إيهاب: أي أوامر يا فندم.
السيسي: بقولك إيه يا إيهاب..
إيهاب: أؤمر يا فندم.
السيسي: أنا بس عايز أسمع الحضور دلوقتي، لو إحنا قلنا نعمل المشروعات دي، اللي أنتوا قلتوا إن هي بتتكلف 165 مليار أو 170، وقلنا نبدأ الكلام ده دلوقتي..
إيهاب: تمام..
السيسي: تكلفنا كام؟
إيهاب: إل إيه يا فندم؟
السيسي: تكلفنا كام؟
إيهاب: لا يا فندم، إحنا هانضرب في 3.
لا صحيح
أيوة يا فندم لأن فرق سعر الجنيه يختلف، يعني سيادتك لما نيجي نقارن بسعر الجنيه النهاردة بالسعر من 3 سنين طبقا للتوقيتات اللي بدأنا فيها، يعني ممكن نوصل ل 400 مليار، مش أقل من 400 مليار.
السيسي: أنا بس بسمع زمايلنا الموجودين وكل الحاضرين معانا ده، ليه إحنا كنا مستعجلين؟ لأن كان في ناس كتير جدًا، حتى في الشركات، كانوا، يعني، شايفين إن استعجالنا مش مبرر يعني.
ليه إحنا عايزين نخلص الأمور دي، ونخلص أكبر حجم من ال، من العمل، خلال الـ4 سنين اللي فاتوا أو قبل كدة. لأن إحنا كنا متصورين ومقدرين كويس، إن ده كل إنجاز هانخلصه، هو توفير في الوقت والجهد، والمال. المال مش بس في تكلفة المشروع، ولكن كمان في العوايد بتاعته، اللي إحنا هانتحصل عليها.
حتى مثال زي اللي إحنا النهاردة بنفتتحه، يعني هو كان المفروض إنه، يعني يتأخر شوية عن كدة، يعني طبقا للخطة يتأخر له شهرين تلاتة. لكن إحنا ضغطنا نفسنا هنا، وقلنا إن إحنا عايزين نحسس الناس في الوقت ده بالاستفادة من المحور الجديد، عشان ده بييسر الحركة، وبييسر على مستخدمي السيارات بأنواعها المختلفة في المنطقة المزدحمة جدًا اللي إحنا عارفينها، شبرا وكدة..
إحنا حلينا مسألة كبيرة قوي بالمحور ده، المحور اللي إحنا بنفتتحه النهاردة، مسألة كبيرة جدًا جدًا في حياة الناس، وفي اقتصاديات الناس. النهاردة اللي كان بيتحرك عشان يخرج من مدينة نصر أو من شبرا في اتجاه - من غير المحور ده، يا ترى كان بياخد وقت قد إيه؟ وبياخد تكلفة قد إيه؟ والنهاردة لما نيجي نتحرك على المحور ده، ناخد وقت قد إيه وناخد تكلفة قد إيه؟
فاللي أنا بس عايز أقوله، إن حجم الأموال اللي أنفقت خلال ال 4 أو 5 سنين اللي فاتوا، بدون مبالغة، لو إحنا كنا انتظرنا، لأي أسباب، إن إحنا نطلق هذه المشروعات خلال، يعني، الفترة التانية اللي إحنا موجودين فيها ديي. أتصور، أتصور، إن قد لا نستطيع أن نطلقها، مش هايبقى معانا نغطي التكلفة المالية للمشروعات دي، وده سؤال ينطبق، أو يعني ممكن يمتد لكل المشروعات اللي إحنا بنتكلم فيها. يعني لو بنتكلم على الإسكان، ينطبق عليه الكلام ده بشكل أو بآخر. كان رقم من 3 أو 4 سنين، ودلوقتي بنتكلم في أرقام تانية خالص.
شكرا يا إيهاب.. شكرًا.
إيهاب: أوامر يا فندم
القيت الكلمة عبر الفيديو كونفرانس على خلفية افتتاح الرئيس لمحور روض الفرج، وكوبري تحيا مصر الملجم، والذي يدخل موسوعة جينيس باعتباره أعرض كوبري في العالم. وذلك بحضور المهندس مصطفى مدبولي، رئيس الوزراء، والفريق أول محمد زكي، القائد العام للقوات المسلحة وزير الدفاع.