلاص ده بتا عال.. لكن الحر بتبيعه بكام؟ بصراحة.
مواطن 1: بنص جنيه، والله بنص جنيه أنا شغال بيه، الرغيف بنص جنيه.
السيسي: يبقى أقل من تمنه.
مواطن 1: أنا بقولك على اللي..
السيسي: يعني إنت بتبيع الحاجة بأقل من تمنها؟
مواطن 1: والله ببيعه بنص جنيه.
السيسي: أنا مصدقك.. بتبيع أقل من تمنه؟
مواطن 1: لأ.
السيسي: طب يعني.. إذا كان هو مكلف 65 قرش.. تبيعه ب 50؟
مواطن 1: أنا شغال، أنا شغال في المكان.
السيسي: وافرض.. ده أنا عارف إن الرغيف بدقيقه بالخميره، بالعامل اللي بيشتغل بشوية الكهربا ولا الغاز.. يعني بالإيجار والكلام ده كله، بيتكلف 65 قرش. فلو إنت بتبيعه ب65 قرش هاقول إيه، ماشي، بتمنه.. لو بتبيعه ب 80 قرش هاقولك بتكسب 15 قرش.. ليه بقى؟ بتعمل كام ألف رغيف في اليوم؟
مواطن 1: على حسب المكنة اللي أنا شغال عليها.
السيسي: كام؟ ماشي..
مواطن 1: مثلا 15 ألف.. عشرة...
السيسي: اسمك إيه؟
مواطن 1: اسمي محمد.
السيسي: يا محمد.. إنت بتبيع ب 50، وبتبيع بشلن.
مواطن 1: آه.
السيسي: طيب... سبب الغلا اللي العيش الحر في بقية الأسواق دي، ليه؟ آه قول.
مواطن 2: حضرتك بسبب الارتفاع العالمي كله عمومًا.
السيسي: إنت مالك بالعالمي؟ هو إنت الدقيق إحنا زودناه عليكوا يا ولاد؟
مواطن 1: لأ.
مواطن 2: مش حضرتك الدقيق بنستورده؟
السيسي: إستنى بس إحنا بنتكلم في العيش دلوقتي.
مواطن 1: آه.
السيسي: إحنا مش بندي الدقيق من وزارة التموين بالحصص سواء كانت للخبز المدعم أو الخبز غير المدعم؟ ولا أنا مش عارف؟
مواطن 1: أيوة صحيح.
السيسي: يبقى إحنا، إحنا بناخد الدقيق بتمن إحنا عارفينه.
مواطن 1: تمن مدعم.
السيسي: أنا مش بتكلم في كدا، بتكلم الدقيق الحر اللي بدهولك ده بدهولك بتمن عشان تفضل تحافظ على سعر الرغيف الحر.. اسمع.. أكبر دورة ربح هي الدورة اليومية، الدورة الإيه؟
مواطن 1: اليومية.
السيسي: أنا كل يوم بعمل رغيف بكسب، لو بكسب في الرغيف قرش..
مواطن 1: بكسب..
السيسي: لأ، يبقى أنا النهارده الرغيف اللي عملته النهارده خدت قرش، واللي عملته بكرة خدت قرش. في ناس تانية بيحطوا بضاعة تقعد بالأسبوع، وتقعد بالشهر، مابتتباعش كل شوية. إنما الخبز الناس كلها بتاخده، فلو أنا النهارده عندي مخبز بيطلع 10 ألاف، وأنا بقولها ليه، مش ليك إنت يا محمد، أنا بقولها عشان يسمعها المصريين.. لو أنا النهارده بعمل 10 ألاف رغيف في المخبز، وبكسب في الرغيف ريال.. كام؟
مواطن 1: ريال.
السيسي: يبقى هاكسب قد إيه؟ يبقى 4 آلاف جنيه. ال 4 آلاف جنيه دول مش بعملهم في الأسبوع، أنا بعملهم في اليوم، ومحسوب فيهم إيه؟ محسوب كل اللي فيه دورة التشغيل، مرتبات الناس، الغاز، أي حاجة بتـ، متسعرة، متسعرة على إن الرغيف أقصى حاجة ليه زي ما إحنا بنكلفه 65 قرش، لو إنت بعته ب 85 يبقى خدت 20، يعني عملت 4 آلاف جنيه في اليوم، ب 10 آلاف. يبقى في الشهر هاعمل كام؟ هاعمل 120 ألف. 120 ألف لمخبز بيعمل 10 آلاف، ده قليل؟ إنت فهمت الكلام يا محمد أقصد إيه؟
مواطن 1: لا آه واصلة آه.
السيسي: هي دي الفكرة اللي إحنا بنتكلم عليها. إن إحنا.. مش بقى بتكلم في رحمة ومش رحمة، أنا بتكلم في اقتصاد.. أي واحد عنده محل أو عنده مصنع عايز يكسب منه، وأنا معاه، وعايزه يكسب ويعيش.
مواطن 1: ربنا يخليك لينا يا ريس.
السيسي: أنا بتكلم بجد. إنما بإيه؟
مواطن 1: بالعقل.
السيسي: بالعقل.
مواطن 3: أنا شاكر أفضالك يا سيادة الريس إن أنا قابلتك. أنا بقالي 17 سنة في الكويت، ماشي؟ بس دلوقتي اتفتحلي شغل في بلدي، أنا شغال هنا في بلدي دلوقتي. سبت الغربة وماكنتش عارف لا أربي عيل ولا أربي ده، بس دلوقتي أنا بشكر حضرتك إنك إنت فتحتلنا مجال في الشغل.
السيسي: هو إنت شغال إيه؟
مواطن 3: أنا شغال ماسك الفرش مع بتوع الفرش.
السيسي: فرش ال..
مواطن 3: العماير آه.
السيسي: آه، إنتوا من دمياط؟
مواطن 3: لأ أنا من، جينا من الأقصر.
السيسي: أهلا وسهلا.
مواطن 3: اهلا بيك يا فندم.
السيسي: ناس طيبين.
مواطن 3: والله...
السيسي: شغال كويس؟
مواطن 3: الحمد لله والله تمام يا ريس.
السيسي: الحاجة متينة؟
مواطن 3: لا تمام والله يا ريس.
السيسي: أنا مصدق.
مواطن 3: والله تمام، إنت..
السيسي: إنت بتعمل بتـ.. بتفرش بالألف والألفين..
مواطن 3: ما هو أنا من ضمن المتضررين في 4 ونص، وجيت في، جيت في أهالينا.
السيسي: ربنا يوفقك.
مواطن 3: فعشان كدا بنراعي ربنا في الفرش وفي الكلام من ده عشان خاطر بردو إحنا من المتضريين قبل كدا.
السيسي: صحيح.
مواطن 3: فالحمد لله يا ريس إحنا شاكرين أفضالك إنك إنت جبتنا من الغربة اللي إحنا كنا متغربين فيها وعيالنا بقينا وسطهم دلوقتي.
السيسي: ربنا يكرمك.
مواطنة 4: كان نفسي أقابلك.
السيسي: أهلا وسهلا.
مواطنة 4: إزي حضرتك؟
السيسي: إزيك؟
مواطنة 4: الحمد لله.
السيسي: سكنتوا هنا؟ مبروك.
مواطنة 4: الله يبارك فيك.
السيسي: إدوا الحاجة الحلوة للولد.
مواطنة 4: إزي حضرتك؟
السيسي: إزيك؟
مواطنة 4: ربنا بيحبني.
السيسي: ده أنا اللي سعيد إني أنا بشوفك.
مواطنة 4: بجد..
السيسي: المهم إنتوا هنا مبسوطين
مواطنة 4: بجد أنا سعيدة قوي.
السيسي: كتر خيرك، كتر خيرك.. طمنيني..
مواطنة 4: مبسوطين..
السيسي: صحيح؟
مواطنة 4: بجد إنت.. ربنا يخليك لينا يا ريس.
السيسي: لا صحيح؟
مواطنة 4: والله كل حاجة كويسة.
السيسي: والأسعار، قوليلي؟
مواطنة 4: أسعار إيه؟ الحلويات؟
السيسي: لا الحلويات دي بتاعة العيال بقى..
مواطنة 4: ال...
السيسي: إحنا بنتكلم في الأكل والشرب يعني.
مواطنة 4: أنا مش مصدقة.
السيسي: لأ.. طمنيني بس الأول على كل حاجة.
مواطنة 4: كل حاجة هنا جميلة. والفرش وكل حاجة جميلة، تسلم إيديك بجد، ويخليك لينا يا ريس.
السيسي: أهلا وسهلا.. إنتي بنتها؟
مواطنة 4: دي بنتي رحيل، ومعايا روضة 5 سنين.
السيسي: ما شاء الله، ما شاء الله.
مواطنة 4: ودي أختي.
مواطنة 5: ربنا يخليك لينا يا ريس.
السيسي: ويخليكي يا بابا.
مواطنة 4: بجد أنا مش مصدقة إني قابلت حضرتك.
السيسي: لأ.. لأ..
مواطنة 4: أنا كنت حاسة.
السيسي: قوليلي الأسعار بتاعة الأكل والشرب إيه؟
مواطنة 4: الأسعار، لسه ما اشترتش حاجة.. أنا بشتري من المنطقة اللي إنت حضرتك اتشالنا منها.
السيسي: آه.
مواطنة 4: يعني من مصر القديمة.
السيسي: أرخص؟ أرخص؟ أنا بتكلم على يعني الشهر ده.
مواطنة 4: زي الفل يا ريس.
السيسي: لا ماتقوليليش كدا.. أنا عايز أسمع..
مواطنة 4: ما أنا حضرتك والله ما اشترتش علشان ما أكدبش على حضرتك.
السيسي: يعني بقالك شهر ما اشترتيش؟
مواطنة 4: والله ما اشتريت.
السيسي: طيب، وبطاقة التموين ماشية؟
مواطنة 4: ماشية.
السيسي: بتاخدوا حاجتكوا؟
مواطنة 4: كل حاجة.
السيسي: والعيش؟
مواطنة 4: والعيش.
السيسي: صحيح؟
مواطنة 4: كل حاجة والله، والعيش بشلن، زي ما هو.
السيسي: طيب.
مواطنة 5: أنا عايز أقول لحضرتك حاجة.
السيسي: قولي يا بابا.
مواطنة 5: أنا أختي، أختي معانا جنبينا، بس ما اتسلمتش ومعاها 5 عيال..
السيسي: قاعدة فين؟
مواطنة 4: في الجيارة، مجرى العيون.
السيسي: يعني اللي هي الحتة بتاعة السكر واللمون ولا حاجة تانية؟
مواطنة 4: لأ لأ، سور مجرى العيون داخلة الجيارة، اللي حضرتك قبل كدا كنت مصور..
السيسي: كل اللي موجود هناك..
مواطنة 4: أيوة هم.
السيسي: الكلام اللي إحنا بنقوله، إحنا بنراجع كل حاجة.
مواطنة 4: بجد يعني بجد البلد إنت حضرتك يعني بجد بقت حاجة تاني.
السيسي: شوفي، شوفي.. أنا عايز أقولك، إنتوا كلكوا أهلي.
مواطنة 4: وحبيبنا.
السيسي: وإنتوا حبايبنا.
مواطنة 4: إحنا ولادك.
السيسي: وولادي.
مواطنة 4: وإنت أبونا.
السيسي: وأنا يسعدني ويشرفني.
مواطنة 4: ويباركلنا فيك ويخليك لينا يا رب.
السيسي: وعايز أعمل كل شيء طيب لكم.
مواطنة 4: يا رب.
السيسي: مش عملنالكم في نادي هنا؟
مواطنة 4: أيوة في كل حاجة.
السيسي: وفي مدرسة هنا؟
مواطنة 4: في كل حاجة.
السيسي: وفي مسجد هنا؟
مواطنة 4: أيوة في كل حاجة.
السيسي: وفي كنيسة هنا؟
مواطنة 4: أيوة في كل حاجة.
السيسي: كل حاجة لكل الناس.
مواطنة 4: صح، صح..
مواطنة 5: ربنا يخليك.
السيسي: ويخليك يا بابا.
مواطنة 4: إحنا كلنا واحد يا ريس.
السيسي: آه واحد.
مواطنة 4: الرب هو اللي خالق الكون كله.
السيسي: ونعم بالله.
مواطنة 4: وهو اللي موزع كله.
مواطنة 5: ربنا يخليك ويسترك.
السيسي: طيب، إيه تاني؟
مواطنة 4: يخليك لينا يا رب.
مواطنة 5: يخليك لينا ويستر طريقك.
السيسي: طب إنتي جوزك بيشتغل إيه؟
مواطنة 4: جوزي مبيّض..
السيسي: محارة؟
مواطنة 4: جبس.. شغال في العاصمة تبع الشغل اللي هو باليومية ده يا ريس.
السيسي: سلمي على والدك ووالدتك.
مواطنة 4: يخليك لينا ويباركلنا فيك ربنا.
مواطنة 5: يخليك لينا يا رب ويعلي مراتبك.
السيسي: إن شاء الله كل خير.
مواطنة 4: شكرا يا ريس.. شكرا.
السيسي: كل سنة وإنتي طيبة.
مواطنة 6: وإنت طيب.
السيسي: عاملين إيه؟
مواطنة 6: الحمد لله كويسين.
السيسي: ولادك؟
مواطنة 6: أيوة ولادي، تقوى، تعالي يا تقوى، تعالي سلمي عالريس.
السيسي: (يضحك الرئيس)
بنت المواطنة 6: مساء الخير
السيسي: إزيك يا جميلة؟
بنت المواطنة 6: إزيك يا عمو.
السيسي: عاملة إيه؟
بنت المواطنة 6: الحمد لله.
السيسي: تقوى بس؟
مواطنة 6: عندي تقوى ومحمد، بس محمد في البيت، وأنا معايا عيال اختي.
السيسي: وماله، وماله هاتيهم هنا.
مواطنة 6: ربنا يخليك.
السيسي: طمنينا عليكي.
مواطنة 6: الحمد لله.
السيسي: صحيح.
مواطنة 6: الحمد لله.
السيسي: قوليلي الأسعار أخبارها إيه؟
مواطنة 6: والله غلا.
السيسي: طب حتى..
مواطنة 6: إحنا قاعدين يعتبر عيلتين في شقة واحدة أوضتين وصالة يعتبر أوضة.
السيسي: ليه؟
مواطنة 6: ما، قاعدة مع حماتي، جوزي يعني شغال يوم آه ويوم لأ، يعني مش.. بس يعني، الحمد لله.
السيسي: بيشتغل إيه؟
مواطنة 6: بيشتغل مع.. مع كبابجي.
السيسي: يعني في محل..
مواطنة 6: آه محل كبابجي زي صبي كدا.
السيسي: كل حاجة..
مواطنة 6: ربنا يخليك.
السيسي: كل حاجة.. فين ولاد اختك هاتيهم.
مواطنة 6: تعالي يا ياسمين.
السيسي: إزيك؟
مواطنة 7: الحمد لله تمام.
السيسي: ولادك؟
مواطنة 7: آه بناتي.
السيسي: ما شاء الله.
مواطنة 7: 3 بنات.
السيسي: ما شاء الله. طمنيني عالدنيا عاملة إيه؟
مواطنة 7: إيه؟
السيسي: الدنيا عاملة إيه، الأسعار..
مواطنة 7: غلا شوية.
السيسي: حتى بعد الإجراءات اللي إحنا يعني..
مواطنة 7: إيه؟
السيسي: يعني المنافذ اللي فتحت ديت..
مواطنة 7: لا هي المنافذ كويسة طبعًا.
السيسي: طب إنتوا بتروحوا المنافذ دي؟
مواطنة 7: لأ بصراحة لأ.
السيسي: ليه؟
مواطنة 7: ماهو عشان إكمنها من قدامنا وكدا ومش موجودة في كل مكان.
السيسي: إحنا دلوقتي المنافذ ديت، وبالمناسبة، كل الهيبرات الكبيرة إحنا عاملين فيها نفس الكلام، لأن الموضوع مش على قد ال..
مواطنة 7: مع حضرتك بس المشكلة الغلا وفي نفس الوقت المدارس والدروس وكل ده طبعا مابيخليش.
مواطنة 6: يعني إحنا دلوقتي.
السيسي: هي قاعد معاكم؟
مواطنة 6: لأ هي مش قاعدة معايا، هي قاعدة جنبي بعديا كدا.
مواطنة 7: بعديها بشوية.
السيسي: ربنا يخليكوا لبعض.
مواطنة 6: ربنا يخليك.
مواطنة 7: ربنا يخليك يا ريس.
السيسي: ربنا يخليكوا، بناتك في سنة كام؟
مواطنة 7: آآ أولى، تالتة إعدادي، وأولى إعدادي، وخامسة إبتدائي.
السيسي: اسمك إيه؟ لأ اللي خايفة ديت.
بنت المواطنة 7: اسمي مي.
السيسي: شيلي يا مي البتاع (يقصد الكمامة) خايفة ليه يا حلوة؟
بنت المواطنة 7: لأ مش خايفة.
السيسي: صحيح؟ طب مشيتي ليه؟ أنا عايز أكلمك.
بنت المواطنة 7: أنا كنت واقفة مع ماما.
السيسي: طيب عاملة إيه في التعليم؟
بنت المواطنة 7: الحمد لله.
السيسي: كويسة؟ بتذاكري كويس؟ إنتي في سنة كام؟
بنت المواطنة 7: أنا؟ خامسة.
السيسي: سنة خامسة.. لسه شوية..
بنت المواطنة 7: لسه شوية..
بنت 2 للمواطنة 7: أنا مريم في أولى إعدادي.
السيسي: أولى إعدادي.. وبتذاكري كويس؟ ماما مخلية بالها منك؟ من المذاكرة؟
بنت 2 للمواطنة 7: (تومئ برأسها أن نعم)
السيسي: شوفوا.. أغلى حاجة، أغلى حاجة تقديميها للولاد، تعليم كويس.
المواطنة 7: أيوة طبعًا، ما هو الواحد مابيهتمش غير بالتعليم، أكيد.
السيسي: تعليم وإن الواحد يتكلم كويس.
المواطنة 7: هي أكتر حاجة الواحد بيعملها معاهم التعليم، من أي حاجة تانية عامة يعني.
السيسي: ربنا يخليهملك.
المواطنة 7: ربنا يخليك يا رب.
السيسي: كل سنة وإنتوا طيبين.
المواطنة 7: وإنت طيب يا ريس.
السيسي: كل سنة وإنتوا طيبين.
السيسي: إزي صحتك؟
مواطنة 8: ربنا يخليك.
السيسي: كل سنة وإنتي طيبة.
مواطنة 8: وإنت بالصحة والسلامة.
السيسي: فين الست اللي معاكي؟ إزيك يا أمي؟
مواطنة 9: ربنا يخليك.
السيسي: ربنا يجبر خاطرك.
مواطنة 9: حبيبي ربنا يخليك.
السيسي: ويخليكي.
مواطنة 9: وينصرك.. عندي مشكلة.
السيسي: عيني.
مواطنة 9: تسلم عينك.. دلوقتي بيتي أنا قاعدة يجيلي 25 سنة..
السيسي: أيوة.
مواطنة 9: والبيت كان واخد قرار إزالة، ورا الإمام الليثي، لما جاب المتحف، بيوسع يعني بينضفوا.. صاحب البيت اللي خد بديل في مدينة السلام عايز يطلعني أنا وعيالي، وأنا بخدم في الجامع ده بقالي 80 سنة.
السيسي: حاضر.
مواطنة 9: زينب فريد محمد.
السيسي: ولا، أبدًا، ولا تقلقي ولا تخافي.
مواطنة 9: عاملي طرد يا بيه وجابلي الحكومة.
السيسي: عيني حاضر.
مواطنة 9: يا رب يخليك يا بيه، يعليك..
السيسي: كل سنة وإنتي طيبة.
مواطنة 9: وينصرك على من يعاديك.
السيسي: اللهم آمين.
مواطنة 9: اللهم بلغك رمضان.
السيسي: آمين يا رب.
مواطنة 9: اللهم بلغك رمضان يا رب.
السيسي: آمين.
مواطنة 9: عشان خاطر حبيبك النبي.
السيسي: صلي الله عليه وسلم.
مواطنة 9: طيب اكتب اسمي طب عـ...
السيسي: كل حاجة هاتتعمل.
مواطنة 9: زينب فريد محمد علي.
السيسي: يا حاجة زينب..
مواطنة 9: 16 شارع الغفاري، الإمام الليثي.
السيسي: (يضحك الرئيس)
مواطنة 9: عشان الحكومة جات وكانوا هايكسروا الباب عليا، معايا بنات في المدارس.
السيسي: ده إحنا عنينا يا حاجة.
مواطنة 9: عشان خاطر ربنا.
السيسي: لا إله إلا الله.
مواطنة 9: أنا قلتلك أهو، ومش عارفة أقولك إيه يا سيادة الريس.
السيسي: ولا تقولي حاجة.
مواطنة 9: نزلت من السما وإنت استلقيتني. بس، مش هاقولك زيادة عن كدا.
السيسي: حاضر.. حاضر.. حاضر..
مواطنة 9: بس.. وإنت ربنا معاك بقى.
السيسي: كل سنة وإنتي طيبة.
مواطنة 9: ربنا معاك، وإنت طيب.
السيسي: كل سنة وإنتي طيبة.
مواطنة 9: معايا 6 عيال، وبربي في أيتام.
السيسي: ربنا يخليهم.
مواطنة 9: أروح فين؟ أروح فين يا حضرة الريس؟
السيسي: على رقبتي.
مواطنة 9: لا يا بيه، تسلم رقبتك.
السيسي: والله على رقبتي.
مواطنة 9: تسلم وتخليك يا رب. مش هاقولك زيادة عن كدا يا حضرة الريس.
السيسي: حاضر، هاياخدوا منك ال..
مواطنة 9: وتحيا مصر.
السيسي: بيكوا وبدعواتكوا الطيبة
مواطنة 9: آه قول يا رب.
السيسي: بدعواتكوا الطيبة.
مواطنة 9: يلّه مش هاقولك حاجة تاني.
السيسي: لا.
مواطنة 9: يخليلك ولادك، هاتسترني ربنا هايسترك.
السيسي: اللهم آمين.
مواطنة 9: بس. آدي اللي هانقولهالك يا حضرة الريس.
السيسي: طيب.. طيب.. عايزة حاجة يا أمي؟
المواطنة 8: ربنا يخليك يا ابني، وينصرك على من يعاديك.
السيسي: آمين يا رب.
المواطنة 8: (جملة غير واضحة) ويكفيك شر المرض، ويعلي مراتبك كمان وكمان.
السيسي: ربنا يخليكي.
السيسي: سلامو عليكو
مواطنة 10: عليكم السلام، إزيك يا سيادة الريس، عامل إيه؟
السيسي: إزيك، إزيك؟
مواطنة 10: كل سنة وحضرتك طيب.
السيسي: وإنتوا طيبين، وإنتوا طيبين.. حاجتكوا كلها موجودة؟
مواطنة 10: لا موجودة الحمد لله والأسعار كويسة.
السيسي: صحيح؟
مواطنة 10: والله الحمد لله. السكر سعره كويس والزيت وكل حاجة..
السيسي: والرز؟
مواطنة 10: والرز وكل حاجة.
السيسي: وبقية كل الأصناف؟
مواطنة 10: كل الأسعار كلها كويسة معانا.
السيسي: صحيح؟
مواطنة 10: الحمد لله.
السيسي: لأ، قولولي عشان لو في حاجة نعملها.
مواطنة 10: لا لأ الحمد لله الأسعار كويسة، ربنا يخليك لينا يا ريس.
السيسي: ويخليكوا.
مواطنة 10: يخليك يا حبيبي يا رب.
مواطنة 11: الأسعار حلوة وكويسة وهم وواقفين معانا وكويسين، وبيعاملونا زي أي حد.
السيسي: كويس.
مواطنة 11: حضرتك أنا، من.. أنا كنت عايزة أعمل كل ما اروح المستشفى أعمل أشاعات للفتاق ده، مش راضيين يعملهالي.
السيسي: عيني.
مواطنة 11: تسلم.
السيسي: ألف لا بأس عليكي.
مواطنة 11: وأنا أصلا كنت مغيرة الديانة. كنت مسيحية وأسلمت وماليش حد.
السيسي: إحنا، يعني، بنعمل للمصري.
مواطنة 11: إنت بتعمل وبتخدم الناس كلها.
السيسي: على عيني حاضر.
مواطنة 11: إحنا في ضهرك.
السيسي: كتر خيرك. مش عايزة حاجة تاني؟
مواطنة 11: ربنا يباركلك ويديك الصحة ويسطر طريقك ويخليك.
السيسي: صحيح؟ صحيح؟
مواطنة 11: ويخليك.
السيسي: ويخليكي. إنتي عايزة علاج؟
مواطنة 11: الفتاق بص واجعني.
السيسي: حاضر، حاضر.. علاج، يعني قوليلي على حاجة، لكن هانعمل كشف كامل ونشوف. حاضر.
مواطنة 11: ماشي.
السيسي: على عيني. ماتعيطيش، اوعي تعيطي، لا مش، يعني.. أومال إحنا موجودين ليه؟ ماحدش عامر، ويعينا ربنا.
السيسي: تعالي ياللي بتضحكي، أهلًا وسهلًا، الله يسلمك.
مواطنة 12: أزيك يا ريس
السيسي: ربنا يجبر خاطرك
مواطنة 12: ربنا يجبر بخاطرك
السيسي: قوليلي الأسعار عاملة إيه؟
مواطنة 12: جميلة والله.
السيسي: بأمانة الله.
مواطنة 12: جميلة، كفاية إن حضرتك موجود والله. ربنا يعينك علينا والله.
السيسي: ربنا يديمكم عليا ويعينا على كل خير. لكن أنا بسألك صحيح.
مواطنة 12: جميلة والله.
السيسي: الأسعار زايدة؟
مواطنة 12: الأسعار جميلة وحلوة.
السيسي: طب أي حاجة تانية عايزينها...
مواطنة 12: ورخيصة عن برة الخضار والحاجات هنا، تسلم حضرتك، تسلم الله يباركلك.
السيسي: إنت حاجة ناقصاك؟
مواطن 13: لا لا يا فندم.
السيسي: طب أقولك حاجة تانية.
مواطن 13: أؤمرني.
السيسي: في ملحوظة تقولهالي نعملها؟
مواطن 13: لا لا تمام، كل الأسعار نازلة وكله بيشتري بنفس الأسعار.
السيسي: صحيح؟
مواطن 13: نازلة عليا أنا ببيع بنفس الأسعار اللي نازلة.
السيسي: إنت بتنزل خضار؟
مواطن 13: بنزل الخضار وبنزل السمنة والزيت والمكرونات كلها..
السيسي: والرز..
مواطن 13: والرز والسكر والشاي والكلام ده كله.
السيسي: طب أي ملحوظة؟
مواطن 13: لا، تمام ربنا يخليك.
السيسي: اسمك إيه؟
مواطن 13: اسمي عبد الحي يا فندم.
السيسي: يا عبد الحي.. إنت بتأجره منهم ولا، ولا إيه؟
مواطن 13: لا لا هو تبع، تبع القسم.
السيسي: تبع القسم.
مواطن 13: القسم هو اللي منزلنا وواقفين فيه.
السيسي: طب ده، طب يعني ده تطوع؟
مواطن 13: آه يا فندم، آه أنا معايا ليسانس حقوق أصلًا.
السيسي: أنا عارف، بس أنا بفهم الناس وبسمعهم إن في ناس في مصر جدعان.
مواطن 13: ربنا يخليك يا فندم.
السيسي: في ناس إيه؟
مواطن 13: في مصر جدعان أكيد يا فندم.
السيسي: آه، رجالة جدعان، الشباب بتاعنا.
مواطن 13: ربنا يخليك يا فندم، ربن يخليك.
السيسي: ربنا يكرمك يا حبيبي.
مواطن 13: اللهم آمين.
السيسي: مش عايز حاجة؟
مواطن 13: ربنا يخليك يا فندم.
السيسي: صحيح؟
مواطن 13: ربنا يخليك يا فندم.
السيسي: أهلا وسهلا.
مواطن 14: أهلا بيك.
السيسي: ربنا يخليهولك.
مواطن 14: ربنا يبارك فيك يا رب.
السيسي: إنت بتشتغل إيه؟
مواطن 14: أنا استورجي.
السيسي: استورجي.. استورجي موبيليا ولا استورجي...
مواطن 14: لا موبيليا.
السيسي: بتعمل كام في اليوم؟
مواطن 14: والله.. على حسب ما ربنا كاتبلي
السيسي: عايزني أساعدك؟
مواطن 14: ربنا يبارك فيك (يضحك) ربنا يخليك أنا.. ربنا يخليك..
زوجة المواطن 14: ربنا يخليك، ربنا يخليك لينا.. إحنا نفسنا في شقة.
المواطن 14: ربنا يديك الصحة.
زوجة المواطن 14: نفسنا في شقة لأن إحنا قاعدين في إيجار جديد ومتبهدلين.
المواطن 14: الحمد لله على كل حال والله.
السيسي: طب ليه مابتقدموش في الإسكان الاجتماعي؟
زوجة المواطن 14: ما إحنا مش عارفين نعمل إيه.
السيسي: إزاي؟ ده إحنا عاملين تسهيلات كتير لكل الناس...
زوجة المواطن 14: طب يعني نروح نـ...
السيسي: حتى، حتى اللي ظروف عمله زي.. اسمك إيه؟
زوجة المواطن 14: محمد.
السيسي: زي محمد.
المواطن 14: لسه مجوز على فكرة بنتي قريب.
السيسي: مجوز بنت؟ ربنا يكرمك.. ربنا يكرمك.
المواطن 14: ربنا يباركلك ويديك الصحة يا رب. الحمد لله والله ربنا كارمها والله، هي في نعمة. ربنا يبارلكنا فيك يا رب ويديك الصحة، ويا رب استرها معاك يا رب، ويوقفلك ولاد الحلال يا رب، ربنا يبارك فيك يا باشا.
مهندس 1 : محور دخول شارع الشاذلي ده يا فندم عبارة عن 2 كوبري، كوبري قرب شارع عين الحياة، وحتى الطريق الدايري، بطول 4.8 وعرض 3 حارة مرورية لكل اتجاه، ده خلق يا فندم محور مروري جديد موازي لمحور الأوتستراد لنقل الحركة من مدينة مصر القديمة وميدان السيدة عيشة وميدان السيدة نفسية وميدان مجرى العيون مع طريق الالتقاء بصلاح سالم إلى الطريق الدايري. بالإضافة يا فندم للدور التاني من شارع الفسطاط وحتى محور الأوتوستراد بطول 4.8 وعرض 3 حارة مرورية لكل اتجاه، وده يا فندم خلق محور جديد موازي للدايري في المسافة من كورنيش النيل وحتى محور الأوتوستراد، ونقل منطقة غرب القاهرة بشرق القاهرة.
توجيهات سيادتك بتطوير طريق صلاح سالم في المسافة من حديقة الفسطاط مرورًا بشارع عين الحياة، ثم شارع الخلاء ثم كوبري الإباجية ثم نفق باب الوزير ثم نفق الأزهر ثم تلاقه عند محور جيهان السادات.
محور ياسر رزق يا فندم بطول 6 كيلو 400 في المسافة من تلاقيه مع محور حسب الله الكفراوي من تحت نفق الأسمرات حتى تلاقيه مع صلاح سالم. والمنطقة دي يا فندم كنت سيادتك وجهت إن إحنا ندرسها ونرفعها لربط محور ياسر رزق بمحور صلاح سالم. دي جاري الدراسة والرفع، وبالفعل يا فندم بدأنا الشغل فيه.
السيسي: أنا عايز أقولك على حاجة، النقطة دي (يشير إلى اللوحة) لو إنتوا حلتوها..
مهندس 1 : تمام يا فندم.
السيسي: إنتوا هاتحلوا حاجة كبيرة قوي في المنقطة دي.
مهندس 1 : إن شاء اله بإذن الله يا فندم.
السيسي: النقطة اللي هي نقطة التقاء صلاح سالم مع محور ياسر رزق ده.. إنتوا هاتنقلوا الحركة دي كلها لشرق القاهرة.
مهندس 1 : لشرق القاهرة، إن شاء الله يا فندم.
السيسي: لمدينة مصر للتجمع لأي حاجة.
مهندس 1 : إن شاء الله هاتتحل بإذن الله، إن شاء الله.
السيسي: طيب، إيه تاني؟
مهندس 1 : تطوير طريق صلاح سالم يا فندم.. المحور ده يا فندم وطبيعة القاهرة الخاصة.. إحنا هايتم تطويره عن طريق إن إحنا هانطور الاتجاه اللي إحنا واقفين عليه ده في المسافة من حديقة الفسطاط وحتى جنوب نادي الأبطال، باعتبار الاتجاه ده للقادم من منطقة الجيزة وحتى منطقة جيهان السادات. المسافة من تقاطع جنوب نادي الأبطال وحتى كوبري الإباجية هايكون اتجاهين بالكامل جداد، للحركة المرورية، وذلك لتخفيف السيولة المرورية وتحويل الحركة في ميدان السيدة عيشة وميدان السيدة نفسية. لأن المنطقة دي يا فندم في وقت المناسبات الدينية بتبقى زحمة جدا. ومن كوبري الإباجية...
السيسي: هي زحمة على طول..
مهندس 1 : هي زحمة على طول يا فندم.
السيسي: لو مشينا دلوقتي هانلاقيها زحمة.
مهندس 1 : لا لأ، إن شاء الله يا فندم بإذن الله بعد ما يتعمل المحور هاتبقى بإذن الله كويسة.
السيسي: إن شاء الله.
مهندس 2: المشروع يا فندم إسكان بديل (كلمة غير واضحة) يا فندم. المشروع يا فندم بيتم ضمن مشروعات بتتبناها الدولة لخلق سكن كريم يليق بالمواطنين المصريين، ونقلهم من المناطق غير المخططة وغير الآمنة إلى سكن صحي، يليق بيهم كمواطنين مصريين.
عندنا يا فندم في المنطقة الجنوبية يا فندم بيتم تنفيذ 5 مشروعات يا فندم. عندنا يا فندم أول حاجة تطوير منطقة المدابغ بمساحة 87 فدان يا فندم. المشروع التاني يا فندم بيتم تطوير منطقة بطن البقر يا فندم. المنطقة التالتة يا فندم منطقة عين الحياة وعين السيرة. عندنا يا فندم مشروع سيادتك تطوير منطقة عزبة أبو قرن، وده يا فندم تم نقل السكان أيضًا إلى مشروع معًا.
وإحنا يا فندم هانتكلم بعد إذن سيادتك على مشروع إسكان بديل بالخيالة، تم يا فندم إنشاء المشروع على مساحة 37.5 فداني يا فندم بنسبة بنائية 36%، بيتم يا فندم تنفيذ المشروع بنسبة 100%. جاري التسكين السكاني يا فندم وعددهم 1660 أسرة. وتم تأسيس العمارات بالكامل يا فندم ومرفقة بالكامل.
السيسي: إجمالي المشروع ده اللي إنتوا عملتوه ده، وأنا مش بقوله لك، أنا بقوله للمصريين. بقول إن إحنا عشان نعمل ال 5 مشروعات ديت، تقريبا 16 ألف شقة. مش كدا؟
المسؤولة عن المشروع: تمام.
السيسي: 16 ألف شقة.. ال 16 ألف شقة ده كانت الناس عايشة في ظروف صعبة، ودلوقتي جم هعيشهم في مكان أفضل زي ما بتقول.. أنا بس عايز أقول إيه.. إحنا عايزين كمان الخدمات وإحنا داخلين.. يعني في محلات موجودة.
المسؤولة عن المشروع: تمام 126 محل.
السيسي: طب إنتوا المحلات دي أولى نعرضها من دلوقتي، وأنا قلت الكلام ده وأنا هناك، ونعملها إحنا، ليه نعملها إحنا؟ عشان تتعمل بشكل يليق باللي إنتوا عملتوه. مانسيبش كل واحد على قد ظروفه. إحنا، يعني إيه، مش هانيجي بعد.. يعني ال 16 ألف وحدة دول النهارده يتكلفوا 8 مليار جنيه، مش كدا؟
المسؤولة عن المشروع: تمام.
السيسي: 8 مليار جنيه، ده لو قلنا 500 ألف، ده غير الأرض وغير المرافق. وبالتالي مانعملش ده كله والناس ماتشعرش بالخدمات اللي موجودة إنها خدمات إيه؟
المسؤولة عن المشروع: مستديمة، ممتازة.
السيسي: حاجة تانية هاقولك عليها.. إنت عملت مبنى إسعاف، ومبنى إطفاء.
المسؤولة عن المشروع: إسعاف، وفي وحدة صحية..
السيسي: لأ، أنا بتكلم في المباني ديت، البريد والإطفاء والإسعاف.. أنا ما أقدرش أعمل مجمع للحاجات ديت بدل ما أعمل مبنى ومبنى ومبنى؟ وأسيب الأرض الفاضية دي يا ملاعب، يا نوادي؟ بدل ما أعمل مبنى للإسعاف ومبنى للإطفاء ومبنى للبريد.. طب ماهو بقى يعني، فال.. ما.. المنطقة دي كلها بالكامل أقدر أعملها الحاجات دي في مجمع واحد.
المسؤولة عن المشروع: مجمع خدمات.
السيسي: مجمع خدمات.. فإيه، من فضلكم، نشوف ده، ونـ..
مهندس 2: أوامر.
السيسي: دلوقتي كل الأحياء بتاعتنا بالكنيسة والجامع، مش كدا يا فندم؟
المسؤولة عن المشروع: أيوة يا فندم.
السيسي: طيب.. حاجة تاني؟
مهندس 2: تمام يا فندم.
المسؤولة عن المشروع: إحنا بس (جملة غير واضحة) ال 16 ألف وحدة، اللي بنتكلم عليهم، إن هم بدأ يتم نقلهم تباعا، من أول منطقة اللي هي منطقة المدابغ وشرق (جملة غير واضحة)، اللي هو الجزء اللي إحنا تم نقله فعلا للأسمرات. وبعد كدا جينا للجزء التاني اللي هو بطن البقرة ومنطقة السحيلة ومنطقة كوم غراب، دول بردو تم نقلهم جزء منهم للأسمرات وجزء منهم في منطقة، في المنطقة الشرقية. بعدين دخلنا على عزبة أبو قرن، كانت المناطق ديت مهددة بالحياة، تقريبا معدومة الخدمات، الحمد لله رب العالمين تم نقلهم لمدينة أو كومباوند "معًا" ال 4000 وحدة كلهم تم نقلهم ل"معًا" وفي حتى في متبقي لسه هنا بعض الوحدات. وإحنا دلوقتي جاري تنفيذ إخلاء والجزء الي هو الخاص بالسكر واللمون والجيارة.
السيسي: إخلاء وتسكين.. إخلاء، إخلاء وتسكين.
المسؤولة عن المشروع: وتسكين، تمام آه، وفعلًا زي ما وعدنا سيادتك المرة اللي فاتت، إحنا فعلا الحمد لله رب العالمين تم نقلهم لمنطقة الخيالة، منطقة الخيالة بتعتبر زي ما سيادتك شوفت النهاردة، يعني الحمد لله الناس كلها نفسيًا مستريحة، وهي كمان فيها ميزة إنها قريبة جدًا من المنطقة الي هم كانوا موجودين فيها، وإن شاء الله بإذن الله هانسرع الوتيرة بتاعة الإخلاء والتسكين، وهانراعي الملاحظات اللي معاليك النهارده قلتها إن شاء الله بإذن الله.
السيسي: متشكرين، متشكرين.. سلامو عليكو.
المسؤولة عن المشروع: وعليكم السلام.
تم الحوار بين الرئيس عبد الفتاح السيسي وعدد من المواطنين في محافظة القاهرة بمنقطتي مصر القديمة والقاهرة التاريخية، أثناء تفقد الرئيس سير الأعمال لعدد من المشروعات.
خدمة الخطابات الكاملة للسيسي تجدونها في هذا الرابط