نص كلمة السيسي أثناء جولة تفقدية بالعاصمة الإدارية الجديدة 5/9/2021
أهلا وسهلا، اسمك إيه؟ ياسر.. إنتوا هاتغطوا دي بحاجة؟ طب نشوف.. وريني اللي إنتوا هاتعملوه.. طب ده، ده فين لونه.. لا هو فاتح قوي ولا غامق قوي. متشكرين.
...
الفكرة كلها اللي أنا هنا عايزين نقولها، أولا إحنا بنعمل حاجة تتناسب مع مصر. لأن إحنا قبل كدة كان قبل كدة بناخد حتة أرض فاضية ونسفلتها ونقول للناس خشوا أقفوا. لا إحنا مابنعملش هنا كدا. إحنا هنا منظمين الموضوع تنظيم محترم جدا جدا. خدمة الناس وراحتها وأمان الناس كمان. إحنا مطمنين قوي إن كل الأرصفة دي بالكامل متسيطر عليها بشكل جيد. والنهاردة الراجل هانشوف على الشاشات بتاعته، على الشاشات اللي موجودة يعني، العربية بتاعته والمكان بتاعها يتحرك لها بأمان، مش هايبقى في نهر.. مش كدة ولا أنا مش واخد بالي؟ خدت بالك.
ثم طبعا كل الخدمات المطلوبة لأن إحنا خليناها مدينة متكاملة، يعني إحنا لما نقول حتى محطة حافلات على 103 فدان، دي مدينة. يعني أقصد أقول إن إحنا ماسيبناش حاجة إن إحنا نعملها، كأسواق، موجودة، كأماكن ترفيهية للناس، هي مش بس مواصلة فقط.
فأنا بس عايز أقول إيه، إن الموضوع اللي معمول ده موضوع يعني بيتناسب مع حتى العاصمة. وإحنا هانعمل واحد تاني على تقاطع مصر السويس وطريق الدايري القاهرة، وواحد تالت عامله الناحية التانية في غرب القاهرة، مش كدة بردو؟ عشان نعمل محطات ركوب أوتوبيسات وانتظار عربيات تليق بقى بالناس.
ألقيت الكلمة في القاهرة بالعاصمة الإدارية الجديدة، بحضور الدكتور مصطفى مدبولي رئيس مجلس الوزراء، وعدد من المهندسين المشرفين على الأعمال الإنشائية.
خدمة الخطابات الكاملة للسيسي تجدونها في هذا الرابط