نص كلمة السيسي أثناء تكريم اللاعبين الفائزين بميداليات في دورة طوكيو الأوليمبية17/8/2021

بسم الله الرحمن الرحيم

أولا حمد لله عالسلامة، وألف مبروك. مبروك، حاجة جميلة جدا جدا. أسعدتونا، ونشكركم، وجهد عظيم، وإن شاء الله الأيام اللي جاية نقدر نحقق أكتر من كدة، والفكرة مش في تحقيق الميداليات أو كدة، هي الفكرة في.. حالة الرياضة، حالة اللياقة البدنية في مصر، بتعكسها المسابقات اللي زي كدة. كل ما الدول تبقى متحضرة، بتهتم بنفسها وبتهتم بشبابها وبتهتم بأبناءها، وينتج عن ده حجم ضخم جدا في القطاع ده بينعكس بالنتايج.

يعني الهدف مش الميدالية، وهي حاجة عظيمة عشان بس يـ.. لكن حالة الرياضة، حالة بناء أجسام ولادنا وبناتنا في مصر. حالة.. أنا بقول الكلام ده لأن فرصة وإنتوا موجودين إن الرسالة دي تصل لينا.

فإحنا سعداء أولا باللي إنتوا عملتوه وبنشكركم عليه وبنشكر كل من شارك فيه في وزارة الشباب، وكل الوزارات اللي كانت ليها، يعني ليها شراكة في هذا الأمر يعني، زي ما قلت كدة.

لكن بقول تاني إن مستوى البطولات دي بيعكس حالة الرياضة في الدولة، في أي دولة. كل ما تكون حالة الرياضة. حالة الرياضة، يعني في شعب مهتم. في أب وأم مهتمين. في دولة مهتمة. في مدرسة مهتمة. في جامعة مهتمة. في إنسان بيراقب نفسه، شايف دايما متابع وزنة وحالته الصحية وكلام من هذا القبيل.. يعني.

فـ... مبروك (يبتسم الرئيس) حد عايز حاجة؟ أيوة يا أحمد.. (البطل أحمد الجندي يطلب توقيع الرئيس على التيشيرت) طيب (يقوم الرئيس بالتوقيع) كويس كدة؟ شكرا ليك.. حاجة تاني؟ ألف مبروك، متشكرين، متشكرين، شكرا جزيلا.

ألقيت الكلمة في القاهرة، بحضور أبطال مصر الذين حصلوا علي ميداليات في اولمبياد طوكيو، والدكتور مصطفى مدبولي رئيس مجلس الوزراء، والدكتور أشرف صبحي وزير الشباب والرياضة.

خدمة الخطابات الكاملة للسيسي تجدونها في هذا الرابط