رئيس وزراء نموذج المحاكاة: خليني أقولك إنه فكرة إن إحنا ناخد قرار بأيدي مرتعشة ماعتقدش إنها بقت موجودة، مابتحصلش. إحنا كلامنا دلوقتي يا فندم، ماشي وفقًا لخطة، وفقًا لرؤية، وفقا لمستهدفات. أنا أكون مرتعش لو أنا مش عارف إيه محدداتي.
مدير الجلسة: طيب أستأذن حضرتك نشوف..
رئيس وزراء نموذج المحاكاة: اسمح لي أنا..
مدير الجلسة: معلش معلش.. نشوف، نشوف بس شكل الكوميكس، ونشوف هل هاترتعشوا ولا لأ يعني. بعد إذنك (يضحك) القرار يعني هايرتعش ولا لأ.. نشوف.. حاجة كدة..
(الكوميكسات تبدأ في الظهور) (يضحك الرئيس)
مديرة الجلسة: معظمها طبعًا عن رفع الدعم عن المحروقات..
(الكوميكس تعيد نفسها)
مدير الجلسة: خلصت؟ لأ أعتقد في تاني، أعتقد في حاجات حلوة تاني يعني.. أستاذ مصطفى، أرجوك كمل معانا يعني.. (تتتابع الكوميكسات) الموضوع كِبِر.. (يضحك الرئيس) صحيح..
رئيس وزراء نموذج المحاكاة: (تعليقًا على كوميك علاء ولي الدين في فيلم الناظر "هو كله رفع رفع، مافيش خفض؟") كان في خفض البطالة..
مدير الجلسة: تحب نكتفي بهذا القدر يا دولة رئيس الوزرا ولا نكمل؟ هه؟ طيب.. لا كان في والله حاجات تانية كنت محضرها لحضرتك (يضحك) طيب.. ممكن نسمع تعقيب، بعد إذن حضرتك يعني، نسمع تعقيب من السيد الرئيس عبد الفتاح السيسي عاللي شوفناه.
السيسي: (يضحك) أنا بشكركوا طبعا، وإحنا ماديناش فرصة كويسة لحكومة المحاكاة إنها تتكلم ويمكن أنا كنت عايز أقول طالما إن إحنا موجودين، وحتى لو كنا محددين توقيت يعني، فندي فرصة للكلام عشان هو الهدف من الموضوع ده إن هو تبقى، هم مجهزين نفسهم بشكل كويس، ودارسين الموقف وكدة.
طرحة ومش طرحه بس لينا إحنا، هو طرحه للمجتمع. أنا يمكن عايز أخلي لو كان في تعليق ممكن نقوله في الآخر بعد ما نسمع الحكومة. وأرجو إن لو الحكومة هاتتكلم يعني تدي فرصة إن الشرح يبقى يصل لكل، لكل الناس يعني، مش لفئة محددة.
أنا هاجي بس على الكلمة اللي إنت قلتها الخاصة بردود الأفعال، والتواصل الاجتماعي، والحقيقة كانت إضافة إن إنتوا تحطوا ال، تحطوا الكلام ده على، بنشوفه دلوقتي مع بعض، وبنضحك كلنا عليه.
هو السؤال كان إنت بتقول يا ترى كانت الحكومة، أي حكومة، إيديها مرتعشة ولا لأ؟ لأ طبعا الحكومة، أي حكومة، لما بتتعامل مع قضايا شديدة الأهمية، بتضع في الاعتبار رد الفعل، وإلا يبقى ده مش، كلام مش، مش، يعني.. لا هو علمي، ولا هو مهني، إن أنا النهاردة هاعمل إجراءات قاسية، الناس هاتجابهها، وأنا أقول لا أنا مـ، ده موضوع مش محل اعتبار. لا طبعًا.
وعشان كدة يمكن إنتوا تجدوا إن إحنا في كل مرة نجد الفرصة للحديث لأهلنا ولناسنا في مصر. ماهو لما بنقول إن البطل الحقيقي اللي هو اللي كاتب الكوميكس ده، واللي معلق وعامل تعليقات قد كدة 100 مرة، اللي هو بيسخر من ال، من الحالة ومن الظروف، ماهو ده يستحمل بردو. هو كاتب كدة وساكت. وكاتب كدة ومستحمل.
فلأ طبعًا الحكومة، أي حكومة، بتقدر رد الفعل، وبتقدره تقدير جيد جدًا، وأحيانًا يكون تقدير رد الفعل أحد أهم أسباب عدم الإصلاح.
...
القيت الكلمة في العاصمة الإدارية الجديدة، بحضور 1500 شاب وشابة من مختلف المحافظات، في إطار جلسة نموذج محاكاة الدولة المصرية، ضمن مؤتمر شباب العالم.
...