نص كلمة السيسي عن المترو والتعليم والبطالة خلال المؤتمر الوطني للشباب 16/5/2018

 

منظمة الجلسة: والآن دعونا نستمع إلى تعقيب سيادة الرئيس، الرئيس عبد الفتاح السيسي، تفضل..

السيسي: الوقت المخصص ليا إيه؟ (يضحك)

منظمة الجلسة: ماقدرش ماقدرش أقول (تضحك)

السيسي: ليه ليه، لا لا.. أولًا خليني أشكركوا جميعا على المساهمات اللي انتوا اتكلمتوا فيها في الموضوعات المختلفة، ولكن أنا عايز أقولكوا حاجة وبقولها لكل اللي بيسمعني، في فرق كتير جدا بين المسار المعرفي حتى النظريات والبيانات، وكدة، وخصوصية التجربة، خصوصية التجربة يعني إيه؟ يعني الخصوصية بتاعت مصر، اللي هي ظروفنا إحنا، لأن إحنا كل اللي بيتم تناوله مش من حضراتكم، اللي بيتم تناوله من اجراءات ممكن بتتعمل موجودة وكل الاكاديميين يعرفوها، وكل الناس الدارسين التخصصات المختلفة ممكن يتكلموا فيها، لكن ازاي النهارده، وإنت بتـ.. ازاي تعملها مع ظروف بلدك.

خلينا نجيب مثلا وهارجع تاني ل.. يعني مثلا أي حد يشوف قطاع زي قطاع السكة الحديد والمترو، وأنا لما بطرحه دلوقتي ماقصدش بيه أي حاجة غير إنه مثال لسه كان يعني إيه، شايفين من يومين محاولة لإيه؟ لأن إحنا نتحرك لإصلاحه.

اي حد دارس الموضوع ده هايقولك المرفق ده، لما يشوف القوائم المالية ويشوف البيانات الخاصة بيه، هايقولك ده محتاج 1،2،3،4،5، خلاص.. طب وماله، طب ما نعمله، وانت لما تيجي تتحرك إنك إنت تنفذ الإجراءات ديت اللي إنت درستها من منظور أكاديمي وبيانات واضحة قدامك ومسار واضح قدامك للحل، لازم تراعي ظروف وخصوصية التجربة اللي إحنا، أو خصوصية الحالة المصرية، عشان لما تيجي تعملها تنجح فيها، وتراعي إنك إنت في الآخر وإنت بتتكلم في كل البيانات وكل النقاط اللي إنتوا طرحتوها دي إنك إنت بتتعامل مع دولة ومع ناس، فانت ماتتحركش من غير ما تجهز الناس دي بشكل كويس وتقنعهم بأهمية الإصلاح وحتمية الإصلاح على سبيل المثال.

أنا هاتكلم على التحديات اللي كتير منكوا اتكلم فيها، وأنا عايز اتكلم معاكم او اشرحها او اضيف عليها اذا سمحتمولي. إنتوا اتكلمتوا عن النمو السكاني كتحدي من التحديات اللي بتقابل ال.. اللي بتقابل الدولة المصرية، والحقيقة النمو السكاني انا اتكلمت فيه كذا مرة على استحياء انه هو أحد التحديات الكبيرة، اللي مش بس في الـ10 سنين ولا ال20 ولا ال30 ولا حتى ال50 سنة اللي فاتوا، لا  ده على مدى زمني كبير جدا جدا مانجحتش الدولة المصرية في ان هي تقنع الناس، بضبط النمو السكاني، عشان ده بيحسس الناس، يعني انتوا اتكلمتوا على معدل النمو، معدل النمو، لن يستطيع الناس ان هم يحسوا بهذا ال، بتأثيره الإيجابي، إلا إذا كان معدل النمو السكاني مناسب.

مثال.. إحنا النهاردة لو اتكلمنا 2.5% لازم تعمل معدل نمو مايقلش عن 7.5% طب لو ماتحققش؟ لو ماتحققش معدل نمو 7.5% الناس مش هاتشعر بتحسن في أحوالها، مش كدة؟ ده كلام آآآ كلكوا عارفينه.

طب النهاردة التحدي ده مرتبط بالدولة ومرتبط بالسكان او بالشعب، هو مش الشعب بس، يعني في جهد على ال، على ال، على الدولة محتاجة انها تعمله، وكمان جهد على المواطنين ان هم يعرفوا، إن مش المهم إن يبقى عندك العدد الكيبر ده، لأ، المهم انك انت، انت مش هاتأكله وتشربه، وانا قلت الكلمة دي قبل كدة، الناس متصورة إن طالما أنا أقدر اأكل آآ ابني أو بنتي خلاص.. لأ. إنت عايز تعده على انه، لأن المجتمع، الدنيا اتغيرت خالص، وحصل تطور كبير جدا في المجتمعات، وبقت المتطلبات اللي عايزاها المجتمعات ديت متطلبات عالية التكلفة، يعني النهاردة لما تيجي تتكلم على العلاج من 50 سنة وتكلفته للفرد، غير تكلفة العلاج بتاعة الفرد النهاردة. نفس الكلام التعليم حتى فرص العمل اللي بنتكلم عليها.

فعايز أقول إن النمو السكاني اللي موجود في مصر، وانا بطرحه، وإحنا اتكلمنا فيه قبل كدة زي ماقلت على استحياء، وتكلمنا فيه وقلنا ان احنا محتاجين نتحرك فيه، وأنا بقول ان هو محتاج كــــــل القوة، الإعلام يتكلم فيه، الأحزاب والقوى السياسية تتكلم فيه، إحنا كمواطنين قاعدين في بيوتنا، لازم نكون عارفين ان ده تحدي لن نستطيع إن إحنا ننعم أو نطمئن أو نشعر بتحسن في دخلنا، حتى لو إحنا زودنا معدل النمو على الوضع الحالي، اتقال معدل نمو 4.5 وكدة، انا بقولكو، وده خبر يعني بس بطمنكوا بيه، إحنا دلوقتي 5.4 معدل النمو في الربع التالت (تصفيق)، إذا كانت وزيرة التخطيط تردني لو انا بقول رقم، تقولي الرقم الصحيح، دكتورة هالة، 5.4 وده بالمناسبة ده ماكانش متوقع، وحتى لما بنتكلم، اتفضلي حضرتك، وحتى لو كااان المستهدف 22، 7 و8، أنا بقولكم أولا إحنا وده مش عيب، ده حالة مصر، ماعندناش بيانات محوكمة عن القطاع الغير رسمي في الدولة حتى الآن، وبالتالي إحنا مش عارفين بدقة شديدة نقدر نقول يا ترى الأرقام اللي إحنا بنقولها دي، نسبة الدقة بتاعتها 100% ولا في معامل بالسلب أو بالإيجاب، لكن الرقم اللي أنا بقوله معدل نموه 5.4 ده معدل تحقق خلال ربع تالت وبنتمنى ان احنا في الربع الرابع من هذا العام نحقق يعني، لو وصلنا ل 5.5 او 5.6 يبقى كويس.

في نقطة تانية مهمة قوي.. إن إحنا واحنا بنتكلم على آآآ الاستثمار، وان احنا نصدر، انا عايز أكون، بالإضافة لده، انا عايز الأول أكفي السوق المحلي، أنا سوقي فيه 100مليون، يا ترى أنا اقدر بلبي، يعني كلنا لابسين قميص مصري، وبنطلون، وكرافتة، وكل حاجتنا مصري؟

أنا بقولكوا في فرص، إحنا بنقول إن هي تحدي دلوقتي ان احنا بنتكلم ان انت عايز تفتح أسواق كتير. طب ما انت وانت بتفتح اسواق كتيرة، او وانت عايز تخفض من فاتورة الاستيراد عندك، انت عندك فرصة، هو تحدي ممكن يتحول إلى فرصة، بإنك انت عندك كتير من اللي انت بتستورده هو فرص عمل متاحة داخل المجتمع المصري، لو الدولة من جانب ورجال الاعمال والمستثمرين سواء كانوا كبار او صغيرين آآ اتحركوا معانا ف ده.. أنا عايز اقولكوا مادام انا اتكلمت عن المستثمرين، كان في تحدي، طمأنة المستثمرين ورجال الأعمال، كان في تحدي في مصر.

يا ترى إيه الحكاية، إحنا رايحين على فين؟ يا ترى في استقرار حقيقي ولا لا، طب يا ترى شكل الدولة المصرية بالقيادة الموجودة دي توجهاتها ايه؟ اظن واضح جدا جدا ان احنا داعمين، مشجعين، في قانون بيحكمنا ما نقدرش نتجاوز هذا لقانون مع رجال الاعمال والمستثمرين في مصر، ده أمر لازم يكون واضح..

اطمئنوا واتحركوا، اطمئنوا واتحركوا، وما دام قلت اطمئنوا واتحركوا عايز اقولكوا في تحدي آخر؛ الوقت.. يمكن ماحدش كتير يشعر بال، مايذكرش كلمة الوقت، لأ، اللي ممكن النهاردة ما انجزوش في الوقت المناسب، ده هايمثل بالنسبالي أعباء أخرى في المستقبل.

مثال..

لو أنا النهاردة، ماقللتش عجز الموازنة، عجز الموازنة لكل الناس البسطاء اللي بيسمعوني هو الفرق بين المتاح من موارد، وبين المصروفات، فاحنا بنضطر نستلفه، بنضطر نستلفه، لو انا ماقدرتش بسرعة أحل المسألة ديت في وقت مناسب، هاييجي عليا وقت من الأوقات ان السلف ياكل قدرتنا، السلف، ياااكل قدرتنا.. أنا موظف أو إنسان دخلي في السنة آآآه في الشهر 1000 ولا 2000 جنيه، وبضطر ان انا عشان اكمل مصروفي استلف 100 ولا 200 وهاسددهم او اسدد خدمتهم اللي هو نتيجة الفايدة اللي عليهم، لو ماخدتش بالي ان انا بسرعة اوقف نزيف اللي هو السلف وخدمته، خدمته اللي هو ايه؟ اللي هو الدين اللي عليا وفايدته، لو انا ماخدش بالي وقدرت بسرعة اسارع الوقت والزمن عشان مايجيش عليا وقت ألاقي ان الخدمة واقساط الدين بقت تجاوزتني، وبقت عبء عليا كبير جدا والدولة تبقى في تحدي كبير، فالوقت، اللي هو انا بتكلم فيه ده، ويمكن دايما بتسمعوني اقولكم ايه، دي خطوة على الطريق، إحنا لازم نسارع الزمن ونتحرك بسرعة وبمعدلات أكبر..

يبقى انا النهاردة، انا هارجع بقى للموضوع اللي كنت بتكلم فيه الأول، عندي رفاهية إن أنا أأجل أكتر من كدة اصلاح لمسار زي المترو؟ لا ماعنديش.. طب في ناس هاتتعب.. أكيد.. نحاول نحل المسألة بقى بإن إحنا نقول طب الاشتراكات، نحلها ان الاشتراكات دي الناس اللي ظروفها يعني كدة، هايقدر يقلل الفاتورة اللي عليه في هذا الأمر، إن أنا أقول إن طلبة المدارس ويعني كبار السن، وذو الاحتياجات الخاصة، ومادام انا اتكلمت في النقطة ديت، أنا عايز اقولكوا ان بتصل التذكرة ل12 ل 15 قرش للتلت قطاعات دول، وإذا كان وزير النقل موجود يردني لو كان الرقم أكتر من كدة، يعني كل الطلبة اللي بتكلم عليهم الاشتراكات اللي بتتعمل القيمة دي 12 قرش و15 قرش، لتذكرة المفروض تبقى ب 16 جنيه، و15 جنيه، و14 جنيه..

طب أقدر أعمل كدة ولا ماقدرش، أقدر أأجل أكتر من كدة؟ وزير النقل انا بكلمكوا عشان بحاول اجيب حاجة وبقول تجربتنا.. وزير النقل من سنة وشوية كدة، قالي خط حلوان هايطلع من الخدمة، هايطلع منين؟ من الخدمة، ليه؟ قالي محتاجين صيانته لانه كان اول خط عملناه، وبالتالي احنا محتاجين نرفع كفاءته، طيب، بكااام؟ 30 مليار جنيه.. عايز مني (يضحك) 30 مليار جنيه! يا نهار أبيض! منين دول؟ 30 مليار جنيه لرفع كفاءة الخط ده.

طب ده إحنا القرض اللي اتعمل بيه الخط ماتسددش.. القرض.. اسمعوا، لكل المصريين، هي بلد كـــــــــلنا هانشيلها مع بعض (تصفيق) لكن.. وبعدين، هو انا خبيت عليكوا حاجة؟ ده أنا قلتلكوا في الترشح الأولاني خالص، إحنا مع بعض كلنا، لن التحدي اللي موجود في مصر اكبر من أي حكومة ورئيس، وده كلام مش.. آآآه أمال إييييه اكبر من.. لكن بالناس، بالشعب بالدولة ككل كدة تقدر..

أرجع تاني فقالي 30 مليار، طب انتوا سددتوا القرض الأولاني يا دكتور، قالي لأ. الله! طب والفوايد بتاعته؟ قالي ما الدولة بقى تشيلها.. طب ال30 مليار دول هاجبهوملك إزاي؟ طب التشغيل بتاعك انت بتقدر تجيب مصاريفه؟ لأ.. يعني، التشغيل هنا يعني إيه؟ يعني الصيانة ومرتبات العاملين.. يعني لو لمبة اتحرقت في المترو، مش هانقدر نصلحها، أنا بقولكوا الكلام ده لأن لما حد يعني سهل جدا، إن مثلا يقولك إن ناس مش عارف.. هو إنت بتركب أي مواصلة تانية قطاع خاص بتقوله أنا مامعيش بيقولك طب معلش؟ مامعاكش مابيركبكش.. مش كدة ولا إيه؟ أي مواصلة قطاع خاص، مش عايز أقول أسماء عشان مايصحش.. حتى ده لما تيجي تقوله مامعيش، مش هايقفلك أساسا، مش هايقفلك يركبك.

فعايزين البلد تقوم وتبقى بلد ذات شأن ولا لأ؟ البلد اللي ذات شأن لازم نضحي ونتعذب.. مش الهدف التعذيب.. لأ، لاااازم نتعذب.. ليه؟ لأن هو ده التحدي.. بلد ظروفها الاقتصادية على مدار سنين طويلة، لا 20 ولا30 ولا40.. أنا بتكلم في 50 سنة، وبقول الكلام ده لأن انا كنت بقول المؤتمرات دي فرصة بالنسبالي وبالنسبالكم ان احنا نسمع بعضنا البعض، ونعرف حالنا، مش عايزين ننسى، مش عايزين ننسى! الحكومة لما تيجي تقعد معايا دايما أقولهم إيه؟ الوقت الوقت الوقت..

طب ماهو الدكتور طارق الملا لما بيكلمني على ظُهر اللي حضرتك اتكلمتي عليه، المفروض 2022 قلتله إنت لسه هاتخليني استنى ل22؟ أنا محتاج الفلوس دلوقتي! ليه محتاج الفلوس دلوقتي، اللي انا قلتهولكوا دلوقتي وانا بتكلم معاكوا ومعاه، إن الفلوس لو ماجاتش في الوقت المناسب، هاتبقى التحدي بقى أكبر.

ف، وقعدنا واتكلمنا عشان احنا نحل ال، ال، ال، المسألة ديت.. فانا عايز أقول بس، انا دخلت في موضوع المترو عشان بظروفه كدة اكيد، لأن إنتوا في اسأل الرئيس هلاقي الدنيا كلها بتسألني عليه، فقلت (يضحك) يبقى.. يبقى جاوبت عليه يعني.

فـ، فالمهم يعني، هل النهاردة كان، إنتوا بترجعوني بردو، يعني كنت ممكن اقول النهاردة، طب، يعني نقفل الخط بتاع حلوان يا جماعة؟ نقفله؟.. طب.. ماقصدش يعني، يعني، طب إحنا كدولة بنحاول نحل المسألة بشكل على قدر الإمكان.

أنا بقول تاني، الـ30 مليار دول لما هاخدهم، عبارة عن إيه؟ حضرتك، وحضراتكوا كلكوا، هايبقى عبارة عن جزء من عجز الإيه؟ سلف.. هستلف 30 مليار جنيه عشان خاطر ده يشتغل، هايبقى سلف.. يبقى إحنا كدة مابنحلش المسائل بقى.. إحنا كدة بنزود الأعباء على القادمين، لا طب إحنا كدة هانتعب شوية.. هانتعب.. إذا كنتوا عاوزين بلدكم تاخد مكانها وسط الأمم، إوعوا تتصوروا إن ده بييجي بسهولة، في ظل التحديات اللي موجودة فيها، وشوف العالم كله بيعمل في بعضه إيه، مش بتكلم على دول المنطقة، الناس بتعمل، الدول الكبيرة اللي عندها اقتصاديات قدنا 100 مرة و1000 مرة بيعملوا إيه عشان ياخدوا آآ، وياخدوا موارد وياخدوا.. يعني، يستفيدوا من امكانياتهم..

فأنا في مصر ماعندناش ترف إن إحنا نأجل ونضيع وقت، ودلوقتي تحديـ، أو إن إحنا ماناخدش القرار. لو ماخدناش القرار يبقى أنا قصرت في حقكوا جميعا، لأن ده مش قرار الحكومة، لأ ده قرار الدولة وإحنا.. ماكانش.. ، هو كان مفاجئ ليكوا؟ لأ بقى، ماكانش، لا ده، لا مش، ده من سعد الجيوشي، من أيام ماكان وزير نقل، وهاني ضاحي، اللي بعد منه، يقولك عايزين نعلي ونرفع الأسعار، وهانعلي ونرفع، يعني كلام مش جديد، ثم بعد منه الدكتور جلال السعيد، بعدين بقى جت خبطت في الـ (يضحك) (تصفيق).

ويطلع في التلفزيون يقولك سامحوني، سامحوني إيه يا دكتور، يقولك سامحوني (يضحك) سامحوني إيه يا دكتور؟ هو في خيار تاني؟ (نظرة جادة فجائية) لااا! البلاد مابتقومش غير بالقرارات الصعبة.. إحنا مش جايين نقعد يومين معاكوا نضيعكوا ونمشي، لا والله، إحنا بنحاول بفضل الله سبحانه وتعالى (تصفيق) ناخد الاجراء اللي..

وبالمناسبة بقى.. إوعى حد يزعل من اللي هقوله، لو ماخدتش القرارات دي ماحدش تاني هاياخدها.. أنا بقولكوا كدة.. ماحدش هاياخدها، يخش في تحدي والناس تطلع تزعقله وتقوله إرحل ولا حاجة؟ لكن لو إنتوا قلتولي إرحل هاقولكوا سلامو عليكوا.. (يبتسم) آآآ ومافيش حاجة.. (نظرة جادة فجائية) يا البلد تبقى بلد، ونقوم ونقف على رجلينا مظبوط، وده أمر مش بسيط، دا أمر محتاج كلنا نبقى فاهمين إحنا مين وظروفنا إيه ومحتاجين نعمل إيه ونستحمل اللي هانعمله، ده خطة اتعملت بقالها النهاردة 4 سنين في القطاعات كلها.. في القطاعاات كلها.. القطاعات كلها..

آآآه.. (يبتسم) الكهربا والمية والصرف الصحي آآآه.. (يضحك الحضور) (تصفيق) مافيش خيار تاني.. طب انا هاقولكوا على حاجة مادام اتكلمت على الكهربا بقى، الدكتور شاكر.. الدكتور شاكر اللي انتوا شايفينه لطيف ده وببيبقى بسيط، ده معذبنا (يضحك بعض الحضور) آه والله كدة، معذبنا وببـ، بـ، بـ، وزير المالية، ودولة الرئيس متعذبين معاه، في الحساب، آه والله صحيح (نظرة جادة) أنا بتكلم ليكوا بجد وبنقلكوا ده، عشان تعيشوا معانا، تبقوا معانا يعني تبقوا، دكتور شاكر ماكانتش على قد محطات اللي هي تم رفع الإنتاج تقريبا 100% يا دكتور؟ لأ لأ، اللي اتضافوا.. طيب، دول يساووا تقريبا 100%؟ أيوة..

أنا بس عايز أقول، عارفين يعني إيه 100% في سنتين ونص، عارفين يعني إيه؟ طيب.. بقوله يا دكتور فاضلك إيه تاني؟ بالمناسبة ده جه سلف، ولا إيه، سلف، مش كدة؟ طيب، عملناها عشان إنتوا، يبقى في فرصة مش إن إنتوا بس الطلب ال، الكهربا لل، لل، يعني، للمسائل المنزلية، لأ، إحنا بنتكلم حتى للصناعة، ماكانش ممكن حد ييجي يشتغل معانا، أو يشتغل يعني يعمل استثمارات، وعندنا، اتفضل يا فندم، الدكتور شاكر راجل عظيم فاضل، راجل عظيم فاضل (تصفيق).

فـ، طيب يا دكتور عايز إيه تاني؟ قالي أنا عايز أعمل الشبكة وعايز أعمل محطات التحكم، مش كدة يا دكتور؟ طب عايز كام؟ قالي أنا عايز 45 مليار.. مش كدة؟ (يضحك) أنا بقولكوا كدة ليه؟ لأن إوعى تقولي أنا ماليش دعوة، إوعى تداري وشك، إوعى وأنا بحكيلك الحكاية دي تروح إيه، تعملي كدة (يلتفت برأسه إلى الخلف) لا لا لا، ماهو، ده، دي بتاعتنا كلنا، وهاتبقى بلدنا الحلوة كلنا، وهانتشرف بيها كلنا، أو لا قدر الله حاجة تانية، فعشان نقدر النهاردة الحجم الانتاج اللي طلع يستفيد بيه كل الناس في مصر بشكل عاااادل، إذا كنتوا بتتكلموا عن العدالة الاجتماعية، لا مابيستفادش بيه دلوقتي بشكل عادل، آه في منتج موجود، في كهربا موجودة بزيادة ممكن، لكن هذه الكهربا لا تصل بشكل جيد طبقا للمعايير العالمية، لغاية ما شبكة الكهربا بتاعتنا تخلص، لغاية ما محطات التحكم بتاعتنا تخلص، مش كدة؟

الدكتور شاكل كان بيقولي إن إحنا، إديني آخر 2019 اخلص، قلتله أبدا، أنا بتكلم بجد، آخر 2018، شبكااات الكهربا كام مرة؟ من 2000 لستة، مش كدة يا فندم؟ مش كدة؟ الشبكات دي اللي هي الابراج اللي بتشوفوها دي، الدكتور شاكر عشان يخلي اللي يخلينا طبقا للمعايير العالمية في شبكات النقل، أنا مش بتكلم على حاجة تانية، مش بتكلم في إنتاج انا بتكلم في نقل الإنتاج، عايزين نوصل من 2300 ل6100.. طيب.

فالمهم يعني، طب ده بكام؟ ده بمليارات كتير قوي، ده بمليارات كتير قوي، نرجع بقى، طب وشبكات التحكم؟ عشان، أو محطات التحكم أنا آسف اللي موجودة، والمحولات بتاعة ال، دي كلها عشان المواطن اللي بيجيله كهربا دون مستوى، مش هاتتصلح بالانتاج، هاتتصلح باللي احنا بنتكلم عليه ده، طب ده محتاج 40، 50 مليار جنيه، طب إزاي؟ كل ما الدول بتتقدم، تكلفة التقدم بتزيد على الدول، يعني إيه تكلفة التقدم بتزيد ع الدول؟ يعني مستلزمات المستشفيات من 50 سنة، لو كان عندك مستشفى فيها 100 سرير ولا 200 سرير ليها قيمة، ودلوقتي، بعد 50 سنة ليها قيمة تانية، كان قبل كدة جهاز أشعة واحد، دلوقتي بقى في أنوااااع، وبالتالي عشان إحنا نبقى دولة بنقدم خدمات حقيقية لأهلنا لا إنت بتتكلم في أموال، هاتتجاب إزاي؟ هاتتجاب إزاي؟ فـ، ال، اتفضل يا دكتور شاكر..

ف دلوقتي المتاح ده تحدي أنا بعتبره آآ إحنا اتكلمنا عن الاستثمار.. أنا قلت واحنا بنتكلم كدة مش معقول، إذا كنا إحنا عايزين نصدر مانكفيييش ما أمكن، ما أمـــكن الطلب المحلي.. مش معقووول، يعني مش معقول أبدًا إن أنا إحنا خفضنا الفاتورة وبردو يردني وزير التجارة أو وزيرة التخطيط إحنا خفضنا الفاتورة 20 مليار دولار، مش كدة؟ مش كدة يا فندم؟ 20 مليار دولار، لا أنا عايز 20 كمان، عشان الكلمة اللي انت قلتها، بتقولي إن إحنا، نعم.. أيوة يا فندم، لما انت قلتلي ان احنا مش عايزين نبقى كل هدفنا إن إحنا بنتكلم على السياحة والاستقرار يبقى، أو تحويلات المصريين في الخارج أو غيره، مش كدة؟ نستنزف هذه الأموال في إن إحنا نستورد مستلزمات نقدر نعملها في مصر أو منتجات ممكن نعملها في مصر، انا في تقديري، طموحي أنا، وانا بقول للحكومة بالاضافة لفرص التصدير ان انا اكفي السوق المحلي ما أمكن وده تحدي كبير هايدخلني على نقطة بس عشان أقولها زي ما اتقال كدة ان احنا وفرنا أراضي للمناطق الصناعية تساوي اللي اتعمل في 10 سنين.

ولما نقول الكلمة دي برضه تاني بقولها مش معناه قدح في اللي قبل مننا، لكن بنقول ده اللي احنا عملناه تشجيعا للاستثمار، وانا بكلمكوا دلوقتي، لأ إحنا دلوقتي شغالين في برنامج، زي ما عملنا مدينة الاساس، ومدينة الروبيكي بتاعة الجلود، وبنتكلم النهاردة في مدينة، طب إحنا.. آآآ أنا خدت وقت كتير؟

منظمة الجلسة: لا لا براحتك يا فندم..

السيسي: طيب..  لما كنا بنتكلم مع الشركة الصيني تيجي تعمل 540 مصنع؟ 560 مصنع؟ فقالت هانشتغل الخطة دي في 7 سنين، قلنالهم 3 سنين، آآه، طب أنا عايز أعمل في 3 سنين ليه؟ عشان المواطن اللي مش لاقي شغل يشتغل.

بالمناسبة احنا معدل البطالة وانا بكلمكوا دلوقتي وده الخبر التاني 10.6% بعد ما كنا 13.6 و13.8 (تصفيق).

طيب، فإحنا، قلنالهم لا أنا هاساعدكم، كلمة أنا أساعدكوا دي معناها إيه؟ إن أنا أكسرله كــــــــــــل ال، يعني لو في إجراءات أنا أخلصهاله عشان نقدر نخلص ال560 مصنع دول في كدة. قالي طب تعملولنا إنتوا المصانع وهاندفعلكوا الفلوس، ومش هاكمل بقيت الكلام عشان يعني.. آه طبعا، قلتله طب وماله؟ فعرضوا عليا الموضوع، قلتلهم طب وماله، نعمل كدة..

كام مصنع؟ 560.. يعني لو مصنع فيه متوسط 100 حط صفرين جنب ال560، يبقى 56 ألف، لما أنا أشغلهم بعد 7 سنين واغير حياتهم غير لما اشغلهم بعد 3 سنين، وبالمناسبة كل ما أخلص حاجة هايبقى في فرصة إن إحنا إيه؟ نعملها.

فأنا عايز أقول بس إن إحنا، ده عشان بس برد على حتة ازاي احنا في الاستثمار الطرح اللي حضرتك بتقوله واللي اتكلمتوا انتوا عليه كلكوا، إن أنا عايز أزود معدل الاستثمار ازاي تعمله؟ وده اللي احنا عايزين نتعلمه ازاي، ازاي نقول ال، ال، العنوان النظري اللي بنتكلم فيه، إزاي نعمله لإجراء عملي ينطبق أو يتطابق أو يتواءم او يتناغم مع ظروف مصر، عشان ننجح، لو ماعملتش كدة هاتخبط في ال، هانخبط في ال، في الحيط.

البطالة زي ما انا قلت 10.6، تأهيل سوق العمل انتوا اتكلمتوا عليه، ومادام اتكلمنا على تأهيل سوق العمل، خليني أكون صريح معاكوا، يا ترى إحنا يا مصريين، وإحنا، يعني هم كانوا عايزين يجيبوا موضوع التعليم النهاردة، قلتلهم ماتفتحوش الموضوع ده دلوقتي (يبتسم) خلوه بقى ده عايزله 3 أيام لوحده، (يضحك) نتكلم فيه..

يا مصريين عايزين تعملوا تعليم جيد ولا لأ؟ أيوة.. أول ماتيجي تقول تعليم جيد، طب هانبتدي نتحرك، يقولك إيه "بس خليك في الولاد اللي بعدي" يعني ساعة لما نيجي نقول نعمل تعليم جيد، يقولك كويس، آآه، في التعليم، التعليم سيء في مصر، حاضر هانعمل تعليم جيد ان شاء الله، يقولك آآآيوة، بس لو سمحت، مش ولادي، اللي بعدي..

يا جماعة.. الدكتور طارق شوقي، ده كان، أولا عشان، يعني، قبل ما يكون وزير التربية والتعليم كان هو في المجلس الاقتصادي وكان هو الأمين العام، مش كدة، الدكتور طارق ويعني كان مغلبني في الاصلاح، عرضت عليه الموضوع مرتين، هو والدكتورة مرفت يمسكوا وزير التربية والتعليم قالوا لأ.. لغاية لما أحرجته مرة قدامكم من، من سنة ونص سنتين كدة في مؤتمر الشباب قلتلهم حتى الناس اللي موجودة معايا مش عايزين يمسكوا القطاع.. طب مسك القطاع.. يبقى إذن الموضوع مش هايبقى وليد، يعني إيه، مش هايجرب فينا، مش هايجرب فينا، لأ ، ده دراسات أيام ما كانت في المجلس الاستشاري سنتين، وقبل منهم طبعا خبرات كبيرة جدا بدليل ان احنا اخترناه يبقى موجود معانا في المجلس ده، ثم بعد كدة اخترناه وزير للتعليم، على طول يعني الناس تتصدى الموضوع، وده تحدي تالت، أو تحدي آخر، إن في ناس تتصدى الموضوع لا تعلم عنه شيء، لمجرد إن، وألاقي ال، طبعا أحبابنا في الإعلام جايبين أهالي أسر، أهالي طلبة، بيودوهم في التلفزيون يتكلموا عن الموضوع.

ده الموضوع كبير قوي.. ده موضوع، التعليم ده موضوع كبير قوي، إحنا بنقعد بييجي يقعد الدكتور طارق مع، بعد مايكون قاعد في مجلس الوزرا، وبالمناسبة، مافيش اجراء من اللي احنا بنتكلم فيه ده الا لما يكون بيتناقش في مجلس الوزرا، ودولة الرئيس بالوزرا أقروه، وبعدين ييجي يتعرض علينا، بعد مانكون احنا اتناقشنا فيه مرتين تلاتة، وأقولهم دخلوه بقى مجلس الوزرا، إن أقرتوه نتكلم فيه.

أنا بتكلم في التعليم رغم ان هو مش يومه النهارده، لكن ده لأن هو، حضرتك بتتكلم عن التأهيل لسوق العمل، طب أنا النهاردة لما أطلع 100 ألف خليج تجارة و100 ألف خريج حقوق، هو سوق العمل عايز دول، ولا انت عايز قدام ابنك او بنتك تقول ان انا علمتك، وعايز تقول ده انا الدولة ابني اتعلم شغله، احنا مش هانحل المسألة كدة، إحنا مش هانحل المسألة كدة وانا بقولهالكوا كلكوا، ان النهاردة الاسرة بتقولك ايه، انا علمت ابني شغلهولي بقى، طب اشغلهولك في ايه؟ إذا كان أنا كل سنة مئات الالوف بيخرجوا لا حاجة لسوق العمل لهم، وبقت في ثقافة عندنا عند الاسر وعند، عند الناس في مصر ان هو خريج جامعة بس، لكن لو أي حاجة تانية، مش مقبول، لو هو بيقول خريج، يعني مدرسة فنية وبيقدر يكسب وكويس، وعلى خلق وكدة، آآآ لا ماينفعش، إحنا عايزين بنتنا مابتتجوزش غير آآ بنتنا مابتتجوزش غير خريج جامعة، طب و(يضحك) هاصلح التعليم إزاي؟

فأنا عايز أقول التأهيل لسوق العمل اللي بتتكلموا عليه، الله طب ماهو كل المصانع دي عايزة ناس مش، مش خريجين جامعة يعني ممكن، مش، ممكن، طب وبعدين؟ الناس دي مش هايبقى ليها نصيب يعني في حاجة؟ 

التأهيل لسوق العمل اللي انتوا اتكلمتوا عليه مرتبط بالتعليم واصلاحه، وخلونا نكون صريحين، هو النهاردة التعليم اللي احنا بنعلمه في مصر، ده بيطلع آآ فرصة كويسة للخريج للعمل في سوق العمل؟ لأ. أنا قلت، يعني، يما تكون كلية الآداب فيها بال100 ألف، شوفوا، حد عنده بيانات، الدكتور خالد موجود؟ (يبتسم) قولي أرقام كدة، قولي كل، (يضحك) بلاش كل جامعة، الجامعات قد إيه؟ مئاااات الألوف من تخصصات. ده الكلام ده مش دلوقتي، ده الكلام ده بقاله سنين طويلة، الكلام اللي انا بتكلم فيه ده، ده بقاله سنين طويلة ماشي في مصر، وعشان كدة الولاد أو الشباب بيحبط بيقولك الله! إحنا خلصنا الجامعة ومش شغالين!

تقولي طب ما إحنا مش جاهزين لسوق العمل، العمل عايز حاجة تانية غير اللي بتخرج، تشبع سوق العمل، قول يا دكتور لو كان يعني.. مئات الألوف.. قول..

أنا بس عايز أقولكوا إيه، أحنا بندي البيانات للمجتمع يشوفها ويلقي الضوء عليها ازاي؟ لما يكون في جامعة واحدة 70 ألف في كلية تجارة، هنا بقى نمو سكاني مع آآآآ سوء الإعداد، سوء إعدادنا كدولة، لأبنائنا إن هم يخشوا في سوق العمل.

في تحدي كمان موجود.. اللي هو، اتفضل يا دكتور خالد.. الجهاز الإداري للدولة، أيوة.. الجهاز الإداري للدولة تحدي.. هل هو أداء الجهاز الإداري الدولة في مصر، ده بيعمل بالشكل اللي احنا بنتمناه؟ أنا بقولكوا لأ.. وهانرجع تاني ل، لل، إحنا عيِّنّا مليون في 2011، عينا مليون، مالهمش أي، حتى.. (يبتسم) خاللللص، ده الجهاز هو مشبع، في 5 ونص مليون (تصفيق) وروحنا إحنا مزودين مليون بالمظاهرات..

أنا بقولكوا.. المترو اللي بيتكلم عليه الدكتور هشام خد ألف منهم.. كمان؟ ربنا يكرمك (يضحك) أنا بقولكوا، الكلام ده حصل في كل وزارات مصر، لما أكلم وزير الطيران أقوله إنت ليه مش عارفين ننافس يقولي يا فندم انا عندي 25، 27 ألف زيادة دخلوا، حتى تخصصات مش ملزومة، يعني، يعني، يعني حتى يعني لو، مش هاتـ، تخصصات بعيييدة عن، ال.. المطلوووب..

انا بقولكوا الكلام ده ليه؟ هو الكلام ده بتاعي انا بقى ولا ايه؟ الكلام ده بتاعنا.. أنا أقدر امشي الناس دي؟  لا ماقدرش، ومش هاقدر، ومافيش حد هايقدر، آه طبعا، يعني انت تقولي ال7 مليون ولا ال6 ونص مليون اللي موجودين في الجهاز الاداري للدولة اللي انت محتاج بالكتير مليوووون، بالكتير مليووون، طب بس ال5 التانيين ولا ال5 ونص ولا ال6، 6 في.. في 5 في المتوسط، 30 مليوووون، نرميهم في الشارع؟ لا ما ها، ماحدش يقدر وماينفعش، ومش هانعمل كدة، فانتوا لازم تكونوا عارفين ان هي فاتورة، إحنا كلنا مع بعضنا بنإيه، بندفعها، هاندفعها ولا.. آآآآ، لأ، هانـ، مع بعضنا نقدر. آآآآه!

صوت من الحضور: "إحنا في ضهرك يا ريس!"

إحنا عايزكوا تبقوا في ضهر مصر (تصفيق)

أنا بقولكوا إذا كنتوا بتتكلموا عن اللي في ضهري.. لا والله، إنت عارف مين اللي في ضهري؟ هاقولك مين اللي في ضهري.. ربنا (تصفيق)

لأن هو اللي مطلع عليا، وهو اللي هايحاسبني، وهو اللي عارف كل الحسابات اللي أنا مهما اتكلمت معاكوا فيها ها قدر افهمهالكوا أو تستوعبوها مني أو أنا حتى اكون مستوعبها وهو عنده حسابات اخرى حسابات ال، الإله! الإله، عشان كدة أنا أحاسبكم، وإنتوا تحاسبوني، وأنا أقف قدامكم، وقدامه، ونتحاسب، والله والله والله، لأقف أمام الله سبحانه وتعالى وأقوله يا رب، بس أنا هسامح يعني، هسامح.. هسامح.. (تصفيق) هاقوله خدلي..

فالجهاز الإداري للدولة اللي إحنا بنتكلم عليه ده، ال، آآ ال 7 مليون دول عبء علينا، عبء علينا، علينا علينا، ومانقدرش ومش هاينفع إن إحنا نقولهم امشوا، أبدًا، ده كان قبل كدة عبء، وزاد العبء بمليون تقريبًا، وإحنا بنقولهالكوا ليه؟ المليون دول لو أنا النهاردة في المتوسط 2000 جنيه، بكام في الشهر؟ ب2 مليار، في سنة ب 25، في 8 بكام؟ ب 150 مليار، دول هم دول، دول استلفناهم، وبنستلفهم، وهانستلفهم، إيه يا فندم..

القاعدة بتاعة المؤتمر ده انا بستناها واللي بيحرمني منها. آآآه، اللي بيحرمني ان انا اقعد القاعدة دي معاكم واتكلم معاكم كاسرة واحدة كمسؤولية مجتمعية ومشتركة، مش رئيس وشعب، لا احنا مع بعض كدة مركب واحدة عايزنها تعدي، هاتعدي مش بيا ولا بالحكومة ولا ب، لا بيييييينا كلنا، وبفهمنا، ودي نقطة كنت انا عايز اقولها، لما قلت لزمايلنا في النقاش الاولاني، على انك انت، السياسي آآآ بضاعته آآآ (يضحك) بضاعته كلها المعارضة، لكن أنا عايز تبقى بضاعته هو الفهم الحقيقي لأن الكلمة أمانة، والناس بتسمعها منك على انك انت عندك حل.. أي حد عنده حل للتحديات اللي موجدوة في مصر ييجي جنبي وانا اقوله يلا شيل، واللي هاتخلصه هاصقفلك واخلي المصريين يصقفولك.

ارجع تاني فالجهاز الاداري للدورة ده، الجهاز الاداري للدولة ده تحدي كبير قوي، آآآ محتاجين ان احنا نشوفه.

الاقتصاد الغير رسمي انا اتكلمت عليه لكن عايز ااكده بردو تاني معاكوا، مهم ان الاقتصاد ده يخش ليه؟ الاقتصاد الغير رسمي للدولة هي الناس اللي بتشتغل وهي مش، بياناتها مش موجودة لدى الحكومة ومالهاش اي يعني وثائق خاصة بيها، طب ما احنا عايزنها معانا ليه؟ الناس فاكرة ان احنا عايزنها معانا عشان الضرايب. طيب انا بقولكوا أهو خشوا في الاقتصاد الغير رسمي عشان وزير المالية مغلبني، خشوا بالاقتصاد الغير الرسمي، وانا بقولكوا معاكوا 5 سنييين آآآ إعفاء (تصفيق).

ماتدفعوش حاجة.. بس خشوا عشان لو انت تقدر تطور صناعتك هاتقدر بدخولك في الاقتصاد الرسمي للدولة انك تخش للبنك تاخد منه وتكبر صناعتك، وانا بقول اهو، وزير المالية بيعمل كدة، انت بقى، انا بقولك تاني أهو، (يضحك الجمهور) مش عارف (يضحك) دولة الرئيس هايبقى رأيه إيه، هه.. خلاص.. ناخد 100 جنيه حتى (يضحك) ماخد 100 جنيه..

فـ، الاقتصاد الغير رسمي للدولة ده اللي هو، وبالمناسبة، هو ده اللي بيضخ في المجتمع وبيصرف على ناس كتير قوي احنا مش شايفينهم، فبياناتها مش وصلالهم، يعني بياناتهم مش وصلالنا، لكن هم بيقوموا، وهي دي اللي مخلي الدولة رغم كل التحديات اللي حصلت خلال الـ7 سنين اللي فاتوا، إن في ناس بتاكل عيش، بتاكل عيش فين؟ إحنا، أنا بقولكوا أهو أنا مش عارف، هو ده، آه طبعا مش عارفين! الاقتصاد الرسمي لما يخش للدولة هايبقى عندنا بيانات ويبقى عندهم فرصة يخشوا، يستفيدوا من التسهيلات اللي بتقدمها البنوك في تطوير صناعاتهم، واذا كنتوا بتتكلموا عن الضرايب اللي هي قلقاكوا أو التأمينات الاجتماعية يا دكتورة، مش عارف هاتحليها معاهم ازاي، (يبتسم) الموضوعين دول، هو الضرايب والتأمينات الاجتماعية، مش عايزين يدفعوا تأمينات اجتماعية.

بس خلي بالكوا، يعني هايبقوا مش عايزين يدفعوا تأمينات اجتماعية، لعمالة شغالة عندهم مثلا يعني، طب ده هايروح فين، تصور ان ابنك بيشتغل عند حد ومالوش تأمينات أو كبر أو لاقدر الله حصله حاجة او بنتك، يعيش ازاي؟ اوعوا تفتكروا الاصلاح الصلا والصوم.. اللي انا بتكلم فيه ده إصلاح (تصفيق) إوعوا! تكونوا فاكرين الإصلاح الصلا والصوم بس.. مهم.. لكن ان انت النهاردة تصلح الناااس وتحافظ على النااس وعلى حياتهم وعلى مستقبلهم، فده، معرفش الدكتور غادة هاتعمل إيه في ال، في النقطة ديت، شوفلكوا حل، لكن على كل حال أنا مع الضرايب خلصت لأن هو، يعني..

طب حتى نحسبلهم آآ مش عارف.. (يضحك) على كل حال أنا خلصت موضوع الضرايب، وانتوا الحكومة تخلصوا موضوع التأمينات للقطاع الغير رسمي (تصفيق)

آآآ.. هاقول شوية حاجات كدة تطمنكم، كنتوا اتكلمتوا عن مستحقات شركات البترول حضرتك، ال، شوفي احنا كان عندنا كان علينا 6.3، 6.4 مش كدة؟ 6.3 مليار دولار للشركاتا لبترول، وده كان، يعني بيقدح في مصداقيتنا وقدرتنا، وعشان كدة لما كنا بنقول الالتزام، رئيس الدولة عالموضوع ان احنا بنأكد ان احنا لايمكن ابدا انه يكون علينا حاجة لحد وماندفعش، خلصنا 4، يعني اللي عليهم، مش 4 بس، 4 زائد المستحقات الشهرية، يعني احنا ال6 ده هتعمليهم مبلغ ثابت، لكن كل الأموال اللي كانت مطلوبة لصالح هذا القطاع بتسدد للشركات والشريك الأجنبي، وحاليا احنا وصلنا ل2 يا... آآه.. كل ما نزق، المهندس طارق، نبص نلاقي الدنيا ترجع تاني، عايزين نخلص الاتنين دول عشان يبقى احنا.. لأن الكلام اللي انتوا قلتوه كلام مهم، ان الشركات دي لما اتطمنت إن إحنا بنسدد المستحقات ديت ابتدت تدفـ، تضخ استثمارات، في هذا القطاع، ولما ضخت استثمارات في هذا القطاع، بان، زاد حجم الاحتياطات بتاعنا، وحجم الانتاج بتاعنا، اللي من خلاله وفرنا تكاليف شرا من الخارج.

فـ، شبكات الغاز احنا كنا المعدل السنوي 750 ألف احنا بنستهدف مليون 350 ألف مشترك، وبالمناسبة مادام قلت كدة، عايز أقول، ال، ال، لل، للمناطق اللي هي المستهدفة ديت، وزير البترول بيقولي ان الناس يعني آآ يعني مش مش مابتروحش وتشترك وكدة، أصل هو في الآخر تعاقد، إحنا مستعدين نعمل تسهيلات، نعمل تسهيلات، نخليها عالفاتورة، مش هناخد مننا حاجة، تقبل؟ تقبل؟ يا فندم.. قولي آه.. أيوة.. يبقى أنا النهاردة.. (يضحك) (تصفيق).

يبقى إحنا النهاردة، ال، ال، آآ، بالمناسبة المليون 350 ألف دول هايتكلفوا في حدود 6.5، 7 مليار جنيه عشان نوصلهم الغاز للمنازل، فلازم الحكومة توفر المبلغ ده ثم تاخده على مدى زمني 3، 4، 5 سنين ولا حاجة، يتقسموا على فاتورة الكهربا.. على فاتورة الغاز آسف.. طيب حاضر حاضر.. لأ (يضحك) طيب ماشي.. ماهو أصلها زي بعضها يعني.

نرجع بقى لحاجة تانية، انتوا اتكلمتوا عالاكتتاب في البورصة، انا معاكم، بس فكروا الاكتتاب في زيادة راس المال، الدكتورة هالة، فكروا الاكتتاب لزيادة راس المال عشان يبقى احنا محتفظين بال إيه، مش كدة يا فندم؟ طيب..

أنا طبعا ماليش في الاقتصاد زيكوا يعني، لكن بقولكوا خليكوا تفكروا بالطريقة ديت..

آآآ.. (ينظر في الورقة) حاضنات الأعمال.. وأنا بقولكوا اللي انتوا بتتكلموا فيهم ده، انا كان ليا رأي وقلته للدكتور واللي قبل حتى، أيام ماكان الدكتور اشرف سالمان، قلتله خلينا نحل المسألة لكل الناس اللي عايزة تعمل شغل، بدل ما أنا اقوله خد انا بتيحلك مليون ولا نص مليون ولا اكتر ولا اقل، ممكن من البنوك، ماتخليني اخلصلك انا الحكاية واعملك فرصة عمل متكاملة، فرصة عمل ايه؟ متكاملة بحيث ان انا آآ عدم معرفتك والاجراءات الادارية وحاجات اخرى كثيرة انا اقوم انا بيها واتيحلك مكان تقدر تشتغل فيه.

فإحنا ال، وصلنا في هذا الموضوع مع ال، خلصنا ده المرحلة الأولى في مدينة الأساس، إحنا بنتكلم في 1500، 1500 يا دكتورة، 1550 اللي هم بتوع دمياط؟ وانا بقول الكلام ده عشان أهل دمياط يسمعوني، يلا، يلا! خش شوف شغلك واجري وقوم بدري واشتغل طول النهار، اجري ابني! وابني واجري اشتغل وانا معاك، هاسهلك في التصدير واعملك المعارض اللي انت عايزها، ومستلزمات الانتاج الخشب، وده توجيه للحكومة اللي بيتم السيطرة عليها بواسطة يعني، لأ لا، تؤ، بالمرة بقى، مايصحش، يا جماعة اللي بيغلي بيبقى عائق أمام الصناعة، الربح البسيط للي بيجيبوا الحاجات ديت، والدولة المفروض تجيب، الدولة المفروض تجيب، لأن في شركة قطاع أعمال، خاصة بالموضوع ده، مش كدة؟

الدكتور خالد موجود ولا لأ؟ أنا قلت خايف يغطس مايطلعش تاني (يضحك السيسي والجمهور) طيب يطلع.. فأنا بس عايز أقول انه ماينفعش يكون في شركة لاستيراد مستلزمات الاخشاب في مصر قطاع عام تجيب للناس في دمياط بأسعار مناسبة يخلي يظبط السوق، يظبط السوق يعني إيه؟ يبقى التاجر اللي بيجيب يعرف ان هو مش هو لوحده فيعني المكسب الناس كلها بتحب تكسب يعني.

فانا بس عايز اقول حاضنات الأعمال وان احنا نعمل مشروعات صغيرة ومتوسطة احنا لينا فيها مقاربة مختلفة والمقاربة دي هي ان انا بحاول بقدر الامكان أقطعله خطوات آآآ هو هاياخد وقت وجهد بشكل مركزي، بشكل مركزي، إحنا دلوقتي في صدد آآآ 5600؟ 5600؟ المصانع اللي انتوا طلبتوها مننا، 4400؟ ماهو قالي 5600 وبعدين قالي 5 مليار وبعدين طلعوا 11، فخلاص رجعنا تاني.. حاااضر.. هه؟ ما أنا براجع الموضوع، أنا مراجع الموضوع والله، تؤ.. طيب خلاص، هانعملهم 4400 بس بقى مش ب 5.5 مليار كمان، إحنا بنعمل مكان للناس وبنقوله هانديك ترخيصك في ايدك، من خلال ايه؟ القوايم اللي احنا بنتكلم عليها، إحنا عارفين سوق المستلزمات عايزة ايه الصناعة عايزة ايه التجارة جوة مصر عايزة  ايه، فبنقولهم في فرص هنا في النسيج، في فرص هنا في البتروكيماويات، في فرصة هنا في الكلام، ونديله ترخيص ونديله المكان، ويبقى عنده فرصة كمان انه يخش عالبنوك ياخد عشان يكمل شغله، إحنا ماشيين في ده.

أنا هاقولكوا حاجة بسيطة جدا كدة، انا كنت براجع، وأنا أقدر أتكلم في دي بجلاء، البيانات اللي موجودة قدام منكم متحفظة جدا جدا جدا، صدقوني أنا، مثال.. أنا كنت براجع انتاج، وزير الزراعة موجود مش كدة؟ براجع إنتاج الألبان في مصر، فطلع 106 ألف طن، مش كدة؟ يا دكتوووور، مش كدة؟ 106 ألف طن (يضحك) طيب. أنا عامل مشرووع، كانوا هايعرضوه يخلصوه، في جزء منه خلص هانفتتحه وهاتشوفوه، كان المفروض يخلص نهاية 19، انتاج مصر كله، كان 106 ألف طن، وإذا كان الرقم عدلهولي يا دكتور، هه؟ تمام.. الرقم اللي انا بقولكوا عليه ده يخلص آخر السنة دي، إن شاء الله، 124 ألف طن.. (تصفيق) 124 ألف طن!

في كلام كتييير، خلال السنة والسنة الجاية دي، هتجدوا بفضل الله سبحانه وتعالى، وانا عمري مابعتلكوا الوهم ولا عمري هابيعه، إن شاء الله تجدوا أمر عجيييب ونجاح بفضل الله سبحانه وتعالى وبفضلكم، انا بتكلم على إيه؟ على إنتاج مصر من اللبن يتضاعف تقريبا مرة وربع، من 104 ل 124 ألف، وزيادة، هه؟ هايبقوا، 125% ما أنا قلت مرة وربع، مرة وربع..

فـ، طب ده ليه؟ عشان ابني وبنتي الصغيرين يجدوا منتجات يشربوها، حقهم علينا ولا مش حقهم علينا؟ فـ، يعني عايز اقول إيه؟ اللي بنقدر نعمله من غير مانيجي عليكم أو نضغط عليكوا يا مصريين، بنعمله، واللي مانقدرش، شيلوا معانا، مالناش حل غير كدة.

في حاجات أخرى كتير، لما أقولكوا على ان انا مثلا هانكون خلصنا.. آآ.. انتوا اتكلمتوا عن المشروعات القومية اللي موجودة، إحنا تقريبا قربنا نخلص البنية الاساسية الحقيقية لدولة، بنية متطورة، بنية إيه؟ وده مش، يعني ده كلام إحنا بنـ، بنية متطورة من كهربا، طاقة كهربا أو غاز، وبنتكلم على بنية أساسية متطورة لشبكة طرق تربط الدولة بشكل كويس، بنتكلم على بنية أساسية قوية لتشريعات تساهم في ده، اللي احنا بنتكلم فيه، بنية في مشروعات قومية زي المليون ونص فدان، وأتمنى إن إحنا خلال هذا العام نكون خلصنا المليون ونص دول ونخش على المليون التانيين، وبقول للناس كلها، لو إحنا لقينا إن في، مش عزوف، يعني، مش هايبقى في فرصة، إدوا الكلام ده لصغار المستثمرين كلهم، كلهم، يبقوا هم ياخدوا ال10 فدادين، ولا ال15، لكــــــــــــل الشباب، بس مادام الآخرين بقى يعني.. ونشوفلها حل.

فـ.. أنا قلت كلام كتير.. و.. عندي أمل في الله سبحانه وتعالى وفي بكرة، عندي أمل في الله سبحانه وتعالى وفي بكرة، وبكرة بفضل الله سبحانه وتعالى تروا إن كل شيء بفضل الله سبحانه وتعالى طيب.

آخر كلمة بقولها، إنتوا اتكلمتوا عن العشوائيات والمناطق الخطرة وانتوا اختزلتوها في الأسمرات، (يبتسم) و.. أبدا أبدا، أنا عارف، ماتزعليش يا ستي، معلش (يضحك) يعني عديهالي. غيط العنب والأسمرات، واحنا مابقيناش نسميها غيط العنب إحنا بقينا نسميها بشاير الخير 1 إحنا إن شاء الله على آخر 6 هانكون خلنا بشاير الخير 2 ودي ألفين، وعلى آخر السنة ان شاء الله نكون خلصنا بشاير الخير 3 ودي حوالي 10000 أو 11000، ثم إحنا شغالين في برنامج يستهدف 200 ألف المناطق الخطرة، ده مالوش علاقة بالاسكان آآآ، ال، ال، ال تؤ، الاجتماعي..

 الدكتور مصطفى مدبولي فين؟ إنت بقى من أول ماقالولك التجمع غرق، وانت زعلان (يضحك) (تصفيق) أول ماقالوا التجمع غرق، الدكتور مصطفى مدبولي بكلمه لقيته إيه، زعلان.

ما أنا عارف إن الموضوع أو المواضيع.. (نظرة جادة) في حاجتين، أنا بقولهولكوم بردو بالمناسبة، ماتزعلش، اتفضل استريح، في حـ، آه طبعا! إوعوا تاكلوا، الرجالة اللي بتشتغل معاكوا لو كانوا ناس كويسة، عيب! ويبقى الترضية على ال (تصفيق) قدام الناس كلها..

فـ، فـ، آآآآه، يعني مش معقولة أنا لامؤاخذة هالك الـ، هالك! هالك إيه؟! ده انا مخـ، يعني، ده الناس خلصت (يضحك) فأرجع تاني بس للنقطة ديت، يعني إحنا عندنا في التعمال مع الازمات اللي زي كدة حاجتين انتبهوا ليهم، انا بحس ان الناس ملتاعة، مفزوووعة، على طول بيجيلها حالة بانيك، وآآآ إيييه الي حصل، والحق التجمع غرق، والناس، يا جماعة ده الكلام ده حصل في استراليا وشوفتوه في التلفزيون، وحصل في تركيا وشوفتوه في التلفزيون، وحصل في الأردن وشوفتوه في التلفزيون، وفي كل حتة يعني، فيعني ده ظروف حتى استثنائية.

وحتى لو كانت ال، ال، البنية الأساسية اللي موجودة هناك كانت فيها قصور، وانا بعترف ان فيها قصور، مش هي بس، لأ ده القصور على مستوى الدولة كلها، وانا بقول كدة ليه؟ طب وانت موجود على راسها وبتقول، اه طبعا! هو انتوا فاكرين دولة زي مصر تصرف ترليون جنيه في السنة؟ مصر بتصرف، عشان تصرف مظبوط، تصرف 20 ترليون جنيه! طب مابيتصرفوش، يبقى إحنا غلابة. وأي حد تاني بقى يتكلم في القنوات التلفزيونية برة دول يقولوا علينا ولا بتاع.. لا مؤاخذة، والله كله هايتحاسب! (تصفيق) كله هايتحاسب! والله كله هايتحاسب! اللي بيضحك على النااااس، واللي بيخدع النااااس، واللي بيحطم آمال الناس، كلــــــــه هايتحاسب.

فـ، كل سنة وانتوا طيبين.