نص كلمة الرئيس عن التعليم خلال افتتاح عدد من المشروعات التنموية بشبين الكوم 19/9/2018
اسمحلي، إن أنا بس آآ، في بداية ال، يعني، بداية التجربة وبداية المشروع القومي اللي إحنا شغالين فيه ده، الدولة بتحاول تعمل اللي عليها، لكن الموضوع ده نجاحه مرتبط بإن إحنا كمجتمع ويمكن ده اللي قاله الدكتور طارق كذا مرة وإحنا، وهو بيعرض العرض بتاعه، ومش بس المرة دي، في المرات اللي فاتت كلها، حتى في مؤتمر الشباب اللي فات.
المشروع ده والإجراءات اللي احنا بنعملها، إحنا حاولنا ما أمكن إن إحنا ناخد بأسباب العلم والتخطيط والتنظيم والتنفيذ الجيد، عشان فعلًا يعني نعمل إصلاح حقيقي للتعليم في مصر.
لكن، جزء كبير من الموضوع مرتبط بينا إحنا كمجتمع، وأنا قلت الكلام ده المرة اللي فاتت واسمحولي إن أنا بكرره معاكوا تاني، ساعدونا في إن إحنا ننجح ال.. المشروع ده، لأن هو بفضل الله سبحانه وتعالى لو إحنا تمكنا من تنفيذه ما أمكن، ده هاينقل مصر وهاينقل التعليم في مصر إلى آفاق تانية خالص.
الموضوع مش وليد آآ دراسة شهر أو اتنين أو سنة أو اتنين، ولا إيه يا دكتور طارق؟ آه، ده، يعني، جهد كبير جدا بقالنا تقريبا خمس سنين فيه، خمس سنين فيه، وده اللي خرج أو ده المخرجات بتاعت هذا الجهد.
لكن، من غير دعم الناس، و.. وإيمانهم، إيمانهم بالتجربة، وإيمانهم بالمشروع، ومعاونتهم لينا، هايبقى.. هاتبقى المهمة صعبة. الثقة في المشروع، الثقة في البرنامج، إحنا خدنا بكل، زي مابقول كدة، بكل أساليب العلم في التخطيط والتنظيم والتأهيل والإعداد، بشكل غير مسبوق، ومش هانقول إن إحنا بنجرب في ولادنا، لا لا، إنما إحنا عشان ننجح في الموضوع ده، يا ترى السادة المحافظين اللي كانوا موجودين معانا في الافتتاحات ديت، ونواب البرلمان، والأسر اللي موجودة، يا ترى هاتزور المدارس دي؟ يا ترى هاتزورها وتبقى موجودة مع ال، التجربة أو البرنامج عشان آآ نشجع وندعم ونشوف، بدل مانتكلم وإحنا بعيد.
أنا عن نفسي هاروح كتير من المدارس ديت، وهروح مش عشان حاجة، عشان أقعد وسط ولادي الصغيرين أو أحفادي بقى اللي موجودين، وأشوف، وأدردش وآخد وأدي عشان أقول للمعلم اللي إنت، بيتهيألك إن إحنا مش واخدين بالنا منك ولا مش قادرين نجازيك كويس، إحنا على الأقل هانيجي نشكرك يعني، وعلى الأقل هانيجي نقعد معاك، وهانيجي نشجعك وندعمك.
فأرجو إن الكلام ده مش على قد السادة المحافظين، والأسر اللي ممكن، إحنا بنتكلم في حجم من المدارس مش ضخم قوي، حتى لو قلنا كل المدارس اللي موجودة في مصر، كل المدارس اللي موجودة في مصر. والكلام ده أنا قلته مرة قبل كدة، من فضلكم آآ اشتبكوا، تواصلوا مع العملية اللي بتتعمل ديت عشان تاخد قوة دفع كويسة من مجتمعنا، وأصبر شوية ماتنتقدش، عشان ماتديش انطباع مش جيد، مش بقول لا ، لأ انزل وخش وشوف، واقعد واسمع مرة واتنين وتلاتة وأربعة، عشان ندي قوي الدفع اللازمة لإنجاح المشروع، كلنا، الوزرا اللي موجودين، كلنا، المحافظين اللي موجودين، كلنا لو الدكتور علي وافقلي كدة السادة النواب، وكل من يتمنى أن يرى تعليمًا حقيقيًا ينقل مصر، إحنا كلنا بنشتكي ونقول إحنا ليه موقفنا، يعني، ليه إحنا متأخرين كدة؟ طب ليه إحنا خضنا التجربة؟ عشان نغير حالنا.
تعالوا نحط إيدينا في إيدين بعض، شوف أنا بقول إيه؟ في إيدينا في بعض عشان اللي إحنا بنعمله ده يخرج بالشكل اللي إحنا بنتمناه فيه.
أنا بشكر طبعا كل رجال الأعمال وعلى رأسهم الحاج محمود العربي في التعليم الفني، تجربة أو جهد رائع جدًا جدًا هم بيعملوه، وإحنا معاهم فيه وبنشكرهم عليه، لأن هو فعلا بالطريقة ديت إحنا هانقدر نقدم آآ يعني تعليم فني بالتجربة، يعني هو هايبقى موجود وموجود جنب المصانع، فهيبقى يعني، والاختيار بالطريقة اللي انتم قلتوها ديت بصراحة، يعني آآ رائع جدًا جدًا، عشان نطلع نماذج تبقى النماذج دي تبقى قدوة للآخرين، في هذا الموضوع.
فأنا بـ، اسمحولي إن أنا من خلالكم ومن خلال الجلسة دي إن إحنا آآ نحيي الحاج محمود العربي، والمهندس إبراهيم (تصفيق) وكل رجال الأعمال اللي هم داخلين في الموضوع دوت، وحتى الكلام اللي الدكتور طارق قاله على إن المدارس الدولية هاتبقى في مشاركة مجتمعية بشكل أو بآخر. تعالوا نحط إيدينا في إيدين بعض كلنا، عشان نقدر نغير الواقع اللي إحنا موجودين فيه.
الدكتور طارق اتكلم عن التابلت وقال إن ده تكلفته المالية كبيرة، ودع صحيح، إحنا بقينا، يعني، فوق الألف مش كدة؟ فوق الألف جنيه مش كدة؟
الدكتور طارق: (يبتسم) بكتير..
السيسي: ما أنا بس عشان زمايلنا، أو الشعب المصري يسمع ده، وبالمناسبة، هو مش هاينفع غير (يضحك) التالبت ده مش هاينفع غير للباقة بس، يعني هو متصمم للعملية التعليمية اللي إحنا بنعملها، مش كدة يا دكتور؟ عشان بس نقلوهم إن ماحدش إيه، هو مش هايستخدم غير كدة، وماينفعش غير كدة، وماحدش يقدر يدخل عليه غير كدة، اللي هي العملية التعليمة اللي إحنا آآ بنتكلم فيها ديت آآ..
فبردو أرجو إن إحنا، وقلنا في يعني إن إحنا نجيبه بمستوى معين، وقدرة تحمل معينة، بس أنا بقول عشان ده رقم كبير قوي مصر دفعته لأجل خاطر أبناءها، ولسة هاتكمل في المراحل اللي بعد كدة.
أنا بشكرك يا دكتور طارق، وبشكر وزارة التربية والتعليم، وكل اللي خاضوا معاك الجهد الكبير قوي ده خلال الفترة اللي فاتت، وبقولهم يمكن إحنا مش قادرين نقدركم حق التقدير المطلوب، لكن أكيد المجتمع في مصر وقبل ده كله ربنا سبحانه وتعالى هايقدر كل اللي إنتوا بتعملوه.
أنا بقول الكلام ده مش بس حتى للقائمين على العملية التعليمية في مصر، كل إنسان في مصر بيشتغل بإخلاص وأمانة، ولا يعني، يعني يشعر بإن هو بيقدر ويقيم التقييم المناسب، لازم تعرف إنك إنت بتقدم لمصر حاجة كبيرة قوي، حاجة كبيـ، التعليم ده لو إحنا بفضل الله سبحانه وتعالى نجحنا فيه، إحنا هاننقل بلدنا لمستوى تاني خالص، حاجة تانية خالص، فمن فضلكم يعني شوف أنا بكررها كام مرة، بكررها 100 مرة والله، من فضلكم، يعني ساعدونا.
فيه في الأكاديمية الوطنية يا دكتور طارق اختبار، اختبار لمدة 8 ساعات، لمدة 8 ساعات، إحنا بندخل فيه كل دلوقتي، حتى طلبة الكليات العسكرية مش كدة يا دكتور، اه، حتى طلبة الكليات العسكرية، حتى أعضاء النيابة الجداد، الاختبار ده بقى، اختبار يعني حتمي، فأرجوا إن إنتم تفكروا إن المعلمين اللي انتم عايزين تكملوا وتخلوهم يخشوا هذا الاختبار، هو الاختبار ب100 جنيه يا دكتور طارق، فانت تدفعهم بقى عشان إيه، أو معرفش الأكاديمية هي، ب100 جنيه صحيح، لأنه حاجة عالية جدا، وبتتعرف على حاجات كتير جدا في، وإحنا عايزين دايما نبقى شايفين بعضنا كويس قوي، ومتأكدين من بعضنا كويس قوي.
فمرة تانية أنا بشكرك، وبشكر القائمين عالمشروع، وبشكر المعلمين اللي هم هايساعدونا آآ في هذا ال، في البرنامج اللي هو الطموح جدا جدا، واللي كل الدنيا، أنا بقولكوا كلام حقيقي، كل الدنيا في العالم اللي هي تابعت معانا ومعنية بالعملية التعليمية في العالم كله، بتبص عالتجربة المصرية في حاجتين، في الموضوع ده، وفي العملية الصحية اللي إحنا شغالين فيها، وداعمين لينا بشكل كبير جدا جدا، فإحنا كمان هانكمل ده وهانـ..
أنا بشكرك، و.. بالتوفيق إن شاء الله، ولازم هانروح المدارس ديت، أنابـ، يعني، بوعد كل أبنائي أو أحفادي الطلبة، والمدرسين القائمين، هتلاقوني معاكم الساعة 6 ولا 5..
قبل ما أنسى، يا كامل حطوا اللوحات، مش، مش، مش آآ لا لا لا لا، حط لوحة ماتتقطعش الطالب بعد شهر يلاقي عوامل التعرية اتعملت، اللوحة تقدم وتقع كدة وبتاع، لا لا، لوحة مظبوطة تتحط ماتتغيرش تاني، دي واحدة.
أنا شايف إن إنتوا عاملين للمدارس اليابانية كلها لاند اسكيب كويس وكل حاجة، والمدارس التانية رمل وكدة..
كامل: المدارس اليابانية ليها بس..
السيسي: لا لا لا لا.
كامل: مخصصات مالية يعني..
السيسي: (يضحك) انت عملت إيه في الطرق؟
كامل: الطرق يا فندم، ال آآ، اللي افتتحت يوم 9/9 اللي سيادتك شرفتها بالافتتاح، كان سيادتك ليك فيها تلت توجهات، الحقيقة يا فندم منهم 2 توجيه اقتحمناهم فورًا، و واحد يعني هايطول معانا شوية لكن جاري إن شاء الله هانتعامل معاه. أول حاجة يا فندم كانت محور تعمير..
السيسي: اتفضل يا دكتور طارق اتفضل اتفضل.
كامل: محور كوبري التعليم في اسكندرية كان فعلا سيادتك ليك حق كان في خطأ تصميمي موجود.
السيسي: اللي انا شوفته يا طارق، ده اللي انا شوفته يا كامل، معرفش الباقي فيه إيه.
كامل: لا يا فندم هو بصراحة هم دول الاتنين اللي كانوا موجودين. الخطأ التصميمي يا فندم ده على طول وانا واحنا بنتكلم هنا مع سيادتك بمجرد سيادتك ما وجهت، زمايلي على طول اتحركوا وتابعتهم بالتليفون على طول، شيلنا يا فندم لوجيستي ووسعنا للطريق عشان يبقى في دخول مريح مابين الكوبري اللي نفذناه الهيئة الهندسية نفذته بكوبري، اللي نفذته هيئة الطرق والكباري وانتهى يا فندم على طول خلال 48 ساعة واتحلت المشكلة تماما وعلى طول ال، يعني الأخبار كانوا متابعنا ووكالات الأنباء كانوا متابعنا كلهم وطلعوه حتى على طول يوم السبت بعدها في جريدة أخبار اليوم، ومعظم القنوات بصراحة كانوا متابعنا كانوا شغالين معانا وده على طول يوم لاسبت بعدها ب48 ساعة على طول يا فندم انتهت المشكلة بتاعة محور التعمير.
التوجيه التالت يا فندم كان الطريق الدايري باسكندرية وكان طبعا لسيادتك حق، الطريق ده يا فندم كان أساسا كان طريق عبارة عن حارتين اتجاهين، يعني كل اتجاه حارة واحدة، وكام طريق فرعي، طريق يعني كان بيمر في منطقة غير مخططة، فالطرق الفرعية يا فندم خط تنظيم مش مش حرم للطريق، فخط التنظيم سيادتك في بعض الاحيان بيبقى يا دوب المباني بتركب على الطبان لكن طبعا عشان ده طريق رئيسي سيادتك طبعا ليك حق، لازم كل الكلام ده يا فندم لازم يرجع تاني إلى حرم طريق، إحنا حصرنا يا فندم على طول اتنقلنا وكان معانا محافظة الاسكندرية وعدينا يا فندم المنشآت دي كان في خمس مدارس وكان في 30 هنجر عبارة عن ورش ومخازن زي ما سيادتك شايف كدة وكان في تقريبا 36 عمارة، الحاجات دي يا فندم في منها اللي راكب على طول على الطبان وفي حاجات منها 4 5 متر، وفي حاجات حتى 15 متر. الصراحة يا فندم أصحاب الهناجر بمجرد ما سمعوا سيادتك بتوجه للقضاء على المشكلة دي وحلها، على طول وأنا كلمتهم في التليفون في نفس اليوم، كلهم أبدوا تعاون كبير جدا، والمشكلة اتحلت يا فندم اعتبارا على طول من تاني يوم ولحد امبارح بالليل بنفك وهم بيفكوا معانا، بنفك الهناجر وعلى طول يا فندم يمكن كلهم انا عارفهم بالاسم وكلهم ناس يعني شرفاء ومحترمين ورفضوا حتى ان هم يتقاضوا تعويض عن المنشآت بتاعتهم وهم هاينشؤوها على الحد اللي احنا هانقرره بإذن الله على نفقتهم الخاصة ان شاء الله.
يتبقى مشكلة العمارات والمدارس لأن دي طبعا ديت في ناس ساكنة فيها والمدارس، وطبقا لتوجيه سيادتك ان شاء الله بإذن الله احنا هانحصرهم وهايتعوضوا يا فندم بردو تعويض مناسب ونحل المشكلة تماما ويبقى طريق حر سريع.
المشكلة التالتة يا فندم وهي مشكلة الناس اللي كانوا بانيين بجوار الطرق اللي احنا عملناها والدايرة بتاعت الطريق بقى فيها بعض العمارات وبعض المنشئآت، في ناس يا فندم استجابوا فعلًا فورًا ونفذوا، والناس الباقيين يا فندم إن شاء الله هايستجيبوا إن شاء الله بإذن الله، يعني بشوية يعني تنسيق معاهم إن شاء الله بإذن الله هايستجيبوا، ونحل المشكلة نهائيًا إن شاء الله. وبنوعد سيادتك إن إحنا بإذن الله ده هيراعى مستقبلًا بإذن الله.
السيسي: أنا بشكرك يا كامل، وبقول بس للمحافظين وللمعنيين بالمواضيع ديت، لو سمحتم ده في تعليمات ثابتة لحرم الطرق حتى لو كان الطريق آآ طالما إنها طرق خارجية يا كامل مش طرق داخل مدن، كانت 50 وبقت 100 متر وبقت 150 متر، حسب، وبيتهيألي دولة الرئيس، مش كدة يا فندم؟
فإحنا إكمن الموضوع ده اتنسى وماحدش حاسب عليه قبل كدة، الناس اتصورت إن الـ.. ده الواقع، الواقع مش كدة، الواقع ان حرم الطريق، إنتم عاملين شاقين كباري وسط العمارات يا كامل، يعني انتوا شاقين محاور وعاملين كباري وأبص ألاقي الناس ماشية ويادوبك البلكونة يمكن متر من المحور، ماحدش يعمل كده.
كامل: يا فندم سيادتك كلنا طبعا بنهتم ان احنا نسلك بس المسار بتاع الطريق عشان نمشي و..
السيسي: لا لا لا.. ده عشان الناس.. عشان الناس..
كامل: تمام يا فندم، سيادتك بس في يعني، آآ أهالينا في اسكندرية في المنطقة اللي هي سيادتك بتعتبر خلف المطار اللي هي كان فيها الطريق اللي ماشي ده، دول يا فندم يعني هم بيلتمسوا من سيادتك طبعًا الأراضي دي يا فندم كلها كانت أراضي منطقة خارج الحيز العمراني ومنطقة غير مخططة وهم طبعا الناس بنوا كلهم بدون ترخيص، وهم نفسهم بيعترفوا إنهم بنوا في الفترة مابين نهاية 2010 حتى 2014 بنوا كل المباني يا فندم بدون ترخيص، هم بيلتمسوا من سيادتك ان اللجنة بتاعة تقنين أراضي الدولة وأوضاعهم وجاهزين يا فندم يدفعوا تمن الرخص بتاعتهم، وما تقر عليه الدولة من أي اشتراطات أو يعني أمور مادية بحيث إن هم نقننلهم وضعهم وماتتهدش المباني بتاعتهم، لأن طبعا فيها أسر، 36 عمارة تقريبا فيها على الأقل من 120 ل130 أسرة يعني.
السيسي: أنا ماقدرش أقول حاجة في الموضوع ده، الحكومة تدرس مع المحافظة وكدة، مانقدرش نوعد غير اما نشوف الموضوع عامل ازاي يعني، شكرا يا كامل، متشكرين.
اقرأ أيضًا: نص كلمة السيسي في افتتاح مشروع الطريق الدائري الاقليمي 9/9/2018
ألقى الرئيس السيسي هذه الكلمة في شبين الكوم بمحافظة المنوفية خلال افتتاحه عددًا من المشروعات التنموية بحضور رئيس مجلس النواب علي عبد العال وزيرة الصحة هالة زايد ووزير التربية والتعليم طارق شوقي.