نص مداخلة السيسي في قناة cbc عن السيدة ناهد سائقة التروسيكل 22/3/2021

السلام عليكم. إزيك يا أستاذ عمرو.. كل سنة وإنتوا طيبين. أهلا مساء الخير، أهلا.. أهلا بحضرتك.

أنا الحقيقة ماكنتش أقدر أشوف الست ناهد، من غير ما أتصل، وأبلغها تحياتي واحترامي، واعتزازي، وكمان ألمي.. ألمي.. إن يبقى في 5 بنات وهي بتجري عليهم، وإحنا بنتفرج عليها.

فـ.. ربنا يديكي الصحة، والمطلبين، وإن كان ليا تعقيب أو رأي آخر يعني، ماعرفش هاتسمعيه يعني..إن الـ 5 بنات محتاجين رعاية، والرعاية، الـ5 بنات هايبقوا 5 أسر بعد كدة. فأنا، يعني، إحنا هاندبر كل اللي إنتي عايزاه. وبالمناسبة إحنا بندبر ده لأن إنتي تستحقي كل خير، وأسرتك تستحق كل خير. وكل ست تعمل كدة، تاج على رأسنا، وتشرفنا.

 لأن.. أنا بس عايز أقول إيه، في النقطة ديت.. إنتوا ليه عرفتوا بحترم قوي الست المصرية، لأن بترجع الساعة 4 الصبح، بترجع الساعة 4، تشيل على.. يعني، مابقتش ست بقى.. بقت، بقت بـ100 راجل يعني.

فأنا بس عايز إن كان صوتي يوصلها يعني، ولكل ست أنا مش شايفها، بقول لكل مسؤول في مصر، المحافظة، المحليات.. من فضلكوا، خلي بالكوا، خلي بالكم من أهلكم، خلي بالكم من عرضكم. الست عرض، وإحنا مسؤولين عنها في الظروف اللي زي كدة، يعني، أنا اللي بطوله، مابستناش، بس أنا في ناس كتير مابطولهاش، ماعرفهاش، مابسمعش عنها. فاللي موجود بيسمع يا يعمل، يا يقولي وأنا إن شاء الله هاعمل.

متشكر جدا يا أستاذ عمرو، والحقيقة أنا بشكركم على إن إنتوا يعني بتجيبوا أمثلة رائعة للناس، عشان تبينوا قد إيه شوف الأم عاملة إزاي؟ اتفضلي.

أنا، يعني عايز أقولك على حاجة، وأقولكم من خلالكم، لكل الناس في مصر.. والله أنا بتمنى أعمل كل حاجة حلوة للناس، خاصة الناس اللي هي، اللي ظروفها صعبة، زي المثال ده، ومنه كتير في مصر بالمناسبة، وفي كل حتة في مصر في كدة، لأن إحنا بلد يعني، ظروفنا مش.. يعني مش، إحنا دولة مش غنية يعني.. لكن على الأل يبقى قلوبنا، ويبقى إرادتنا إن ربنا سبحانه وتعالى يعينا إن إحنا نقدملهم كل حاجة على قد ما ربنا يقدرنا.

فانا بس.. بوجهلك التحية، وبوجه ل، للزميلة الفاضلة.. ريهام على ال، على الجهد دوت، وبالمناسبة، أنا عايز أقولكم، ياريت نفضل الأمثلة دي على طول تبقى موجودة، يعني...

أنا اللي متشكر وبشكركم، وأرجو إن إنتوا تبلغوا ال، الست ناهد إن إحنا كل اللي إنتي عايزاه إن شاء الله.. كل عام وإنتوا طيبين.. اتفضلي حضرتك.

أجريت المداخلة الهاتفية على قناة سي بي سي، في برنامج "من مصر".

خدمة الخطابات الكاملة للسيسي تجدونها في هذا الرابط