نص كلمة السيسي خلال افتتاح عدد من المشروعات في شبه جزيرة سيناء 21/9/2021
اسمحولي إن أنا النهارده في ال، في الافتتاحات ديت، كان عندنا خيار إن إحنا الحقيقة نأجل الافتتاح ده، وكانت الناس اتحركت، لما يعني.. جاية في الطريق وكدة. فقلنا يعني نكمل هذا الأمر، لأن هو (المشير حسين طنطاوي) كان رجل جاد يحب العمل. كان رجل جاد يحب العمل.
نتكلم الأول على قناة السويس، وبنقول النهارده إذا كان خلال فترة الجائحة إيرادات قناة السويس في 20، 6% إذا كنت أنا فاكر، و11% في 21. فـ.. مش كدة يا فندم؟ آه. فأنا عايز أقول.. اتفضل... الـ11% ده رقم مش قليل يعني، يعني رقم في ال، في الـ5 مليار يبقى تقريبا 500 مليون ولا.. مش كدة؟ مش كدة؟ هه؟ يعني خليهم 500 يا أخي عشان بس.. 50 مليون دولار يعني.. فـ.. ولسه طبعا إحنا كل ما الأمور تتعافى، كل ما قدرتنا وقدرة القناة على التعافي تزيد.
النقطة التانية فيما يخص التأمين الصحي الشامل. طبعا أنا عايز أقول إن تجربة بورسعيد كل يوم بيتثبت أقدامها، وبتأكدلنا، يعني، كفاءة النظام اللي إحنا ماشيين بيه. ولما بنتكلم عالـ6 محافظات اللي ذكرتهم الدكتورة وزيرة الصحة، أنا بس عايز أقول للمواطنين، وللمشاركين في العمل في هذه المنظومة، إن إحنا الإجراءات الخاصة بعمل التوثيق والبيانات وكلام من هذا القبيل، أرجو إن إنتوا تتحركوا معانا، عشان نستفيد بأسرع وقت ممكن بالمزايا التي تقدمها منظومة التأمين الصحي الشامل.
هنا.. برجع أو بنأكد على كلام إحنا كنا قلنا فعلا إن إحنا ترتيبنا إن نخلص، أو الدولة المصرية يعني، تخلص هذا الأمر خلال 15 سنة. ثم، يعني، قلنا نضغط لمدة أقل من كدة، فاتقال إحنا ممكن قوي يعني نضغط نفسنا 10 سنوات. ولما جيت حياة كريمة قلت طب إحنا هانقوم بإجراءات كتيرة جدا جدا فيما يخص الشؤون بتاعة كل الوزارات. يعني وزارة الصحة لها مستشفيات، سواء كانت مستشفيات عايز تترفع كفائتها، أو مستشفيات هاتقام طبقا للخطة، ونفس الكلام للمدارس بتاعة وزارة التربية والتعليم.
يعني قصدي اللي هي الخطة الاستثمارية أو خطط الوزارات داخل الدولة المصرية. فبما إن إحنا اختصرنا الخطط دي من 10 سنين في حياة كريمة، لـ3 سنوات، فكنت عشمان إن هم يعني ينزلوا بالـ10 سنين في أقل من كدة، ولكن طبعا لاعتبارات، يعني، مقدرة جدا جدا، يصعب ده، ولكن عل الأقل الـ10 سنين ممكن تقل شوية لو قدرنا يا دكتور مصطفى، لأن العائد الصحي، العائد الإنساني اللي هايعود على الناس اللي هي أعداد ضخمة جدا، وبالتالي كل ما هاندخل أكبر حجم من المنظومة، أكبر حجم من الأفراد في المنظومة، أو أكبر حجم من المحافظات في المنظومة، هايكون ده له تأثير في تحسين جودة الخدمة الصحية اللي بتقدم للناس.
لكن أنا على ال، ده جزء، الجزء التاني أو الجزء الأخير في النقطة ديت، من فضلكم إن إحنا، يعني، عملية التسجيل البيانات، لأن هي المنظومة على بعضها، مستشفى، ونظم المعلومات اللي موجودة، وبقية الإجراءات الأخرى.. لكن أهمها إن إحنا نقدر نجمع بيانات كل محافظة، وتبقى موجودة على قواعد البيانات اللي موجودة في وزارة الصحة وفي المستشفيات.
أنا بس هاتكلم على نقطة، كان في الرويسات.. أنا مش عارف بردو يا إيهاب إنتوا كنتوا شغالين، وأنا قلتلكوا الحكاية دي قبل كدة، يا إيهاب.. أنا قلتلكوا الحكاية دي قبل كدة. لما تكونوا شغالين جنب حتة، ماتسيبوش المناطق اللي جنب منها. هنا هاتقولي يا فندم ما فيه المحافظة وبتاع، ماشي ما إحنا، ما هانتحاسب.. لكن أنا النهاردة كنت بعمل، بتعمل الطريق الرئيسي اللي هو ال.. اللي هو بتاع من ال، من مدخل شرم الشيخ، لغاية المطار تقريبا، مش كدة؟ طيب وإنتوا خلصتوه أو قربتوا تخلصوه.. طب ما كنتوا دخلتوا عالرويسات وإيه؟ مش بس الطرق.. لأ مش بس الطرق، شوفوا الصرف الصحي. ما إحنا حياة كريمة ممكن نعملها كدة يا دكتور مصطفى، شوفوا الصرف الصحي بتاعها، شوفوا مية الشرب اللي بتخش لها، وبقية الأمور الأخرى اللي ممكن نعملها للناس.. دي القرية كلها 5000، وبعدين ده من حساب الطريق.
أيوة يا إيهاب، يعني، يعني، يعني لما دخلت جوة، الحقيقة يعني قلت بقى إحنا موجودين جنبهم، ومش عارفين نخدم الناس بشكل كويس؟ مايفوتكش الحتة دي، ولا أي حد، الكلام ده لينا كلنا يا دكتور مصطفى.. أي شركة تابعة.. يا إما تبعكوا إنتوا، يعني شغالة معاكوا، أو مش تابعة لهيئة المجتمعات يا دكتور مصطفى، من فضلكم مانسيبش حاجة، حتى لو خارج التخطيط، حتى لو خارج التخطيط، بس إدوني خبر.. بس إدوني خبر يعني... شكرا.
أنا بردو شبكة الطرق اللي اتقالت، اللي قالها، وإن أنا، إحنا كدولة مهتمين قوي بيها، سواء ل.. يعني لسينا أو لبقية الجمهورية. وحجم الطرق اللي بيتعمل، وأنا يمكن اتكلمت الكلام ده بردو يا دكتور مصطفى، إحنا كنا قلنا 7000 كيلو شبكة الطرق القومية. صدقوني إحنا تجاوزنا هذا الرقم بكتير قوي، وأرجو إن الرقم الجديد يتم إعلانه بالتنسيق مع وزارة النقل، ومع هيئة المجتمعات، مش كدة يا دكتور مصطفى؟
يعني، يعني، يعني ما يحدث في سينا لوحده منفصل، اللي بيتعمل ده للناس اللي بتتحرك في سينا، وللتنمية اللي إحنا بنتكلم عليها، هايبقى ليها تأثير كبير قوي قوي. الربط بين شرق القنال وغرب القنال بالطرق ديت. يعني أنا ممكن، مش عايز أقول لو تجيبولنا الخريطة بتاعة شبكة الطرق، بما فيها المربوط لغاية جنيفة يا إيهاب، لو ممكن...
طيب.. طيب.. أنا بس عايز أقول نقطة هنا واحدة.. إن إحنا بنتكلم تقريبا لما نشوف حجم الطرق اللي موجودة كلها سواء كانت الحمرا اللي خلصت أو الخضرا اللي قربت تخلص، أو حتى المخطط تنفيذه، إحنا بنتكلم حوالي سنتين، في خلال سنتين هانكون خلصنا المخطط ده كله، ولا أنا مبالغ كدة يا إيهاب؟ مش كدة؟ يعني النهارده في خلال سنتين إن شاء الله هانكون خلصنا كل الشبكة اللي بتكلم عليها في سينا هنا، سواء كانت للتنمية العمرانية أو للتنمية السياحية زي ما اتقال، أو للتنمية الزراعية.
وهنا، إحنا بنتكلم في أكتر من، يعني، يعني، يعني.. يعني الدكتور مصطفى بيقولي 3500 كيلو، ده هنا بس.. في ال.. سواء كان طرق رفع كفائتها، أو تم زيادة مسطح الحركة عليها، أو مشاريع جديدة.
المهم اللي أنا عايز أقوله، النقطة اللي كنت عايز أذكرها في الحتة ديت، فيما يخص الزراعة.. وإحنا يمكن أيام قليلة، مش كدة يا إيهاب؟ هانفتتح محطة بحر البقر، والمحطة دي هاتدخل مية حوالي 5.6 مليون متر يوميا لسينا، مية معالجة معالجة ثلاثية متطورة، إحنا كنا اتكلمنا عنها كتير، ودي اللي هاتضيف، لا خللي الخريطة دي من فضلك.. لا الخريطة اللي بعدها يعني.. بس، اثبت على كدة.. اللي هو اللي إحنا بنقول إن إحنا في المنطقة ديت هايبقى في حجم كبير جدا من الزراعة، قد يصل إلى 500 ألف فدان، عشان الرقم مايتنسيش.
وأنا بقول للقوات المسلحة، وإنت، يا.. اللوا محمد، الفريق محمد آسف، والفريق محمد فريد بردو.. من فضلكم أثناء عمل الشركات أمنوهم، أمنوهم عشان الأشرار مايـ.. آه.. لأن إحنا لازم المشروع ده فيما يخص الزراعة. إحنا بنضيف أكتر من نص مليون فدان زراعة مستقرة، بنظم حديثة، بنظم متطورة في المنطقة ديت، وما يستتبع ذلك من تواجد سكاني وتوفير فرص عمل للناس.. مش كدة يا إيهاب؟
فإنتوا شغالين.. طيب، والعملية متأمنة وكل حاجة.. أنا بس بقولها كدة عشان الأشرار يعرفوا إن إحنا هانأمن ده بشكل قوي، ماحدش يقرب لحد.
نرجع بس للغرب عشان أفهم. اسمحولي إن أنا أتكلم في نقط دي.. هنا، يعني، شوفوا حجم المحاور اللي اتعملت من الدلتا، من القاهرة، اللي بتصل إلى سينا، وعملت ربط، ربط ضخم، قوي، عميق، بين شرق القنال وغرب القنال، بين سينا وبين الدولة. عايز أقولكوا هنا ده طريق السويس. يمكن إيهاب ما اتكلمش فيها كتير قوي.. يعني آسف.. تكلم على جنيفة والأزرق اللي بنتكلم عليه ده، وده طريق السويس.. إحنا كملنا المحاور العرضية كدة واصلة للسخنة، مش كدة يا إيهاب؟ مش كدة؟ واصلة للسخنة اللي هم المحورين دول.
المعنى اللي أنا عايز أقوله بس عشان يمكن الناس تتصور إن إحنا مبالغين في إقامتنا للطرق والكباري، لأ هي الدولة المصرية لازم تكون حرية الحركة للبضايع، وللناس، والأشغال ولكل شيء، سهلة على امتداد الرقعة المعمورة في مصر.
يعني يمكن آخر السنة هانفتتح في منطقة الفرافرة وتوشكى، مش كدة؟ في شرق العوينات، حوالي 1300 كيلو، ولا 1000 كيلو؟ 1070 كيلو؟ هانفتتحهم آخر السنة دي، مش كدة ولا؟ الـ300، لا لا لا أنا بتكلم تشوكى وشرق العوينات كمناطق فيها زراعات متطورة وكلام من هذا القبيل.
الخلاصة اللي أنا عايز أقولها للمصريين هنا، إن اهتمامنا بالموضوع ده، هو اهتمام في وضع أسس حقيقية للتنمية على امتداد أرض مصر. وبالتالي حجم العمل اللي بيتم. أنا مش عايز أقول ضخم بشكل غير مسبوق.. مش كدة يا دكتور مصطفى؟ ضخم بشكل غير مسبوق.. واللي أنا عايز أقوله اللي خلص ضخم وغير مسبوق، واللي فاضل مش كتير قوي.. ويبقى إحنا فعلا قدرنا نوصل إن إحنا نعمل شبكة طرق قومية قد تصل لـ12 ألف كيلو أو أقل، جديدة على اللي إحنا، يعني كان موجود قبل كدة خالص. ثم اللي بنرفع كفاءته.. ثم اللي بنرفع كفاءته.
الـ 12 ألف دول بالـ7 اللي قبل كدة، عشان بس ماحدش يتصور إن ده رقم آخر غير الـ7000 كيلو، يعني بنقول الـ7 قد يمتدوا يبقوا 12 ألف، 14 ألف، حسب ما إحنا ماشيين بنشوف إن دايما مناطق تنمية محتاجة إن إحنا نعزز بمحاور أكتر، بنعمل محاور أكتر يعني.
أنا في النهاية بختم بشكر كل الشركات اللي قامت بالعمل ده. النفق اللي اتعمل ده زي ما قال اللوا إيهاب، دول شركتين مصريتين، كانوا اشتغلوا في مشروع الإسماعيلية وبورسعيد واكتسبوا الخبرة وعندهم القدرة، طب خشوا اعملوا.. ماسمعناش صوت كتير بقى ساعتها لأن خلاص كان هم عرفوا القصة، ومستعدين نعمل للدول اللي عايزة أنفاق، سواء كانت أنفاق تحت المية، أو أنفاق بتاعة، للمترو والكلام ده، إحنا لدينا القدرات والخبرات إن إحنا نقوم بأي عمل هندسي بالمستوى ده.
مرة تانية بشكر كل الشركات وكل القائمين والمشاركين في هذا العمل، وشكرا جزيلا.. متشكرين.
ألقيت الكلمة في محافظة السويس، بحضور مصطفى مدبولي، رئيس مجلس الوزراء، واللواء إيهاب الفار رئيس الهيئة الهندسية للقوات المسلحة، والدكتور هالة زايد وزيرة الصحة، وعدد من الوزارء.