نص كلمة السيسي خلال افتتاح عدد من المشروعات القومية في الإسكندرية 29/8/2020

 

معلش يا دكتور مصطفى، اسمحلي إن أنا أقاطعك هنا. النقطة دي مهمة قوي، لأن الدكتور مصطفى اتكلم على حاجتين إحنا بنعاني منهم ومن مشكلة كبيرة جدًا جدًا، مشكلة التعدي والبناء غير المخطط.

أنا بس عايز أشاور لنقطة هنا والدكتور مصطفى ووزير الإسكان حتى ممكن يصلحلي الكلام... الكلام اللي بيتقال هنا 2014، 12% من حجم المباني اللي كانت موجودة في 2014، الكلام اللي إحنا كاتبينه هنا 37.5% 2020 من حجم المباني اللي موجودة 2020، اللي هي ممكن تكون زادت عما كنا عليه في 2014 مش أقل من 10-15% وممكن الدكتور مصطفى يصلحلي الكلام ده.

أنا بقول الكلام ده ليه؟ لأن الكلام اللي إحنا فيه ده، ده محل نقاش كتير وجدل كبير دلوقتي، والمواطنين كتير منهم متألم متضايق من موضوع، موضوع ال، إجراءات الدولة لضبط هذا الموضوع، مخالفات البناء، سواء كان البناء على الأراضي الزراعية، أو البناء على، بدون ترخيص.

والحقيقة، ماحدش بيتكلم في الموضوع ده كويس، بيبقى، مالهمش دعوة بيه، عشان ماحدش يزعل، وأنا مش طبيعتي كده معاكوا يا مصريين، أنا مش طبيعتي كدة، إحنا قدامنا تحدي، بروح مطلعه قدامكوا كده وبقولكوا، التحدي ده خطير علينا، واستمرارنا عليه، يدمر الدولة المصرية.

إنتوا كنتوا بتتكلموا ودايما متألمين وخايفين، موضوع سد النهضة والمية وكلام من هذا القبيل، صدقوني، صدقوني، هذا الأمر، موضوع التعدي على الأراضي الزراعية، والبناء غير المخطط، خطير خطير جدا، مش عايز أقول بنفس النسبة، بس الناس مش، مش شايفاه غير، يعني اللي واضح لينا موضوع المية، لكن اللي مش واضح لينا إن إحنا إن استمرينا بالشكل ده، اللي هو التعدي على الأراضي الزراعية، والبناء فوق منها، وأنا كنت هاأجل كلامي للآخر بصراحة في النقطة دي، لكن أنا حبيت إن أنا أجيبها في الفرصة اللي ذكرها الدكتور مصطفى لما قال إن إحنا ال 99% من سكان الريف أو سكان مصر، خلاص وصلهم المية، مية شرب نقية، بس اللي مأخر ده هو التوابع، وأنا بقولكوا، لو استمرينا في الطريقة ديت عمرنا ما هانوصل 100%، ليه؟ حد كده يقدر عدد التوابع قد إيه؟

رئيس الوزراء: 32 ألف يا فندم.

السيسي: الأرقام اللي إحنا بنتكلم فيها دي يعني إيه، ده غير القرى، كل خمس أو عشر بيوت مع بعض، بقم لوحدهم كده، وأنا بقول الكلام ده في منتهى منتهى الأهمية، الأرض الزراعية اللي إنتوا بتدمروها دي، هي اللي إنتوا بتسكنوا جنبها دلوقتي، ولما هاتسكنوا جنبها دلوقتي هاتشتغلوا فين؟ هاتشتغلوا فين؟ يعني النهاردة الأسر اللي بتتبني، وبتبني لأولادها، وتجيبهم جنبها، بعد كده هاتشتغلوا.. والكلام ده أنا قلته من 5 سنين، قلت الموضوع ده تحديدا من 5 سنين، انتبهوا من التعدي على الأراضي الزراعية.

أنا عايز أقولكوا، أنا ببقى شايف مش بس على الأرض كدة، لا في تقارير بتجيلي أكتر من كدة، وكمان المشاهدة الشخصية ليا، الناس بتحط على الأرض قيراط ولا قيراطين ويروح بس مصوره كدة، وخلاص، قال أنا امتلكت، بقت عندي أرض مباني، الأرض المباني الاستثمارات اللي فيها والله الأراضي الزراعية بالري الحديث، بالري الحديث، وبالزراعة الحديثة، يجيبلك عائد أكتر من كدة، وده دور وزارة الزراعة ودور الدولة إنها توضح للناس الكلام ده وتعمل برامج تطمن الناس على إن إحنا ممكن يبقى عندنا مكاسب أكتر كتير من إن أنا أبني على بيت أو أوسع في البيت ده.

طب المدن الجديدة اللي إحنا عملناها دي، عملناها عشان نقول للناس، بدل ما تبني على الأراضي الزراعية، في ظهير صحراوي إحنا بنبني فيه مدن، مافيش بنعمل مدن تانية في حتت تانية عشان ثقافة إن ولادنا يبقوا معانا، من فضلكم دي هاتدمر، هاتدمر كثير من قدراتنا.

تاني بقولكم، إن إحنا الكلام اللي بيتقال يمكن ده بعيد خالص عن الدكتور مصطفى بيقوله، لا، إحنا موضوع الأراضي الزراعية والاعتداء عليها، ومخالفات البناء اللي بنتكلم عليها، عشان بس الناس اللي زعلانة، هو في حد بيبقى ماشي بعربيته، ويعمل مخالفة ونقوله ادفع المخالفة بتاعتك، يبقى مبسوط؟ لا طبعا، بيبقى زعلان. فأي حد هانقوله مخافلة البنى بتاعتك، سواء كان الكلام ده هايتم بالتصالح أو بالإزالة مش هايبقى راضي يعني، بس إحنا ماخدناش إجراءات حادة من غير إنذار، لا، إحنا قايلين الكلام ده من 3 سنين، وإدينا مهلة لنفسنا 6 شهور، وقلنا التصالح وكلام من هذا القبيل.

حجم الناتج، أنا بقولكوا كلكوا، لكل الناس اللي متابعين معانا، حجم الناتج اللي اتعمل، المصالحة في خلال المدة دي كلها، بعد ما إحنا كنا محددين 6 شهور ونخلص من المسألة، عشان نبتدي الدولة تنظم البناء المخطط والمرخص... 10% أو أقل... وال10% دول، حصل تعدي يتجاوزهم، يعني إحنا هانبقى، يعني في دايرة مفرغة، في دايرة مفرغة.

أنا حبيت أقول ده في بداية الكلام، وبقول للإعلام وبقول للمفكرين وبقول للمثقفين، وبقول لمن يهمهم أمن واستقرار مصر، الموضوع ده مش مسؤولية الحكومة بس، ولا مسؤولية الرئيس بس، دي مسؤوليتنا كلنا في إن إحنا نحافظ على بلدنا، اللي إحنا فيه ده صدقوني، مش لمصلحتنا، ولا لمصلحة الأجيال القادمة، موضوع التجاوز في البناء، سواء على أراضي الدولة، أو على الأراضي الزراعية.

وخلونا، إحنا أعطينا نفسنا مهلة 6 شهور، أرجو إن إحنا الدكتور مصطفى من فضلك، مع السادة المحافظين، الكلام اللي إحنا بنقول عليه، وقلنا نتحرك بسرعة مع المواطنين عشان ننهي هذا الملف، وعشان ننظمه، ننظمه في الدولة، ومايبقاش في بعد كده هذا الحجم الكبير من التجاوز... إحنا بنتكلم في 700-800 ألف؟

رئيس الوزراء: أكتر من 700 ألف لغاية دلوقتي يا فندم.

السيسي: 700 ألف مخالفة، ده رقم، يعني إيه؟ يعني تقريبًا لو قلنا كل مخالفة بأسرة، يعني بنتكلم في ملايين يعني من اللي بيتأثروا بالمخالفة ديت، بيتأثروا هم لأن بيتعمل معاهم إجراء قانوني، وفي نفس الوقت، تأثير ده على الدولة.

تاني بقول الكلمة اللي أنا، الموضوع اللي انا بتكلم فيه ده شائك جدًا، وأي حد تاني بردو تاني بقولها، يقولك ماتدخلش في الكلام ده وسيب الإعلام يتكلم فيه.. لا لا لا.. أنا هاتكلم في كل حاجة تمس مصر ومستقبلها، هاتكلم في كل مصلحة حقيقية للدولة، ولن أبيع أبدًا الوهم للناس تحت اعتبارات السياسة وال، والحفاظ على الشعبية والله.

الموضوع اللي انا بتكلم فيه ده شائك جدًا، وأي حد تاني بردو تاني بقولها، يقولك ماتدخلش في الكلام ده وسيب الإعلام يتكلم فيه.. لا لا لا.

إحنا عملنا كده في الاقتصاد وربنا وفقنا، وكان هو ده الرصيد اللي إحنا عدينا بيه أزمة كبيرة جدا الدنيا كلها بتعاني منها، وبالتالي كل عمل صالح حتى لو كانت الناس مش هاتبقى راضية عنه، لكن هانعمله لأجل خاطر بلدنا، وقبل ده، لأجل خاطر ربنا سبحانه وتعالى، أنا هاعمله، طب إنتوا هاتتألموا مني، طب أنا أعمل إيه؟ إنتوا مش عايزين تساعدوني ليه؟ أنا بتكلم على كل المصريين، كل الناس مش عايزة تساعد في النقطة أو في الموضوعات اللي إحنا بنطرحها ليه؟ ليه مش عايزين تساعدونا؟ ليه مصرين على مواقفكم؟ إنتوا بتحلموا ببلد كويسة ومتنظمة ومترتبة وزي الفل، ولا كل واحد عايز يعمل اللي هو عايزه؟

أنا بقول مرة تانية، الكلام اللي بيقولوا الدكتور مصطفى ده ال 37.5% دول،  لو كنا إحنا في 2014 مخططين، كان ممكن على نفس العدد اللي موجود ده مازادش، أو طبقا للتخطيط اللي إحنا عملناه، أنا ممكن أقولكوا كان أكتر من، كنا وصلنا ل 50%، فإنتوا انتبهوا للكلام، ده أنا بكلم نفسي وبكلم وسائل الإعلام في مصر، إحنا مابنتصدرش للموضوع، إحنا بنتكلم بنجيب مبنى بيتزال في التلفزيون، إنه إزالة مخالفات البناء، لا يا جماعة، حد يتكلم بشكل أعمق من كدة، حد يتكلم بشكل أكبر من كدة، حد يبين مدى التأثير الخطير على مصر نتيجة هذا التجاوز، لكن مش إن إحنا بنهد مبنى يعني، وتبقى الناس تقولك يعني كده حرام، آه طبعا لما حد يشوف كده يقولك: هو ده اللي إحنا بس بنعمله عشان... لأ، ما إنت خاطب عقل الناس، الناس من حقها تفهم إن ده خطر كبير جدا جدا على أمنها ومستقبلها ومستقبل أولادها وأحفادها... شكرا.

...

ألقيت الكلمة في محافظة الإسكندرية، بحضور الدكتور مصطفى مدبولي رئيس مجلس الوزراء، ووزير الإسكان الدكتور عاصم الجزار، وعدد من الوزراء وكبار رجال الدولة

...

خدمة الخطابات الكاملة للسيسي تجدونها في هذا الرابط