نص كلمة السيسي أثناء تفقد أعمال تطوير وصيانة الطريق الدائري 4/6/2021
السيسي: ده الأول إيه؟ ده...
المهندس: دي منطة الأسمرات يا فندم...
السيسي: يعني إنت واقف الخط لغاية هنا.
المهندس: أيوة يا فندم، أنا رابط هنا يا فندم بالطريق القائم، القادم من شارع 9، متجه قادم طرق الأسمرات، أنا رابط عليها مباشرة بطريق رئيسي طوله 2 كيلو.
السيسي: يعني الطريق واصل لكدة...
المهندس: بالظبط يا فندم، واصل بالمقطم وواصل بحي الأسمرات. هنا يا فندم من الأعمال طبقا لتوجيهات سيادتك، تم توسعة تم توسعة مدخل ومخرج الشهيد، تم بنسبة 100%، وعمل سور حضاري أمام المقابر على محور الشهيد، تمت بنسبة 100%.
السيسي: يعني الأصفر ده خلصان، والأخضر ده اللي إنتوا شغالين فيه.. اللي إنت بتعمله ده، هاينتهي تمامًا إمتى؟ 30-9. في حاجة تانية، زي ما بسأل السؤال ده في كل مرة، إنتوا شايفينها، وجودكم في المنطقة هنا محتاجين نعملها، تحسن وتخلي جودة العمل وجودة الحركة أفضل؟ قولي.
المهندس: كله اتعرض عى سيادتك يا فندم وفي بردو R5 طريق بيربط من حي الأسمرات بواقع إجمالي عرض 10 حارة مرورية، بواقع 5 حارة مرورية لكل اتجاه، بيربط محور الشهيد برضو.
السيسي: كدة مش عايزين حاجة تاني.
المهندس: لا تمام يا فندم.
السيسي: طيب، شكرا يا هشام.
المهندس: إحنا مكونات الكوبري يا فندم الكوبري ده حضرتك 24 محور، عبارة عن 29 قاعدة خرسانية، و29 عمود خرساني، و154 كمرة خرسانة، والباكية المعدنية سيادتك اللي معدية الدايري دي طولها 60 متر، وعمق الباكية حضرتك بيوصل لـ2.85 متر، الباكية دي يا فندم الكمرة واحدة منها وزنها 130 طن، وكان ليها طبيعة خاصة في التركيب هنا إن إحنا كنا محكومين نركب من مكان واحد، الكمرة دي حضرتك فيها فوق الـ13 ألف مسمار، ووزنها فوق الـ2000 طن يا فندم.
السيسي: ده خلاص إحنا خلصناه.
المهندس: تمام سيادتك، إحنا فاضلنا سيادتك بس بنركب الكمر الصغير العرضي الللي هو مابين الكمر الرئيسي وبنستكمل تربيط تعزيم المسامير عشان نوصل لعزم 100%.
السيسي: إحنا هانخلص هنا إمتى؟
المهندس: إن شاء الله الكوبري 15-6 يا فندم.
السيسي: 15 يوم؟
المهندس: إن شاء الله يا فندم، إحنا سيادتك عشان نرفع الرافعة دي نسقنا مع وزارة الداخلية إن إحنا قطعنا 10 ساعات على مدار أسبوعين خميس وجمعة 10 ساعات اللي فاتوا والخميس والجمعة دول يا فندم.
السيسي: على كل حال نص الشهر الجاي، اللي إحنا فيه ده، نكون مخلصين، ده هايعمل فرق كبير جدا جدا. متشكرين، متشكرين.
المهندس: أهم عمل صناعي في المشروع هنا كوبري المنيب على النيل، الكوبري ده يا فندم بيتكون من 3 أجزاء.
السيسي: لا قولي الأول، المحور ده، شغال ولا لسه؟ المريوطية، شغال، مش كدة؟ يعني خلاص، طيب، اتفضل.
المهندس: التقاطع التاني المهم عندنا يا فندم تقاطع الأوتوستراد، 3 حارات لكل اتجاه، إحنا بنوسعه حاليا لـ6 حارات لكل اتجاه، بإذن الله مخطط الانتهاء منه في 30-6.
السيسي: السنة الجاية؟
المهندس: لا 30-6 السنة دي، هو وكوبري السلام، وكوبري المرج، وكوبري مسطرد، جميعا بإذن الله 30-6 القادم يتم الانتهاء منها بنسبة 100%.
السيسي: طب أنا بس عايز أسألك سؤال، أنا شايف وإحنا جايين إنتوا بتزيلوا عشان توسعوا، مش كدة.. إنتوا معوضين الناس..
المهندس: جميع الناس يا فندم بياخدوا تعويض من محافظة القاهرة والجيزة والقليوبية...
السيسي: المهم بياخدوا.. بيوصلهم التعويض.
المهندس: قبل ما بيمشوا بياخدوا التعويض يا فندم.
السيسي: طيب ماشي.. طيب، إحنا هانخلص كل المراحل دي، إمتى؟
المهندس: بإذن الله 30-12 العام الحالي يا فندم.
السيسي: السنة دي.
المهندس: بإذن الله يا فندم.
السيسي: طيب. حاجة تاني؟ في حاجة تاني إنت شايفها هنا، في المنطقة، في شغلكم، لقيتوا إن إحنا محتاجين نشتغل عليها؟ على كل حال شوفوا، لو لقيتوا إن إنتوا محتاجين من خلال المعايشة مع الناس هنا، ومع الحركة اللي موجودة معانا، محتاجين نعمل حاجة بغض النظر عن الطريق الدايري، لأ، أنا بتكلم على طرق أخرى جوة ال، جوة الأحياء اللي إحنا بنتكلم عليها، ابقوا ادرسوا الكلام ده، ولو في حاجة.. آه طبعا، طبعا.. متشكرين.
ألقيت الكلمة في القاهرة، بحضور عدد من المهندسين القائمين على تطوير الطريق الدائري حول القاهرة الكبرى والمحاور المحيطة بحي الأسمرات.