نص كلمة وتعليقات السيسي خلال افتتاح عدد من المشروعات القومية 2/3/2022
السيسي: معلش يا إيهاب، لو سمحت رجع الخريطة تاني.
إيهاب: اتفضل.. ارجع...
السيسي: أنا بس عايز اقولك إيه.. يعني إحنا، لما قلنا إن إحنا غرب ال النيل أو غرب القاهرة اللي متمثل في محافظة الجيزة، لازم نخلي نحرر الحركة فيه بشكل مايقلش عن اللي إحنا عملناه في شرق ال..
إيهاب: القاهرة.
السيسي: في شرق القاهرة ويبقى بالتالي كدا مدينة القاهرة يا دكتور مصطفى سواء كان شرقها أو غربها، غرب النيل أنا بتكلم دايمًا من، نوصف نفسنا من نهر النيل يعني. يبقى كدا إحنا عملنا عالأقل الحركة الرئيسية. لكن يبقى، وده تحدي بالنسبالنا الحقيقة، إنك إنت مثلًا، مثلًا يعني، موضوع زي محور كرداسة، أو آسف، منطقة كرداسة دي.. واخد بالك؟ إنت بتتكلم في عدد سكان كبير قوي. طب إنت حليتله المسألة على محور رئيسي سواء كان عرضي أو طولي حوالين المدينة، حوالين الحي يعني.
لكن تفتكر يا إيهاب هنا إيه اللي ممكن نعمله، عالأقل محور رئيسي أو اتنين، واحد، يعني طولي، وعرضي، ياخد الحي ده ويخلي فيه حركة ويبقى في ميدان وكلام من هذا القبيل.
أنا عارف إن حجم ال ، حجم المساكن اللي موجود في ال، في الأحياء دي زي، يعني.. كرداسة وناهية وبولاق.. هي طرق بسيطة يمكن حارة وحارة أو حراتين وحارتين. لكن في النهاية، إنت حليت أو إحنا حلينا الموضوع حوالين الجيزة، وعبرها، مش كدا يا دكتور مصطفى؟ لكن أنا كمان عايز أخلي المواطن اللي في بولاق ده يتحرك بشكل كويس، اللي في كرداسة. أصل إحنا اللي إحنا بنعمله ده، ماهو مش هدفه بس إن هو يتحرك كويس. لكن كمان يحس إن هو، يعني، مش معقول تبقى البيوت كلها في الكتلة دي الفاصل بين البيت والبيت مثلا 5 ، 6 متر ولا 10 متر ولا حتى 20.
فإحنا، الموضوع ده محتاج دراسة مع محافظة الجيزة. نشوف المحاور اللي موجودة بالفعل جوة ال، جوة الأحياء ديت، ونبتدي نشوف إحنا هل ممكن نوسعها ولا لأ؟
أنا بقول الكلام ده وبسمع الناس ليه؟ لأن طبعا إحنا عشان نعمل ده، هانضطر إن إحنا نعمل بعض الإزالات يا دكتور مصطفى.. بس، وأنا بقول بردو الكلام ده، ده مبدأ عام الدولة حطته على نفسها في إن هي أي إزالات بتتعمل لصالح النفع العام، الدولة بتـ إيه؟ بتعوض الناس.
فأنا بس عايز أقول إن إحنا، رغم إن الخطة اللي إنت عاملها طموحة ودي هاتخلص المفروض السنة دي؟
إيهاب: إن شاء الله يا فندم.. إن شاء الله.
السيسي: كله.. حتى ال 3 المستقبلين دول.
إيهاب: إن شاء الله.
السيسي: مش كدا؟
إيهاب: إن شاء الله.
السيسي: طيب.
إيهاب: داخلين في العام ده يا فندم.
السيسي: طيب.. هانشوف بس الباقي ده هل ممكن بردو نبقى طموحين ونخلصه السنة دي في اللي إحنا، إحنا في أول السنة يعني إحنا في شهر 2، ولا 3 حتى..
إيهاب: تمام.
السيسي: ماشي؟
إيهاب: تمام.
السيسي: طيب، اتفضل.
إيهاب: إحنا بنستأذن سيادتك إحنا هاندرس زي ما سيادتك أمرت مع السيد المحافظ، وهم في تعاون شديد جدًا..
السيسي: طبعًا.
إيهاب: ويمكن أنا هاعرض على سيادتك كمان الأهالي عملوا إيه في موضوع التعويضات في اللوحة اللي بعد كدا. إن شاء الله ده هاندرسه وهايتعرض يا فندم ونصدق بيه.
السيسي: ممكن ترجعوها لو سمحت..
إيهاب: ارجع.
أنا بفكر نفسي وبفكر دكتور مصطفى والفريق كامل يمكن.. إحنا ساعة لما توليت المسؤولية كان اللي موجود بالفعل هو الطريق الدايري وبكفاءة يعني منخفضة. وكتير من، من الناس بيقولوا يعني إيه، ليه في اهتمام كبير قوي بمجموع ال، بالطرق اللي موجودة والتكاليف الكتير اللي إحنا بندفعها في الموضوع.. وأنا عايز أٌقولكوا إن كان ساعة لما أنا توليت المسؤوية كان، كنا فتحنا مرحلة واحدة، مش كدا يا كامل؟ كنا مرحلة واحدة في الدايري الإقليمي.. وكان فاضل حوالي 350 كيلو لسه ماخلصوش، صح؟ وكملناهم..
إيهاب: تمام.
السيسي: وبعدين ماسكتناش، مش كدا يا إيهاب؟ اتفضل يا كامل، اتفضل.. عايز تقول حاجة يا كامل؟
كامل: لا هو حضرتك زي ما حضرتك ذكرت بالظبط كانوا 50 كيلو ووصلوا دلوقتي 400 كيلو. يعني سيادتك اتضاف في خلال 7 سنين أو يعني طبعا لحد ماخلصناه في 2018 خلصنا 350 كيلو.
السيسي: بالظبط كدا.. وبعدين دخلنا في الدايري الأوسطي، أنا بقصد أقول إيه.. كل الكلام ده اتعمل يا دكتور مصطفى للقاهرة، يعني كل الكلام ده إنت بتتكلم في تقريبا آآآ حوالي 700 كيلو طرق كدا، لو إنت قلت الدايري الإقليمي 400.
إيهاب: أيوة يا فندم، 456
السيسي: مش كدا؟ يعني ده فقط محاور دائرية حوالين القاهرة عشان تخفف وتبقى طرق مناورة للناس أو يعني تقدر الناس تتحرك من الطريق ده للطريق ده عند، على المحاور ديت وتتحرك بسهولة أكتر، سواء للتجارة سواء للمعايش اليومية بتاعة الناس.
لكن اللي أنا عايز أقوله في النهاية.. لما، لما بنقول إن.. إن.. وزارة، وزارة النقل، خدت تقريبا مشاريع آآ بـ 1.6 ترليون يا دكتور مصطفى؟ مش كدا يا كامل؟
كامل: تمام يا فندم.
السيسي: هي مش طرق كلها يعني، بس خلي بالكم. هو كامل هايتكلم بيحط الميزانية دي في الطرق اللي بتقوم بيها وزارة النقل. لكن في طرق بتقوم بيها آآآ وزارة الإسكان، وفي طرق كتير بتقوم بيها القوات المسلحة.
أنا بس هاخد على إيهاب حاجة واحدة إن هو قال إيه "إحنا بنحاول نحل المسائل الزحمة في القاهرة" لأ، إحنا في إسكندرية بنعمل إيه يا دكتور مصطفى؟ في بورسعيد بنعمل إيه؟ في الإسماعيلية عملنا إيه؟ لأ، ما إحنا بردو عشان بس الصورة اللي إحنا بنقدمها للناس، إن ده جهد، مش، ومش الهدف إن إحنا بنسجل جهدنا، لأ إحنا بنحاول نحل مسائل، ونخفف على الناس حركتها اليومية والاقتصاد وكلام من هذا القبيل، وأتصور إن ده كمان ليه تأثير كبير جدًا جدًا على نسب التلوث، نسب التلوث لأن إحنا محتاجين وإحنا في ال، في المؤتمر، نعرض خطتنا الاستراتيجية اللي عملناها لتخفيف حجم التلوث في مصر من خلال مشاريع مختلفة، سواء في الكهربا أو في السكة الحديد، أو، اللي هي القطاعات اللي إحنا اشتغلنا فيها، عشان نقلل نسب التلوث، بما فيهم مشاريعنا البحيرات اللي إحنا اشتغلنا فيهم، بما فيهم المشاريع اللي بنعملها لبحيرة قارون.
كل ده الهدف منه أنا بس بحاول أجمع ده مع نفسنا، ونجهز نفسينا لل، لليوم ده بشكل يسجل فيه قدرة الدولة وأداءها، وفهمها لفكرة ال، ال، البيئة، والحركة فيها.
أنا بس عايز أٌقول للناس اللي بتسمعنا النهارده، أنا عايزكم تتصوروا، لو ده ما اتعملش.. لو لا الدايري الإقليمي اتعمل، ولا الدايري الأوسطي اتعمل... معدلات العمل اللي اتعمل بيها الكلام ده يا جماعة، بصراحة يعني أنا بقولكم، عشان يعني.. لا دي معدلات عمل غير مسبوقة، ولما أنا بقول إن اللي اتعمل في مصر في الفترة ديت عمل كبير قوي، أنا بقصد بسجل بيه ده. بس ده مش معناه إن العمل الكبير ده نتوقف عنده يا دكتور مصطفى، لأ، ده إحنا ده عملنا، ولسه إيه يا إيهاب؟
لسه بنكمل.
لسه بنكمل كتير قوي قوي.. لسه بدري.. بالمناسبة، جميع الأراضي، في أراضي كتير جدًا كانت داخل وحدات القوات المسلحة، الأراضي دي إحنا خدناها، وطبعا يا محمد إحنا ماعوضناكمش بحاجة.. لا أنا بقول صحيح يعني، الكلام ده أنا بقوله بردو بسجله للجيش.
أسهل طريق عندي كان يتعمل يقولولي إيه: ده في وحدة عسكرية جنبه. هاقولهم طب خدوا من الوحدة.. مش كدا؟ معلش يا محمد اتفضل، اتفضل.
فأنا بس بقول الكلام ده عشان، مثلا طريق السويس، لما جه الفريق كامل يتكلم على، من أول كوبري المشير أبو غزالة، مش كدا يا إيهاب؟ لغاية الكوبري بتاع الدايري، مش كدا؟ المسافة دي كلها سواء كانت الأراضي قوات مسلحة أو الأراضي بتاعة الهيئة العربية للتصنيع، من غير كلام، أنا ممكن أقولكوا إن الأراضي دي تساوي 4 ، 5 مليار جنيه، دول طبعا ما اتدفعوش، وغيره وغيره يعني.. حتى المحاور اللي هي بتاعة الأهرام هنا اللي إنت بتتكلم عليها، في محاور منها اتاخدت من وحدات عسكرية موجودة بالفعل، مش كدا؟
كامل: الحرب الإلكترونية.
إيهاب: تمام يا فندم.
السيسي: آه.. طب اتفضل.
كامل: أستأذن سيادتك يا فندم في حاجة لو سمحت؟
السيسي: اتفضل، اتفضل يا كامل.
كامل: سيادتك بس يمكن النهارده طبعا أنا بشكل إيهاب بيتلكم على الطرق، ومركزين النهارده على الطرق في محافظة الطرق، كطرق، طرق برية. ولكن سيادتك أنا عايز أقول اللي اتصرف في محافظة الجيزة عشان نحل مسألة المرور بالإضافة للطرق ده، في نقل جماعي سككي، في 3 خط مترو بيتعملوا دلوقتي في محاظفة الجيزة، الخط الرابع اللي بيتعمل من أكتوبر لما لحد الملك الصالح، ثم هايوصل لما لحد ال، القاهرة الجديدة. الخط التالت اللي بيكمل دلوقتي يا فندم وسيادتك جاي على الطريق الدايري المحطة بتتعمل فوق الدايري عشان يكمل لما لحد من الوراق لما لحد الجامعة للكيت كات ويربط مع محافظة القاهرة في الزمالك. الخط التاني اللي جاي من شبرا الخيمة بيعبر النيل وبيبدأ في الجيزة من أول الدقي لما بيوصل لما لحد جامعة القاهرة. المونوريل اللي بيوصل من أكتوبر لما لحد منطقة وادي النيل... كل يا فندم باللي محافظة الجيزة حاليا دلوقتي بيتعمل كمترو ومونوريل بيتعمل تقريبا في حدود 300 مليار جنيه. غير طبعا اللي إيهاب بيتكلم عليه كطرق يعني.
عايز أقول إن الدولة في.. عشان تحل مشكلة مرور فقط في محافظة الجيزة، بتدفع غير ال55 مليار دول 300 مليار جنيه، عشان تحل مسألة المرور وتسهل حياة البشر في المنطقة دي.
لو حطينا القاهرة الكبرى يا فندم بقى وضيفنا الدايري الإقليمي زائد الدايري الأوسطي زائد الدايري العادي اللي بيتصرف عليه النهارده 15 مليار جنيه من ضمنهم 8 مليار فقط لنزع الملكية، زائد ال LRT اللي بيربط كل القاهرة بالمناطق الجديدة، زائد المونوريل اللي بيكمل في اتجاه العاصمة... إحنا يا فندم بنصرف تقريبا 500.. 550 بالتحديد، 550 مليار جنيه لحل المسائل المرورية أو لتسهيل حياة أهالينا في نطاق القاهرة الكبرى... شكرا يا فندم.
السيسي: أنا اللي بشكرك يا كامل على الإشارة ديت، بس أنا الموضوع دهب يستدعي إجراء إحنا بنعمله دلوقتي، وفي نقاش كتير جدا أول ما بدأنا فيه يا دكتور مصطفى الناس انتقدتنا انتقاد شديد.. اللي هو إن إحنا نعمل مدن جديدة. وقالك إن إنتوا رايحين تصرفوا فلوس كتير جدا مالهاش لازمة، مش كدا؟
أنا عايز أقولكوا على حاجة.. لو كان الكلام ده اتعمل من 40 سنة، وكان في تخطيط عمراني عمل في حساباته النمو بتاع السكان بشكل حتى، حتى لو إحنا دلوقتي بنحل الطرق، وبنحاول نحسن من جودة الحياة، لكن مازالت الأحياء زي كرداسة وأبو النمرس والخصوص، وغيره وغيره.. ولا إيه يا دكتور عاصم؟ إنت اللي هاتعرضه، مش كدا؟
إنت بتكلمني، لما بتتكلم في 7 ، 8 مليون.. ال 7 ، 8 مليون دول يا إيهاب عايشين إزاي؟ عايـ... ده لو كنا إحنا مرتبين نفسنا زي ما النهارده ال50 ألف وحدة سكنية اللي إحنا بنعملهم دول.. تصوروا إن ال50 ألف دول إحنا كنا عملنا أو الدولة كانت شاركت أو ساهمت أو ساعدت وخلت مع القطاع الخاص، يبقى في تنمية في الإسكان متخططة ومترتبة، معمولة بالشكل اللي إنتوا الافتتاح ال، ال.. اللي هانشوفه دلوقتي. أو اللي إحنا بنعمله يا كامل.
كامل: تمام يا فندم.
السيسي: إنت النهارده بتعمل ده، عشان تحل مسألة.
كامل: تمام.
السيسي: لكن هي الأرقام اللي إنت بتتكلم عليها.. لو إنت النهارده، إنت بتعمل خط مترو إنفاق ليه؟ لأنك إنت ماعندكش فوق الأرض حاجة تقدر تتحرك أكتر من كدا..
كامل: بالظبط.
السيسي: صح كدا؟
كامل: بالظبط.
السيسي: لكن لو أنا النهارده عامل.. هو أنا أقدر أقول إن أنا في العاصمة الجديدة محتاج أعمل مترو أنفاق؟
كامل: لا متخططة من جديد خلاص، كله سطحي.
السيسي: مش كدا؟ وبالتالي لما كون الدولة بتخطط حاجة، ودي الرسالة اللي إحنا عايزين نوصلها للناس، لما الدولة تعمل حاجة، بتاخد بأساليب العلم وبأساليب التخطيط السليمة في أي منشآت بتعملها، ومش بس كدا، ولما بتيجي تنفذها بتنفذها بالشكل اللي يتلاءم مع متطلبات الحياة. لو في مدرسة بتتعمل مدرسة.. لو في مستشفى بتتعمل مستشفى.. لو في نادي اجتماعي بيتعمل نادي اجتماعي.. لو في مناطق صناعية تخدم عالحي، بنعمل.. مناطق حرفية، تتعمل.
لكن لما ييجي المواطن من غير ما يقصد، كل واحد بيلاقي حتة أرض بنى عليها البيت بتاعه، أو بنى بيته، خلاص. طب بقية الناس دي هاتعيش إزاي؟ وأنا الكلام ده قلته قبل كدا.
وأنا عايز أقولكوا على حاجة، وأنا بقولها لكل المصريين، وأرجو إنكوا إنتوا تسجلوها كويس، وتفكروا فيها كويس.. أنا شايف إن كل واحد معاه قرشين يا دكتور مصطفى، بيعمل إيه؟ يبني حاجة.. طب والله، طب، طب.. بدعوكوا كلكوا بما فيهم السادة الوزرا اللي موجودين، امشوا على الطريق الدايري دلوقتي، وبصوا على حجم العماير اللي موجودة، وحجم الإشغال، حجم إيه؟
كامل: الإشغال.
السيسي: اللي فيها. طب يا جماعة إنتوا، يعني لو إنت معاك قرشين، بتبني 5 ، 6 أدوار مش هايتسكنوا، أو هايتسكن منهم دور ولباقي لأ ليه؟ يعني، فاهمني يا دكتور مصطفى؟ المبلغ ده لو إنت حطيته في البنك هايبقى ده هايوفر لك عائد مناسب، إنت بتبني على الأرض الزراعية، بتبني على أرض حتى مش بتاعتك.. لكن اللي بتبنيه عليها ده مش هايجيبلك حاجة.. مش هايجيبلك حاجة.. وأنا بقولكوا كدا لأن يبدو إن دي ثقافة عندنا.. حتى في الريف، تبص تلاقي الناس بتبني دور ودورين، وهو مش، يمكن مش محتاجه دلوقتي، محتاجه كمان 10 ، 15 سنة إن كان هايحتاجه ولا أبناؤه.
إحنا لازم نتجاوز الحتة ديت، النقطة دي، كمواطنين، كشعب. مش ممكن أبدا، بقولكوا يعني حجم ال.. المساكن اللي، اللي بشوفها أنا على الدايري، ما أنا ببص بردو.. حد يقولي لأ إنت مش واخد بالك، أقولك، يعني، دا مافيش شباك، ده إيه يا دكتور مصطفى؟.ده مافيش شباك راكب، يعني هاتقولي إن هي ساكنة، ده مافيش شباك راكب (يضحك الرئيس)
يعني، فالمهم أنا عايز أقول.. اتفضل يا كامل..
كامل: نقطة أخيرة يا فندم بس..
السيسي: اتفضل.
كامل: ال.. سيادتك، الرسم اللي إيهاب راسمه للدايري الأوسطي، 156 كيلو، ده صحيح. لما جينا نخطط للدايري الأوسطي يا فندم، وعرضنا على سيادتك، فسيادتك من حرصك على الأرض الزراعية في القوس الشمالي ده، رغم إن هو كان المفروض يكمل دايرة زي الدايري القديم وزي الدايري الإقليمي، سيادتك حرصت قلت ماتمشوش في الأرض الزراعية، لأن إحنا كنا لو سيادتك مشينا بالقوس الشمالي ده، اللي هو كان تقريبا حوالي 102 كيلو، كنا هاناخد حوالي 2500 فدان من الأراضي الزراعية، سيادتك حرصت وقلت لأ، مانمشيش في الأرض الزراعية، ودعموا أو وسعوا أو عرضوا الطرق الطولية اللي واخدة من الدايري إلى الدايري الإقليمي، والغوا القوس الشمالي اللي هو حوالي 102 كيلو في الأراضي الزراعية اللي تقريبا كان هاياخد أكتر من 2000 فدان في الأرض الزراعية.
السيسي: والله يا كامل أنا عايز أقولك على حاجة.. يا ترى الناس وهي بتسمع الكلام ده مننا، طب هو المحاور بتاعة النيل يا إيهاب لما إنت قلتلي هاخد 500 فدان، مش كدا؟
إيهاب: أيوة يا فندم سيادتك رفضت..
كامل: ده في سندوب لوحده.. في سمنود لوحده..
السيسي: مش كدا يا كامل؟
كامل: أيوة يا فندم.
إيهاب: أيوة يا فندم.
السيسي: قلتلكوا يا جماعة إنتوا هاتاخدوا 500 فدان للطريق، رغم إن هو هايحرك، وهايبقى عليه حركة للناس.. قلتلكوا لا أعملوا كوبري بس على النيل، وماتعملوش محور، صح كدا يا كامل؟
كامل: واستخدموا الطرق المحلية اللي موجودة وارفعوا كفائتها وماتخشوش في الأرض الزراعية.
إيهاب: شغالين كدا يا فندم.. شغالين كدا إن شاء الله.
السيسي: فأنا بس بقول للناس قد إيه حرصنا عالأرض الزراعية، ونابع من إيه. دي أرض بتتروي بالراحة زي ما إنتوا بتقولوا، وأرض، أرض خصبة جدا جدا قياسا بأي أرض تانية إحنا بنحاول نستصلحها.
فنحافظ عليها، وإن كان عالنمو.. إحنا.. يعني شغالين في برنامج في 500 ألف وحدة، غير.. مش كدا يا دكتور مصطفى؟ غير الإسكان كله، ده في المحافظات، مش اسمه إسكان المحافظات. بقول لعواصم المحافظات يا جماعة ياللي بتسمعوني، ال500 ألف وحدة هايتعملوا بالنمط اللي هاتشوفوه دلوقتي. لو محتاج مدرسة هاتتعمل مدرسة جواة. خدماته جوة الحي اللي بيتبني، وبيتبني بالشكل ده، بالشكل اللي هو اللي يليق بالإنسان.
طب بتعمل كدا ليه؟ عشان أنا مش عايز أشوه ال، الطفل اللي طالع، أشوع فكره وذوقه وشخصيته بإن هو يطع في بيت.. يعني.. مش، مش زي ما إحنا بنعمل يعني. وإحنا قادرين بالمناسبة عشان بس تقبى الأمور واضحة.. إحنا قادرين كدولة إن إحنا نلبي مطالبكوا.. بس إنتوا كمان ماتضيعوش فلوسكوا في حاجات، يعني.. يعني المفروض الناس بتوع الجامعة، علماء الاجتماع يدرسوا ليه الناس بتبني كدا، وهي، وبالمناسبة، في مدينة الامل يا دكتور مصطفى، نفس الملحوظة، أعدي هناك، فببص عالبيوت، ألاقي البيوت كتير، كتير جدا.. وعالية.. وتلت ترباعها فاضي.. طب، طب إنتوا بتعملوا كدا ليه؟ اللي عمل كدا بيعمل كدا.. بتضيع فلوسك ليه؟ إنت بتتكلم إن كان ده كان حجم طلب، إحنا بقالنا 7 سنين بنقول أي حد عايز إسكان اجتماعي بنوفره بالشكل اللي إنتوا بتشوفوه.. لو اتطلبت مليون وحدة سكنية إسكان اجتماعي، هانعمله. والبنك المركزي دخل معانا بمبادره عشان يخفض الفايدة على الناس.
فإحنا، يعني، إنتوا.. موضوع الإسكان كفكرة اترسخت في نفوسنا في سنين طويلة جدا إن مافيش حل لها، فلازم.. لا لا.. دي اتحلت خلاص.. وأنا قلت إن إحنا مش هانخلي في مصر طلب على شقق في أي محافظة من المحافظات، إلا لما نكون إيه؟ لبناها.
فإنتوا وفروا فلوسكوا.. مش وفروا فلوسكوا إنكوا إنتوا.. خش في المخطط واعمل طبقا للتخطيط. لكن ماتعملش عمارة 7 ، 8 أدوار.. أنا شايف واحد وأنا جاي في الطريق كدا، عمل 4 أدوار، وعامل السلم ل 12 دور.. سلم بس (يضحك الرئيس) عامل السلم بس يعني.. بيحلم إن هو يـ إيه؟
كامل: يكمل.
السيسي: (يضحك الرئيس) ربنا يسعد الناس.. اقعد يا كامل اتفضل.
إيهاب: هاستأذن سيادتك يا فندم، لما سيادتك إديت الأمر عشان الطريق الدايري الأوسطي ده يتنفذ، واتعرض على سيادتك وسيادتك صدقت عليه، حصل لغط حتى بين المتخصصين في الطرق، ويمكن كان عندنا ناس في الهيئة الهندسية كمان قالوا إن ده مالوش لازمة والطريق ده هايسد والدنيا هنا ممكن ده يتطور، ولكن سيادتك أمرت إن إحنا نعيد الدراسة من جديد، وعيدنا الدراسة ولقينا إن المميزات بتاعة إنشاؤه أكتر بكتير من إن إحنا نلغيه.
وأنا عايز أقول لسيادتك دلوقتي، حتى الناس اللي كانوا عندنا في الهيئة، واستشاريين النهارده، أقروا إن ده فعلا..
السيسي: أنا مش عايز اقولك كلمة صعبة يا إيهاب..
إيهاب: اتفضل يا فندم.
السيسي: هو يا كامل يا وزير لما كنتوا جيتوا أول ما نعمل الطرق قلت اعملوا 3 طرق، 3 محاور، قلتولي إيه؟
كامل: كتير قوي يا فندم.
السيسي: (يضحك الرئيس) مش كدا؟ قلتلهم أنا مش مهندس ولا حاجة، بس أنا بال، يعني، بال.. بـ.. يا رب خلي فطرتنا دايما طيبة.. بالفطرة، كنت شايف إن حجم التحدي يا دكتور مصطفى، أكبر من ال، من ال، من اللي إحنا بنفكر فيه. وبالتالي، هو النهارده، هو بيتكلم.. هو الزملا لما بييجوا يناقشوا موضوع، يا ترى بيناقشوا على حجم حركة حقيقية في المحافظتين تلاتة دول؟ أو ال 7 حتى محافظات اللي هم بيطلوا عليهم بقية المحافظات، مش القاهرة والإسماعيلية والسويس و.. والجيزة والفيوم.. مش كدا يا كامل؟
كامل: ده سيادتك بيجيلهم سيادتك كل محافظات الدلتا عبر الدايري الأوسطي ده. الشرقية كلها بتيجي سيادتك منه، القليوبية كلها بتيجي منه، الدقهلية كلها بتيجي منه..
السيسي: يعني أقصد أقول، إن الزملا لما قالوا الكلام دوت، وأنا بقول الكلام ده، وكويس إنك إنت يا إيهاب قلتلنا ال، فكرتنا بالنقطة ديت.. إن يا جماعة الدولة المصرية موجودة على شريط ضيق، وده مش موجود في كتير من الدول.. كل الدول منتشرة على كامل أرضها، وبالتالي حجم الحركة على الشريط الضيق ده لازم تبقى حجم حركة متقـ.. عالي قوي.. سواء بمترو، بسكة حديد، بطرق، بالنيل لو قدرنا نعمل النيل.
يعني يا كامل ماحدش حلم في النيل يجيبلي كام أوتوبيس نيل محترم جميل؟
كامل: جايين يا فندم.
السيسي: طب يلا.. قول للناس (يضحك الرئيس)
كامل: سيادتك أنا كنت إمبارح في المجر، سيادتك سافرت صد رد يوم السبت ورجعت، أو الحد ورجعت التلات، إحنا يا فندم دلوقتي بنتفق على السويم باص، السومي باص ده أوتوبيس بيعوم في المية، بيمشي على ال، على ال، يعني لما هم لما حبوا يرغبوني فيه، لففوني لفة الأول بالأوتوبيس في كل معالم المجر السياحية، ثم نزلت بيه في نهر الدانوب اللي هو أكبر نهر بيربط شمال أوروبا بجنوب أوروبا. مشينا في النهر خدنا جولة سياحية كبيرة جدا، ثم خرجنا تاني طلعنا من نفس المطلع على برة.. الأوتوبيس ده يا فندم إن شاء الله إحنا اتفقنا مش هانجيب أوتوبيس، إحنا هانعمل مصنع إن شاء الله يا فندم، وده التزام مني قدام حضرتك وقدام كل اللي بيسمعونا، هانعمل مصنع للأوتوبيسات، الناس المجريين حابين جدا يا فندم من بعد زيارة حضرتك للمجر بالتحديد الي فاتت دي، ورئيس وزراء المجر يعني، يعني فعلا باعت لسيادتك السلام وكل الشعب المصري وبيقول إن إحنا تحت أمركوا في الصناعة، مش في إن إحنا نوردلكوا حاجة.. هايعمل مصنع يا فندم للأوتوبيسات اللي هو السويم باص هنا في مصر، اتفقت معاه مبدئيا على 6 أوتوبيس، 2 قاهرة، 2 الأقصر، 2 أسوان.. هايشتغلوا سيادتك في المناطق السياحية، ثم بعد كدا المصنع ده هايدي لكل دول إفريقيا إن شاء الله والشرق الأوسط.
السيسي: شكرا يا كامل.
كامل: تحت أمر حضرتك.
السيسي: طيب، شكرا. الافتتاحات، في افتتاحات؟
إيهاب: آه، أستأذن سيادتك في الافتتاحات.
السيسي: طيب اتفضل.
إيهاب: افتتاح طريق الدايري الأوسطي. (تصفيق)
افتتاح كوبري ومحور المنصورية. (تصفيق)
السيسي: بصوا الحركة أسفل الكوبري لو سمحمت، كدا... اتفضل.
إيهاب: افتتاح تطوير طريق ترسا وكوبري ترسا. (تصفيق)
السيسي: الدكتور مصطفى بيقولي ترسا كان مكانه عمارات، يعني 1000، 1000 متر ولا 6 كيلو ولا إيه؟ 6 كيلو، مش كدا؟ فالدكتور مصطفى بيقولي المحور ده إحنا شيلناه، شيلنا قدام منه صف، صفين عمارات على الجنبين ولا صف واحد، عشان يتعمل الطريق ده... (صوت غير واضح) اللي هو ترسا؟ (صوت غير واضح) ليه يا فندم؟ (يضحك الرئيس)
المشرف على المشروع: بمشي عليه دلوقتي، يعني حاجة معجزة فعلًا، حقيقي شاهد عليه والله يا فندم.
السيسي: ده فضل من ربنا سبحانه وتعالى.. فضل كبير من ربنا.. اتفضل.
إيهاب: افتتاح تطوير محور المريوطية، وكوبري المريوطية.
السيسي: أنا كان نفسي يا إيهاب إنك إنت نجيب المحور ده، المريوطية وال.. قبل، وكان شكل، أنا آسف يعني الترعة عامل إزاي، مش كدا ولا أنا نسيت؟
إيهاب: لا تمام يا فندم.
السيسي: مش كدا؟ وشوف إحنا النهارده لما جينا عملناه عملنا إزاي، كان هنا، أنا آسف أقول، في مخلفات بتترمي في ال..
إيهاب: في الميه.
السيسي: في الترعة، لأ، وحاجات يعني.. حيوانات نافقة زي ما الدكتور عاصم بيقولي كدا.. حاجة كانت لا تليق أبدًا لا بالإنسان، ولا بمصر.
إيهاب: تمام. افتتاح تطوير محور وكوبري المنصورية. (تصفيق)
افتتاح تطوير طريق الجيزة الفيوم (تصفيق)
أي أوامر يا فندم.
السيسي: شكرًا يا إيهاب، متشكرين.
السيسي: معلش يا دكتور عاصم.
اتفضل يا فندم.
السيسي: أنا بس هنا في لفت.. نقطة موجودة.. وعليها نقاش كتير وجدل دلوقتي. اللي هي اشتراطات البناء يا دكتور مصطفى. وأنا بس عايز أقول إيه، الربط بين الاتنين بيدي صورة للناس ليه إحنا كدولة واخدين إجراءات قد، قد تكون في، من وجهة نظرهم قاسية عليهم، أو حتى هاتخسرهم، مش كدا؟
السيسي: طيب، أنا بس بقول إيه، ال.. يعني.. لو أنا حطيت دي جنب أول صورة إنت جبتها يا دكتور عاصم...
عاصم: نرجع لو سمحت.
السيسي: أول صورة بس.. خالص.. أول واحدة.. بس.. أيوة دي..
عاصم: بس..
السيسي: لا اللي بعدها من فضلك.. أو اللي قبلها.. لأ لأ..
عاصم: الكتلة السكنية.. بعديها لو سمحت، بعديها.. بعديها.. بس هنا...
السيسي: طيب.. انا عايز أقولكوا على حاجة. لو واحد عنده حتة أرض فاضية هنا. أنا بقول لكل المصريين اللي بيسمعوني دلوقتي، أنا أخليه يبني تاني؟ أنا بس عايز إنتوا تقولوا بحكم، مش هاقول شغل هندسة ولا حاجة، بمنطق عادي جدا، لو حد في هنا حتة أرض فاضية، أقدر أخليه يبني، ولا هايقول جات عليا؟ هايقول جات عليا؟ مش كدا يا دكتور مصطفى؟
عاصم: صحيح يا فندم.
السيسي: يعني، ده اللي هايقوله، إشمعنى أنا. طب لو جيت قلتله ماشي ممكن أخليك تطلع دورين، يقولي طب اشمعنى أنا ما في اللي جنبي طالع 10 أدوار، اشمعنى أنا؟
لو إحنا فكرنا دايما على إن إحنا "إشمعنى أنا" يبقى عمرنا ما هانغير. ومافيش دول بتتعمل كدا. انا جبت النقطة دي بس، ماعلش يا دكتور عاصم قاطعتك من الكلام.
عاصم: لا يا فندم.
السيسي: علشان دي نقطة عليها نقاش. وكمان أيضا النقاش بيبقى حتى على مستويات مختلفة، وأنا ماقصدش بالكلمة دي حاجة، لكن أتصور إن البرلمان لازم يساعدنا في كدا، يساعدنا في اللي إحنا بنعمله. ليه؟ لأن اللي إحنا بنعمله مش الهدف إن إحنا نأذي المواطن. ده المواطن ده بتاعنا، مننا كلنا. لكن إحنا بلد.
فهنا، لما نيجي نقول اشتراطات البناء، حد تاني يقولي، أنا لو مكانك ما أخليش في محافظة القاهرة حاجة تتبني تاني... كـ.. كسكن وسط ال.. ماكانش حتة أرض فاضية والكلام يتعملها مخطط مظبوط، أرض كبيرة، أرض تاخدلها 10000 وحدة، علشان نشيل قدام منها 20000 وحدة. مش كدا؟ هاعمل 10000 وحدة عشان تشيل قدام منها.. ولا 5000؟ مش كدا؟
إنت النهارده لما تيجي تاخد كيلو في كيلو هنا في أي حتة في ال..
عاصم: في العمق، في الصورة دي.
السيسي: في الصورة ديت، طب لو أنا عايز أفضي عشان أعمل زي ما قلت كدا ال..
عاصم: المحاور.
السيسي: في الجيزة أو كدا، نعمل محورين واحد طـ، عرضي، وواحد طولي، زي مثلًا اللي في النص ده، مثلًا يعني. لو حبيت أخليه ده عشان يبقى متنفس لناس 5 و5 وأعمل كل مثلًا كيلو واحد زيه.. مش كدا يا دكتور عاصم؟
عاصم: نسبة التعويضات يا فندم بتساوي ضعف نسبة إنشاء الطريق، تكلفته.
السيسي: طبعًا.. طبعًا.. طبعًا.. أنا عارف.. بس إحنا مش هانسيب الناس كدا..
عاصم: لأ لأ.
السيسي: مش هانسيب الناس كدا. أنا بس حبيت أتكلم على فكرة التراخيص البناء، لأن فيها نقاش كتير وأنا بسمع. يعني إوعوا.. بسمع وبشوف تعليقات الناس و.. و.. لا لا.. إحنا مش هانزايد على بلدنا.
عاصم: صحيح.
السيسي: إحنا مش هانـ إيه؟
عاصم: مش هانزايد.
السيسي: لا لا.. وإذا كان الأمر محتاج إن إحنا نقعد ونشرح للناس أكتر، نشرح.
عاصم: حاضر.
السيسي: نجيب ونقوله بص على حاجة زي كدا. الكتل دي حوالين القاهرة، وجوة القاهرة. مش كدا يا دكتور مصطفى؟ طب يا جماعة إنتوا، يعني.. وتبقى في صيغة لحل المسألة ديت يا دكتور مصطفى عشان، يبقى.. لكن الاشتراطات اللي إنتوا عملتوها مش ضد الناس، لكن هي كانت.. وعشان كدا إحنا قلناها حتى على المحافظات الزحمة. يعني في إسكندرية بتلاقي الأبراج 16 ، 17 متر.. دور.. على شوارع 6 متر. يعني بقت كتلة بردو يعني بشكل أو بآخر زي كدا.
عاصم: صماء.
السيسي: طب ما إحنا خلاص هانعمل بقى في برج العرب مدينة، وبنعمل في العلمين مدينة، وحتت تانية شغالين فيها عشان توفر السكن المطلوب للمحافظة، أنا مش بقولك إن أنا هاقفل عليك ومش هاوفرلك، لا لا لا.. لأ.. ولو أنا النهارده وإحنا قاعدين مع الدكتور مصطفى دلوقتي، جه الدكتور عاصم قالي أنا عايز أدخل في برنامج للقاهرة والجيزة ب100 ألف وحدة سكنية هاقوله إيه؟
عاصم: نعمل.
السيسي: أنا جاهز. مش كدا يا دكتور مصطفى؟
عاصم: تمام يا فندم.
السيسي: ليه؟ لأن إحنا مش هانسيب الناس كدا.
عاصم: تمام يا فندم.
السيسي: عاصم...
عاصم: أفندم.
السيسي: إحنا قلنا مش هانعمل مكان نحط فيه جامع، إلا لما يكون...
عاصم: في كنيسة.
السيسي: في كنيسة. إحنا عاملين كدا، ولو مش عاملين نعمل.
عاصم: حاضر.
السيسي: بس.
عاصم: إحنا في المجمعات الكبيرة في الإسكان الاجتماعي في، إنما المشروعات الصغيرة بيبقى فيها مسجد أو زاويـ.. يعني مصلى، بس مافهاش مسجد لأن الحجم السكاني مابيوصلش لل..
السيسي: أنا على كل حال ده، يعني..
عاصم: حاضر يا فندم.
السيسي: حتى لو إحنا عملنا..
عاصم: هانعمل فوق المعدل.
السيسي: لأ حتى لو عملنا حاجة صغيرة.
عاصم: حاضر يا فندم.
السيسي: يعني ماهو النتيجة بتعمل إيه، يقولك خلي أعلم الشقة دي كنيسة، طب ليه؟
عاصم: حاضر.. حاضر.
السيسي: لأ إحنا مخططين، حتى لو كانت حاجة يا دكتور مصطفى ل 150 واحد ل 100 واحد، ل 100 مواطن يعني.
عاصم: حاضر، تمام يا فندم.
السيسي: كدا يعني.
عاصم: حاضر.
السيسي: أنا بشكركوا جميعًا يعني النهارده على اليوم دوت، وعلى الكلام المهم اللي إحنا قلناه. سواء في الطرق أو في ال، في الإسكان، أو أي موضوعات تم طرحها خلال المناقشة ديت. وأرجو إن ده يصل لينا كلنا ك، كمواطنين، وكمسؤولين عن الدولة ديت.
والحقيقة ال، ال.. يعني كنت دايم أقول يا جماعة وإنتوا بتصوروا، يعني، يعني الدكتور عاصم كان هنا جاب سن العجوز، وجاب المدابغ وجاب ده.. مهم قوي وإحنا بنوري الناس ليه إحنا بنعمل كدا يا دكتور مصطفى، أنا بتكلم في الإعلام حتى.. إن هو لما ييجي نقوله إيه، آدي منطقة المدابغ اللي كنتوا إنتوا، يعني، مش متصورين إحنا هانعمل فيها إيه. لأن كتير من الأحيان وإحنا بنيجي نعمل برنامج من ده، يقوم الناس تقولك إيه، ده في مستثمر مش عارف هاياخد ال، المنطقة ويعملها حاجة.. وده يمكن يكون شغل من الناس اللي بيعملوه اللي هم يعني، أقل مافيها مايعرفوش يعني..
لأ طبعا، أنا مش ها.. مش.. يعني.. والمستثمرين بيروحوا في الحتت اللي هي، أنا آسف يعني، اللي هي مافيش فيها مشكلة.. عايز التجمع، عايز العلمين، عايز العاصمة، عايز الجلالة.. أماكن، يعني مش هايـ.. مش هاتبقى حاجة جميلة في وسط حاجة متواضعة.
لكن إحنا كدولة، إحنا هدفنا إن لأ، نحسن حياة مواطنينا. وعشان كدا، يمكن لو كان كملنا الأفلام دي يا دكتور عاصم بالمنشآت بالشكل والواقع اللي كان موجود، ثم فيلم صغير كدا، على ال، وإنتوا بتورهولي يعني، في العرض بتاعكوا، بتوريني شكل الحي، وبـ.. ده شكله.. ثم بتوريني بنزيله، ثم بتوروني الشكل اللي إحنا وصلناله.
فده المواطن يعرف إحنا بنعمل كدا ليه، ليه إحنا بنـ، بنخش، ويمكن يكون هنا.. بس إحنا مابنجيش عليك.. إحنا مابنجيش إيه؟ مابنجيش عليك، إحنا بنعوضك.. يعني إحنا مش بنقول إحنا هانعمل جديد، يلا إنت... لا لا لا لا لا.. إحنا بنعوضك، يعني، وبسعر مناسب جدًا جدًا ومش إحنا اللي بنحدده، ده هيئة بتقوم بـ.. بـ.. بتقيم المكان ده يساوي كام، بالمتر، وبالغرفة، ولا أنا مش واخد بالي يا دكتور عاصم؟ هه؟
أنا بتكلم حتى لو بنفتح طريق، أو لو بنزيل عشان نعمل نغير شكل ال، الحياة اللي موجودة، ونحسن من حياة... هو النهارده المنطقة بتاعة.. المدابغ.. يعني إحنا هانفتتح إمتى يا دكتور مصطفى؟
عاصم: إن شاء الله يا فندم يعني في آخر 6 بإذن الله تكون جاهزة بإذن الله.
السيسي: إنت وعدتني آخر السنة اللي فاتت.. صح يا دكتور مصطفى؟
عاصم: صحيح، بل، بس يعني خصائص التربة صعبة جدًا..
السيسي: أنا ماليش دعوة.
عاصم: إن شاء الله 30 – 6 يا فندم تكون منتهية كلها.
السيسي: خلاص.
عاصم: إحنا العمارات قربنا نخلصها. كامل المشروع 30 – 6 بإذن الله.
السيسي: بس هو كدا..
عاصم: إن شاء الله.
السيسي: فأنا عايز أقولكوا لما هاتيجي تشوفوه. اتفضل يا دكتور عاصم.. لما هاتيجي تشوفوه، هاتقولوا الله هي دي منطقة آآآ سكن اللمون، مش كدا ولا؟ (يضحك الرئيس)
رئيس الوزراء: السكر واللمون.
السيسي: السكر واللمون وكدا.. هو ده اللي كان موجود؟ آه. تبقى كدا؟ أيوة تبقى كدا، نقدر نعمل كدا، نقدر كـ.. لما نحط إيدينا في إيدين بعض كلنا نقدر نعمل حاجة حلوة.
فأنا بوجه الشكر لكل القائمين على الشغل اللي بيتعمل ده، ولسه.. لسه بدري قوي. قدامكوا كتير... شكرًا جزيلًا. (تصفيق)
ألقيت الكلمة في الٌقاهرة، بحضور الدكتور مصطفى مدبولي رئيس مجلس الوزراء، والفريق كامل الوزير وزير النقل، والدكتور عاصم الجزار وزير الإسكان، وعدد من الوزراء.