نص كلمة السيسي أمام المهندسين والضباط القائمين بأعمال مبادرة "معًا نبني المستقبل" 23/7/2021

إنتوا عندكم خطوط التنظيم والبيانات الأولية بتاعة المواضيع ديت.. مش كده يا دكتور مصطفى؟ اللي هي بتقول هنا كان إيه.. شوفوا، أنا عايز أقولكوا على حاجة، لابد ينتهي التعدي والتجاوز اللي موجود في البلد، وده مش بتاعي أنا بس ده بتاعنا يا دكتور مصطفى كلنا، المحافظين، الأمن، كل حد معني، وزارة الري، وزارة الإسكان، وزارة الزراعة، كل من هو معني بالموضوع يبقى معانا في ده، مايسيبش أبدًا إن إحنا، وإحنا بنعمل إيه؟ لأن ده معنا إحنا قلنا إيه، هاناخد خط كده ومايبقاش في جديد تاني.. لأ، مش هاينفع أبدًا اللي أنا بشوفه ده، وعلشان كده بقول من فضلكم لو إنتوا محتاجين تبصوا على القطاع، المحافظة يقسموه لقطاعين تلاتة اربعة، نطلع ونبص عليه ونشوف، معانا متخصصين، بحيث إن إحنا هاناخد ناخد إجراء كويس.

أنا عايز أقول إيه، مابقولش إن أحواض السمك دي أو أحواض الاستزراع دي بولاية وزارة الزراعة، فأنا إيه.. ماليش دعوة، لأ، ما إحنا مع بعض كلنا عشان نبقى.. والمحافظ أنا قلت مرة قبل كده هو مين يا فندم؟ رئيس الجمهورية في المحافظة.. يبقى كل.. ما إنت عندك مديريات الزراعة والصحة والتعليم مش كده.. دول موجودين معاكوا، عشان إيه؟ يمثلوا الوزارات عندك.. كده يعني.

إحنا طبعا التدبيش ده، ده داير البحيرة ولا هنا بس.. لا أنا فاهم أنا فاهم، لا أنا بتكلم إن إحنا كنا قلنا  إن أي حاجة بقى هانعملها، نعمل طريق قوس شرقي قوس غربي طالما إن هو على عرض البحيرة يبقى برده ندبش كده عشان كده إحنا بنقول للناس دي بحيرة ماتقربش أكتر من كده، ماحدش يقدر يقول كركنا ورفعنا مخلفات وجودنا حالة المية اللي موجودة فيها ثم روحنا محاوطينها علشان ماحدش يتعدى عليها تاني، الكلام ده مش لينا إحنا، الكلام ده إحنا بنعمله مش لينا إحنا، ولا لعصرنا حتى، ولا إيه يا دكتور مصطفى؟ لقدام للعشرين تلاتين سنة الجاية، هايبقى في فرصة لحد يا كامل إن هو يخش؟ هه، ياخد بقى يحط يهد حتة، لأ. عايزين تبقى فيها استزراع سمكي يبقى الموضوع مقنن ومتخطط تمامًا متابع، مايبقاش الموضوع إيه الناس بيتساب كده يعني.

إحنا بنتكلم إن الشغل متكامل مع بعضه، الطرق اللي بتعمولها، مع المحطات اللي بتعملوها، مع تسوية الأرض اللي بتتعمل جوه الـ.. مع شبكة الكهربا مع ده.. هه.. حاجة تاني؟

خلصتوا الموضوع بتاع الطريق بتاع جرجوب الـ200 كيلو؟ 210 من مطروح ولا من جرجوب؟ طب فاضل على مطروح قد إيه؟ طيب، يعني شوفوا، شوف يا إيهاب، راجعوا معاهم ولو جاهزين... بإذن الله متشكرين، كل سنة وإنتوا طيبين، متشكرين.

إنتوا جيتوا في العيد ليه؟ (يضحك) ربنا يوفقكوا.. أنا عايز أقولكوا على حاجة بالنسبة لحياة كريمة، إحنا مجموعات العمل يا إيهاب، مجموعات العمل وهي داخلة هاتدخل، لا مش بس كده، في توقيت مع بعض، بوضوح علشان الناس تعرف قد إيه حجم العمل اللي إحنا هانعمله.

وهنا زي ما بقول الشعبة وكل ظابط معني بالموضوع في الـ52 مركز، ولا 26 ليكوا إنتوا، 27؟ إن شاء الله، أنا هاخش وهاشوف المراكز ديت والقرى ديت.

وبحلم، والله العظيم، إن الحاجة دي تبقى حاجة معمولة ترضينا أو ترضي ربنا ثم ترضينا. فإنتوا اللي موجود جوة يا إيهاب لام يبقى عنده لا مركزية في القرار، يعني يقدر النهاردة رئيس الشعب ونائب رئيس الشعبة لو في حتى ظابط أقل من كده بس هو اللي متابع الموضوع، أقل في الرتبة يعني، متابع الموضوع، طب في فكرة هو شايفها، يقولنا. لكن إحنا لازم نعمل سياق، سياق عام للي إحنا بنفكر فيه نعمله. إحنا كمعنيين بمتابعة الشغل في القرى اللي إحنا بنتكلم عليها دي لازم السياق العام ده يبقى عندنا كلنا على سمت واحد، نبقى عارفين إحنا هانعمل إيه، إحنا عايزين نعمل ايه؟ إحنا بنبطن ترعة؟ ولا بندخل مية شرب؟ بنحسنها ولا بنحسن شبكة الكهربا؟ ولا الصرف الصحي للناس؟ ولا المباني اللي هي بنرفع كفائتها؟ ولا المباني اللي هي بتاعة الدولة اللي بتتعمل جوه؟ ده كله حاجة على بعضها. فإنت المعني بالموضوع.

كل قرية إنت عايز تغير، تـ إيه يا ولاد؟ تغير حياة الناس. نخرج منها بفضل الله سبحانه وتعالى حاجة تانية خالص. وطبعا مع الأهالي اللي موجودة اتعاونوا معاهم علشان هم كمان يساعدوا في موضوع مثلا حاجات تحسن من المخرج النهائي. لو إحنا خرجنا إن القرية فيها صرف ومية وكلام من هذا القبيل بس من غير ما شكل القرية يتغير تمامًا، أنا بقول إحنا مش هايبقى، لسه، إحنا عايزين ناخد خط كده على الشكل اللي كان موجود قبل كده، والمضمون اللي كان موجود قبل كده يا محمد. وبصراحة أنا كنت قلت للدكتور مصطفى مش كده؟ إن إحنا نعمل مسابقة لأفضل مركز وأفضل محافظة وأفضل قرية، مش كده يا فندم؟ ونحط رقم معتبر للي هايتعمل، الأول التاني التالت، سواء كان للوحدة نفسها اللي هو المحافظة يعني أو المركز او القرية، أو الناس المشرفة على المنفذين عليها.

والمكافأة هنا مش الفكرة فيها يعني العائد الـ.. لا لا، هو المعنى، المعنى إن أنا خدت مهمة وجريت عليها وبذلت فيها جهد كبير، والجهد ده أهو الناس كلها قدرته وقالت عليه كده.

والمشروع اللي إحنا بنعمله ده، ده فضل من ربنا علينا. المشروع حياة كريمة ده ده فضل من ربنا وأمر غير مسبوق، لو عملناه صح كمان، هايبقى عملنا أمر غير مسبوق بأسلوب غير مسبوق. ربنا يوفقكوا، كل سنة وإنتوا طيبين.

ألقيت الكلمة بمحافظة الأسكندرية، بحضور المهندسين والضباط القائمين على أعمال تطوير المحاور والطرق الجديدة، في إطار مبادرة "معا نبني المستقبل".