نص كلمة السيسي خلال حفل تخريج دفعة من طلاب كلية الشرطة 20/10/2021
اسمحولي إن أنا أتقدم بالتهنئة للظباط الخريجين الجدد والظابطات، ألف مبروك (تصفيق) واسمحولي إن أنا أهني الأسر وأشكرهم أيضًا إن هم قدموا أو بيقدموا أبناءهم وبناتهم عشان يتولوا مهمة عظيمة جدا هي حماية أمن، أمن مصر، وسلامة الناس (تصفيق) فكل التحية وكل الشكر لكم جميعًا على ذلك.
مش هانسى إن أنا أوجه كل التحية وكل التقدير والاحترام، باسمي وباسم المصريين، لأسر الشهداء والمصابين (تصفيق) كل الأسر وكل الشهداء وكل المصابين من كافة.. من الشرطة ومن الجيش ومن القضاء ومن طوائف المجتمع المختلفة.
والنهارده يمكن مهم قوي إن إحنا نتذكر قد إيه الأيام الصعبة اللي مرت على مصر خلال السنين ال7 اللي فاتت.. وقد إيه التضحيات اللي قدمها، مش الشرطة والجيش، لأ الشعب المصري كله. وأنا دايما بأكد الكلام دوت. قدموا تضحيات عشان البلد دي تفضل واقفة وعايشة وتتقدم. ففي أسر قدمت، وإحنا لن ننسى أبدا. والمفروض إن إحنا، مش بقول أنا، أنا أو الوزارة أو الحكومة بس.. أنا بكلم الشعب المصري كله.. مش هاننسى أبدا أبناءنا وبناتنا الذين، يعني، قدموا أرواحهم وحياتهم وإصاباتهم، عشان مصر تبقى بالوضع اللي إحنا موجودين فيه دلوقتي.
وعايز أقول إن ده مازال حتى الآن والله، مازال حتى الآن بيُقَدَّم من الجيش ومن الشرطة شهدا ومصابين. وبالتالي دي أو ده أمر المفروض إن إحنا نتذكره حتى لا يتكرر في حياتنا تاني. دلوقتي ومستقبلًا يعني.
مش هانسى إن أنا وأنا باهني الخريجين الجدد، أقولهم إنتوا بتتعاملوا مع المواطن وأمنه وسلامته وراحته، فمن فضلكم تذكروا دائمًا إن إنتم تكونوا قدوة لهم، قدوة في التعاون معاهم، قدوة في.. يعني.. معالجة المسائل الأمنية والمصالح الخاصة بيهم، ده أمر مهم قوي.
أنا عارف إن ال، يعني، تعامل ال.. التعامل مع الرأي العام ومع الشعب أمر ليس باليسير، ولكن كمان دي صورة رائعة جدا إن إحنا كـ.. يعني، ممثلين لوزارة الداخلية، في كل القطاعات اللي بتشتغل وبتتعامل مع الجمهور، قد إيه مهم قوي إن إحنا نكون قدوة ومثل، ونحافظ على ده.
وده يكون التطوير اللي بنتكلم عليه في، اللي يمكن النهارده لتاني سنة، أو لتاني دفعة بنخرجها من حاملين الدراسات العليا، من شباب وشابات الحقوق والكليات المتخصصة، وإن إحنا نطور العملية التعليمية، بيبقوا حاصلين على الدبلوم أو الماجستير. ده أمر.. ثم البرامج الأخرى اللي بتتعمل او اللي غالة دلوقتي في وزارة الداخلية لتطوير قدرات وأداء أبناءها من الخريجين والعاملين في قطاع الشرطة.
بتمنى لكم التوفيق، وبقول مرة تانية ألف مبروك، وخلي بالكوا من نفسكم، وخلوا بالكوا من زمايلكم، ودايما تكونوا مثل عظيم ورائع للناس في الشارع وفي كل حتة. شكرًا جزيلًا وألف مبروك. (تصفيق)
مش هانسى إن إحنا كنا قلنا مرة قبل كدة في الكلية الحربية إن إحنا في كل حفلات التخرج بتاعتنا بيبقى في من ضمن مراسمها سلام الشهيد.. سلام الشهيد.. من فضلكم، مش عايزين ده، زي ما اتعمل في الكلية الحربية، ده مراسم لابد إن إحنا نحافظ عليها، وأرجو من قائد الطابور ينادي سلام الشهيد، ويُعزف سلام الشهيد، ويبقى ده بردو أحد مراسم اللي بيتم اتباعها أثناء حفلات التخرج. زي مابقول مش هاننسى، وبنسجل التحية لهم من خلال هذا الإجراء، اتفضل يا فندم.
ألقيت الكلمة بأكاديمية الشرطة بالقاهرة، بحضور دفعة جديدة من الطلبة الضباط الخريجين.