نص كلمة السيسي خلال مؤتمر القاهرة الدولي للاتصالات وتكنولوجيا المعلومات 1/12/2019
أنا هاستأذنك دقيقة واحدة بس عشان، مافيش.. (كلمة غير واضحة) بسم الله الرحمن الرحيم، اسمحولي إن أنا أرحب بالحضور جميعا، أهلا وسهلا.. أهلا وسهلا بيكم، وكل مؤتمر وكل معرض بنلتقي فيه، بنتقدم خطوة وخطوات الحقيقة بيكم وبدعمكم وبجهدكم.
والحقيقة زي ما قال الأستاذ أسامة والدكتور عمرو، إن إحنا في مصر فرص الرقمنة والعمل في هذا المجال، هي فرصة عظيمة جدًا، وده أمر إحنا مصرين على إن إحنا نتحرك فيه باندفاع شديد جدًا، لأن هو ده الحاضر والمستقبل اللي إحنا بنتمنى إن إحنا نمشي فيه يعني.
فأنا بتمنى لكم التوفيق، وبقول إن مصر فيها فرصة، فرصة كبيرة جدًا جدًا، مصر سوق كبير، كبير، إحنا بنتكلم في 100 مليون إنسان، بينمو وبيزداد، وبعدين إحنا متحركين في هذا المجال كدولة.
يعني زي ماقلت بقوة كبيرة قوي، لأن إحنا في استراتيجيتنا وفي حركتنا في هذا المجال إن هو ده اللي هايحقق لينا كل العناصر النجاح اللي إحنا بنتمناها للدولة المصرية. لو بنعمل حوكمة، لو بنكافح فساد، لو بنقلل التدخل البشري في شغل الحكومة وفي إجراءاتها، كل الكلام ده هايتم أو بيتم دايمًا بإن إحنا، بالرقمنة اللي إحنا شغالين فيها.
أنا هاخد من كلام رئيس الاتحاد البريد العالمي على المنصة التجارة، وبقول، لسة كنت بقول للدكتور عمرو، إحنا ندرس هذا الموضوع، وبالتعاون مع القطاع الخاص، ومع الدولة، إحنا مستعدين نطلق هذه المنصة، ودعمي لكم بإن إحنا نتحرك فيها، ونبقى يعني زي ما غيرنا اتحرك وساهم في العالم، إحنا مستعدين هنا في مصر نتحرك بالمنصة ديت، نعملها، ونتحرك فيها، ونشوف، ونحقق فيها إن شاء الله النجاح لينا ولأفريقيا بشكل كبير.
النقطة الأخيرة خالص اللي هي المعرض القادم بتاع البريد في مصر، طبعًا إحنا هانبقى سعداء جدًا باستضافته هنا، ودايمًا إحنا سعداء بإن إحنا نساهم، أو نبقى، يعني، منصة معارض للإنسانية، للتقدم، للسلام، للبناء، للتنمية، إحنا حريصين على الدور ده إن إحنا نعمله زي ما إنتوا شايفين، إحنا هنا في مصر بنقدم كل التسهيلات اللي ممكن نقدمها، ومش واقفين في مكانا، لأ، إحنا بنقدم وبنطور نفسينا عشان نحسن من أداءنا في المجالات المختلفة.
مرة تانية أنا برحب بيكم جميعا، بكل الشركات اللي موجودة، بكل المسؤولين اللي موجودين، بكل المهتمين بهذا المجال اللي هو المجال اللي إحنا بنقول عليه مستقبل الإنسانية، إحنا مهتمين بيهم، وأهلا وسهلا، نتمنالكم، يعني، فعاليات ناجحة، وشكرًا جزيلًا، شكرًا، شكرًا جزيلًا، شكرًا. (تصفيق)
ألقيت الكلمة في مركز المنارة للمعارض والمؤتمرات بالقاهرة الجديدة، بحضور لعديد من الوزارات و الهيئات الحكومية وأيضا وزراء و شركات أفريقية،