نص كلمة السيسي قبل الاجتماع مع رئيسة اليونان 11/11/2020
اسمحي لي إن أنا، سيدتي الرئيسة، إن أنا أشكرك على حفاوة الاستقبال، وكرم الضيافة. أنا الحقيقة في زيارتي لليونان، دي الـ 3 زيارات خلال 5 سنوات، ودي بتعكس العلاقات وقوتها، ومش على الفترة اللي إحنا موجودين فيها، أنا بتكلم عن نفسي، ولكن ده على مدى سنين طويلة. العلاقات بين البلدين بتتطور بشكل رائع وعظيم، وبتتقدم بشكل كبير.
واسمحي لي أقولك إني بتفق معاكي في إن توقيع اتفاقية ترسيم الحدود البحرية كان أمر بيعكس حجم التفاهم وقوة العلاقات.
واسمحي لي أسجل هنا بكل تقدير إن مصر تقف إلى جانب اليونان ضد أي تصعيد أو عمليات استفزازية في شرق المتوسط، أو مرتبطة بحدودها البحرية، وفي إطار احترام قواعد القانون الدولي والأعراف الدولية.
اسمحي لي أسجل بردو مرة، يعني أتوافق معاكي في أمر في منتهى الأهمية على إن مكافحة الإرهاب والتطرف ليست مرتبطة أبدا بدين واحد، ولكنها، أو مش مرتبطة بالأديان بصفة عامة، ولكن هي شكل من أشكال الانحراف الفكري، وده بيؤدي إلى شكل من أشكال التطرف والإرهاب اللي إحنا بنعاني منه كلنا. مهم قوي إن هذا الأمر، يعني لا يتحول إلى إساءة إلى الأديان أو إلى مشاعر المؤمنين.
مرة تانية أنا بشكرك على حفاوة الاستقبال وكرم الضيافة سيدتي الرئيسة.
ألقيت الكلمة في أثينا، بحضور إيكاتيرني ساكيرلاربولو رئيسة اليونان.