نص كلمة السيسي أثناء تفقد القرى التي تأثرت بالسيول في أسوان 25/11/2021
أحد المهندسين: كان اختبار لينا حقيقي إن إحنا إزاي هاندير أزمة زي دي. لأن القرية هنا، قرية غرب أسوان، مش من قرى حياة كريمة. ابتدينا نحصر الاحتياجات الفعلية للناس، مابين أضرار في البيوت بتاعتهم، مابين أضرار في الأجهزة. قدرنا نشوف بعض الأهالي، نوفرلهم حوالي تجهيزات لـ150 شقة يا فندم. وبدأنا نشتغل في بعض البيوت اللي كانت متهدمة، زي البيت ده يا فندم، بيت الحاج منسي.
زوجة الحاج منسي: أهلا وسهلا بسيادة رئيس الجمهورية في منزلنا المتواضع.
الحاج منسي: مرحب بيك، نورت النوبة.
السيسي: لا لا، إنتو عايزين إيه، ناقصكوا إيه، أنا جاي عشان كدة.
زوجة الحاج منسي: إحنا مانقصناش حاجة.. حضورك إنت.
الحاج منسي: إحنا البيت والله كله، البيت كله واقع مننا.
السيسي: تحت أمركم، وإحنا جايين علشان نعمل كل حاجة.
الحاج منسي: الله يخليك..
السيسي: صحيح..
الحاج منسي: إنت وشك خير علينا، والله يوم المطر قلنا في خير جاي، أهو في خير وصل النهاردة.
السيسي: الله يبارك فيكوا. أنا متابع الموضوع كله، من أول ما حصل وكدة. وطبعا عارف حجم المشكلة يعني. يعني البيوت اللي كانت بظروفها مع السيل هي اللي اتضررت جامد. وطبعا البيوت الي بردو مبنية كدة، اتضررت بالمنظر اللي بنشوفه.
زوجة الحاج منسي: البيوت مبنية من 100 سنة دي، من 100 سنة، أجدادنا هم اللي بنوها. والله البيوت دي مبنية من 100 سنة.
السيسي: (يضحك) ربنا يجعلها عمرانة بيكوا.
زوجة الحاج منسي: والله، ده عمرانة بفضل قدومك لينا يا سيادة الريس.
السيسي: الله يخليكوا... إنتوا مش عايزين حاجة؟
زوجة الحاج منسي: إحنا كنا بنشوف يا سيادة الريس إنجازاتك في التلفزيون. الإنجازات اللي إنت بتعمله. العاصمة الجديدة اللي إنت بهرتنا بيه في التلفزيون، ولا حياة كريمة اللي كنا بنشوفها في التلفزيون، كنت بقول يا رب، ده فين ده؟ ده فين ده؟ لما شوفناها عالواقع، إحنا سعادتنا مش متـ.. يعني مش قادرين، اللسان عاجز، عاجز، عاجز عن التعبير.
السيسي: لا والله.. طب مش هاقول إنتوا عايزين حاجة. طب الناس اللي هنا؟ أنا جاي عشان كدة...
إحدى ربات المنزل: والله كله متضرر من السيول ديت. كله متضرر. يعني إنتم...
السيسي: أي ضرر هانشيله.
السيسي: السلام عليكم.
مواطنة: نورتنا يا سيادة الريس، الله يخليك، ونورت أسوان كلها.
السيسي: منورة بيكم. بلدكوا مصر، إن شاء الله عمرها ما هاتتخلى أبدا عن أهلها، ولا هاتسيب ضرر إلا لما ترفعه، ولا مشكلة إلا لما تحلها، وده دورنا، ده موضوع مابنعملوش.. ده حقكوا.. إن إحنا نيجي هنا، ده حقكوا.. إننا نطمن عليكوا.. ده حقكوا.
كل قرى مصر، مش بس غرب أسوان، وسهيل وكل قرى مصر، كل قرى مصر، إحنا حاطين لنفسنا خطة إن إحنا نخلصها في 3 سنين. نخلص إيه؟ نكرر، هانخلص إيه؟ هانخلص الصرف الصحي. هانتطمن على ميه الشرب. هانتطمن على الكهربا.
مواطنة: ياريت إحنا السنة الأولى بقى من الـ3 سنين.
السيسي: (يضحك) هو عشان خاطر.. حاضر.. حاضر.. هانقول ده مش بدل حد، لكن إيه، نزود ده يا دكتور مصطفى على ال...
مصطفى مدبولي: بعد إذن حضرتك، إحنا أسوان 5 مراكز. كنا بدأنا السنة دي حضرتك في مركز كوم أمبو، وإدفو، ونصر النوبة. فاضلنا كان مركزين السنة الجاية، اللي هو مركز أسوان، اللي فيه القرية هنا، قرية غرب أسوان، ومركز دراو. دول اللي كنا هانبدأهم السنة الجاي، فلو حضرتك أمرت هانبدأ هنا على طول. هانبدأ على طول هنا.
أهالي أسوان: (تصفيق) تحيا مصر.. تحيا مصر.. تحيا مصر..
مواطنة: أهلا بيك يا سيادة الريس في بلدك، نورتنا وسط بلدك وحبايبك. يعني ماتتصورش كنا بنحبك قد إيه. وزادت محبتنا لما جيت، حسيت بينا وجيت عندنا في البلد. وإحنا يعني في قمة السعادة النهاردة. وياريت، ياريت حياة كريمة تستمر معانا، ويشوفوا مطالبنا. إحنا في حاجات كتيرة في البلد كنا بنتمنى إنها تتحقق، ودلوقتي متأملين في خلال الأسبوع اللي شوفناه من حياة كريمة، إنها هاتكون أحسن من اللي كنا بنتوقعه.
السيسي: لما حصل السيل، عجلنا بالخطة يعني، وقلنا نخش هنا عشان نخفف الضرر اللي بنشيله يعني. لكن إحنا كدة كدة كنا جايين، ولو حد منكم بيزور القرى اللي إحنا شغالين فيها، ولادنا وبناتنا، وولاد مصر شغالين فيها، هاتجدوا إن إحنا اللي أنا بقول عليه ده بيتعمل مش في قرية واحدة.. في آلاف القرى.
مواطنة: نسيت كل حاجة لما شوفتك النهاردة.. من الفرحة.
السيسي (يقبل رأسها)
مواطنة: وأنا فرحي يا ريس.. فرحي في أجازة نص السنة إن شاء الله في شهر 2..
مواطنة: وهي بيتها اتهد عالحاجة.. وقع على حاجة العروسة.
السيسي: لا قبل، قبل.. قبل إن شاء الله ما، هاتكون خلصانة.. إن شاء الله.
مواطنة: أي نعم إحنا اتضرينا وزعلنا خالص.. بس الخير اللي إحنا شوفناه، وأكبرها طبعا إن إحنا شوفنا حضرتك يا حضرة الريس، ربنا يعينك على حكم مصر، ربنا يخليك لمصر. يكفيك إنك إنت كنت جندي في جيش مصر، والآن حاكمها. ربنا يا رب يبعد عنك ما يسمون بأعداء النجاح.
السيسي: آمين، اللهم آمين.
الأهالي: (تصفيق وزغاريد)
ألقيت الكلمة في محافظة أسوان، بقرية غرب أسوان وقرية الشهامة، بحضور أهالي أسوان من المواطنين، ورئيس مجلس الوزراء الدكتور مصطفى مدبولي.