نص كلمة السيسي أثناء تفقده أعمال تطوير المحاور والطرق الجديدة بمناطق شرق وغرب الإسكندرية 23/7/2021
إديني فرصة يا أحمد لو سمحت... .
بسم الله الرحمن الرحيم،
الدكتور حسن... الدكتور عبد السلام موجود؟ الدكتور عبد السلام موجود؟ والفريق كامل موجود؟ واللوا إيهاب موجود؟ طب الدكتور عبد السلام هو كان رئيس المجموعة اللو هو مشرفة على التأمين الفني التأمين العلمي التأمين الهندسي للمشروع ده، فممكن أسمع من حضرتك.. دكتور عبد السلام... كل سنة وأنت طيب الأول... .
بس عايز أقولكم إن الدكتور عبد السلام ده شيخ الـ.. اسمحلي إن انا أقول الكلمة دي (يضحك الرئيس) بس انا بتكلم لأن الموضوع ده طبعًا المشروع في المنطقة ديت في مجال لنقاش كبير قوي، وإحنا طبعا من 3 حارات لـ9 حارات، ده مسطح ضخم جدًا بيتردم في بحيرة أو في ملاحة وكلام من هذا القبيل، وبالتالي معرض إن الكلام ده يا كامل مش كده؟ إن هو مثلا يحصل فيه هبوط على مدار مثلا سنة اتنين تلاتة حسب. وده كان محل نقاش يا إيهاب، مش كده؟
فأنا بس عايز أطمن إحنا الدكتور عبد السلام متابع الموضوع ده من كام شهر؟ (يرد عبد السلام: من منتصف مارس تقريبًا) طب اتفضل يا فندم طمنا الأول... .
أنا طبعا بشكرك على الفهم اللي إحنا فهمناه، وإن كان مهم إن الناس تسمعه مننا، لأن ده كان محل نقاش كبير من المهندسين طبعًا اللي هم المعنيين بحالة الطريق وكفاءته، وحتى من المواطنين إن هم يبقوا مطمنين إن الطريق دوت رغم إن هو اتعمل زي ما حضرتك قلت في ظروف تربة صعبة جدًا جدًا في البحيرة أو في الملاحة على طول الـ35 كيلو، لكن الإجراءات الهندسية اللي اتعملت، والاعمال التنفيذية اللي تمت، تحقق أقل قدر إذا كنت، إذا كان التعبير ده مناسب، أقل قدر من الضرر للطريق على مدى زمني كويس... .
توافقني على كدة على التعبير ده؟ توافق على كده.. وإحنا مطمنين يا دكتور عبد السلام لأن إحنا لما حصل نقاش في هذا الأمر، قلنا عايزين... يعني.. أنا لما قلت شيخ أنا ماقصدش بيها أكتر من يعني اللي هو الكبير العلامة في هذا المجال يبقى معانا فيه (يضحك) يبقى معانا في الموضوع عشان مش بس على قد المرة الأولانية خالص لما قلنا نعمل فحص للواقع اللي تم، لأ قلنا يبقى موجود معانا لغاية لما ننهي الطريق إن شاء الله ونطمن إن إحنا طبقًا عالأقل اللي إحنا متوقعينه هو اللي بيتم، يعني طالما حضرتك قلتلي النهارده إن إحنا في الصيانات الدورية والصيانات الطبيعية في الطريق هي دي اللي هاتقابلنا أثناء عمليات الهبوط وهانعالجها، خلاص تبقى الأمور كدة، مش كدة يا فندم؟ تبقى كدة مقبولة يعني. لكن أنت بتنصح إن الطبقة الأخيرة ماتتعملش... .
طيب، إحنا بردو يا دكتور عبد السلام إحنا ماشيين في 15 كيلو إضافيين غربًا بقى، وتقريبًا في نفس طبيعة التربة إذا كنت أنا يعني، مش كدة يا أحمد ولا؟ فبرده هانبقى محتاجين إن إحنا نستمر بنفس يعني مسار العمل ده والمتابعة ديت لغاية لما نخلص بقية الـ50 كيلو.. أنا بشكرك يا دكتور عبد السلام اتفضل استريح، اتفضل اتفضل.
أنا بس حبيت إن إحنا نطرح ونطمن يعني من المسار اللي إحنا ماشيين فيه، وبقل إن إحنا لما طرح هذا المشروع، كان المطروح هو كان 3 حارات، وإحنا لما بنيجي نتكلم في موضوع بنعمله مش بنعمله عشان يحل مسألة مؤقتة، لأ، إحنا بنعمل موضوع يحل مسألة مستقبلية، يبقى قادر على استيعاب حركة عالأقل الـ20 سنة الجايين، ليه؟ لأن الكود الهندسي اللي بيتعمل والتكلفة المالية اللي بتتعمل للمحور اللي هو الـ35 كيلو، اللي قد يعتقد الكثير مننا إن تكلفته يعني قليلة، يعني وعدد السنين اللي يتعمل فيهم محور زي كدة ممكن يبقى أكتر من كدة بكتير، يعني إذا كان بيتقال إن إحنا ممكن نخلصه على نهاية السنة دي، يعني التخطيط كان أكتر من كده، يا كامل، مش كده ولا؟ كان لازم ولا لازم؟ يعني أكتر من سنة؟
طيب، يعني إنت يا كامل عايز تقول إن إحنا يعني الكلام اللي اتقال إن إحنا نحط طبقة ربط واحدة أو طبقة أسفلت واحدة سنة ولا اتنين ده أمر ماشي يعني... طب خلاص، خلاص... .
طيب.. إيهاب... طب اتفضل يا إيهاب، اتفضل.. الدكتور حسن موجود؟ الاستشاري مش كده؟ اتفضل... طب أنا بشكرك يا دكتور حسن شكرًا جزيلًا.
طيب أنا بس حبيت إن النقاش ده يببقى موجود ويبقى مسجل علينا كلنا في إطار إن إحنا طبعًا وجهات النظر الهندسية أنا فنيًا ماقدرش أتكلم فيها يا دكتور مصطفى، ماقدرش أتكلم فيها (يضحك) كل واحد هايدافع عن وجهة نظره وكامل طبعا هايقولك الأشرطة وأنا يا كامل لما سيبت الموضوع ده سيبته علشان حاجتين، التكلفة المالية وعملية إن انا أحط الأشرطة ديت تحت كمية ضخمة من الردم، أنقلها في منطقة الملاحات بالطريقة ديت عشان أردم وتاخدلها سنة ولا اتنين، تطلع المية ديت وأبقى أنا بس ماشي على الـ3 حارات لمدة سنة ولا اتنين لغاية لما اطمن إن حجم الهبوط بقى مناسب إن أنا أبني عليه الطريق أو محوره، أو إن أنا أحط الدبش بتكلفته المالية الكبيرة، أنا جيت على المشروع، عالفكرة دي، خلي بالكم، إحنا بنجيب رجالة تشتغل معانا ونضع فيها الثقة في مشاريع بتتكلف عشرات المليارات، ويمكن مئات المليارات كمان، أنا بقول الكلام ده لينا كلنا عشان تبقى الأمور واضحة، إحنا من النادر لما نجد ناس تقدر تحققلنا كل اللي إحنا عايزينه، من النادر، أنا متابع حاجتي كويس قوي، ويا إيهاب، مافيش موضوع بيتعمل في الدولة المصرية إلا إما أنا شايفه كويس، على قد ما بقدر وعلى قد ما باعرف، ولما بلاقي حاجة ما أعرفهاش يا دكتور مصطفى بجيب المتخصصين، المتخصص ييجي يقولنا رأيه في الموضوع إيه عشان فنيًا يبقى هو أولى بالكلام وأولى بالمتابعة، وفي جميع الأحوال زي ما إحنا قلنا في المحور ده، إن هو يعني الهبوط منتظر أو ده طبيعي ولكن نسبته قد إيه؟ طب ما إحنا في جميع الأحوال هانقف على، يعني، على طبقة واحدة هانعمله ونكمل بعد كدة نشوف كمان سنة ولا اتنين لو احتاجنا نعمل كدة تاني مش هايبقى الأمر بالطريقة ديت.
إحنا بنتكلم في المنطقة اللي إحنا بنتكلم فيها ديت بما فيها الدلتا اللي إيهاب شغال فيها، بنتكلم في أكتر من 150 مليار جنيه، ولا أنا مش واخد بالي؟ مش كدة يا إيهاب ولا إيه؟ كان الكلام ده بيتم قبل كدة يا جماعة إن إحنا نقول وإحنا بنعمل الدلتا الجديدة تخش تعمل العلمين وتخليه سبع تمن حارات وتخش عالضبعة وتخليه سبع تمن حارات ويبقى في تخطيط لشبكة الطرق اللي هاتغطي الدلتا الجديدة والتخطيط بتاعها علشان المليون ونص فدان اللي إحنا رايحينلهم يبقى حاجة مايحصلش تاني الكلام اللي حصل في بلدنا على مدى اللـ.. عالأقل الـ100 سنة اللي فاتوا... .
إن يبقى أي حاجة معمولة، الزراعة بتتعمل وبعدينا الناس تحط مبانيها، وبعدين نعملهم طريق، وبعدين كلام.. لا إحنا بنعمل النهاردة حاجة على بعضها... المينا بتاع اسكندرية اللي بنقول عليه كان مينا عجوز نتيجة الظروف اللي موجودة، إحنا بنغير واقع اسكندرية يا جماعة.
النهاردة لما بقول القوس الشرقي والقوس الغربي وبقول كمل المحمودية لغاية نهايته، يعني 50 كيلو إضافيين على الـ25 بتوع المحمودية مش كدة بردو ولا أنا.. يعني 75 كيلو كانوا فين؟ كانوا عبارة عن... أنا آسف يعني حجم التجاوزات اللي موجودة على المحور وعالترع وعلى الكلام ده، والناس حاطة على أراضي حرم الترع مساكن بالآلافات، بنعوض بـ2 مليار يا دكتور مصطفى.. مش كدة ولا؟ مش كدة؟ يعني 2 مليار جنيه بيتحطوا عشان نزيل منشآت موجودة على حرم ترعة ماعرفش اتعملت امتى، لكن اتعملت.. علشان نرجع تاني نخلي حرم الترعة ده كويس، ونعمل طريق مناسب على من أول اسكندرية لغاية البحيرة، اللي هم الـ75 كيلو دول، حجم الأموال اللي بتنفق علشان نعوض الناس اللي مالهاش ذنب في الموضوع.. حاجة ضخمة جدًا جدًا.
فهنا مهم قوي إن إحنا وإحنا بنبص على ده نبقى شايفين قد إيه بلدنا كانت محتاجة جهد ومحتاجة متابعة، ولما نقول يا إيهاب إن البحيرة بتاعة كينج مريوط أو الكلام ده يتم تطهيرها بشكل كامل، يبقى الناس المعنيين في المحافظة يبقوا منتبهين، لأن أنا وأنا جاي بالطيارة بردو كده، بصيت لقيت ناس في على المزارع السمكية بتردم... لأ إحنا مش هايحصل الكلام ده تاني، وبالتالي لو سمحتم يبقى في توافق، ويبقى في فهم مشترك للي إحنا للأساس اللي إحنا بنتحرك عليه، الأساس اللي إحنا بنتحرك عليه بنقول النهاردة إن إحنا بنرجع كل شيء لأصله، يبقى أنا النهاردة لازم كمحافظ لاسكندرية على سبيل المثال أو للبحيرة على سبيل المثال أو أي محافظة أخرى، يراجع بقى التخطيط العمراني بتاعه، عنده وزارة الإسكان، مش كدة يا دكتور مصطفى؟ عنده القدرة على إن هي تديله الخبرة وتديله المشورة اللازمة لإعادة تنظيم الأراضي.
أنا وأنا جاي كده على محور التعمير وحتى من امتداد لغاية العلمين، بردو موضوع أنا مش حاسس إن إيد الدولة موجودة في التخطيط وتنظيم الكلام اللي موجود، وأنا ماقصدش بكده إن أنا يعني أقول لحد إنه مقصر يعني، لكن لازم ننتقل من الحالة اللي كانت الدولة فيها الناس بتتصرف بدون تنظيم وبدون تخطيط، إلى دولة بتشتغل والدولة إيديها واضحة، وبصمتها موجودة في الموضوع اللي إحنا بنتكلم فيه.
أنا بقول الكلام ده كده لأن.. يعني.. المسيرة اللي إحنا الواحد شافها وشاف قد إيه بلده يعني تعبت نتيجة إن إحنا كمسؤولين، أنا بتكلم مش عليا، ومش بتكلم عالحكومة الحالية ولا حتى اللي فاتت، لكن على مدى السنين اللي فاتت كلها، لما.. لما ماحصلش.. أقولكوا على حاجة صعبة؟ ده يمكن إن الناس اتصورت إن المشاكل مالهاش حلول، فيقوموا يعملوا إيه يا كامل؟ مايطرحوش مشاكل.. مش مصدق إنها ممكن تتحل.
فأقصد أقول يا جماعة اللي إحنا بنعمله ده لما نيجي نمسك منطقة على بعضها، مسطحها قد إيه كله؟ مايجيش 50 كيلو في 50 كيلو.. ألاقي إن أنا محتاج إن أنا أصرف عليها في حدود 150 مليار جنيه.
بالمناسبة، ده تقريبًا كل قطاعات الدولة كده.. تقريبًا كل حتة في الدولة محتاجة كده.. وحياة كريمة مش بعدية عن ده.. حياة كريمة مش بعيدة عن ده.. لكن أنا بتكلم على إن إحنا عشان وأنا جاي قلت طب أشوف الـ.. الغرب الطريق بتاع ترعة محور التعمير، أنا لقيت الناس يعني إيه.. على استحياء كدة، هاتردم تاني في البحيرة.. طب ما إحنا يا إيهاب قلنا هانخلص ونطهر وحتى المزارع السمكية متنظمة في سيطرة للدولة يا جماعة، مش بتاعتك يا إيهاب، مش بتاعتك يا إيهاب، دي بتاعة أجهزة الدولة مع بعضها، المحافظة مع الزراعة مع الري مع ده، وإحنا كنا قلنا يا دكتور مصطفى إن إحنا نخلي مسؤول أو كيان هو متابع البحيرات ديت علشان يكونلها قيادة يعني تتحمل أو كيان يتحمل مسؤولية الموضوع ده.
ولكن، قلتلكم مرة قبل كده من فضلكم وممكن وزارة الدفاع توفرلكم الطيارات تطلعوا تتفرجوا على المنشآت بتاعتكم وعلى الشكل العام للواقع اللي موجود فيه البلد.. إحنا جايين هنا عشان نشتغل ونغير حال بلدنا.. ولما جينا النهاردة وساعة ما الفريق كامل قالي الطريق ده يا فندم قدامنا 3 سنين علشان بس نحقق موازنته.. طب أنا هاعذب الناس والناس اللي بتخش المواني.. مينا اسكندرية والحركة اللي عليها طول الوقت على طريق 3 حارات؟ يعني خلاص لازم نعمله.. فيلّا.. بكل ما تعنيه هذه الكلمة، علشان يبقى بقول في 9 حارات، منهم الـ3 القدام والـ6 اللي هايتضافوا ليهم دول بكل ما هايحقق مش بسس للمينا، لأ، لأهل اسكندرية كلهم، حاجة كويسة قوي قوي في الحركة بتاعتهم، ولغاية ما نوصل لبرج العرب إذا كنت أنا فاهم.وبعدين وإحنا بنقول كدة قلنا كل الطرق اللي موجودة في المنطقة دي بالكامل تتعمل... طب هاتتكلف قد إيه؟ طب ده النهاردة وزارة النقل أكتر وزارة خدت مخصصات في فترة الـ3 سنين اللي فاتوا دول، هو القطاع عايز كده، وكل قطاع هانخش فيه، هانجد إن هو محتاج نعمل فيه كدة، ري عايز كده، زراعة عايزة كده، صحة، أي حاجة.. فعشان نعمل مجموعة الطرق ديت، إحنا بنتكلم في فلوس كتيرة قوي قوي.. طب إحنا بقى هانأجلها لأربع خمس سنين أو.. لأ.. ده على طول دلوقتي بنقول تتعمل بشكل متكامل بحيث إن إحنا نطلع من المنطقة ديت بالكامل حلينا كل مسائلها.. حلينا كل مسائلها.
ألقيت الكلمة بمحافظة الإسكندرية بحضور الدكتور مصطفي مدبولي رئيس مجلس الوزراء واللواء أحمد العزازي من الهيئة الهندسية للقوات المسلحة وعدد من الوزراء.