نص حديث السيسي مع المواطنين أثناء قيامه بجولة تفقدية بالرويسات 13/9/2021
مواطنون: الله أكبر يا ريس. الله أكبر يا ريس
السيسي: طب أنا عايز أسمع منكو.. عايز أتكلم معاكو شوية.
مواطن 1: تحيا مصر.. تحيا مصر.. تحيا مصر..
السيسي: سلامو عليكو الأول.. كل سنة وإنتو طيبين.. طمنوني عايزين إيه.
مواطن 1: أنا بالنسبالي، مؤهل دبلوم 84. حضرتك لا ليا وظيفة من 84 ولا معاش ولا أي حاجة حضرتك في السن ده، سايب القاهرة وجاي بشتغل هنا حضرتك. أنا نفسي في حاجة..
السيسي: بتشتغل إيه؟
مواطن 1: استورجي حضرتك، نفسي في أي حاجة عندي 3 بنات. بنت اتجوزت وبنتين لسه حضرتك. والله ما جهزت فيهم ولا بنت إلا اللي اتجوزت حضرتك.
السيسي: ألف بركة وعقبال الباقي إن شاء الله.
مواطن 1: بس نفسي في حاجة حضرتك أعيش عليها الباقي من عمري.. الله يخلي حضرتك ويخليك يا رب لمصر. ويخليك لمصر يا رب. يخليك لمصر يا رب.
السيسي: إنت منين من القاهرة بقى؟
مواطن 1: أنا قاعد في منشية ناصر حضرتك.. حتى المشروع الله أكبر اللي إنت عملته، الأسمرات، ماكانش ليا نصيب آخد فيه حاجة حضرتك.
السيسي: حااااضر..
مواطن 2: إحنا بنحبك قوي.. بص شايلين بطاقتك أهي.
مواطن 1: بس،حضرتك. فإنت جزاك الله كل خير عن مصر. الله يخليك
السيسي: كتر خيرك..
مواطن 3: أنا عايز سلامتك في الدنيا بس، مش عايز حاجة لنفسي.
السيسي: طب أنا عايز أطمن على اللي هنا. أنا جاي هنا عشان أطمن على البلد.
مواطن 3: إنت وجودك بالدنيا كلها يا ريس. بس أنا عندي أخ عاجز لا بياخد معاش ولا قبض. قدمناله على عربية، أي حاجة بنقدمله عليها رافضين.
السيسي: ليه؟
مواطن 3: ماعرفش، بيروح يقولك عنده عجز، مابيشتغلش خالص، عنده شد عصب في رجله من ورا. لا أي شغل ليه ولا أي وظيفة ولا أي شيء.
السيسي: والدنيا هنا أخبارها إيه؟
مواطن 1: الدنيا الحمد لله. الأمان من ساعة ما إنت مسكت، الأمان الأمان الأمان الأمان. من ساعة ما سيادتك مسكت، الأمان الأمان الأمان الأمان.
السيسي: فضل من الله.
مواطن 1: فضل من الله بس الله سبحانه وتعالى بيجعل حضرتك سبب إن 100 مليون ممكن يعيشوا الأمان.
السيسي: ربنا يا رب يديم علينا الأمان والسلام والاستقرار.
مواطن 1: ربنا يا رب يدومك علينا يا باشا. ويدومك علينا ريس.
السيسي: ربنا يجبر بخاطرك.. إنتو عايشين هنا، مش كدة؟
مواطن 3: عايشين هنا، عايزين نشتغل يا ريس. إحنا بنشتغل في الخردة يعني. شغلنا تمام، بس أنا واحد من الناس لسه في بداية حياتي، ببقى جاي شوية خردة وجاي عالبوابة، ساعات بيعارضوني، بيرجعوني. بس، إحنا في حالنا يعني.
السيسي: خردة إيه؟
مواطن 3: حديد بايظ، بلاستيك، كرسي بايظ، مرتبة بايظة، حاجات مستعملة بنجيبها وبنصلحها وكله بياكل عيش.
السيسي: يعني إنتو عندكو هنا، يعني في سوق ليكو.
مواطن 3: آه في جوة في دواليب وفي..
السيسي: لا ماقصدش، لا هل في معملكو سوق ولا هو كل واحد..
مواطن 1: الموظفين اللي حضرتك شغالين هنا، اللي عايز سرير فرداني، دولاب فرداني، وإحنا بنصلح من الخردة وبنبيع.
السيسي: طيب.. والراجل الطيب؟
مواطن 2: أنا نجار يا باشا.
السيسي: نجار.
مواطن 2: أيوة.
السيسي: من مصر ولا من هنا؟
مواطن 2: من إسكندرية
السيسي: من إسكندرية.. بتشتغل هنا كويس؟
مواطن 2: آه الحمد لله.
السيسي: صحيح؟
مواطن 2: آه الحمد لله.
السيسي: مش عايز أسألك أقولك بتعمل إيه، لكن، يعني، بتكسب كويس يعني؟
مواطن 2: أيوة الحمد لله، عشان إسكندرية وضع وهنا وضع. هنا تعرف توفر شوية. إسكندرية اللي جاي رايح.
السيسي: الدنيا غالية هناك، مش كدة؟
مواطن 2: أيوة
السيسي: إنت مش عايز حاجة؟
مواطن 2: عايز بس يشوفولي رجلي الدكاترة. عشان أنا كنت بعمل الكلية بتاعة بورسعيد. فاشتغلت في شغل حراير، فدخل في كل جسمي.
السيسي: ألف لا بأس عليك.
مواطن 2: وحتى رجلي، داخل في كعب الرجل.. يعني..
مواطن 3: آه العلاج هنا مغلبه بس. يروح لمستوصفات الدكاترة مش عارفة..
السيسي: (يشير إليه عينه) عيني حاضر.
مواطن 3: تسلم عينك يا ريس.
مواطن 2: الله يخليك.
مواطن 4: أنا عايز سلامتك بالدنيا كلها. أنا كفاية إن أنا شوفت سعادتك بس.
السيسي: إنتوا كلكو من الصعيد؟
مواطن 4: آه كلنا من الصعيد.. من المنيا.
السيسي: من المنيا أهلا وسهلا.
مواطن 4: الله يسلمك
مواطن 2: إحنا مبسوطين قوي إن إحنا شوفناك.. ده حاجة يعني
السيسي: إنتو أهلي وناسي.. آه والله العظيم.. آه أومال إيه؟
مواطن 1: ربنا يعينك على كل غلبان.
مواطن 3: إحنا ماكناش بنصدق اللي بنشوفه يا ريس.
السيسي: ليه؟
مواطن 3: النهارده عرفنا إن دي حقيقة
السيسي: (لطفلة) تعالي يا جميلة تعالي! تعالي! اسمك إيه؟
طفلة 1: أنا هَنا.
السيسي: هنا؟
طفلة 1: آه
السيسي: مش عايزة حاجة؟
طفلة 1: لا عايزة سلامتك.
طفل 2: (لهنا) سلمي.
السيسي: أهلا أهلا
طفل 2: سلمي يا بت ماتخافيش.
السيسي: (يصافح الأطفال) أهلًا وسهلًا.. طيب.. خلاص.. اسمك إيه؟
طفل 3: آدم
السيسي: آدم. وإنت اسمك إيه؟
طفل 4: عبد الرحمن.
السيسي: عبد الرحمن. إنت في سنة كام يا عبد الرحمن؟
طفل 4: تانية
السيسي: تانية.. بتذاكر كويس؟
طفلة 1: أنا داخلة أولى.
السيسي: داخلة أولى؟ بتذاكري كويس؟
طفل 2: أنا داخل خامسة
السيسي: ما شاء الله.. بتلعبوا رياضة ولا لأ؟
أطفال: آه
السيسي: المدرسة كويسة؟ صحيح؟
أطفال: آه
السيسي: إنتو إخوات كلكوا؟
أطفال: لا إحنا أصحاب.
السيسي: أصحاب بس.. وإنت اسمك إيه؟
طفلة 1: ده أخويا.
السيسي: أخوكي إنتي. اسمك إيه؟
طفل 2: عُدَيّ
السيسي: عدي.. اسم جميل يا عدي.. إنتو في المدرسة كلكو في المدرسة مش كدة.
طفل 2: عمو إنت بتيجي تلف ع البيوت كلها؟
السيسي: والله نفسي ألف ع البيوت كلها.. والله نفسي والله.. يعني، المهم إن أنا شوفتكو.
السيسي: إزيك؟ إزيك؟ في سنة كام؟ ما شاء الله.. أهلا أهلا أهلا إزيِك؟ في سنة كام يا جميلة ولا لسه؟
طفلة 5: أنا في حضانة.
السيسي: حضانة..
طفل 6: إزيك يا عمو (يصافح الرئيس)
السيسي: أهلا وسهلا.. مش عايزة حاجة يا حلوة؟ (لأحد المواطنين) مش عايز حاجة؟
مواطن 5: عايز السلامة يا فندم.. عايز السلامة.. ربنا يسترها معاك..
السيسي: اللهم آمين.. مش عايزين حاجة؟ يا إخوانا؟ كل اللي إنتو قلتوه هنا (يشير إلى رأس)
مواطن 1: بالله عليك.
السيسي: لا إله إلا الله.. يا نهار أبيض..
مواطن 1: جبت الستين، عايز أعيش بكرامة زي ما حضرتك بتقول كرامة. عايز أعيش بكرامة بقية عمري.
السيسي: عيني حاضر.
مواطن 1: بس يا باشا.. بس ربنا يجعلك لمصر.
مواطن 5: حتة أرض بتاعتي من 2012 أنا باني فيها أوضة.
السيسي: فين؟
مواطن 5: هنا في العشوائيات. بس هو يا فندم لو كان منوهالي انا شغال في الزيت القديم يا فندم بتاع العربيات. أنا بلم الزيت القديم هنا من الأمن المركزي ومن القطاعات ومن كله. لو كان منوهالي يا فندم يبقى كدة يعني.. أنا عامل فيها أوضة، وماحدش زالهالي، ماحدش.. يعني أنا بلم فيها حاليا وقاعد.
السيسي: معاك ولادك ولا لوحدك؟
مواطن 5: آه معايا تلت ولاد ريان وراكان ويوسف
السيسي: ربنا يخليهملك.
مواطن 5: ربنا يخليك يا فندم... معلش.
السيسي: معلش ليه؟ أنا موجود هنا عشان أخدم يا ابني.
المواطنون: ربنا يخليك لمصر .. والله كل الناس بتحبك.
السيسي: كتر خيرك، متشكرين، متشكرين، مش عايزين حاجة؟
المواطنون: تحيا مصر.. تحيا مصر.. تحيا مصر..
مواطنون: منور الرويسات والله.
السيسي: إنتو اللي منورين. كل سنة وإنتو طيبين. إحنا جايين عشان نطمن عليكو. جايين نطمن عليكو. ربنا يبارك فيكو.
مواطن 6: ليا طلب صغير عند حضرتك.
السيسي: اتفضل.
مواطن 6: انا بقالي 22 سنة هنا. طالب شقة..
السيسي: حاضر..
مواطن 6: ربنا يباركلك يا ريس.
السيسي: (للأطفال) هاتوا أبو تيشيرت أصفر دوت.. ياخدوا العيديات دول. إدوا الباقي.. (يمسك الأطفال بالعيديات والأموال) أهلا أهلا.. اسمك إيه؟
طفلة 7: بسملة
السيسي: بسملة ده اسم جميل يا بسملة.. إنتي في المدرسة؟ خدتي عيدية ولا ماخدتيش؟ فين العيدية بتاعة البنت؟ إنتي خدتي ولا ماخدتيش؟ خدتي العيدية؟ فين العيدية بتاعة البنت ديت؟ طب البنت ديت؟
مواطن 6: سجدة بنتي يا افندم
السيسي: وسجدة كمان.
المواطنون: سعادة الريس ربنا يباركلك.
السيسي: كل سنة وإنتوا طيبين
مواطن 7: وإنت طيب ربنا يخليك
السيسي: ساكنين هنا؟
مواطن 7: آه ساكنين هنا يا فندم
السيسي: بقالكو قد إيه؟
مواطن 7: بقالنا سنة ونص دلوقتي يا فندم.
السيسي: كل سنة وإنتو طيبين
مواطنة 8: وإنت طيب يا ريس
السيسي: أهلا وسهلا..
مواطن 7: أهلا بيك.. آه المية كويسة يا فندم.
السيسي: يعني في مشكلة؟
مواطن 7: في مشكلة بس سيادتك التليفونات الأرضية، عشان عندنا عيال سيادتك في المدارس.
السيسي: طيب حاضر.. إنت من مصر؟ من هنا ولا من..
مواطن 7: أنا أصلا من سوهاج بس مقيم هنا وساكن هنا بقالي يطلع 15 سنة يا ريس.
السيسي: ما شاء الله.. وده ابنك؟
مواطن 7: ده ابني كرولوس يا ريس
السيسي: أهلا وسهلا، أهلا وسهلا..
مواطن 7: قوله أهلا بيك يا سيادة الريس
السيسي: ازيك؟ لسه ما روحتش المدرسة مش كدة؟ ولا روحت؟
مواطن 7: لا لسه يا ريس، عنده 3 سنين.
السيسي: ودي زوجتك؟
مواطن 7: دي أختي
السيسي: أختك أهلا وسهلا.. أهلا بيكو.. مش عايزين حاجة؟
مواطنة 8: ربنا يخليك لينا يا ريس.
السيسي: طيب ممكن ندي الولاد الصغيرين دول حاجات كدة العيديات بتاعتهم الولاد دول، مش كدة..
مواطن 7: ربنا يخليك لينا يا ريس
السيسي: ربنا يخليك.
مواطن 7: إحنا كنا ساكنين في العشوائيات يا ريس، ومن ساعة ما سيادتك مسكت البلد وجابونا في العماير سيادتك.
السيسي: ربنا يوفقكو، وألف مبروك عليكو، وخلوا بالكو من ولادكو.
مواطنة 8: شكرا يا سيادة الريس.
السيسي: الشكر لله.. غير التليفونات حاجة تاني؟
مواطن 7: لا ربنا يخليك يا ريس
السيسي: صحيح؟
مواطن 7: ربنا يباركلنا فيك سيادتك
مواطنة 8: شكرا يا ريس الله يخليك.
مواطن 7: إحنا اتشرفنا بيك يا ريس. ده إحنا أملنا إن إحنا نشوف سيادتك وإنت جيتلنا بنفسك يا ريس. ربنا يخليك لينا يا ريس مانتحرمش من سيادتك. ربنا يخليك يا فندم. سلام يا ريس.
السيسي: أهلا وسهلا، تعالي، تعالي يا أختي. تعالي أهلا وسهلا.
مواطنة 9: كل سنة وإنت طيب.. أنا بنتي عندها عملية. عاوزاك تعملها، تركبلها قسطرة في القلب. مش عايزة القسطرة في القلب البنت.
السيسي: فين هي البنت دي؟
مواطنة 9: أهي هند أهي.
السيسي: إزيك يا هند.
مواطنة 9: عمرها 6 سنين.. فمعلش..
السيسي: يا نهار أبيض... اسمك إيه؟
مواطنة 9: دي هند ودي نورا وده عبد الله.
طفل 8: وأنا أيمن.
السيسي: وإنت أيمن؟ ربنا يخليكو.. سلامو عليكو..
التقى الرئيس بهؤلاء المواطنين أثناء جولته في مساكن الرويسات بمدينة شرم الشيخ.