بسم الله الرحمن الرحيم،
سعادة السيد بوكيف بوريسوف رئيس وزراء بلغاريا،
السيدات والسادة، الحضور الكريم،
الحقيقة، اسمحوا لي إن أنا أرحب بفخامة رئيس وزراء بلغاريا في مصر، والوفد المرافق ليه، والحقيقة خلوني كمان أقولكم إن خلال المباحثات إللي تمت في مناخ وروح ودية للغاية، عكست حجم التفاهم المشترك، وكان رصيدها كمان العلاقات التاريخية الممتدة لأكتر من 90 سنة بين مصر وبلغاريا.
فـ، أنا يمكن مش هقول، مش هتناول اللقاء من خلال بيان يتقال، ولكن، خليني أقول لكوا إن إحنا اتفقنا مع فخامة رئيس الوزراء على إن إحنا نتعاون فيما بيننا في كافة المجالات المختلفة.
اتكلمنا عن التعليم وأهميته، التعاون فيه، بشكل جيد جدًا. اتكلمنا عن الصحة، وأهمية التعاون فيها بشكل جيد جدًا. في مجالات نقل التكنولوجيا، وفي المجالات الرقمية، والمجالات المختلفة. في الرياضيات اتكلمنا.
أنا بتكلم هنا، كان في تفاهم شديد، واستعداد كبير، وإرادة سياسية من جانبنا إحنا الإتنين.
فـ، كمان تحدثنا عن القضايا ذات الاهتمام المشترك في منطقتنا، وإحنا هنا لازم نشكر بلغاريا على إنها الصوت إللي بيتم آآ صوت مصر، آآ داخل الاتحاد الأوروبي، قد إيه بتقوم بدور إيجابي جدًا في إيصال رسالة عن أهمية مصر وأهمية الاستقرار المنطقة من خلال استقرار مصر.
زي ما إحنا مقدرين في مصر هنا، إن بلغاريا آآ دولة مهمة جدًا في استقرار أوروبا كمان.
فـ، تحدثنا أيضاً عن القضايا المهمة في المنطقة، زي الأزمة الليبية، والأزمة السورية، وأهمية تنسيق المواقف والتعاون فيما بيننا، في هذه القضايا.
تحدثنا أيضًا عن القضية الفلسطينية، وأهمية إيجاد حل لهذه القضية في إطار حل الدولتين على الأراضي التي احتلت في عام 67، وأيضًا عاصمتها القدس الشرقية.
الحقيقة، اتفقنا كمان على إن اللجنة المشتركة تنشأ بين البلدين، ستنعقد خلال فترة قريبة جدًا، بنتكلم على بداية العام القادم، واتفقنا أيضًا على إنها لجنة مشتركة من وزراء الدولتين، لوضع إطار وصياغة سريعة جدًا جدًا، للموضوعات اللي احنا هانتعاون فيها فيم بيننا اللي أنا تحدثت عنها بشكل عام.
ويبقى في خلال النص التاني من العام القادم، تنعقد اللجنة مرة تانية، وبالتالي يبقى هانعمل عقد للجنة مرتين، لجنة مشتركة زي ماقلت كدة، ولكن بعد كدة هاتنعقد دوريا على، في عاصمتي البلدين بالتناوب.
لكن إن شاء الله، إحنا هانلتقي، اللجنة المشتركة هاتعقد في صوفيا في بلغاريا خلال يناير.. فبراير بالكتير.
الحقيقة، المباحثات زي ما قلت كانت في جو أكتر من رائع، وعكست الرؤية العظيمة لفخامة رئيس الوزراء، وقد إيه إن إحنا في بيننا قواسم مشتركة كثيرة جدًا جدًا، وزي ما قلت كدة إحنا تحدثنا في كل شيء، تحدثنا عن الهجرة غير الشرعية، عن الجرائم العابرة للحدود، كل القضايا ديت كان في تفاهم شديد إن إحنا نتحرك ونتعاون فيم بيننا فيها.
أنا مش هطيل عليكم، لكن اسمحوا لي باسمي وباسم كل المصريين إن أنا أتقدم بالتحية والتقدير لفخامة رئيس الوزراء والوفد المرافق ليه، واسمحولي إن أنا أعطي الكلمة لفخامة رئيس الوزراء، أهلًا وسهلًا.
ألقيت الكلمة في قصر الإتحادية بالقاهرة، في مؤتمر استقبال الرئيس السيسي لبويكو بوريسوف، رئيس وزراء بلغاريا.