نص كلمة السيسي في الاحتفال بعيد الميلاد بكاتدرائية العاصمة الإدارية الجديدة 6/1/2018

بسم الله الرحمن الرحيم،

اتفضلوا استريحوا، اتفضلوا استريحوا لو سمحتوا، ..

( أصوات زغاريد، هتاف: "بنحبك يا ريس!")

وإحنا كمان بنحبكوا.

واسمحولي إن إحنا.. إسمحولي إن أنا أقولكم، وقداسة البابا، ولكل الأِشقاء والأهل، ولكل مصر، ولكل العالم، كل عام وإنتم بخير، كل عام وإنتم بخير. (تصفيق)

وكمان مهم قوي إن إحنا، أهنيكم على الافتتاح الجزئي ده للكاتدرائية. الافتتاح ده رسالة، رسالة كبيرة قوي. طب اسمعوني طيب. طب اسمعوني.

(صوت: "بنحبك يا ريس!")

وإحنا بنحبكوا والله.

اسمعوني عايز أقولكوا حاجة بس. افتتاح الكاتدرائية النهارده، ده رسالة كبيرة قوي من مصر، مش بس للمصريين، لأ، ولا حتى للمنطقة، ده للعالم كله، رسالة سلام، ورسالة محبة. (تصفيق)

إحنا بفضل الله سبحانه وتعالى، بنقدم نموذج، بنقدم نموذج للمحبة والسلام بينا وبين بعضنا، هاتخرج المحبة وهاتخرج السلام من مصر، وهايعم العالم كله، صدقوني أنا. يمكن إنتم وإنتوا عايشين الأحداث إللي إحنا فيها دي، تقولوا معقول؟ معقول هايبقى في كدة؟ طبعًا هايبقى في كدة! طب ليه هايبقى في كدة؟ دايمًا بكرر وبقول: عمر الشر، عمر الشر، وعمر الخراب، وعمر التدمير، وعمر القتل، لا يمكن يقدر أبدًا يهزم الخير والبناء والمحبة والسلام، لا يمكن! (تصفيق) يمكن.. يمكن تقولوا، تقولوا، يعني، إزاي يعني؟ تقولوا إزاي ده هايحصل؟ هايحصل عايز أقولكم..

(صوت: "عاش السيسي وتحيا مصر! عاش السيسي وتحيا مصر!"، زغاريد)

أنا عايز أقول للناس كلها إللي بتتفرج علينا دلوقتي، يا ترى المحبة، يا ترى الفرحة دي، الفرحة إللي إحنا شايفينها في الناس إللي موجودة هنا والناس إللي بتتفرج علينا، تساوي كام؟ تساوي إيه؟ ليه إحنا مش شايفين الخير والسعادة بينا وبين بعضنا؟ ليه إحنا مش شايفين غير الأذى؟ أنا مش بتكلم على حد بعينه، أنا بتكلم إن إللي أنا بقوله ده، وإللي إنتوا شايفنه ده، بكرة بفضل الله سبحانه وتعالى..

(صوت :"بنحبك يا ريس!")

وإحنا والله كمان بنحبكم، خلي بالكم، خلي بالكم إنتم أهلنا، وإنتم مننا، وإحنا واحد، وماحدش أبدًا، أبدًا، هايقدر يقسمنا! (تصفيق) ماحدش يقدر يقسمنا! ماحدش يقدر يقسمنا أبدًا، ودي بردو رسالة تانية، دي بردو رسالة تانية.

إوعوا في زحمة الأحداث إللي إحنا فيها ديت، وفي زحمة الـ..، وفي زحمة الـ..، يعني، الألم ده، وأنا الحقيقة ماكنتش عايز أكلم قداسة البابا في أي آلام، صحيح! مش عايز أتكلم في أي آلام. الآلام، يعني، بتئذينا كلنا.

فـ.. أنا مش عايز أطول عليكوا، ولا على قداسة البابا عشان تبدأوا صلواتكم، وأنا سعيد إن إحنا موجودين هنا، وموجودين وإنتوا فرحانين كدة، ويارب يقدرنا إن إحنا ندخل الفرحة على كل الناس في مصر، كل الناس بدون تمييز، كل الناس، طبعًا، طبعًا. (تصفيق)

أنا بشكركم على حفاوة الاستقبال وتحيا مصر بيكوا، تحيا مصر بالمصريين! (تصفيق) تحيا مصر بالمصريين! وبقولكوا تاني، ماحدش أبدًا هايقدر على مصر، طول ما مصر كدة (يقبض على يده) إوعوا تنسوا دي، إللي عايز يئذينا بيفرق بينا، إللي عايز يئذينا بيفرق بينا، ويخلينا إن إحنا ناكل بعضنا البعض، ده مش هايحصل، كل سنة وإنتوا طيبين، وعام سعيد عليكم وعلينا وعلى الدنيا كلها، وكل سنة وانت طيب يا قداسة البابا، وكل سنة وإنتوا طيبين، كل سنة وإنتوا طيبين.

ألقى الرئيس المصري عبد الفتاح السيسي هذه الكلمة أثناء مشاركته في قداس عيد الميلاد بكاتدرائية العاصمة الإدارية الجديدة.