نص كلمة السيسي أثناء تفقده عددًا من مشروعات تطوير القاهرة الكبرى 25/2/2022
مهندس1: المنطقة اللي إحنا فيها دي يا فندم تم حفر أكتر من 200 ألف متر في تربة صخرية باستخدام المعدات الميكانيكية لتجنب النسف، لوجود منطقة سكنية
السيسي: طبعا.
مهندس1: وتم ردم أكتر من 350 ألف متر مكعب باستخدام أعلى معايير الجودة.
السيسي: طيب.. إحنا هانخلص إمتى؟
مهندس1: إن شاء الله يا فندم خلال شهر تلاتة.
السيسي: يعني قبل رمضان، مش كدا؟
مهندس1: إن شاء الله يا فندم.
السيسي: نكون خلصنا ال(كلمة غير واضحة) وكل شيء.
مهندس1: (كلمة غير واضحة) بجميع الأعمال التكميلية.
السيسي: حتى إمتداده؟
مهندس1: القمر الصناعي خِلِص.
السيسي: خِلِص. يعني كدا هايبقى المحور انتهى تمامًا.
مهندس1: إن شاء الله يا فندم هي نقطة الربط عن طريق الاوتوستراد.
السيسي: هل إنتم شايفين في حاجة تانية ممكن تيسر للمنطقة هنا، الحركة بتاعتها ممكن نعملها؟
مهندس1: التقاطع ده يا فندم كان دايمًا مزدحم، لأن الأوتوستراد طريق رئيسي، مع داخلة زهراء المعادي وحي المعادي، فإحنا دلوقتي يا فندم قدرنا نحرر الحركة تماما.
السيسي: طيب، أنا بتكلم بقى على المنطقة دي كلها.
مهندس1: تمام سيادتك.
السيسي: هل في حتة، أو في حركة تانية، محتاجة مننا نوسع المحاور، نزود حارة ولا حارتين، أو نزود كباري نحرر الحركة فيها، بحيث إن الحركة.. إنت كدا (كلمة غير واضحة) الحركة العمودية اللي على هنا.
مهندس1: تمام يا فندم.
السيسي: على كل حال، أنا بقولك الكلام ده عشان لو كان ده مجال إنك إنت تفكروا فيه، فكروا..
مهندس1: هاندرسه يا فندم وهايتم العرض على حضرتك.
السيسي: بس كدا.. حاجة تاني؟
مهندس1: تمام يا فندم.
السيسي: شكرا.
السيسي: السلامو عليكو.
مهندس2: محور حسب الله الكفراوي، بيبدأ من صينية القمر الصناعي، مرورًا بتقاطعه مع محور الأوتوستراد، ومرورا بمنطقة زهراء المعادي، ويتقاطع مع محور الطريق الدائري، الكوبري اللي سيادتك مشرفنا عليه يا فندم، وبينتهي عند نفق الأسمرات يا فندم.
المحور ده يا فندم بياخد القادم من مناطق جنوب القاهرة، والقادم من حلوان وطريق السيد الحر، وبيربطه مع شرق القاهرة في اتجاه العاصمة الإدارية عن طريق عدة محاور يا فندم: المحور الأول محور الدكتورة سميرة موسى، المحور ده يا فندم بيبدأ من نفق الأسمرات، وبيتقاطع مع محور الشهيد ومحور المشير محمد علي فهمي، ومحور اللواء عمر سليمان، ومحور المشير طنطاوي، حتى شارع جمال محمد علي. ومن القادم من الجنوب لمناطق شرق القاهرة ومناطق العاصمة الإدارية، عن طريق محور اللواء عمر سليمان، اللي بيتقاطع مع محور محمد علي فهمي، ومحور الدكتورة سميرة موسى، وكذلك بينقل القادم من الجنوب للمناطق دي عن طريق محور المشير طنطاوي.
الطريق ده يا فندم برضو بيربط القادم من الجنوب بمناطق شرق القاهرة، وطريق السويس، ووصولًا لمطار القاهرة الدولي عن طريق محور شنزو آبي، مرورا بمنطقة مدينة نصر ومدينة الأمل. كذلك يا فندم المحور دهب يربط مابين مناطق الجنوب ومناطق شمال القاهرة وغربها عن طريق محور امتداد المشير ومحور جيهان السادات.
يبقى كدا يا فندم المحور ده نقدر نقول إنه بيربط مناطق الجنوب بالكامل، القادم من حلوان، ومناطق الجنوب بالقاهرة.
السيسي: ده المحور رقم 8؟
مهندس2: تمام يا فندم.
السيسي: لأن إحنا قلنا المحور بتاع طريق السويس نفسه ده محور يربط الشرق بالغرب، ويربط شرق القاهرة وامتدادها لغاية التجمع ولغاية السويس، ولغاية العاصمة الجديدة بالمدن اللي موجودة عليها، صح كدا؟
مهندس2: تمام يا فندم.
السيسي: ثم عندي بعد كدا محور، أو كوبري سمير غانم، مش كدا برضو؟
مهندس2: مظبوط.
السيسي: وده بياخدني من شنزو آبي ويكملي لغاية التجمع الأول، صح كدا؟
مهندس2: مظبوط يا فندم.
السيسي: أنا اللي أنا عايز أقوله هنا إيه، إن إحنا مش بنقول للناس إن إحنا ربطنا بس كدا، إحنا عملنا تعدد وتنوع في وسائل الانتقال من الشرق، شرق القاهرة، بشكل مريح جدًا جدًا، بحيث إن أنا قربت، قربت ماخلتش الناس النهارده وهي بتتحرك من، من وسط القاهرة مثلًا في اتجاه شرق القاهرة، مايبقاش عنده غير مثلًا، مثلًا، محور السويس، أو مثلًا محور المشير طنطاوي، لأ، ده أنا عملت فريال أشرف، مش كدا؟
مهندس2: مظبوط.
السيسي: عملت ده، عملت عمر سليمان، آدي محور تاني، مش كدا؟
مهندس2: مظبوط يا فندم.
السيسي: عملت حسب الله الكفراوي اللي إحنا بنتكلم عليه. إذن، أنا مش فكرة إن أنا.. أنا بقوله هنا مش عشانك إنت، إنتوا اللي عاملينه، لكن أنا بقوله عشان الناس تبقى عارفة إحنا ليه عملنا كدا، عملنا محاور كتير ليه؟ عشان أوزع حجم وكثافة العربيات الكتير قوي اللي كانت القاهرة ماتستوعبهاش، عالأقل في المنطقة ديت، ويبقى النهارده الناس عندها أكتر من، من .. من.. من مسار حركة، يخدم على كل واحد، طبقا لأقرب نقطة ليه، أقرب حاجة للسكن بتاعه، أو للعمل بتاعه. آدي نقطة.
وإحنا شغالين بعد كدا في الغرب، بنفس الطريقة. يعني إحنا شغالين في الغرب عشان نعمل شبكة طرق أخرى لغرب، غرب النيل، أو غرب القاهرة إن شئتم تسموها كدا.
إنتوا هنا المفروض هاتعملوا حاجة توصلكوا لغاية صلاح سالم. فوق النفق هانطلع على الوصلة بتاع المقطم على الجبل..
مهندس2: أيوة يا فندم.
السيسي: ونوصل لغاية، نعدي المقطم نفسه..
مهندس2: تطويل شارع 9 يا فندم.
السيسي: مش كدا يا فندم.. أيوة ونوصل بيه لغاية صلاح سالم.
مهندس2: مظبوط يا فندم. في كوبري هايتعمل في الصينية يا فندم اللي عند شارع 9.
السيسي: ماشي.. المهم إنتوا اللي شغالين فيه ده، مش كدا؟
مهندس2: أيوة يا فندم.
السيسي: إمتى معادنا؟
مهندس2: إحنا لسه يا فندم سيادتك عاينا إمبارح...
السيسي: في التصميمات والكلام ده.. لكن.. إنتوا قدامكوا بعد التصميمات ماتوصلكوا 3 شهور..
مهندس2: تمام يا فندم.
السيسي: كتير؟ ولا قليل؟ بصراحة؟ (يضحك الرئيس) كتير ولا قليل؟
مهندس2: يعني إن شاء الله يا فندم إحنا...
السيسي: أنا عايز أقولك على حاجة، إنتوا شوفتوا الموضوع ده يعمل إيه في الناس؟
مهندس2: طبعا.
السيسي: بيفرّج عليهم.. بيوفرلهم وقود.. مش كدا؟
مهندس2: طبعا.. طبعا..
السيسي: بيريحهم؟
مهندس2: طبعا.
السيسي: طيب.. إنت عايز توريني إيه؟
مهندس3: بنفذ يا فندم الأعمال الصناعية على المحاور الرئيسية لتحرير التقاطعات يا فندم على المحاور. محور سيادتك حسب الله الكفراوي، إحنا نفذنا عليه يا فندم 6 كوبري ونفق يا فندم. تم تنفيذ كوبري أعلى الأوتوستراد يا فندم وده بيحقق ربط كامل مع طريق الأوتوستراد، ثم تم تنفيذ يا فندم 3 أعمال صناعية: نفق و2 كوبري لتحرير الحركة مع الطرق الداخلية بمنطقة زهراء المعادي يا فندم. ثم تم تنفيذ كوبري اللي هو حسب الله الكفراوي اللي سيادتك مشرفنا عليه يا فندم أعلى الطريق الدايري لربط المحور بالطريق الدايري، وسيادتك تم تنفيذ نفق الأسمرات لتحرير الحركة مع المتجه يا فندم لمحور الدكتورة سميرة موسى ومحور عمر سليمان ومناطق المقطم.
سيادتك محور الدكتورة سميرة موسى يا فندم ده عليه 4 كباري يا فندم. في كوبري بيحرر الحركة مع محور الشهيد، وده بالفعل يا فندم منفذ وجاري العمل ب3 كباري لتحرير الحركة مع محور المشير محمد علي فهمي، ومحور عمر سليمان، ومحور المشير طنطاوي. وسيادتك الكوبري اللي على محور المشير طنطاوي ده يا فندم، هايوصل ارتفاعه لحد أكتر من 25 متر، وهايعدي أعلى المونوريل، وتم التنسيق مع الهيئة القومية للأنفاق يا فندم.
السيسي: اللي هو عند المنارة.
مهندس3: اللي عند المنارة سيادتك، تمام. وفي سيادتك محور عمر سليمان يا فندم اتنفذ وسيادتك محور الدكتورة سميرة موسى يا فندم، هايوصل لحد شارع جمال محمد علي، لحد كوبري البطلة فريال يا فندم أعلى الطريق الدايري يبقى إحنا كدا ربطنا المحور بمناطق القاهرة الجديدة، ومنها للعاصمة الإدارية.
السيسي: يعني إنت، إنت عملت محور موازي للدايري، مش كدا؟
مهندس3: بالظبط يا فندم.
السيسي: وده اللي إحنا عايزين نقوله للناس، إن إحنا مش هانكتفي بس بالدايري ممكن أتحرك عليه، الناس اللي متحركة ممكن تروح داخلة تعدي الكباري ديت وتمشي موازي للطريق الدايري.
مهندس3: دون المرور بالطريق الدايري يا فندم.
السيسي: ماشي.
مهندس3: في سيادتك محور عمر سليمان يا فندم دهم تنفذ يا فندم بالفعل، ومتنفذ عليه 3 أعمال صناعية...
السيسي: شوف.. ده آخر محور، اللي إحنا كنا بنتكلم فيه..
مهندس3: تمام.
السيسي: من أول طريق السويس، وسمير غانم، وفريال أشرف، وعمر سليمان، والمشير طنطاوي.. ده آخر حاجة، مش كدا؟
مهندس3: تمام
السيسي: ده آخر إيه؟
مهندس3: ده آخر محور.
السيسي: ده آخر محور.
مهندس3: ده آخر محور اللي سيادتك مشرفنا عليه.. سيادتك بردو محور عمر سليمان يا فندم بيربط يا فندم ال، ال.. محور حسب الله الكفراوي مربوط بمحور عمر سليمان. محور عمر سليمان يا فندم اتنفذ عليه 3 أعمال صناعية عشان نحرر الحركة يا فندم مع محور الشهيد ومحور...
السيسي: طب إحنا ممكن نقول للناس إيه، إن المحاور دي بالكامل...
مهندس3: خلصانة.
السيسي: متحررة.. لأ، متحررة الحركة عليها.
مهندس3: تمام سيادتك.
السيسي: بحيث إن هي مابقتش في أي إعاقة، وهو ماشي على الطريق يلاقي حد بيـ.. يعني..
مهندس3: تقاطعات يا فندم.
السيسي: تقاطعات أو كلام من هذا القبيل. وإنتوا هاتعملوا الكوبري، مش كدا يا محمد؟ الكوبري اللي هو عند مدخل الأسمرات، مش كدا؟ مش كدا؟ عشان تدخلني على هنا مستريح بعيد عن اللفة اللي، مش كدا بردو ولا؟
مهندس3: تمام سيادتك.
السيسي: إنتوا اللي هاتعملوا؟
مهندس3: إن شاء الله يا فندم. وسيادتك محور شنزو، محور شنزو آبي يا فندم، عليه يا فندم 15 عمل صناعي، 12 يا فندم بالفعل تم تنفيذهم، وجاري تنفيذ 3 أعمال صناعية يا فندم: عملين عند منطقة جاردينيا، ودول يعني خلاص يا فندم، يعني يكاد يكون انتهينا منهم، والمحور اللي بيحرر الحركة يا فندم مع الكوبري اللي بيحرر الحركة مع محور الشهيد علشان سيادتك مانخلقش تقاطع مع محور الشهيد مع محور المشير مع محور شنزو آبي، وده سيادتك واصلين لنسبة تنفيذ 50%. وفي سيادتك بردو يا فندم من ضمن ال...
السيسي: يعني على رمضان يكون خلصان؟
مهندس3: تمام سيادتك.
السيسي: متشكرين. إحنا معادنا في رمضان.
مهندس3: إن شاء الله بإذن الله.
السيسي: متشكرين. سلامو عليكو.
ألقيت الكلمة على محور حسب الله الكفراوي، بالقاهرة، بحضور عدد من المهندسين والعمال القائمين بأعمال تطوير القاهرة الكبرى.