نص كلمة السيسي في افتتاح مركز خدمات المستثمرين "إحنا جبنا جون يا مصريين" 21/2/2018

دا كان يطلع الغاز ده عن طريق أي دولة أخرى مش عايز أقول أسماء دول، يا إما عن طريقنا، لو كانت راحت عن طريق دولة تانية كنتوا هاتقولوا إنتوا فين يا مصريييين؟ وسايبين الدولة بتروح منكم! لا إحنا ما راحتش الدنيا مننا

بسم الله الرحمن الرحيم

في البداية أنا باشكر كل القائمين على العمل اللي إحنا موجودين فيه النهاردة، وباتمنى لهم التوفيق، وأرجو إنه الكلام اللي إحنا سمعناه دلوقت عن الإجراءات وعن اختصار الوقت وعن الجدية في التعامل مع المستثمرين يكون بالأداء دوت. 

واسمحولي بالمناسبة ديت إني أقول إن الرقابة الإدارية وأمانة مجلس الوزرا مسؤولين على إن هم يبقى في تفقد بشكل أو بآخر للإجراءات اللي بتتم ويشوفوا هل فعلا إحنا من خلال العمل وتنفيذه فعلا إحنا قدرنا المستهدف يتحقق ولا محتاجين نعدل حاجة أو نحسن حاجة وهافكر الرقابة الإدارية إن في مجموعة إحنا كنا اتكلمنا فيها أو اتكلمنا عليها اسمها المتابعة والتحفيز.  وقلنا دي مجموعة شبابية مسؤولة على إن هي تشوف مش بس هنا لكن في الـ.. حاجات تانية كتير في مصر تشوف الدنيا فيها إيه وتبعتلنا ونتحرك عشان نحفز الاداء ونحسنه 

اقرأ أيضًا: نص تعليقات السيسي في افتتاح عدد من المشروعات الكبرى بمدينة العاشر من رمضان

أنا يهمني إن أنا كل أسبوع يجيلي تقرير من هيئة الرقابة بعدد الشركات اللي تم تنفيذها اا خلال... يعني أسبوعيًا يجيلي التقرير دا إن إحنا اللي تقدم كذا واللي عملناه كذا خلال الفترة القادمة يعني أسبوعيًا لو سمحتوا يجيلي تقرير من الرقابة أو من امانة مجلس الوزرا    عن عدد الغجراءات او عدد الشركات اللي تم الانتهاء من من اااا يعني خلصت إجراءاتها ولو في أي حاجة برضو صعوبات أو معوقات أرجو إنها تجيلي يعني. أنا باثق في الناس اللي موجودين هنا في مصر، حتى العاملين في الـ..  مش بس اللي موجودين في الـ.. في المراكز ديت، لأ أنا في ثقة كبيرة جدًا وعايز اقول إن جهدكم وحركتكم معانا هيصبوا في مصلحة بلدنا كلنا مش في مصلحة إنك إنت بتأدي عملك فقط، لأة، عشان كدا أرجو إن إحنا برامج التاهيل والتدريب للعاملين في هذه المراكز تبقى دايمًا موجودة ومتطورة عشان الناس الموجودة تبقى دايما  تستطيع إن هي تطور من أداءها وينعكس دا على العمل يعني. 

انا بس مش هطول كتير عشان كل الكلام اللي اتقال سواء في ال في التقديم اللي قدته دكتورة سحر أو حتى في الفيلم اللي عرض أو كدا بإن إحنا في مصر حريصين جدصا جدًا على إن إحنا نعطي فرصة لكل رجال الأعمال وكل المستثمرين الجادين اليل هم عاوزين يشتغلوا في مصر. 

اللي بيحكم مصر قانون.  اللي بيحكمنا في مصر قانون. واظن إن السنين اللي فاتت أكدت إن مش ممكن يتعمل إجراء خارج إطار القانون ضد أي حد منقدرش نعمل كدا، وعشان كدا يمكن البيئة التشريعية الموجودة دلوقت حطت إطار متكامل أو حطت تصور أو بيئة تشريعية ناضجة جدًا وجيدة جدًا وحاكمة جدًا لهذا الموضوع عشان الناس تبقى عارفة غنه محدش يقدر يمس حد، محدش هيقدر يمس أي حد إلا في إطار القانون اللي بيحكمنا كلنا من اول رئيس الجمهورية لغاية اي مواطن، في قانون والقانون دا ملزم لينا كلنا منقدرش نتجاوزه لأن الدول مبتتقامش غير بالقانون وبفكرة العدالة. 

اقرأ أيضًا: نص كلمة السيسي أثناء افتتاح حقل ظهر ببورسعيد "اللي عايز يلعب في مصر، لازم يخلص مني أنا الأول"

دي نقطة، النقطة التانية أنا بس عايز أقول للـ.. لكل اللي بيسمعني سواء كانوا مستثمرين مصريين أو حتى غير المصريين، إحنا بنتكلم على دولة فيها 100 مليون ودا يمكن اتقال بشكل مباشر أو غير مباشر يعني لو إحنا قدرنا نعمل صناعات تلبي مطالب الميت مليون دول في كافة القطاعات دا مشوار كبير قوي وافتكروا إن إحنا مبقاش عندنا، ااا، مش على قد موضوع المراكز بتاعة الاستثمار، إحنا مخليناش حاجة ممكن تساهم بجد في إن الاستثمار يتحرك بشكل جيد إلا لما عملناها. 

(صوت من شخص غير ظاهر في الكادر: البنية الأساسية)

البنية الأساسية اللي بنتكلم عليها ديت مكنش ممكن أبدًا نقول للمستثمر تعالى و هنا في مناخ جيد ويبقى عنده مشكلة كهربا او مشكلة حركة أو مشكلة مواني أو مشكلة مطارات أو تشريعات. كل دا كلام اتعمل وخد وقته عشان في الآخر تبقى الباقة الكاملة بتاعة الموضوع تكاملت أو البيئة الكاملة بتاعة الاستثمار في مصر بقت متكاملة وكدا. وبالتالي بنقول دلوقتي لأي حد عندنا هنا إنت عندك فرصة حقيقة لو إحنا كحكومة، كدولة قدرنا إن إحنا اداءنا يكون ينعكس أو يكون على قد مطالب رجال الاعمال والمستثمرين في أداءهم. يعني أنا اتحسب أتحسب إن إحنا نقول للناس خد كل الإجراءات خلصت مثلا يعني ويجد نفسه لما ييجي يخرج بقى يتعامل مع الواقع يجد إن لسة في أمور عايز يخلصها. يعني قلناله خد ورق الكهربا خلص وورق الغاز خلص ودا خلص وخد معاك الـ.. انا معرفش التفاصيل، يعني آجي يروح على الواقع بقى في المنطقة الصناعية اللي إحنا اتاحناله فيها او في المنطقة اللي أتاحناله فيها يجد نفسه يصطدم بإنه إزاي يتعامل مع الخدمة دي المقدمة ليه. وبالتالي برضو إحنا كدولة من خلال الرقابة ومن خلال أمانة مجلس الوزرا مسؤولين إن إحنا نشوف إحنا إدينا موافقات وخلصنا إجراءات ل 1000 شركة دول اللي اشتغل فيهم بالفعل كام على الأرض، يا ترى اللي إحنا عملناه فعلا نجح ولا الناس اصطدمت بعد كدا بحاجة تانية محتاجين إن احنا نتصدى ليها كدولة. 

في موضوع برضو الحقيقة عاوز اتكلم فيه، يمكن يكون مش سياقه هنا لكن لما قلنا على إن إحنا الكهربا والغاز ودا اليومين إللي فاتوا حصل نقاش كبير قوي، واهتمام كبير جدا من جانب المصريين على موضوع الغاز. وأنا بصراحة سعيد جدا بالنقطة ديت على عكس ما ناس كتير جدا تتصور، لأن أنا يهمني إن المصريين يبقوا مهتمين ببلدهم، وحريصين عليها وخايفين على كل قرش فيها وبيبصوا على مستقبلها، ويبقوا معانا في كدا، وأنا سعيد.

بس أنا هقول حاجة، وإحنا اهتمامنا ده، يستكمل بإن إحنا نجمع الموقف بشكل متكامل، وكمان إحنا كدولة، كحكومة، حتى لو كان الموضوع، يعني الحكومة مش طرف فيه، يعني الموضوع ده بتاع استيراد الغاز من إسرائيل، ده القطاع الخاص إللي عمله، لكن إحنا كدولة نتصدى، إحنا ماعندناش حاجة نخبيها، وماعندناش حاجة نداريها، لا، نتكلم وزي ما أنا بتكلم كدا، زي ما أنا بتكلم، بمنتهى الوضوح ده.

يا مصريين إحنا تقريبا، تقريبا، وفي كلام بردو هقدر أقوله، وفي كلام، مش كل الكلام ينفع يتقال يعني، لكن إللي إنتوا لازم تعرفوا، إن إحنا في مصر هنا تقريبا منتجاتنا، منتجاتنا إللي بنستهلكها كمشتقات سواء كان غاز أو سولار وبنزين وكلام من..، بيتراوح بين 1.3 مليار ل 800 مليون في الشهر. يعني لو قلنا متوسط تقريبا مليار جنيه حسب أسعار المنتجات ديت، يعني، يعني حوالي 12، 13 مليار جنيه في، دولار آسف، في السنة. ده حجم ال، ال، المشتقات إللي إحنا، أو المنتجات الطاقة، سواء كانت غاز أو مشتقات بترولية بنستهلكها في السنة.

لما تشوفوا ال، أنا بحاول دايما أتكلم في حاجات بسيطة جدا توصلك الرسالة، لو النهارده إنت بتشتري بمليار ونص دولار غاز من إسرائيل، ده معناه 125 مليون دولار شهريًا، أنا عايزك بس تحط الرقم ده في سياقه ضمن القيمة أو فاتورة الاستهلاك اللي إحنا بنستهلك بيها المنتجات في مصر، دي نقطة.

النقطة التانية، شوفوا.. ال، مصر عشان تبقى مركز إقليمي للطاقة في منطقة شرق المتوسط، في 3 خيارات، يا إما يبقى التسهيلات دي تقام في دول اللي اكتشف فيها الغاز في قبرص أو في إسرائيل أو في لبنان أو في مصر. ويتم هنا ساعتها تطلع الغاز إللي بيطلع من الحقول، أيا ما كان مكانه هو غاز خام بيحتاج لعمليات بتتم عليه عشان يصلح للاستخدام أو يصلح للتصدير، وبردو الكلام ده يتعمل يا عندنا يا يتعمل في قبرص يال، ال، إسرائيل، أو لبنان، أو أي دولة تانية قريبة مننا يعني، أو في مصر.

طيب.. إزاي مصر تبقى مركز إقليمي؟ واللي أنا هاقوله ده، أنا ، يعني، كنا دايما زمايلنا بيتكلموا يقولك إيه، ال، ال إحنا عملنا، لأ، أنا دايما أقول، إحنا عملنا لأن اللي قبل مننا كانوا بيعملوا بردو، مش كدة ولا إيه؟

(صوت: طبعًا)

فاللي انا عايز أقوله إحنا عندنا تسهيلات وعندنا منشئات للتعامل مع الغاز الحقيقة مش موجودة في دول كتير في منطقة المتوسط، أو عالأقل الدول إللي إحنا بنتكلم عليها دلوقتي، وبالتالي كان عند تصدير الغاز أو الاستفادة من الغاز اللي تم اكتشافه في شرق المتوسط في قبرص وفي اسرائيل، وان شاء الله في لبنان وفي غيره، تلت طرق، يا إما يطلع الغاز ده عن طريق تركيا، يا إما يطلع عن طريق الدول المنتجة بنفسها، يا إما عن طريق مصر.

وأنا بقول الكلام ده وجنب مني ال، ال، دولة الرئيس، وهو يعني أكثر خبرة وفهما مني في هذا الموضوع، بصراحة يعني، لأن هو، يعني، كان وزير بترول، ودولة رئيس مسؤول عن حاجات كتير، ويعرف كتير عني يعني، في هذا الموضوع. وبالتالي، طيب.. هل النهارده لما ال، ال، لما ال، لما مصر، بفضل الله سبحانه وتعالى، وبردو أنا لما، مابتكلمش على مين، آآآ، عمل كدا، أنا مابتكلمش على القطاع الخاص خالص، إحنا في قانون طلعناه، بينظم تجارة الغاز في مصر، ده كان قبل كدة الناس اللي بتشتغل في الصناعات المستهلكة أو كثيفة الاستخدام في الغاز، كان يقولك إن الدولة بتحط تكلفة كبيرة على الغاز المستخدم، مش كدا؟ ولو إحنا بنقدر نستورد، تكلفته علينا هاتبقى أقل، بس إدونا الفرصة دي، طيب..

إحنا عايزين ندي تكافؤ الفرص، ويبقى السوق حر في تداول عناصر الطاقة، وقلنا، طيب وماله، إحنا هانتيح للشركات إنها نستورد الغاز وتشتغل عليه، وإحنا كدولة يبقى التسهيلات اللي عندنا، اللي هي المنشآت اللي عندنا، ناخد قدام استخدامها مقابل، مش كدة وبردو ولا دا؟

يعني النهارده عايز حد يجيب غاز ويدخله على مصانع لانتاج الحديد والصلب الاسمنت السـماد، أو أي صناعات كثيفة أخرى، هايقدر يستخدم الشبكة بتاعة مصر، وناخد إحنا قدام منها مقابل هذا الاستخدام، أقول تاني.. يعني اللي هايجيب غاز النهاردة ويشلغه لصالح القطاع الصناعي في مصر، وبالتالي هو عايز يخليه استخدام غاز فقط، وماله، هايخش الغاز ده على منشآتنا تعمل الإجراءات ال، ال، التنقية، التكرير، المعالجة المطلوبة، ثم يضخه على الشبكة، يا الشبكة بتاعتنا، وإحنا ناخد مقابل إللي عملناه ده كله، يا إما يصدره، وده بردو إحنا هايبقى لينا مقابل فيه، وهو ياخد حقه.

ده، دي الحكاية، الحكاية باختصار شديد، فأنا لقيت الناس يعني إيه، مممم، يعني مستغربة، إزاي إنت بتقول حقل ظهر، وهايحققلنا الاكتفاء الذاتي، وفي نفس الوقت إنت، هتجيبوا غاز من حتة تانية. ما إحنا لو نجيب من حتة تانية، هانجيب طبقا لآليات السوق، يا رب توصلكوا القصة دي.. يعني هانشتري بكام؟ مش كدا؟ هانشتري بكام؟ إنتوا عارفين إحنا بنشتري إزاي حاجتنا؟ عارفين؟ (يضحك) لا دا إحنا بفضل الله سبحانه وتعالى، وأنا مش بقول كلام أرجو إنه يصل ليكو، لا إحنا جبنا جووون، إحنا جبنا جوووون يا مصريين في الموضوع دوت. مش كدا ولا إيه؟ (تصفيق)

النهارده مصر بفضل الله حطت رجليها على إن هي تبقى آآ المركز الإقليمي اللي إحنا بنتكلم عليه واللي كنا بنحلم فيه بقالي أربع سنين بحلم بالحكاية ديت، إن إحنا نبقى مركز إقليمي ل، آآ (يضحك منتشيا) للطاقة في المنطقة بتاعتنا، وده بيضيف، بيدي، آآآ، يعني له آآآ، إيجابيات كتيرة جدا جدا، والناس اللي هي الناس اللي بتبقى يعني، تبقى متطمنة على إن إحنا باللي إحنا عملناه ده، ومش بقول إن الدولة إللي عملته كحكومة، لكن الدولة أتاحت الفرصة بحاجات كتير قوي، حتى تتبوأ هذا الأمر، إن إحنا نبقى مركز إقليمي، كل الغاز إللي يطلع في المناطق والدول القريبة مننا ييجي عندنا إحنا، وبعدين إحنا نعمل عليه شغل ناخد عليه مقابل، ثم يصدر لدول أخرى، أو إذا كنا إحنا هانعمل عليه صناعات.

وهقولكوا، أرخص تكلفة، أو أرخص عائد، هو إنك انت تستخدم الغاز كطاقة في السيارات، أو في المنازل أو في المصانع كوقود، لكن الحقيقة الاستخدام الأفضل والأمثل اقتصاديا إنك انت تعمل بيه قيمة مضافة، يبقى مصانع للسماد مصانع للبتروكيماويات، وكل ما تتقدم هذه الصناعة عندك في هذا الموضوع، كل ما إنت يعني، العائد بيتعاظم، والقيمة المضافة إللي إنت خدتها أكتر كتير، من غير آآ يعني، أنا ماحبش أجيب أسماء دول، لكن عايز أقولكوا، في كوريا الجنوبية هي مابتـ، ماعندهاش غاز بتنتجه، ولكن هي دولة، عندها صناعة بتروكيماوات ضخمة جدا بتستخدم قدراتها التكنولوجية والكلام ده، في إن هي تستفيد، تجيب غاز من برا، وتعمل عليه الصناعات إللي هي عايزاها دي، وبعدين تعيد تصديرها تاني.

أرجو إن إحنا النقطة دي تبقى وصلالنا، أنا قلت كلام كتير يعني، لكن ألخصه.. إحنا يا مصريين بفضل الله سبحانه وتعالى، بهذا الإجراء، جبنا جون كبير قوي في حاجات كتير (تصفيق) ما أنا قلتلكوا، دا كان يطلع الغاز ده عن طريق أي دولة أخرى مش عايز أقول أسماء دول، يا إما عن طريقنا، لو كانت راحت عن طريق دولة تانية كنتوا هاتقولوا إنتوا فين يا مصريييين؟ وسايبين الدولة بتروح منكم! لا إحنا ما راحتش الدنيا مننا، والحاجة عندنا، وده استخدام حقيقي، وبقولكوا إنت ماتعرفش الشركات القطاع الخاص اللي اشترت دي، هو في حد في القطاع الخاص بيخسر؟ هو في حد بيخسر في القطاع الخاص؟ (يضحك) ده هم اشتروا الغاز ده بشطارة أكتر ما إحنا كدولة نقدر نشتريه، بصراحة يعني.

فأنا.. حبيت بس النقطة دي أقولها ليكم، وإهتمامكم يا مصريين بالموضوع محل تقدير واحترام واعتزاز مني خلي بالكو من بلدكو، واحرصوا عليها، وحطوا دماغكوا في كل حاجة، دي بلدكوا مش بلك حد تاني، ومش هاتقوم غير بيكوا إنتوا، وربنا يوفقكوا.. شكرًا جزيلًا.

 

ألقيت هذه الكلمة في احتفالية افتتاح مركز خدمات المستثمرين بمقر مبنى وزارة الاستثمار بحضور رئيس الوزراء ووزير الاستثمار والتعاون الدولي وعدد من أعضاء الحكومة.