نص كلمة السيسي خلال اجتماعه مع وزير الاتصالات وتكنولوجيا المعلومات ومدير الأكاديمية العسكرية المصرية 28/5/2025
https://www.youtube.com/watch?v=11fYWBhBov0
السيسي: أنا رسالتي اللي أنا عايز أقولها لل.. لل.. مش بس للشباب والشابات.. أنا عايز أتكلم رسالتي تبقى كمان للأصغر. الكلام اللي إحنا بنتكلم فيه ده وبنقول فيه إن هو.. إن سوق العمل كله خلال المرحلة اللي هي القادمة، مرتبط بالرقمنة.
عندنا فرصة كويسة، الدولة بتوفرها، وحطينا أجهزة الدولة كلها بالكامل مع بعضها إيديها في إيدين بعض عشان تخرج هذا الأمر بشكل يليق بمصر، وأيضا بـ.. بالشباب والشابات اللي هم هيبقوا يلتحقوا بيها.
إوعوا تفتكروا إن الموضوع ده عشان يتعمل، وأنا ما أقصدش لما بتكلم في أرقام وكدا أقصد بيها أكتر من إن أنا عايز أقول آآ مدى قناعتنا بالموضوع بنترجمه لإجراءات آآ وبتتكلف كتير، يعني الإعداد للمكان فقط اللي بنتكلم فيه، والمعامل اللي ممكن تعملوها آآ في ال.. في الكلية عشان تأدي الدور المطلوب لها، إنت بتكلمني في 5000 جهاز آآ لازم يكونوا موجودين أحدث حاجة، مش كدا؟
وزير الاتصالات: تمام
السيسي: فده كنا بنـ.. ده وتجهيز بقى ال.. البنية التحتية الخاصة بيهم و.. سواء كان طاقة كهربائية زيادة شوية، أو كابلات مطـ.. يعني الشق ده اللي بيتعمل.
أنا بقول، بقول للناس اللي بتسمعني، إحنا بنعمل ده كله عشان ندي فرصة لولادنا وبناتنا لتعليم متقدم جدا، جدا، ولما بقول آآ زي ما الدكتور عمرو بيقول إن إحنا هنعمل إقامة لكل الناس، إحنا بنعمل نظام، بنعمل إيه، برنامج متكامل يهدف منه ال.. يعني حشد الطاقة والجهد من جانبنا، ومن جانب الطلبة الموجودين، عشان يقدروا يستوعبوا آآ أكبر حجم في أقل وقت، مش كدا؟
وزير الاتصالات: تمام.
السيسي: ويبقى الجدية هي المطلوبة مننا إحنا الاتنين، وإحنا بنقوم بالدور ده، و.. وال.. المتخصصين اللي هيقدموا، هيعلموا، والشركات اللي هتقدم والجامعات اللي هتقدم التعليم، وأيضا للناس اللي هتستقبل التعليم مننا، يبقى فيهم الجدية الكاملة عشان الفكرة اللي إحنا بنتكلم فيها، مش على قد 3 مليار.. أنا عايز أقول يعني.. ولا عشرة مليار جنيه.. وأنا مش مبالغ في الكلام اللي بقوله ده، بس هل ده قليل أو ده كتير على شبابنا وشاباتنا؟ لا مش كتير، مش أكتر من حق إيه.. حق النتيجة.. النتيجة اللي إحنا بنتمناها ليهم.
فـ.. إنت بتقول 3 شهور، وأنا بقول إن المدة 3 شهور كتير، لأن إحنا عايزين طبقا للتخطيط اللي إحنا كنا عاملينه قلنا يا دوبك 6، 7.. فأتمنى إن إحنا في شهر 7 نكون أنهينا كل الإداريات اللي موجودة.
وعايز أطمن ال.. الشباب والشابات اللي موجودين إن إحنا آآ بنجهز آآ لكم كل شيء بما يليق بمصر وبيكم في إن إنتم تتلقوا وتعيشوا بشكل آآ يعني.. كريم جدا جدا أثناء فترة الدراسة اللي ممكن تمتد، من 4 شهور؟ لغاية سنتين، مش كدا؟
وزير الاتصالات: تمام.
السيسي: فـ.. هو زي ما قال الدكتور عمرو، ده.. ده، يعني، الدولة عاملة المبادرة دي آآ بدون مقابل، ولكن آآ يعني هيبقى أرجو إن إحنا يبقى في عندنا التزام لأن إحنا مش آآ يعني اللي هيخش يبقى ملتزم بإن هو، بقولها بمنتهى الوضوح عشان ده شق مهم قوي، إن إنت بتاخد مكان لو إنت هتسيبه إنت خدت مكان حد تاني، فمن فضلك، أو من فضلِك اللي هتيجي تخش معانا، تبقى طبعا طبقا للمعايير اللي هتتعمل، الاختبارات اللي هتتعمل بتأكد ده، بتأكد إن.. إن هو صالح أو صالحة إن هي تخش آخد الجرعة العلمية في ال.. في المستويات الأربعة اللي إنتم.. مش أربعة بردو؟
وزير الاتصالات: أربعة آه.
السيسي: في ال 4 مستويات اللي إنتم حاطينها، اللي هي من أول يعني مستوى مش كبير قوي أو قوي قوي، لغاية مستوى متقدم جدا. في النهاية، آآ مع بعضنا، مع بعضنا، نقدر نعمل حاجة كويسة.
رسالتي مرة تانية للشباب والشابات المتقدمين، إحنا جادين في هذا الأمر، وأرجو إن الجدية دي تترجم مننا كلنا، كدولة أو من آآ الشباب والشابات إلى جدية في تلقي المعرفة دي، والموضوع هيتعمل بلا أي نوع من المجاملات على الإطلاق، الموضوع هيتعمل آآ معايير تحترم الكل، وطبقا لهذه المعايير هيتم آآ التعاون مع وانتقاء ال.. الدارسين إن شاء الله.
أتمنى إن ربنا سبحانه وتعالى يوفقنا في هذا الأمر، وبقول تاني للأسر، من فضلكم اهتموا بهذا التعليم وبهذه الدراسات، هو ده المستقبل، مش ده المستقبل، ده الحالي والمستقبل. نسب النمو في القطاع عندنا في هذا القطاع هي أعلى نسب على الإطلاق، مش كدا؟
وزير الاتصالات: تمام يا فندم.
السيسي: 16%؟
وزير الاتصالات: 16%.
السيسي: 16% هي أعلى نسب على الإطلاق، ده معناه إيه؟ إن هو قطاع عنده آآ فرصة نمو كبيرة قوي قوي، إن شاء الله بالتوفيق، وإن شاء الله على معادنا. متشكر ليكم.