نص تعليق السيسي على كلمة وزير السياحة خلال افتتاح جامعة الملك سلمان 31/10/2020

يا دكتور خالد، قبل ما نفتتح، أشاور بس على نقطة واحدة مهمة قوي الدكتور خالد قالها كذا مرة في الموضوعات اللي كان بيعرضها يعني، قال إيه؟ قال إن إحنا بدأنا 2002، بغض النظر عن إن الموضوع اتأخر من 2002 لـ2010، بغض النظر، ده مش دي القضية اللي إحنا بنتكلم فيها.

ولكن حتى عندما بدأنا في العمل في 2010 وكدة، أو حتى إذا كان العمل كان ماشي، جه عند 2011 وتوقف. دي النقطة المهمة جدا جدا، وأنا قلت مرة قبل كدة وبكررها لحضراتكم، مش الفكرة إن أنا بقول 2011 معناها إساءة لحد، ولكن معناها بقول إن أي فعل الناس هاتعمله ليه تكلفة كبيرة جدا جدا.

أنا بس حبيت أقول، معلش في اليوم الجميل اللي إنتوا بتفتتحوا فيه، إن الموضوع بتاع 2011 ده اللي حصل لقطاع الآثار، ده اللي حصل، مش إيقاف إنشاء المتاحف أو تعثرها، لأ، ده في حصل حاجات كتير قوي في القطاع ده بردو، يعني ممكن يكون في فقد لآثار بس ده مش مجال إن إحنا نتكلم فيه دلوقتي. ممكن نقول حصل تهريب كبير قوي لآثار في الفترة ديت. عدم الاستقرار. عدم الاستقرار معناه ضياع الدولة. طب إنت بتكرر الكلام ده كتير. وهافضل أكرره، لمصر ولغير مصر.

لما بقول خلي بالكم من البلاد، احفظوا بلادكم وحافظوا عليها، الهدف منها إن الناس ماتعرفش إن النتايج بتاعة العمل بتاع عدم الاستقرار، مدمر للدولة ومستقبلها. الدليل بتاعنا اللي إحنا بنتكلم عليه، النهاردة بنتكلم في 2011 وإحنا 2020، يعني 10 سنين ده في القطاع ده. طب بقية القطاعات؟ الشركات اللي اتعطلت، الاقتصاد اللي راح، الإرهاب اللي اتصدر لنا اللي لقى فرصة في الموضوع 2011، و2013، ولو حصل تاني حاجة تانية، هايبقى بردو نفس الكلام.

ده مش بس كدة، مش إن هي تتعثر، أو ماتكملش، لأ، ده ممكن يتم الاعتداء عليها زي ما قال كدة الدكتور خالد، وإحنا مش بصدد يعني ذكر كل اللي حصل في الفترة ديت من حجم التدمير والخراب اللي تم بالاعتداء على، مش بس المنشآت والمتاحف، لأ، ده أكتر من 75 كنيسة، مش كدة؟ تم تدميرهم، والدولة طبعا قامت بترميمهم مرة تانية، لأن ده لا يليق.

الخلاصة اللي أنا بس عليها، اللي أنا بأكد عليها هنا، إن أي موضوع طول ما الاستقرار موجود هانقدر نتجاوزه، أي تحدي هانستطيع إن إحنا نتغلب عليه، ونكمل مسيرتنا وننجه فيها، أو بقى عدم الاستقرار يبقى التمن اللي بيتدفع تمن كبير قوي... شكرا يا دكتور خال، اتفضل.

ألقيت الكلمة في شرم الشيخ، بحضور الأمير فهد بن سلطان بن عبد العزيز أمير منطقة تبوك، والدكتور خالد العناني وزير السياحة والآثار، وعدد من الوزراء.

خدمة الخطابات الكاملة للسيسي تجدونها في هذا الرابط.