نص كلمة السيسي خلال استقباله وفد رجال الأعمال الأمريكيين المشاركين في المنتدى الاقتصادي المصري الأمريكي 26/5/2025
https://www.youtube.com/watch?v=DVC6C2D2Ir8
أرحب بكم في مصر، وأرحب كذلك بكافة رجال الأعمال وممثلي الشركات الأمريكية في المنتدى الاقتصادي، وقيادات غرفتي التجارة في واشنطن والقاهرة.
واسمحوا لي إن أنا أأكد على استعدادنا الكامل لأن يكون عقد هذه النسخة من المنتدى الاقتصادي مجرد بداية لسلسلة من الفعاليات الأخرى، بما في ذلك التنسيق لعقد نسخة أخرى قبل نهاية هذا العام، وفي مطلع عام 2026، وأؤكد حرص الحكومة المصرية على مواصلة الحوار البناء مع جميع الشركات المشاركة، ونرحب أيضا بالشركات الجديدة التي لم يسبق لها العمل في مصر، وأؤكد لكم جميعا على أن مصر تعتبر فرصة ممتازة للمستثمرين، والاستثمار.
واسمحوا لي إن أنا، يعني إنتم إمبارح في المنتدى كان فيه نقاش كبير جدا جدا على آآ كل الأعمال أو الفرص اللي ممكن الشركات الأمريكية آآ تعمل بيها في مصر في المجالات المختلفة. سوق كبير مصر. فيه بنية أساسية جاهزة إنها تبقى قادرة على استيعاب أي استثمارات. فيه قوانين بتضمن الاستثمارات. فيه يعني أنا بتكلم منها قوانين يعني البنية التشريعية بتاعتنا بقت صالحة إنها تشجع الاستثمار. ثم أيضا فيه مناطق في مصر، زي المنطقة الاقتصادية لقناة السويس، عندها فيه امتيازات للشركات اللي ممكن تشتغل معانا في مصر في منتجاتها يعني.
بذلنا جهد كبير قوي خلال ال 10 سنين اللي فاتوا عشان نحقق للمستثمر، أي مستثمر، فرصة حقيقية في سوق كبير، السوق المصري النهارده ممكن يبقى أكتر من 110 مليون، ثم سوق المنطقة العربية، ثم السوق الأفريقي اللي فيه أكتر من مليار ونص.
وإحنا يمكن أثناء لقاءنا مع.. يعني.. اللي قبل كدا، وكنا نقول يعني علاقتنا دايما علاقات متوازنة جدا مع شركاءنا في أفريقيا وأصدقاءنا والدول الأفريقية بالكامل، ودي نتيجة سياسة متوازنة بقى لها سنين طويلة قوي إحنا حريصين عليها، وبالتالي، الشركات الأمريكية اللي هتعمل معانا في هذه المشاريع هتستفاد أيضا من هذه العلاقة بإن الأسواق دي تبقى جاهزة و.. إنها تستقبل المنتجات والصناعات الأمريكية اللي ممكن نعملها في مصر.
إحنا ملتزمين معاكم بإنجاح الشراكات اللي هتتم للشركات الأمريكية في مصر. الإنجاح ده زي ما قلت كدا من خلال ال.. النوايا قبل كل شيء ال.. الحسنة من جانبنا، ثم أيضا بالإجراءات اللي إحنا عملناها خلال السنين اللي فاتت عشان تبقى مصر وجهة آآ مناسبة آآ مشجعة للاستثمار فيها.
عندنا عمالة تكلفتها ما تقارنش بأي مكان تاني، الطاقة أسعارها بتعتبر آآ أسعار يعني منافسة جدا جدا، ثم زي ما قلت كدا ال.. الامتيازات اللي إحنا بنقدمها عشان آآ الصناعات أو الاستثمار اللي موجود هنا يبقى يبتدي فرصة كويسة.
برحب بيكم، وهبقى سعيد جدا جدا إن إحنا نتقابل في شركاتكم اللي هتفتح في مصر، سواء كانت من جانبكم، كشركات أمريكية خالصة، أو باستثمارات وشراكات مع القطاع الخاص المصري اللي هو إن شاء الله قادر أيضا على إن هو يحقق شراكات ناجحة بين المصريين وبين الشركات الأمريكية.
بعتبر الرئيس ترامب فرصة، فرصة كبيرة جدا، لأن هو بيشجع على الاستثمار وعلى العمل، وعلى آآ التعاون، وخاصة التعاون الاقتصادي بين البلدين.
مرة تانية أنا برحب بيكم أهلا وسهلا، سعداء بوجودكم معانا، هنبقى سعداء أكتر باستثمارات من جانبكم، بصناعات من جانبكم، وإحنا من جانبنا هنقوم بكل ما يلزم لإنجاح هذه الشراكة.
ألقيت الكلمة في القاهرة بقصر الاتحادية، في 26 مايو 2025، حيث استقبل الرئيس عبد الفتاح السيسي وفد رجال الأعمال الأمريكيين المشاركين في المنتدى الاقتصادي المصري الأمريكي.