نص كلمة ومداخلات السيسي أثناء افتتاح نفق الشهيد أحمد حمدي 2 بالسويس 22/4/2020
مداخلة 1: اسمحيلي أقاطعك ثانية بس.. من فضلكم الفتيات اللي واقفين دول ماتقفوش كدة، تعالوا لو سمحتوا، تعالوا لو سمحتوا.. لما نيجي نفتتح.. لكن ماتقفوش كدة... الفتيات لو سمحتوا تعالوا كدة... اتفضلي.
مداخلة 2: استنى يا إيهاب، استنى... مدير شركة الكونكورد وبتروجيت موجودين؟ موجودين، طيب.. إنت بتقول 1.4 مش كدة؟ أنا بس هافكركم لما خلصنا الأنفاق بتاعة بورسعيد، والإسماعيلية، قلتوا إن إحنا عايزين نشغل الناس، مش كدة يا إيهاب؟ كويس، يا كامل، مش كدة؟ آه.
فقلنا يا جماعة إذا كنتوا عايزين إحنا مش مخططين في المنظور اللي إحنا فيه ده إن إحنا نشتغل في نفق الشهيد أحمد حمدي، لغاية لما نقدر ندبر مانضغطش على نفسينا، وأنا قلتلكوا ساعتها إلا إذا، يا إيهاب، كان الكيلو برقم غير اللي إنت بتقول عليه ده خالص.
فإحنا إذا كان كلامنا زي ما اتفقنا، هايبقى كلام جميل، طيب، آه، خلاص، يبقى زي ما اتفقنا. دي واحد.
نمرة اتنين أنا بردو في مقابل ده في عندنا مشروع اللي هم الأنفاق بتاعة أسفل مطار القاهرة يا كامل، مش اتنين كيلو؟ بنفس المكنة دي، طيب، أنا بقول لو حاتاخدوا بالرقم اللي أنا قلت عليه من الأول في، عشان ناخد المشروع ده، هاديكوا الاتنين كيلو دول، ماشي يا كامل؟
كامل: ده يبقى يا فندم سعر سيادتك يعني...
السيسي: دلوقتي بقى يا كامل سعر؟
(يضحك الرئيس وكامل الوزير)
لا لا، خلونا نتكلم كلام مناسب وأنا هانـ، معلش يا إيهاب أنا قاطعتك، شوفوا، إحنا لما جينا نعمل الأنفاق ديت، الفكرة دي من 3-4 سنين، كان حلم إن إحنا نعمل الكلام ده بإيد مصرية ومكن مصري، وبتكلفة كمان مرشدة كتير عن ال، يعني لو استخدمنا شركات أخرى من خارج مصر يعني، وبالتالي بقى في النهاردة 6 شركات شغالين ولا 4. 4 شركات شغالين في الموضوع دوت بالإضافة للمقاولين العرب وأوراسكوم، مش كده؟
طيب، فأنا ساعة لما، أنا بقول الكلام ده دلوقتي واحنا بنتكلم فيه واحنا بنفتتح الكلام ده، ساعة لما قلنا الكلام ده كان بعيد علينا، كان بعيد علينا، وكان حلم "ياه معقول؟ هانجيب نشتري مكن من برة" لما قالولي يعني، قلتلهم نجيب المكن.. "ده خطر والتيار اللي مش عارف ايه" الكلام اللي بيتقال يعني، اللي هم المحاذير بتاعة ال، فنيات المشروع.. قلنا نعمله، حتى لو إن إحنا استعنا بخبرات أجنبية، بس نعمله إحنا.
بقول الكلام ده دلوقتي ليه؟ بقول الكلام ده النهاردة وإحنا بصدد فعلا خلصنا 5 أنفاق، كان كل يوم أثناء أنفاق بورسعيد والإسماعيلية كل يوم أسأل كامل عليهم وآخد تمام، في النفق ده كنت كل أسبوع ولا عشر أيام أسأل إيهاب عليهم، ده نتيجة إيه، الاطمئنان إن إحنا اكتسبنا الخبرة، وده أمر، يعني، مايقدرش كتير.
خلاصة الكلام، إن لما يكون عندنا موضوع وباين عليه صعب، وصعب تحقيقه، أبدا، ندخل فيه بفضل الله سبحان الله وتعالى بالعلم وبالإرادة وبالإخلاص، ولازم ربنا هايساعدنا وهاننجح فيه، فأنا بس بقول الكلمتين، الرقم اللي إحنا اتفقنا عليه يا إيهاب، هو اللي إحنا متفقين عليه... شكرًا.
مداخلة 3: استنى يا إيهاب، إنت متأخر ليه في شرق القاهرة؟ الكباري بتاعة شرق القاهرة والطرق والمحاور اللي بتتعمل، إيه اللي مأخرك، بصراحة، إحنا عالهوا دلوقتي، ليه؟
رئيس الهيئة الهندسية: طب يا فندم أنا هاستأذن سيادتك إحنا أول ما عرضنا على سيادتك التخطيط العام لمنطقة شرق القاهرة، إحنا كنا بنسعى إن إحنا ننفذ الكوبري الواحد في 3 شهور، وربنا قدرنا في الـ 6 كباري الأولانيين ونفذناهم في 3 شهور للكوبري، ولكن طموحاتنا عالية، وإحنا كظباط في القوات المسلحة ومهندسين بنسعى دايما إن إحنا نطور نفسنا، إحنا فضل من عند ربنا يا فندم إحنا بنفذ الكوبري دلوقتي في زمن قياسي، بنفذه في شهرين، وأنا أعقتد إن ده ممكن يدخلنا موسوعة جينيس يعني لو قدمنا فيها.
اللي بيحصل ده يا فندم أنا مش عشان أنا رئيس الهيئة الهندسية، ولا أنا بقود مجموعة محترمة...
السيسي: يا كامل... (يضحك) طيب...
رئيس الهيئة الهندسية: هو الظروف غير الظروف يا فندم.
السيسي: (يضحك)
كامل: لا يا فندم دول سيادتك ولادي وأنا اللي معلمهم.
السيسي: طيب.. قول يا إيهاب، إحنا عملنا كام كوبري؟
مداخلة 4: أنا كنت عايزك بس يا إيهاب تذكر لل، يعني، للحضور وال، وحتى للمصريين اللي بيسمعونا، إنت اتكلمت على تقريبا 40 كوبري في منطقة شرق القاهرة، تقريبا يعني، وعايز أقول أنت ذكرت بردو اللي بيتعمل في غرب القاهرة وحتى اللي في وسط القاهرة اللي إحنا الحتة الخاصة بمنطقة عين الصيرة ومجرى العيون مش كدة؟ والمتحف ال...
أنا بس عايز أٌقول للمصريين إيه، إنتوا عارفين 40 كوبري يعني كام؟ كلمة كام دي لازم دايما تبقى حاضرة وأنا قلنا الكلام ده قبل كدة، لو انت قلت متوسط سعر الكوبري 400 مليون، 300 مليون، لو 300 مليون، 12 مليار، لو 400 مليون، 16 مليار، إحنا مش بنعمل كوبري بس، إحنا بنعمل كوبري ومحور، مش كدة؟ فيعني بناخد طرق وبنغير إذا كان لقينا فرصة إن إحنا نغير مواسير المية بمواسير مية صحية بنروح عاملين الكلام ده، مش كدة يا إيهاب؟
آه، أنا بس عايز أقول لينا كلنا، إحنا، يعني، بفضل الله سبحانه وتعالى، ماشيين بمعدلات يعني والله، فيها كتير كتير من كرم ربنا سبحانه وتعالى لينا، إن إحنا نعمل الكلام دوت في، بفلوس، وأموال هائلة، هائلة.
وبالمناسبة ديت، إحنا للعمالة، عشان أنا جاتلي شكوى إن العمالة مش موجودة.. أنا بقول يعني رسالتي للعمالة، إحنا حرصنا على إن إحنا نوفر في كل مواقع العمل المختلفة التأمين اللازم، وهانأمن أكتر، بالتنسيق مع وزارة الصحة، والشركات، ووزارة الدفاع، محمد، عشان نقدر نكمل، أي حد عايز يشتغل، من فضلك اطلع عالعاصمة، اطلع على رشيد، اطلع على المنصورة الجديدة، اطلع على العلمين، في شغل، مش كدة يا إيهاب؟ عشان نرجع على معدلات الأرقام اللي إحنا بنتكلم فيها.
لو حطينا بقى معاهم اللي إحنا، المشروع الكبير يا دكتور مصطفى بتاع تبطين الترع، إحنا بنتكم بقى في عدد كبير جدا جدا داخل أحزمة ونطاقات القرى والريف يعني والمحافظات، وإحنا يعني الكلام اللي إحنا قلناه ده، يادوبك بس هانجهز الدراسات بتاعته وننطلق في خلال أسابيع قليلة، عشان المشروع ده نقدر نعمله في خلال السنتين زي ماوعدنا.
أنا اللي أنا عايز اقوله هنا بس ليكم في مصر وإنتوا بتسمعونا.. الحكومة بتشتغل والله ليل ونهار عشان معدلات النمو اللي إحنا كنا بنحلم بيها، واللي اتأثرت كثيرا بالظروف اللي إحنا فيها ديت، إحنا مصرين على إن إحنا نشتغل بنفس المعدلات ويمكن زيادة. بس نتوا لازم تبقوا معانا، وتساعدوا معانا في الأمر ده.
وأنا بقول الكلام ده لأن يعين جاتلي شكوى في الكوبري بتاع العروبة يا إيهاب، فقالولي يعني إيه، خلي الناس تبطل شغل بالليل، قالولي خلي الناس تـ إيه؟ (يبتسم) أنا بتكلم جد والله، قلتلهم والله العظيم الدق في دماغي ال24 ساعة بس أنا مش هابطل، الكوبري ده (يضحك) المقاولين، المهندس محسن قالك طب هو بيقولي اعمل بسرعة، طب أنا هاخليه يتبسط يعني.
(يضحك)
على كل حال، ساعدونا بإن إحنا لما نقول مافيش بناء من غير ترخيص، ومانتجاوزش، نحافظ على كدة.. بالمناسبة، الرخصة، ده عقد بين صاحب العقار اللي بيبني، وبين الدولة. عقد يعني إيه؟ يعني التزام، إنت بتقولي أنا هابني 4 أدوار، تبنيهم 10 ليه؟ بتقولي أنا هابني 4 أدوار، وتحت منهم جراج، تلغي الجراج ليه؟ ده عقد. لازم تنفذ بنود العقد، عشان أولا يعني عشان مصلحتنا عشان الكلام اللي إحنا بنتكلم فيه ده، إحنا كل ده كنا بنحاول نحل مسائل في العاصمة القديمة، عشان مايتقالش إن الدولة هاتروح العاصمة الجديدة وتسيب الناس في مصر أو في القاهرة، وبردو الإسكندرية الجديدة، وتسيب الناس في إسكندرية.. لاااا، لا.. كل الناس في مصر دول في رقبتنا، نعمل في كل حتة اللي ربنا يقدرنا عليه.
قبل ما أنسى... إنت عندك حاجة تاني يا إيهاب؟
شكرا يا إيهاب، أنا اسمحولي أوجه التحية لكل العاملين، سواء كانوا في اللي اشتغلوا معانا، وكان السيد محافظ السويس كلمني على إن إحنا نعمل مشروع للصرف الزراعي لعدد ال، للأفدنة الموجودة في منطقة السويس، ونعمل بردو بيارة ونعمل محطة معالجة شرق، زي اللي إحنا عملناها في المحسمة، وإحنا هاندرس هذا الموضوع، والدكتور مصطفى قالي يعني إحنا ممكن لو فعلا في جدوى ليه هانعمله، وأنا بأكد لأهل السويس وللمحافظ إن إحنا هانعمل كدة.
فأنا بقول تحية وتقدير لكل العاملين في هيئة قناة السويس، العاملين في المحسمة، وأيضا العاملين في شركة بتروجيت وكونكورد على الجهد الحقيقة إن إحنا نخلص النفق، والنهاردة نفتتح أو تخرج المكنة من شرق القنال، ده إنجاز الحقيقة يعني مقدر، وأمر يسعدنا إن إحنا المصريين قدرنا نعمل كدة.
قبل ما أختم كلمتي بس عشان ما أعطلكمش أكتر من كدة، إحنا، يعني كان جالنا، مش جالنا، إحنا كنا منتبهين، ويمكن قعدنا مع الحكومة مع دولة الرئيس، ومع وزيرة الهجرة والخارجية، والداخلية، والصحة، والدفاع، والمعنيين بالموضوع على العالقين، واتعملت خطة ل، يعني، إن إحنا نجيبهم في بلدهم مصر.
إحنا ملتزمين، ملتزمين دولة الرئيس على إن إحنا، كل العالقين، اللي عددهم تقريبا 3500 أو يزيد شوية، موجودين في دول كثيرة جدا جدا، في دول العدد فيها مايتعدش على أصابع الإيد الواحدة، لكن إحنا ملتزمين إن إحنا إن شاء الله، يعني نرجعهم لمصر في أقرب فرصة.
وأيضا التعامل مع بعض المواقف الإنسانية في بعض الدول مع أشقاءنا، أيضا إحنا حريصين على إن إحنا نعمل ده بس ساعدونا إنتوا عارفين إن إحنا اللي هاييجي هانعمله هايبقى في منطقة عزل، ولازم يبقى ليه إقامة جيدة وإعاشة جيدة، وإحنا بنشتغل في خطة لتنفيذ ده.
أنا بطمن كل المصريين اللي بيسمعوني، إحنا حتى لو كانت ظروفنا صعبة، مش هانسيبكوا، حتى لو كانت ظروفنا صعبة، مش هانسيبكوا.. شكرا جزيلا.
(تصفيق)
ألقيت الكلمة في محافظة السويس، بحضور الدكتور مصطفى مدبولي رئيس مجلس الوزراء، وعدد من الوزراء وكبار رجال الدولة والقوات المسلحة.