نص حديث السيسي مع المواطنين أثناء افتتاح مدينة أسوان الجديدة 28/12/2021

0:23

 

السيسي: طب بقولكم إيه، بقولكم إيه.. اختاروا مكان، يا دكتور مصطفى، وإحنا هانعملهلكوا، وهايبقى معرض دائم على طول.

مواطنة1: والله بس أنا بقول لحضرتك إن مافيش أي حد مسؤول وفي جهة معنية بيتأخر عننا في حاجة، بس أهم حاجة إن إحنا نوصل ونطرق الباب، هي دي.

السيسي: طب طرقتم الباب؟

مواطنة1: بنطرق البيبان كلها (يضحكون)

السيسي: متشكرين.. هانعملكوا المعرض اللي إنتوا عايزينه.

 

1:07

 

مواطنة2: البيوت تحتها ميه، من كتر المية اللي من تحت البيوت الميه بتطلع، الناس مش عارفة تعيش من الميه دي، فحضرتك معلش، يعني إنت جمايلك علينا كتيرة.

السيسي: مافيش جمايل.. الجمايل ده لما حاجة.. دي البلد. دي مصر. مصر اللي جمايلها علينا كلنا.

مواطنة2: والله، أنا فخورة بحضرتك.

السيسي: متشكر.. أنا هاقولك بس على حاجة، ده فرصة إن أنا أقول كدا.. معنى إن إنتي تطلبي الطلب ده، ما هي القرية دي من 4500 قرية، المفروض إن إحنا عاملين برنامج حياة كريمة لهم.. ثانية بس طولي بالك.. إن إحنا نغطي ده في 3 سنين.. في 3 سنين.. خدنا إيه؟ خدنا أول تلت، اللي هو أصعب حاجة، هاتقولي ده اللي عندنا صعب، هاقولك صدقيني اللي إحنا اخترناه كان أصعب.. كان إيه؟ أصعب. التل تده هايخلص في سنة، يخلص في سنة. هانعمل فيه إيه؟ هانعمل فيه الصرف الصحي، هانراجع ميه الشرب، هانراجع الكهربا ونتطمن إنها تمام، هانراجع البيوت اللي هي حالاتها صعبة ونحسنها، هانعمل الطرق، هانبطن الترع، هاندخل الغاز، هاندخل الاتصالات... في كل ده، وده مش إيه، يعني إيه، مش حد يعني يقولي صوته ييجي ودني فأقوم أعمله، لأ، إحنا بنتكلم على دولة، بتخش على كل ريف مصر.. صعيد، دلتا، والتوابع بتاعتها.. كله كله، لا كله.. ده موضوع مش متنقي، يعني إيه، شوفنا القرية دي عملناها، لا لا، ما أنا هاكملك بس..

أصل إنتي إحنا دلوقتي الناس بتسمعنا، إحنا عالهوا. فأنا عايز الناس في الفرصة إن هم يعرفوا إن إحنا مش هانسيب حد. البرنامج، إيه يا دكتور؟ البرنامج مغطي الجمهورية كلها. كل قرية في مصر لازم يخشلها صرف صحي، كل قرية في مصر لازم يخشلها ميه شرب كويسة ونتطمن، كل قرية في مصر نتطمن على الكهربا بتاعتها (تصفيق) ما أنا هاقولك، كل قرية ممكن الغاز يخش فيها هاندخلها الغاز، كل قرية، الاتصالات يعني النت والكلام ده، هايخشلها، ثم الترع اللي فيها نعمل فيها إيه؟ نبطنها.. ما أنا هاقولك، يعني.. لو مافيش مدارس، هانعمل، لو المستشفى عايز يترفع كفائتها ومافيش، هانعمل، أو مراكز صحية، ثم المحليات بتاعتها.

المعنى اللي أنا عايز أقوله إيه؟ إن إحنا أملنا عند ربنا سبحانه وتعالى، إن في ال3 سنين دول، اللي بدأوا بقالهم 6 شهور، يعني فاضل سنتين ونص، نقدر، الوعد ده لكم، مش مني، من الدولة المصرية، من الكهربا، والكهربا يعني إيه؟ يعني إنتوا ممكن يكون عندك كهربا، في البيت يعني، بس ممكن تكون جودتها إيه يا دكتور شاكر؟ بتقطع شوية مش عارف إيه، لا إحنا بنتكلم على جودة كهربا حقيقية، في كام سنة؟ فاضل منهم كام؟ ست شهور، فاضل إيه؟ بعد ال6 شهور الجايين دول اللي هو 6 اللي جاي إن شاء الله، هانخش عالتلت التاني إن شاء الله، التلت الإيه؟ ياخد سنة، ثم بعد كدا إن شاء الله بعد سنة نخش عالتلت الأخير، ويبقى كدا خلصنا الريف، مش بس قرية حضرتك، القرية بتاعة كل مصر وتوابعها.

 

5:06

 

مواطنة3: إحنا كنا بنستسمحك إن حضرتك تدينا أرض فضا الشباب يبنوا فيها.

السيسي: طب أنا هاقولك بردو الكلام الي بتقوليه ده كلام مهم، وإحنا موجودين، إحنا بنتكلم عالأراضي الزراعية بنقول إيه، نحافظ عليها، لأنها مش كتير. لكن في الأراضي اللي هي الظهير الصحراوي، نعمل ده، ونشوف يا دكتور مصطفى الكلام دوت، مش بس قريتك، لكل القرى اللي هي...

مواطنة3: مافيهاش شبر مكان نبني فيها بصراحة.

السيسي: بس أنا هاقولك على حاجة، مادام إنتي قلتي كدا.. في فرق كبير قوي إن أنا أقول عايز أبني بيت ريفي.. وإن أنا أبني بيت نعيش فيه فوق بعض، لامؤاخذة يعني شقق فوق بعضها كدا. في الوضع اللي إحنا فيه ده، مع ندرة الأرض، محتاجين نغير إيه، عاداتنا، نبني إيه، دور واتنين وتلاتة..

مواطنة3: مش مشكلة أهم حاجة...

السيسي: لا هانوفر، حاضر.

 

6:11

 

السيسي: عايز أقولك على حاجة، لما.. ما أنا ممكن أقول إيه، حاضر وأمشي.. ماينفعش كدا، إحنا، إحنا باصين، الدولة باصة لكل ريفها، من الجيزة، الصف، لغاية أسوان.. البرنامج اللي موجود زي ما قلت كدا، اللي هو ال، في ال3 سنين هانغطي كل الملاحظات اللي انا قلت عليها دي.. لا، ده.. قولوا يا رب بارك لمصر، ويحمينا من فضله.. أنا عيني ليكوا..

 

7:05

 

مواطنة4: عايزين نتصور معاك.

السيسي: قوي.. قوي.. خلي بالك إحنا دلوقتي وإحنا طالعين كدا كل الناس شايفينا في مصر (يضحكن) عايزيني آجي فين؟ آجي فين.. مش عايز أقف قدامها طبعا مايصحش.. ماهو أنا جاي أهو...

 

 

1:15

السيسي: أنا عايز أقولك على حاجة.. أنا عايز أقولك على حاجة.. أنا، أنا، مش انا بس، أنا والدولة معنيين بإن إحنا نحيي كل التراث اللي عندنا ونديله قوة دفع كويسة عشان ده تاريخنا، ولازم نحافظ عليه، ومش بس نحافظ عليه.. آه أمال إيه؟ وأنا معاكوا.

وإحنا دلوقتي يا دكتور مصطفى، هانخلينا نقول.. نحط تحت فكرة إحياء التراث ده كـ.. أنا دايما بحب أحط حاجة إيه، تستقر.. نحط عائد 200 ميون جنيه من تحيا مصر، عائد ال200 مليون جنيه تحيا مصر لصالح دعم الإيه؟ الصناعات دي. بالإضافة للي إنتوا بتعملوه.

مواطنة5: أقول لفخامتك حاجة كمان، الخطة المستقبلية بتاعتنا إننا نعمل متحف محلي للنسيج والتطريز في أخميم. في المركز بتاعنا، عندنا مكان نقدر نعمله..

السيسي: طب أنا هاقولك على حاجة أكتر.. هاقولك على حلم أكبر من كدا... إحنا عاملين في العاصمة مكان كبير قوي للتراث.. مكان كبير إيه؟ للتراث. المكان ده إحنا محتاجين إن إحنا لما يبقى، بس لما يطلع يطلع قوي قوي، يطلع إيه؟ قوي جدا، عشان دي الصورة اللي إحنا بنديها للناس على إن إحنا، إحنا فين؟ فلو ال..

مواطنة5: وعندنا إيه..

السيسي: آه، فلازم المجموعة اللي تخش معانا في الموضوع ده، وأرجو إن الكلام ده مايبقاش مؤلم لأي حد.. مجموعة قوية قوي، ومحترفة جدا، لأن الفرصة اللي هاتبقى موجودة مش.. الفرصة مش فرصة مكسب هنا، لأ، الفرصة هي مكسب لتاريخ مصر. الدول كلها بتعمل تاريخ، الدول كلها بتعمل إيه؟

 إحنا عندنا تاريخ، وعندنا تراث جميل زي ما إحنا شايفين كدا. مش هاقول نسيناه ولا حاجة، لكن هاقول لا إحنا عايزين نحييه بناس فاهمة كويس وشاطرة قوي في الموضوع، بحيث إن إحنا لما نيجي نبدأ ده يكون إنتوا راجعتوه...

وزيرة التجارة: سيادتك قلتلي نعمل ده بالتناوب. حضرتك كنت وجهت...

السيسي: لا دي حاجة.. أنا ممكن أعمل.. ما،  ماهو أصل..

وزيرة التجارة: لا الأماكن هناك في العاصمة الإدارية في الجالريهات الي هناك سيادتك قلتلي تنتقي مجموعة وإن هم مثلا يبقوا موجودين دول لمدة 3 شهور، وآخرين منتجات أخرى 3 شهور، عشان نقدر نتيح أكبر قدر للمنتجات المتميزة إن هي تبقى موجودة هناك.

السيسي: طيب، أنا بردو عايز أقول إن إحنا اللي أنشأناه يا دكتور مصطفى هناك كتير قوي. ففي فرصة لأماكن، في فرصة لإيه؟ لأماكن. أصل أنا لو قلتله إيه، معنى إن في إحلال يعني إيه؟ ده معناه بيشيل حاجة، لا إحنا عايزين كل اللي عندنا..

وزيرة التجارة: نحطه..

السيسي: لأ، نحطه الحاجة اللي إيه؟

وزيرة التجارة: الكويسة.

السيسي: اللي هي، يعني، جودة عالية. بحيث إن.. ويبتدي يتبني عليها بقى. المصريين يشوفوها، ونتكلم معاها، وتشتغل وكدا يعني. فـ.. ونتيحلكوا في ال.. (يبتسم الرئيس) هاخلي بردو تحيا مصر تدفع الموضوع ده لمدة إيه، سنتين.. كمكان، لأن المكان غالي قوي (يضحكون).

...

ألقيت الكلمة في محافظة أسوان، خلال افتتاح مدينة أسوان الجديدة حيث تفقد الرئيس كورنيش المدينة ومنطقة الإسكان والفيلات، وضلك بحضور الدكتور مصطفى مدبولي رئيس مجلس الوزراء، ونيفين جامع وزيرة التجارة والصناعة، وعدد من المواطنين.

...

خدمة الخطابات الكاملة للسيسي تجدونها في هذا الرابط