نص ثلاث مداخلات للسيسي على كلمة وزير التربية والتعليم خلال افتتاح منشآت تعليمية 16/9/2020
يا دكتور طارق... لو سمحت اشرح اللي فات ده كويس، ماقصدش كويس للناس اللي بتسمعنا، انت بتتكلم على نظام حضور، مش كده؟ مختلف عن ما كنا عليه، وبالتالي، لو سمحت نرجع للوحة اللي قبل كده، أيوه، اللي هو الطرح اللي إنتوا عاملينه واللي إحنا روحناله غصب عننا، ده روحناله عشان إحنا نقدر نخش العام الدراسي الجديد في ظل كورونا اللي لسة ماخلصتش، واللي محتاجة مننا كلنا إن إحنا ننتبه لها عشان نفضل محققين، يعني، الاستقرار اللي إحنا حققناه في الموضوع دوت.
فالكلام اللي الدكتور طارق بيقوله هنا، بيتكلم على نسب حضور، لفترات حضور مختلفة عما كنا عليه. أنا بس عايزك، يعني إيه... آه، بعد إذنك يعني.
يعني، إذا كان واصل للناس كلها اللي الدكتور طارق بيقصده، إن إحنا الحضور في المدارس، هايتراوح بين يومين لـ 3 أيام فقط في الأسبوع، مش كدة يا دكتور طارق؟ أنا عايز أوصل المعنى ده والرسالة دي بوضوح للمواطنين، للأسر، إن إنتم هاتجدوا نظام مختلف عما كنتم عليه، إنتم كنتوا بتودوا الأولاد من السبت، أو من الحد للخميس، النهادره إنت بتتكلم يا إما 4 أيام هانحضرهم، مش كده؟ أو 3 أيام، وفي بعض المدارس هايبقى يومين بس، مش كده؟
ده اللي أنا عايز الناس تبقى تستقبله، وتبقى واضح بالنسبالها إن هو معمول لأسباب كتير، منها السبب الرئيسي إن إحنا لمجابهة جائحة كورونا، مش كده يا دكتور، ده اللي أنا عايز أوصله لكم، يعني إنتوا ماتندهشوش، ماتستغربوش إن إحنا بنقول إن الطفل أو الطفلة هايحضر 3 أيام بس، في بعض المدارس، وفي مدارس تانية هايحضر 4 أيام بس، ده موضوع مرتبط بحجم المدرسة وحجم الطلبة اللي جواها، مش كده يا فندم؟ ما أنا عا.. أنا مش، أنا بتكلم، عايز أقولهم ده عشان إحنا لما قلنا تعالوا اتكلموا في اليوم بتاع الافتتاح، عشان الرسالة توصل للناس بوضوح، لأن مافيش أفضل من اليوم ده إن إحنا نبلغ بوضوح الحكاية، ونكمل شرح بعد كده في البرامج، في الإعلام، الموضوع ده بتفصيل أكتر، عشان تصل لكل أسرة الحكاية ماشية ازاي... اتفضل.
السيسي: أنا بهنيكي، استني يا رودينا بس، استني شوية، عشان نحييكي ونخلي الناس كلها اللي قاعدة توجهلكوا التحية ليك يا محمد، وليكي يا رودينا على التغلب على كل الظروف الصعبة والنجاح المتميز، ألف مبروك، ألف مبروك.
وألف مبروك ليكي يا رودينا، وأنا عايز أقول، النموذج لمحمد ورودينا بيقول إيه؟ إن رغم كل التحديات، لكن بالإرادة والإصرار والجهد، والثقة في النفس، حققوا النتيجة دي، وفي غير منهم كتير النماذج يمكن ماتكونش موجودة معانا دلوقتي، ده بيدينا إحنا الأمل؟ آه، إن إحنا رغم كل التحديات اللي عندنا، هانقدر ننجح فيها، ونتجاوزها؟ أيوه.
فـ.. مبروك، محمد، مبروك يا رودينا، وأرجو إن إحنا لو سمحتم نحييهم (تصفيق)
أنا مش عارف أقدملكم إيه يا رودينا، نفسك في إيه تاني غير ال، أنا بدأت برودينا يا محمد عشان هي، يعني، فتاة يعني... اتفضلي، نفسك في إيه يا بابا؟
رودينا: هو أنا يعني إن شاء الله نفسي إن أنا أكون صحفية ومتميزة، أنا الحمد لله بكتب مقالات وقصص قصيرة من صغري، فنفسي إن أنا أستغل الموهبة دي في إن أنا أخدم بلدي بإني أعرض قضايا ومشكلات، أسلط عليها الضوء، طبعا، المجهودات ما شاء الله مبذولة، وطبعا حضرتك السيد الرئيس مشكور عليها، لكن أنا حابة يكون ليا دور بقى وأقدر أساهم في إني أساعد الناس وأساعد أي حد محتاج إن هو يتسلط عليه الضوء أكتر يعني.
السيسي: وإحنا عايزين دورك ده، بس قوليلنا إيه اللي ممكن نعمله معاكي دلوقتي، دلوقتي دلوقتي، لو كنتي مجهزة حاجة يعني.
رودينا: لا هو أنا يعني إن شاء الله هدفي كلية إعلام جامعة القاهرة دي هاتنمي موهبتي أكتر يعني إن شاء الله.
السيسي: إن شاء الله... محمد..
محمد: أنا نظرا للظروف اللي عديت فيها، بلدنا مافهاش مستشفى، وإحنا عددنا أكتر من 200 مليون نسمة.
السيسي: 200 مليون؟ (يضحك الرئيس)
محمد: 200 ألف.
السيسي: طيب يا محمد...
محمد: فكان نفسي يتعمل مستشفى في بلدي.
السيسي: إحنا كلنا نفسنا نعمل مستشفى في كل حتة يا محمد، وده مهم، شوف النقطة اللي إحنا كنا بنتكلم فيها من شوية، والنهارده ابننا بيقول إيه. يا دكتور مصطفى.. أنا مش بقول لدكتور مصطفى اعمل أو ماتعملش، الدكتور مصطفى بيعمل أقصى ما يمكن يا محمد، لكن المطلوب في ظل ال... أنا مش عايز أخلي اللحظة الجميلة دي يعني نتكلم فيها كتير، لكن حاضر.. حاضر.. لأجل خاطرك يا محمد... (تصفيق) حاضر.
ومتشكرين يا رودينا ومتشكر يا محمد وربنا يديكوا الصحة ويوفقكم ونشوفكوا دايما محققين ودايما قدام، وتدوا المثل الجميل لينا كلنا، شكرا جزيلا (تصفيق)
ألقيت الكلمة في مدينة برج العرب بمحافظة الإسكندرية، بحضور رئيس مجلس الوزاراء مصطفى مدبولي، ورئيس البرلمان علي عبد العال، ووزير التعليم العالي والبحث العلمي الدكتور خالد عبد الغفار، والدكتور طارق شوقي وزير التربية والتعليم، والدكتور عمرو طلعت وزير الاتصالات وتكنولوجيا المعلومات.