نص حديث السيسي مع المواطنين وعمال الفخار أثناء تفقد عدد من المشروعات 17/12/2021

السيسي: أخبار الدنيا هنا إيه؟

عامل1: الدنيا هنا كويسة سيادتك بتعليمات سيادتك إن إحنا نهتم بالحرف اليدوية. سيادتك عملنالهم حاجات كويسة، زي إيه.. سيادتك كانوا بيحرقوا بالخشب بيبوظوا البيئة، عملنالهم سيادتك دخلنالهم أفران صديقة للبيئة، دخلنالهم المية، دخلنالهم الغاز. لأن الناس هنا سيادتك جواهرجية الطين، بمعنى أصح سيادتك الاهتمام بيهم بيرفع المستوى، علاوة على كدة إن هم موجودين في منطقة الفسطاط اللي سيادتك أمرت بتطويرها في وجود متحف الحضارات، في وجود العائلة المقدسة، ومجمع الأديان، فهايبقى ليها شأن كبير جدا لو اهتمينا أكتر بيهم، بمعنى سيادتك إن إحنا نستكمل، المشاريع اللي موجودة هنا عبارة عن إن إحنا نفتح مدرسة، لأن الموضوع ده سيادتك هايندثر.

الناس اللي شغالة بإيديها سيادتك كبار في السن. أولادهم مابيجوش لأن هم مابيعلمهمش حاجة، عايزين نحطهم عالخريطة السياحية. طبعا سيادتك لما أمرت بالكلام ده، المحافظة والمنطقة الجنوبية سهلت لهم حاجات كتير قوي في دخول الغاز والكهربا والأفران الصديقة للبيئة. بس جاري في استكمال باقي الأفران. بتشرف طبعا بحضور سيادتك، أنا ماعرفش إن سيادتك هاتشرفنا طبعا. وأتمنى من الله إن سيادتك تبص على حرفة يدوية فنانين على أعلى مستوى بنسميهم جواهرجية الطين.

السيسي:  طب أنا هاسألك سؤال.. هل في مكان للمدرسة للي إنت بتقول عليها؟

عامل1: آه في يا فندم.

السيسي: فين؟

عامل1: في المبنى الإداري.

السيسي: يعني هاتبقى جزء من المبنى الإداري.

عامل1: جاهزة يا فندم جزء منه.

السيسي: طيب.. المبنى الإداري مساحته قد إيه؟

عامل1: مساحته يا فندم أكتر من 2000 متر.

السيسي: طب وهو كان معمول ليه؟

عامل1: معمول سيادتك علشان تخش فيه الحرف الصناعية، وزارة الصناعة بتعمل فيه سيادتك عبارة عن تصميمات لبعض الحرف اليدوية، ومدرسة لإنشاء جيل جديد.

السيسي: هو كام دور؟

عامل1: دورين يا فندم.

السيسي: دورين.. يعني 4000 متر، مش كدة؟ طيب، نعملهم المدرسة.. إيه تاني؟

عامل1: استكمال باقي سيادتك الأفران الغاز.

السيسي: الأفران دي إنتوا بتجيبوها منين؟

عامل1: المصانع الحربية يا فندم. مصنع 4 الحربي.

السيسي: مساحة معينة، حجم معين؟

عامل1: حجم معين يا فندم بس كان في اختلافات.

السيسي: لإيه؟

عامل1: الاختلافات سيادتك إن البعض هنا لما جه يصمم سيادتم ماخدوش رأي بعض الصنايعية، لأن الصنايعية هي اللي عارفة أكتر حاجة تقدر تعمل فيها إيه. لكن للأسف اتعمل ومشيت عليها. في نوعين: في 120 في 120 سيادتك ده الفرن الصغير...

 السيسي: 120 سنتي؟

عامل1: 120 آه يا فندم، وفي 170 في 170. لكن في حاجة بعد إذن سيادتك يا فندم يعني.. التكلفة غالية، بمعنى هم لما كانوا بيحرقوا بالخشب سيادتك بينتج، ولما بينتج، كمية الخشب والفلوس اللي بتتدفع في الخشب قليلة، عن استهلاك الغاز، أو استهلاك الكهربا. فطبعا النهارده الناس اللي دفعت سيادتك في موضوع الغاز بتدفعلها من 9 ل 8 آلاف جنيه، تمام، وكمية   الإنتاج اللي بتطلع حلوة في النوعية لأن الغاز والكهربا بينشف المنتج وبيخليه على أعلى مستوى. تمام سيادتك، فده كان بب رئيسي إن الناس قلقانة من حتة المبلغ.

السيسي: شوف أنا هاقولك على حاجة. خلينا إيه ناخد الموضوع حتة حتة. هو طبعًا فنيًا مش هاقدر أتكلم في موضوع مساحة الفرن وكدة. بس انا متصور إن إحنا كل ما هانخلي المساحة بتاعة الفرن ده ونشوف المتخصصين في الموضوع ده أكبر من كدة، هايبقى الحرارة دي ويتعمل إجراءات إن يتحافظ على الحرارة بقدر الإمكان، يبقى حجم الغاز المستهلك مايبقاش عبء على الناس، ليه، حجم المنتج اللي جواه هايبقى كبير. لكن إنت كل ما تكون شغال في حاجة صغيرة كدة، أنا آسف يعني لو بتعمل حاجة في 20 في 20 غير لما تعملها في أكبر من كدة.

فأنا فنيًا هانشوف دي، واخد بالك، لكن عايز أقولك إيه، ما إنت بردو بتاخد منتج كويس. ولازم نتعود بقى إن إحنا إيه، نحط تكاليف الحاجة مظبوط. يعني مش هانقدر نقول إيه، عشان أكون أمين معاك.. مدرسة نعمل مدرسة.. نحسن من هنا نحسن.. نعمل كل حاجة حلوة لهم. لكن خلونا كل حاجة تتعمل بإيه، بأسعار، لأن الغاز أساسًا سعره منخفض. يعني لو إنت النهارده بتستخدم كهربا، هايبقى أضعاف الرقم اللي إنت بتقول عليه ده، كدة يعني.. طب إيه تاني؟

عامل1: بس خلاص.

السيسي: ربنا يوفقك.

...

5:32

عامل2: (يفتح فرن كهربائي للرئيس السيسي)

السيسي: بس علشان مانبوظش الشغل بتاعكوا.. لا اقفل اقفل اقفل..

عامل2: ده لسه متشطب.

السيسي: طيب.. الدنيا ماشية كويس؟

عامل2: الحمد لله.

السيسي: اللي إنتوا عايزينه متحقق دلوقتي؟

عامل2: الحمد لله بإذن الله.. بس هو يعني بردو نفسكوا إنتوا بقى معانا.

السيسي: إيه المطلوب؟

عامل2: المطلوب بس الدعم في ال، لأن إحنا بقالنا فترة قاعدين، فالرصيد بتاعنا خلاص، فعايزين بس المون والحاجات دي تبقى مخفضة شوية.

السيسي: المون اللي هي إيه؟

عامل2: اللي هي الحاجات اللي بنستعملها.

عامل3: الخامات. في مشكلة في الخامات. هي الحرف اليدوية عامة بتكون محتاجة دعم.

السيسي: آه طبعا، طبعا.

عامل3: محتاجين دعم لأن ده تراث لازم نحافظ عليه.

السيسي: بتشتغل كام ساعة كام يا أحمد؟

عامل3: أنا لو في شغل بشتغل أي وقت، من الصبح.

عامل2: في الدراسة كان بييجي يشتغل بردو.

السيسي: ما شاء الله.

عامل3: كل الشغل ده إحنا بنعمله.

السيسي: حاجة جميلة وحاجة محترمة، ما شاء الله.

عامل3: من فضلك بردو في شغل تصدير بيطلع برة مصر.

السيسي: إحنا نساعد في الحكاية ديت، آه نساعد في الحكاية دي.

عامل2: يا ريت، المهنة دي خسارة إنها تنقرض يعني.

عامل3: بالنسبة لشغل التصدير كله لازم يبقى عليه البادج بتاع "صُنِع في مصر".

عامل2: لا شغل التصدير ياريت تهتموا بيه، لأن الصنعة دي خسارة إنها تنقرض يعني.

السيسي: لا طبعًا طبعًا. إحنا هانعملكوا المدرسة في المبنى الإداري، وشوفوا إنتوا بقى مين ال، يعني..

عامل2: هم بقى يختاروا أقدم واحد بقى.

السيسي: لا أنا بقول اللي هو هايقوم بالدور والتدريس وكدا.

عامل3: ده في ناس كتير سابت الصنعة دي، لأن هي مش مربحة.

السيسي: كانت مش مربحة.

عامل3: هي المفروض إن هي مربحة جدًا، بس هي الفكرة إن في ناس كتير بدأت اللي اشتغل سواق اللي اشتغل.. وفي ناس فنانين يعني...

السيسي: بيعمل كام في اليوم؟

عامل2: بالنسبة؟

السيسي: اللي هو المهني يعني.

عامل3: المعدل يعني الطبيعي؟

السيسي: لأ، يعمل، يعني إنتاجه يحقق أرباح أو عائد ليه قد إيه؟

عامل2: لا لو في إنتاج وشغل وبيع وشرا.. هايعمل إنتاج حلو، فلوس حلوة.

عامل3: ممكن يعمل 500 جنيه في اليوم.

السيسي: لا أنا بتكلم أنا النهارده يا أحمد جيت اشتغلت عند أحمد. وهاشتغل 7 ساعات أو 8 ساعات.. هاخد كام؟

عامل2: هايعمله 150 جنيه 200 جنيه.

السيسي: لو مهني.

عامل3: ده الصنايعي. المبتدئ مثلا ممكن 70، 80، 100.. لو عيل صغير من 50 لـ60 جنيه. كل ما بيفهم الشغل وبيتعلم الراتب بتاعه بيزيد.

السيسي: يعني ال70 ده للي لسه بادئ، لغاية 150 جنيه.

عامل2: آه لغاية ما يوصل ل100 و200 وممكن 300 كمان.

السيسي: أصل أنا إحنا بنقول الكلام ده الناس هاتسمعه، وتعرف إن في إيه، في فرصة.

عامل2: فيه، يا ريت نقدر نعلم حد.

عامل3: هي بتاخد وقت وسنين علشان نتعلمها.

السيسي: إن شاء الله.

عامل2: خسارة المهن اللي زي دي.

السيسي: آه طبعًا خسارة.

عامل2: ممكن تدخل دخل حلو لمصر والله.

عامل3: برة بيدوروا عليها، ماحدش بيشتغل بإيدوا، كله مكن، الشغل بالإيد مطلوب دلوقتي.

عامل2: ده عشان يدوي، كليه حضرتك يعني، الأجنبي بالذات لما بييجي بينبهر بالشغل إن هو يدوي يعني.

السيسي: ما شاء الله، متشكرين.. متشكرين يا أحمد.. خلي بالك من الأب. متشكرين.

...

9:25

 

عامل4: صدرت لهولندا، صدرن للأردن الجزائر البحرين...

السيسي: فين مصنعك دلوقتي؟

عامل4: نعم..

السيسي: مصنعك ال100 متر فين؟

عامل4: مصعني موجود حضرتك تيجي تتفرج عليه حضرتك.

السيسي: هاجيلك.. هاجيلك.. طب إيه المشكلة اللي عندك؟

عامل4: مشكلتي مش عارف أشتغل.

السيسي: ليه؟

عامل4: أنا بصدر، دخلت عملة صعبة لبلدي، واخد بال حضرتك؟ النهاردة لما بيجيلي أوردر مابعرفش أعمله، لأن كان مصنعي 4 أدوار، انا مسجله على التليفون.

السيسي: أنا مصدقك.. أنا مصدقك.. طب ليه مش قادر؟

عامل4: إمكانياتي ضيقة، المصنع ضيق.

السيسي: ال100 متر قليل؟

عامل4: قليل جدا عليا لأن أنا بعمل حاجات كبيرة 50 و60 و70.

السيسي: ممم.

عامل4: وطبعا شغلتي أبا عن جد.

السيسي: طب إحنا هانشوف دي، حاضر.. حاضر..

عامل4: ربنا يخلي سعادتك، ربنا ينصرك

السيسي:  وينصرك.

عامل4: ربنا ينصرك سعادتك.

السيسي: إيه تاني؟

عامل4: خلاص..

السيسي: تحت أمرك.

عامل4: كفاية كدا.

السيسي: ليه؟ تحت أمرك.

عامل4: ربنا يباركلك، ربنا يديك الصحة..

السيسي: ماتشيلش هم.. ماتشيلش هم.. ماتشيلش هم.. اللي إنت عايزه هانعملهولك.

عامل4: ربنا يخليك.

...

10:29

السيسي: سلامو عليكو. إزيكوا؟ إزاي صحتك أهلا وسهلا. عاملين إيه؟ ده شغلك؟

عامل5: أيوة القرميد.

دول حد من، في هنا حد من ولادك؟

عامل5: أيوة دول شغالين أيوة سعادتك معايا ولادي كلها شغالة.. معايا 16 عيل مشغلهم معايا.

السيسي: مخلف 16؟ (يضحك الرئيس)

عامل5: أيوة يا فندم، ربنا يباركلك يا فندم.

السيسي: ما شاء الله لا قوة إلا بالله، ما شاء الله لا قوة إلا بالله. ربنا يخليهوملك. في مشكلة عندك ولا حاجة؟

عامل5: مافيش مشاكل.

السيسي: لا قول، أنا جاي عشانكم.

عامل5: سعادتك إحنا عايزين بس الأفران يهتموا بينا بس.

السيسي: أنا كنت موجود مع الحاج عادل، فقالي إن الأفران الكهربا أرحم من الغاز.

عامل5: ده بالنسبة لحاجات حاجات. أنا القرميد ماينفعش سعادتك علشان الفلل والقرى السياحية ال..

السيسي: (مبتسما) ما القرى السياحية بيدفعوا كويس.

عامل5: ربنا يباركلك.

السيسي: قولي أعملك إيه؟

عامل5: إحنا عايزين بس رضاك علينا بس يا فندم.

السيسي: لأ، لا قولي، ورضاكوا عليا بردو.. آه والله، قولي، لأ قولي.

عامل5: إحنا تمام كدة ماشيين أهو والحمد لله.

السيسي: (يصافح طفل) أهلا، اسمك إيه؟

الطفل: حسن.

السيسي: إزيك يا حسن؟ إنت جدك بتشتغل معاه ولا لأ؟ بتعرف تشتغل؟ كويس؟

الطفل: آه.

عامل5: ربنا يباركلك يا فندم، ربنا يكرمك يا فندم. تؤمر سعادتك.

السيسي: لا إنتوا اللي تؤمروا.. صحيح.

عامل5: والله ربنا يباركلك يا فندم. تمام الحمد لله. الحمد لله والله. مستورة الحمد لله.

السيسي: ربنا يجبر خاطرك، ويخليهوملك، متشكرين.. حسن، سلاموا عليكو.

...

12:22

عامل6: كله تمام، ربنا يبارك في سعادتك.

السيسي: الأفران والكهربا و..

عامل6: كله تمام.

السيسي: مش عايزين حاجة؟

عامل6: ربنا يبارك في سعادتك.

السيسي: أنا سعيد بيكو والله.

عامل6: وإحنا سعيدين بيك والله.

السيسي: ربنا يخليك.

عامل6: ربنا يصلح لك الحال.

السيسي: يا رب يصلح لنا جميعا. متشكرين.

...

السيسي: إزيكوا؟ أزاي صحتك؟ أخباركم إيه؟

عامل7: الحمد لله.

السيسي: سلامو عليكو.. إزيك يا حاجة؟ (أم العامل) وبعدين إيه الحكاية جينا لخبطناكي ولا إيه؟ (يضحك الرئيس) ربنا يوفقكوا.. ربنا يوفقكوا إن شاء الله. مش عايزين حاجة؟ مش عايزة حاجة؟ تحت أمرك.

الأم: نبان شوية بس، يعني الناس تعرف يعني إيه فخار و...

السيسي: وإحنا لما جينا هنا، نحطكم عالخريطة السياحية، إن شاء الله تبقى الأمور أحسن يعني. ولو أي دعم تاني إحنا تحت أمركوا، صحيح. والدتك؟ تحطها على دماغك كدة.

عامل7: أكيد طبعا.

السيسي: صحيح... مش عايزة حاجة؟ تحت أمرك.. تحت أمرك.

...

13:29

عامل8: حضرك شرفتنا يا راعي الحرف في مصر.

السيسي: ربنا يكرمك.

عامل8: زيارة حضرتك دي لينا شرف. بجد والله يا فندم. فمحاجين مبادرة، وإحنا كلنا خدامين بلدنا.

السيسي: وإحنا اتفقنا على إن إحنا هانعملكوا مدرسة في المبنى الإداري ده.

عامل8: ده شرف لينا. ده حلم.

السيسي: هانجيب طبعا فيها الولاد اللي هم في الدبلوم، ويبقى عندكوا فرصة إن إنتوا تدربوهم، وهم..

عامل8: إحنا، يعني تقريبا كل حاجة محتاجة حضرتك تقص لنا الشريط.

السيسي: حاضر.

عامل8: وده شيء يبقى شرف لينا.

...

22:23

مهندسة: السكر واللمون ديت تعتبر من المناطق العشوائية الخطرة. من أول هنا لغاية شارع حسن الأنور، تقاطعها مع حسن الأنور. في جزء تاني بعديه اللي هو منطقة الجيارة وحوش الغجر بردو، تم حصره حوالي 5000 وحدة بردو. المفروض دول الخطة المقترحة اللي هانبدأ تنفيذها إن شاء الله بعد إخلاء وتسكين عزبة أبو قرن اللي إحنا ناقصلنا فيها حوالي 130 وحدة من 4758 وحدة. إن شاء الله بإذن الله قدامنا هذا الأسبوع ونخلص منطقة أبو قرن.

السيسي: هل إحنا.. المنطقة ديت عايزة إجراء عاجل، مش كدة؟

مهندسة: تمام.

السيسي: طيب. بس إحنا بنتكلم هنا على وحدات شاغلة، يعني مسكونة، مش وحدات فاضية زي اللي فوق دي مثلا.

مهندسة:  لا، وحدات سكنية مشغولة، وبقالها سنين هنا.

السيسي: لا خلاص، زي اللي قدامنا دول.

مهندسة:  تمام يا فندم. ده جزء يا فندم من المخطط نفسها. يعني منطقة الفسطاط نفسها الدولة بدأت تعمل مخطط تفصيلي متكامل لمنطقة الفسطاط. 3 محاور: أول محور إن إحنا بنحصر جميع الوحدات السكنية غير الملائمة والعقارات ذات الخطورة الداهمة. المحور التاني إني أنشئ وحدات سكنية بديلة لقاطني هذه الوحدات. المحور التالت اللي هو تنفيذ المشروعات وإعادة القيدة التاريخية لمنطقة الفسطاط.

الجزء التاني بالنسبة للمحور التاني. إناء وحدات سكنية بديلة. تم الانتهاء من 18300 وحدة بالأسمرات، وتم سكنها بالكامل، سواء جزء من المنطقة الجنوبية أو جزء من باقي القاهرة. وفي جاري تنفيذ حوالي 99% 2500 وحدة بالخيالة. جاري الفرش الآن.

السيسي: إحنا إن شاء الله نتحرك ونسكنهم كويس، ونزيل ونكمل يعني. إن شاء الله. إحنا عاملين حسابنا على كل حاجة.

مهندس: المشروع بتاع (جملة غير واضحة) بمجرد ما جت توجيهات حضرتك لينا، بدأنا فعلا بالمشروع، وإحنا دلوقتي متقدمين جدا بجزء العمارات، والجزء التاني المول التجاري مساحته 51 ألف متر مسطح. بيتكون من بدروم بيسع ل1650 سيارة، نظرا للتكدس، حضرتك عارف المنطقة هنا عربيات وكدة. الجزء التاني عندنا مجمع سينمات، ومسرحين، مكشوف ومغلق، وعندنا محلات تجارية، وغرف فندقية للسياحة الداخلية والخارجية اللي إن شاء الله هاتزور المنطقة بإذ الله تعالى.

السيسي: طب إحنا بس كنا بنتكلم دلوقتي على المنطقة دي كإجراء للناس اللي لسه عايشة. أنا شايف في ناس مشيت، لكن أنا بتكلم الناس اللي لسه عايشة حتى الآن في المناطق ديت، علشان نخلي المنطقة دي كمان. إحنا عاملين حسابنا على كدة. نكمل يعني.

مهندس: أوامر يا فندم. تعليمات حضرتك.

السيسي: متشكرين، متشكرين.. متشكرين.

...

(سيدة تبكي وهي تتحدث تطلب من الرئيس ألا يتم تسكينها في مكان بعيد)

السيسي: إوعي تعيطي. ماتعيطيش. ربنا يخليكي، أنا ليا الشرف. والنبي ماتعيطي.. والنبي ماتعيطي.. والله ما تخافي، مش هاتروحي، هانعملك كل حاجة حلوة.. اللي إنتي عايزاه، الي إنتي عايزاه.. والنبي ماتبكيش. ويخليكي. بيكوا. ماتزعليش. ماتبكيش.

السيدة: والنبي يا سيادة الريس، أنا أختي هنا.

السيسي: ماتحلفيش، عيني. ماتخفيش يا أختي أبدا.

السيدة: خايفة أروح في مكان بعيد لما ينقلونا، أن اساكنة هنا في مجرى العيون.

السيسي:  حاضر حاضر. حاضر.

السيدة: ربنا يخليك لبلدك ولعيالك ولينا.

السيسي: ويخليكي. حاضر.

السيدة: إنت نفسك حلوة مابنسيبش حد أنا عارفة، أنا عارفة. إنت مابتسيبناش.

السيسي: بس ماتعيطيش. على عيني

السيدة: خايفة أروح في مكان بعيد ماعرفش أروح ولا آجي...

السيسي: ولادك.. أختك دي بنتي.. وإنتي أختي.. وولادك ولادي.

السيدة: ربنا يخليك وينصرك ويعليك أنا بصلي وبدعيلك يا سيادة الريس.

السيسي: متشكرين.. متشكرين.. متشكرين..

...

27:17

(الرئيس يتحدث مع أسرة من 4 أفراد ركبون موتوسيكل)

السيسي: سلاموا عليكو. إزيك؟ إزيك يا ستي. مش خايف عليهم. مش خايف عليهم كدة؟

رب الأسرة: والله آآآ، هانعمل إيه بقى؟ يلّا الحمد لله.

السيسي: ساكن فين؟ فين؟

رب الأسرة: في العمرانية.

السيسي: مش عايز حاجة؟ مش عايز حاجة؟ صحيح؟

رب الأسرة: ربنا يباركلك.

السيسي: بلاش إنت.

ربة الأسرة: الحمد لله.

السيسي: صحيح؟ ماتتكسفش. صحيح.. أنا واقف عشانك.. عايز أطمن عليك... اسمك إيه؟

الطفلة: تاليا.

السيسي: تاليا، في سنة كام؟

الطفلة: تالتة.

السيسي: تالتة.. شاطرة ولا؟ هاتروحي الجامعة، مش كدة؟ إنتوا ولادي. وإنت يا أستاذ اسمك إيه؟

الطفل: مصطفى.

السيسي: تعالا يا درش. تعالي يا تاليا تعالي (يأخذ الرئيس صورة معهما)

...

سيدة2: ربنا يديك الصحة. ربنا يباركلك.

السيسي: عايزة حاجة؟ والله صحيح؟ والله صحيح؟ تحت أمرك! والله صحيح. ماتتكسفيش.

سيدة2: لأ، ربنا يباركلك.

السيسي: والله ماتتكسفيش.

سيدة2: والله مافي حاجة ربنا يباركلك ويديك الصحة يا رب.

السيسي: سلامو عليكو.. سلامو عليكو..

...

تم الحديث مع المواطنين وعُمال الفخار في القاهرة بمنطقة مجرى العيون.

...

خدمة الخطابات الكاملة للسيسي تجدونها في هذا الرابط