نص كلمة السيسي خلال فعاليات موسم حصاد القمح 21/5/2025
https://www.youtube.com/watch?v=eQT2QbHSqv4
السيسي: اسمح لي يا بهاء...
مدير جهاز مستقبل مصر للتنمية المستدامة: أوامر سيادتك يا فندم.
السيسي: معلش ها أتدخل.. ارجع ل.. ارجع.. ارجع.. كمان واحدة.. كمان واحدة.. اللي قبلها.. اللي قبلها لو سمحت..
مدير جهاز مستقبل مصر: ارجع لو سمحت.. ارجع..
السيسي: لا لا اللي هي الزراعة بس..
مدير جهاز مستقبل مصر: الزراعة.
أنا بس هنا هأتوقف عند النقطة دي عشان نكلم بعضنا يعني.. أنا عايز أقولكم إن إحنا لما نيجي نقول فيه تخطيط، أنا بكلم الحكومة وبكلم المستثمرين، وبكلم كل من يقدر يساهم معانا في إن إحنا ننجح الفكرة اللي إحنا بنتكلم فيها.
لما نيجي نقول إن إحنا عايزين ندخل الأرض دي للزراعة، بيبقى بـ.. بيقابلنا تحديات، مش التمويل بس، ولكن التنفيذ، يعني لما نيجي نتكلم على البنية الأساسية المطلوبة للزراعة، فالبنية الأساسية بتبقى طاقة المفروض إنها تبقى موجودة، والبنية اللي بتخدم على الزراعة، سواء كان طرق ومدقات وكلام من.. وشبكة الكهربا، وحاجات كتير يعني.. لما إنت بتفقدني فرصة، لو أنا بقول عايز أدخل 600 ألف فدان، أو 800 ألف فدان للزراعة، لو ضيعت مني سنة، نتيجة أي شيء، إن إحنا تنسيقنا مكانش كفاية، أو عزيمتنا مكانتش كفاية، مش هأقول التمويل لأن لو ما فيش تمويل هنجيب منين يا دكتور مصطفى؟ لو مفيش تمويل مش هنقدر نعمل ده.
لكن أنا بتكلم على حاجة تانية، بتكلم على إن أنا لما أضيع مني موسم زراعي، بتضيع مني سنة. طب ال 800 ألف فدان أو ال 600 ألف فدان، تفتكروا متوسط دخلهم في السنة كام؟ يعني نقول 50 ألف جنيه الفدان يا دكتور؟ نقول 50 ألف يا بهاء؟
مدير جهاز مستقبل مصر للتنمية المستدامة: طبعا سيادتك..
السيسي: يعني كام؟ 30 مليار، مش كدا؟
مدير جهاز مستقبل مصر: طبعا سيادتك.
السيسي: يبقى.. ولا إيه؟ يبقى إنت ضيعت مني، مش مني أنا يعني، ضيعت من مصر فرصة 30 مليار، آه إنت هتاخدهم السنة الجاية إن شاء الله، بس كنت ممكن تاخدهم السنة دي والسنة الجاية، فبدل ما كنت تاخد في السنتين 30، لأنك زرعت بعد سنة متأخر نتيجة أي أسباب أنا مش عارفها، لأ زرعت السنة دي ب 30 والسنة الجاية ب 30 مع الوضع في الاعتبار إن كل إنت ما بتزرع، جودة الأرض يتتحسن، والخبرات بتتحسن.
ثم.. هو النهارده ال 600 ألف فدان، هيشتغل فيهم كام؟ ال 600 ألف فدان، يشتغل في ال.. يعني يشتغل فيهم كام؟ فرد على الفدان؟ فرد؟ هه؟ خلينا نقول فرد، يعني الفريق عبد المجيد بيقول 3، أنا هأقول واحد.. يعني 600 ألف، يعني 600 ألف إنسان، لو كل إنسان ورا منه أسرة، يبقى فيه 600 ألف أسرة ابتدت إن أنا أدخل لهم دخل مش هيقل عن 7000 جنيه في الشهر، ولا أنا بقول كلام بعيد يا بهاء؟
مدير جهاز مستقبل مصر للتنمية المستدامة: طبعا.. أقل حاجة سيادتك يا فندم.
السيسي: مش كدا؟
مدير جهاز مستقبل مصر: أيوة يا فندم.
السيسي: يعني، يبقى النهارده فيه 600 ألف أسرة أنا حرمتهم، طب حرمتهم ليه؟ إحنا بنقول ما إحنا ممكن يعني قاعدين قعدة جميلة والدنيا حلوة، أيوة الدنيا حلوة بس لازم أنا أقول الكلام ده عشان وزير الكهربا يحط إيده معايا بقوة، وزير الري يحط إيده معايا بقوة، أي حد معني.. وزير الزراعة يحط إيده معايا بقوة، ويبقى إحنا قاعدين بنذاكر وبنتابع كلنا مع بعض، مش بس جهاز مستقبل مصر، لأ، حتى المستثمرين الموجودين بتوع القطاع الخاص، ما هي الأرض دي متاحة لكم، الأرض دي إيه يا بهاء؟
مدير جهاز مستقبل مصر للتنمية المستدامة: متاحة سيادتك يا فندم.
السيسي: وإحـ.. أنا بتكلم صحيح يعني.. النهارده إحنا هنبقى قطعنا الشوط الكبير في تجهيز الأرض للزراعة، لا إنت محتاج توصل لها ميه، ولا محتاج توصل لها كهربا، ولا محتاج تعمل لها طرق ومدقات، إنت داخل بس حتى معدات الزراعة إذا كنت أنا فاهم، إذا كان بيفوت ولا كده هيبقى موجود، يعني إنت كل اللي مطلوب منك إنك تعمل خدمة أرض عشان تطلع إنتاج.
وبصراحة يعني إحنا عايزين القطاع الخاص يبقى موجود في المجال ده يا دكتور مصطفى على حجم، على حجم المتاح، إحنا بنتكلم في أرقام كبيرة جدا آآ ها نعملها.
لما ييجي نتكلم على مشروع، وأنا بقول الطاقة يمكن عشان برضو يبقى الأمر واضح، ما هو الشغل ده كله ما بيمشيش من غير كهربا، وعشان توصل الكهربا للأماكن دي، مش كلها يعني دي كلها ممكن تكون خارج نظام الشبكة بتاعتنا يا دكتور مصطفى، وبالتالي فيها استثمارات كبيرة بتتعمل عشان توصل الكهربا هنا، يعني الدكتور محمود كان بيكلمني على إن هو عشان يدخل الطاقة لل 2.2 مليون فدان، تـ.. أنا بتكلم بعيد عن ال.. عشان ندخل الشبكة كبنية أساسية، غير بقى الطاقة المتولدة نفسها، بيتكلم في عشرات المليارات.
أنا بقول للناس الكلام اللي أنا بوسع فيه ده يا بهاء..
مدير جهاز مستقبل مصر للتنمية المستدامة: طبعا سيادتك.
السيسي: إنت يعني الطرح بتاعك بتقول المسار ده كويس، لكن أنا عايز أقول للناس اللي موجودين معايا وبيسمعوني، إن عشان أدخل 100 ألف فدان للزراعة الحقيقية، وإلا ما كانتش... كان ال.. اللي قبلنا واللي قبلنا واللي قبلنا، كانوا قدروا يعملوا ده بسهولة، ما دام العملية..
مدير جهاز مستقبل مصر للتنمية المستدامة: سهلة.
السيسي: يعني.. ياللا إعمل، طب ما هو كله بيقول ياللا نعمل. لأ، إحنا بنتكلم عشان تعمل بنية أساسية وتكلفة ال 100 ألف فدان، إنت بتتكلم على الأقل من 200 ل 300 ألف جنيه للفدان، ده على فرضية إنك إنت عندك محطات طاقة كهربائية مش هاتعملها، إنت هتنقل الكهربا بس مولدة منها، مش كدا يا دكتور؟ طيب.
ما إنت بتتكلم في 200، 300 ألف جنيه للفدان بنية أساسية عشان تخليه في الآخر قابل للزراعة، من أرض صحراوية مرمية مالهاش قيمة، لأرض بتنتج، يعني ال 600 ألف، يعني المليون يتكلفوا قد إيه؟ 300 مليار، مش كدا يا دكتور؟ من 200 ل 300 مليار.
أنا عايز أقولكم عشان ده يطلع، الحكومة والدولة بتبذل جهد كبير جدا جدا عشان تطلع هذا الأمر. يمكن آآ يعني زملائي، زمايلنا ومواطنينا من القطاع الخاص يقول لك طب تحيي الأرض دي وأنا هأعملهالك، وده، وده كلام مهم بردو.
هأقولكم أنا بس عشان بعمل بنية أساسية مركزية، لو أنا النهارده قلت لك خش اعمل إنتو إنت تقدر تعمل مفيش كلام بس هتعمل لك 5000 فدان، 10000، وبعدين هيبقى شغل مش.. آآ.. داخل لك الكهربا، طب الكهربا ما دخلتش، طب ما هو وزير الكهرباء، فأنا قلنا لا إحنا هنعمل عمل مؤسسي للدولة هي الدولة تنظمه بالكامل ثم بعد كدا يا دكتور مصطفى نتيحه للقطاع الخاص جاهز أهو، أكني بقول لك خد اتفضل، عايز تخش تشتغل، عايز تاخد حق انتفاع، أهلا وسهلا، عايز تأجر أهلا وسهلا، عايز تشتري، معندناش مشكلة خالص.
أنا بس كان حبيت أقول النقطة دي عشان ال.. ال.. التوقيت اللي إحنا بنتكلم فيه كل ما هندخل الأراضي الزراعية اللي إنت بتعلن عنها دي يا بهاء، واللي الناس مبتشوفش.. ما أقصدش مبتشوفش عشان هي مش عايزة تشوف.. عشان فيه تفاصيل كتير جدا في ال.. في ال.. يعني في المشروعات اللي زي كدا، وجهد كبير وتكلفة كبيرة عشان في الآخر تخرج وتبقى آآ مشروع يشتغل يعني.
فمهم قوي إن إحنا نقول لهم إن لما نيجي نقول عايزين بفضل الله سبحانه وتعالى ال 500 ألف فدان بتوع سينا يخشوا في الخدمة، يبقى محافظ شمال سينا، يبقى محافظ بورسعيد والإسماعيلية، يبقى التنمية المحلية، يبقى الكهربا، يبقى الري، يبقى الزراعة، يبقى بهاء كلهم قاعدين ليل ونهار يخلصوا عشان في النهاية لما تدخل ال 500 ألف فدان السنة دي غير لما تدخلهم السنة الجاية.
مش بس كدا، انا بتكلم على يعني تخيل بقى إنك إنت أتحت 500 ألف فدان في سينا إضافيين بيزرعوا، يعني 500 ألف أسرة، يبقى الطرق اللي إحنا عملناها والأنفاق اللي إحنا عملناها والكهربا اللي إحنا دخلناها والسكة الحديد اللي كامل وزير بيعملها دلوقتي وهتوصل لغاية العريش وطابا يا كامل؟ مش كدا؟ بقى ليها قيمة، يبقى مليارات المليارات اللي إحنا صرفناها هتنتج هتاخد المواد دي سواء لأهل سينا أو للناس في الدلتا يعني.
كان لازم بس أتدخل يا.. بهاء، عشان أقولك أنت قلت في سبتمبر اللي جاي هأدخل 800 ألف فدان، صح يا دكتور؟ صح يا بهاء؟
مدير جهاز مستقبل مصر للتنمية المستدامة: تمام سيادتك يا فندم.
السيسي: يبقى إن شاء الله، إن شاء الله نشوف، هنشوف ال 800 ألف فدان دول في سبتمبر اللي جاي.
أنا عارف إن لحد دلوقتي فيه شغل بيتعمل على الأرض بين طاقة وبين بنية أساسية، والمفروض إنها تخلص في شهر 6. أرجو الناس اللي، يعني، سواء كان قطاع خاص، أو دولة، إن الموضوع ده نحط إيدينا في إيدين بعض عشان في شهر 8 تبقى الأراضي دي جاهزة آآ ال 800 ألف فدان دول اللي بيطرحهم بهاء يبقوا قابلين للزراعة. شكرا جزيلا.
مدير جهاز مستقبل مصر للتنمية المستدامة: إن شاء الله يا فندم.
السيسي: اسمح لي يا بهاء هنرجع..
مدير جهاز مستقبل مصر: أوامر يا فندم.
السيسي: هنرجع للثروة الحيوانية.
مدير جهاز مستقبل مصر: للسلايد اللي قبله...
السيسي: طيب. أنا بس هنا هاتوقف عند النقطة دي وأقول لكل الناس في مصر اللي بتسمعني. ال.. ال.. لما يكون فيه ظروف اقتصادية صعبة لبلد، وعايزة تتجاوز المشكلة دي، بتخش في تفاصيل وبتعمل خطط قد يراها البعض، يعني، يعني صعبة يعني، مستحيلة يمكن، مش كدا يا دكتور؟
هنا هأتكلم على الثروة الحيوانية. شوفوا، إحنا اتكلمنا في النقطة دي قبل كدا، والكلام ده يمكن من 3، 4 سنين، ووزير الزراعة موجود، وإنت موجود، وكتير.. والقطاع الخاص موجود دلوقتي سامعني.. فيه راس ماشية بتاكل وتشرب زي الراس الماشية المصرية اللي هي متمش، يعني، تحسينها والسلالة بتاعتها، دي تطلع كيلو اللحم في اليوم، ودي تطلع 1.5 و 1.8 كيلو لحم في اليوم، بنفس الأكل.
إذن، يبقى لو إحنا عندنا في مصر ثروة حيوانية، ونقعد مصرين، مش مصرين، مش قادرين نغير الواقع بتاعها، ونقول إن إحنا ال.. ال.. حجم ما لدينا من ثروة حيوانية في الماشية، مش قادرين بعد ما اتكلمنا في النقطة دي، سواء لإنتاج اللبن أو لإنتاج اللحوم، بعد 5 سنين مقدرناش نحل المسألة دي؟
يعني عشان نحل دي يا بهاء، إنت لازم يكون عندك آآ 200، 300، 400 ألف راس.. أنا بتكلم كلام، عشان نقول للناس إيه، ناخد الأبقار اللي موجودة في، عندنا، اللي هي نموها كيلو، ونعمل إحلال بال إيه.. يبقى ال.. المواطن المصري المزارع المصري اللي عنده راسين أو 3 أو أي حاجة، بعد ما كان عنده بنفس الأكل ونفس الميه ونفس الخدمة، يطلع في الشهر للراس الواحدة زيادة 30 كيلو، ها يطلع في نفس الوقت للراس الواحدة 45 كيلو.
كدا غنيته ولا ما غنيتوش يا بهاء؟
مدير جهاز مستقبل مصر: غنيته يا فندم.
السيسي: غنيته.. زي ما بقول، بدل ما بيطلع 7، 8 كيلو لبن للراس الواحدة في اليوم، بيطلع 30 و 40 كيلو للراس الواحدة. أنا كدا غنيته ولا ما غنيتوش يا دكتور؟
يبقى لو أنا عندي مليون راس. بدل ما يطلعوا 8 مليون كيلو لبن في اليوم، ها يطلعوا 40 مليون كيلو. ده يخش الإنتاج، يتعمل منهم منتجات اللي هو لا صناعة اللي بيقول عليها بهاء في إن إحنا ما ينفعش أبدا نستخدم الحاجة بتاعتنا خام يعني، فيه ألبان تبقى منتجات ألبان، عشان نستفيد منها وعشان يبقى فيه قيمة مضافة.
معقول بعد كل ده، أبقى أنا بودرة ال.. لبن البودرة ال 40، 45 اللي بنجيبهم، لغاية دلوقتي وأنا بتكلم، ما يتعملش مصنع، يا كامل، لإنتاج لبن الأطفال في مصر؟ واستورده. ما يتعملش مصنع لعلب ال.. الكلام ده أنا قلته قبل كدا من 4، 5 سنين.. 4، 5 سنين..
امسكوا في موضوع موضوع، وخلصوه.. أنا بقول الكلام ده مش للحكومة بس.. بقوله للمستثمرين، لرجال الصناعة، للقطاع الخاص، للغرف يا كامل.. يا جماعة إذا كنتو عايزين تنقلوا بلدكم من وضع لوضع أفضل، ده مش هيبقى سهل. إنت هتفضل تصر على موقفك وتفضل تبحث وتجري، لغاية لما ربنا سبحانه وتعالى يسدد خطاك في اللي إنت بتعمله.
فلو إنتم عايزين، أنا، أنا ممكن يا بهاء كنت أسيبك تقول اللي أنت عايزه كله في ال 40، 50 دقيقة اللي إنت حاططهم وخلاص، لكن إحنا عايزين نستفيد كمواطنين، كمزارعين، كرجال صناعة، كرجال زراعة، كحكومة، من اللي إحنا بنقوله ده عشان نصر على إن إحنا نغير الواقع اللي إحنا موجودين فيه ده.
يبقى تيجي تقول لي 100 ألف راس و 200 ألف راس.. المزارع اللي موجودة عندكم إنتم ووزارة الزراعة قادرة على استيعاب كمية أكبر من كدا. ومش هات.. الفلاح في مصر، مش هيقدر يغير راس الماشية اللي عنده دي بالراس اللي أنا بتكلم عليها دي بسهولة. دي لازم يبقى في برنامج نعمله. أنا بدل ما أطلع، عشان ما حدش يفهمني غلط بس في ال.. تكافل وكرامة، ما أقصدش.. لكن أنا ممكن لما أخلي بدل ما أدي فلوس كل شهر، أنا ممكن أدي حاجة من دي تغني الناس، إنتاجها في اللحوم ولا إنتاجها في ال..في الألبان يغني الناس.
طب إزاي؟ إزاي نقدر نعملها مع بعض؟ هل ده معناه إن الراجل اللي في القطاع الخاص ميكسبش؟ لا يكسب. مفيش كلام لأن إحنا مفيش حد هيشتغل من غير ما يكون فيه عوايد لاستثماراته، وإحنا معاكم، بس بصوا للكلام اللي احنا بنقول عليه ده وصروا عليه.
أنا آسف أقول لكم، لموا للمدبوح الأبقار اللي هي إنتاجها مش كبير يا دكتور مصطفى، وحلوا محلها بال.. باللي إنتاجه كويس، يبقى في خلال 4، 5 سنين، أكتر أقل، بقى عندنا ثروتنا الحيوانية كلها تم استبدالها بسلالات إنتاجها للحوم أكبر وإنتاجها للألبان أكبر.
إنتم عارفين ده على مستوى الدولة يعمل إيه؟ ده يبقى حاجة تانية خالص، لو إحنا عندنا 2، 3 مليون راس، أكتر ولا أقل، أنا بتكلم عالـ.. في الريف يعني مش بتكلم على مزارع، لا إنت زودت الخير للناس بشكل كبير قوي.
نرجع لل.. ال.. السلايد اللي بعده لو سمحت.
مدير جهاز مستقبل مصر للتنمية المستدامة: للي بعده لو سمحت.
السيسي:اللي بعده..
مدير جهاز مستقبل مصر: اللي بعده..
السيسي: لا السمك.
مدير جهاز مستقبل مصر: لا هات الثروة السمكية بين ناصر والبردويل.
السيسي: لا مش ناصر والبردويل بس. وأنا بقول الكلام ده عشان كل الناس اللي شغالة في الأماكن دي، والمحافظات اللي واقعة فيها البحيرات دي، تنتبه لده، ليه؟ إحنا عندنا شواطئ ممتدة كبيرة قوي، وعندنا بحيرات.. 14؟ البحيرات، حوالي 14، منهم الكبير ومنهم الصغير، ل 500 فدان يعني. طيب.
البحيرات دي ثروة آآ محتملة، مش للدولة بس، للعاملين في المجال، ولكن اللي عامل في المجال في بحيرة ناصر ممكن يكونوا 30، 30 ألف صياد؟ بهاء
مدير جهاز مستقبل مصر: سيادتك هناك في بحيرة ناصر يا فندم حوالي 3500 صياد يا فندم
السيسي: ناصر.
مدير جهاز مستقبل مصر: ناصر بس
السيسي: 3000؟
مدير جهاز مستقبل مصر: أيوة يا فندم، والبردويل سيادتك...
السيسي: لأ.. 3000؟
مدير جهاز مستقبل مصر: 3000
السيسي: أنا موافق. أتمنى إن يكون العدد كدا. أنا بقول للناس اللي هنا في البحيرة، طول ما إحنا ما بنستخدمش طرق صيد جيدة وبنستخدم أساليب علمية في تنمية الثروة بتاعتنا، هتفضل إنت كصياد دخلك محدود. يعني أنا بقول لك كدا عشان تتعاون معايا، وتعرف اللي أنا بعمله معاك مش الهدف منه إني أمنعك أو أخسرك، بس إنت عايز تصبر معايا سنة أو سنتين، طب ليه؟ لأن فيه آآ في البحيرات دي نظام بيئي لازم نحافظ عليه، عشان إنتاجها بدل ما يبقى 20 و30، يبقى 60 و80، هي هي البحيرة بتنتج ده؟ أيوة، وكانت بتنتج قبل كدا، ولكن لما إحنا فقدنا السيطرة وبقى فيه عمل عشوائي في هذه البحيرات، انتاجها تراجع، وبالتالي أرباح الناس تراجعت، وبالتالي كمان الإنتاج اللي كان بينزل أسواقنا، تراجع وقل.
فإنتم اتعاونوا معانا كمواطنين، كصيادين، كمسؤولين، مش بس بحيرة البردويل اللي بيتكلم عليها، لأ، بحيرة المنزلة عالناحية التانية في بورسعيد و.. ودمياط و.. والدقهلية. 3 محافظات، وبردو فيها 200 ألف فدان، وإحنا عملنا في البحيرات دي تكريك، يعني، يعني شيلنا مخلفات، وشغل خلال 7 سنين اللي فاتو، مش كدا يا كامل؟ مش كنت إنت ساعتها...
البحيرة دي بتاعة المنزلة على سبيل المثال فيها حوالي 200، 225 ألف فدان أيضا، وكانت كلها يعني مخلفات وشيلناها عشان نغير البيئة بتاعتها. طيب. لو إنتم كصيادين وكجمعيات ما اتعاونتوش معانا، الإنتاج بتاعها هيفضل محدود ودخلكم ودخل صيادينا هيبقى محدود، فيه فرق إن أنا أطلع في ال.. في الرحلة بتاعتي او في ال.. زي ما تسموها السرحة بتاعتي، 10 كيلو ولا 20 كيلو ولا 30 كيلو، ولا 100 كيلو، ولا أنا بقول كلام يا بهاء...
مدير جهاز مستقبل مصر : صح يا فندم.
السيسي: طيب ده هيتم إزاي؟ هتيجي تلاقيني بقول لك في البردويل والمنزلة وحتى بحيرة ناصر فيه وقت معين هنمنع الصيد فيه، طب بمنع الصيد ليه؟ عشان أدي فرصة لل..
مدير جهاز مستقبل مصر: الإنتاجية ال...
السيسي: للبيئة الحيوانـ.. البيولوجية بتاعة البحيرات دي إنها تنمو، ودي بتاخد فترة من السنة ولا حاجة، بتاخدلها سنة واتنين عشان نصل لإنتاجنا لأكبر حجم. دي واحد.
نمرة اتنين، طب أنا بقى وأنا بعمل ده ألاقي حد عند بحيرة البردويل جاي من حتة تانية ياخد الزريعة اللي داخلة أو بحيرة المنزلة اللي هي هتبقى سمك إنتاجه كبير وأضيعه؟ ولا أسيب الفرصة لينا عشان نعيش؟
طب مين اللي مسؤول عن ده؟ أنا مش هأخاطب أبدا فقط ضماير الناس يا دكتور. أنا مش هأخاطب ضماير الناس. أنا هأخاطب ضماير الناس وهأخاطب المسؤولين بتوع الحكومة وأجهزة الدولة للسيطرة، بس أنا بقول للناس اللي موجودة اللي هم بيسمعوني إن إحنا مش جايين أبدا، أبدا غير والله عشان نزود الإنتاج ونحسنه ونحسن حياتكم، بس أرجو إن إنتم تصدقونا وتثقوا فينا إن إحنا جايين نعمل كدا معاكم في كل البحيرات، مش بس في ال.. في المنزلة والبردويل والتمساح و.. و.. البرلس وكنج مريوط، لا لا لا.. ساعدونا، إنتم بتاخدوا الحد الأدنى من الإنتاج، لو جيتوا معانا، هتاخدوا حد أكبر من كدا بفضل الله سبحانه وتعالى.
يبقى بقى شرطة المسطحات المائية وزارة الداخلية تعمل إيه؟ الشغل التقليدي القديم اللي إحنا ماشيين بيه مش هينفع. مش إيه؟
مدير جهاز مستقبل مصر: مش هينفع.
السيسي: وإحنا لازم ننقد أنفسنا يعني. أنا مش جاي عشان يعني، يعني عشان نسمع الكلام ده بس، إحنا جايين عشان نغير، نغير حال بلدنا، وده مش هيتغير إلا بينا كلنا، مش بالنوايا، بالأفعال. إن مكانتش البردويل اللي بتنتج أحسن حاجة، الناس اللي موجودة هناك، تيجي معانا في النظام اللي إحنا عايزين نعمله، ويبقى كمان أجهزة الدولة بتساعدنا بشكل كبير عشان نحسن ال 5000 طن المتوقع ده، كانت بتجيب أكتر من كدا، 8000 مع حد تاني.. مع حد تاني يا دكتور، كانت بتجيب 8000 طن، وممكن يبقى أكتر من كدا كمان، طب إزاي؟
فممكن هو يتسابوا كدا وكان يعني الكلمتين اللي بيقولهم ال.. بهاء، وخلاص.. وفرق إن أنا أقول لكم إن إحنا عايزين نبقى مع بعض عشان نغير ونطور ونحسن من حالنا.
إحنا مبنعملش حاجة أبدا الهدف منها آآ إن الحكومة أو الدولة أو آآ المسؤولين، أو المحافظين، أي حد يعني، كل ده، كل ده في.. في الدولة.. هدفه المصلحة يعني. حتى لو إنت شوفتها في الأول مش كدا.
فـ.. من فضلكم ساعدونا إن إحنا نعمل ده، يعني يبقى وزير الداخلية يبقى المحافظ، يبقى مدير الأمن، منتبه، وحاطط في دماغه إن كل خطوة يعملها من دي هي بيعمل إضافة وبيعمل دعم لقدرة الدولة المصرية في المحافظة دي. شكرا.
مدير جهاز مستقبل مصر للتنمية المستدامة: تحت أمر سيادتك يا فندم.
السيسي: خلي النقطة.. خلي النقطة دي يا بهاء..
مدير جهاز مستقبل مصر للتنمية المستدامة: عودة لو سمحت.
السيسي: أنا بس هأتوقف عند النقطة دي وعند كلمة اتقالت على موضوع العمران.. أنا عايز أوضح لكم نقطة.. إن إحنا لما نيجي نتكلم على إن ال.. منطقة الدلتا الجديدة فيها 2 مليون فدان، 2 مليون ونص فدان، يعني إحنا بنتكلم على الأقل في 2 مليون إنسان أو أكتر هيبقوا عايشين هنا.. يبقى 2 مليون أسرة، يبقى بنتكلم على إن إحنا وده الحكومة شغالة في الموضوع ده فيه تخطيط متكامل للأرض دي عشان إحنا بنتكلم هنا في الأرض دي تقريبا 3 محافظات يا دكتور مصطفى، 3 محافظات هم بحيرة ال.. أنا قلت بردو الكلام ده قبل كدا، محافظة زي البحيرة فيها 700، 800 ألف فدان، مش كدا؟ أكبر محافظة عندنا، إنت بتتكلم هنا في 2.2 مليون، يبقى لو اتعمل هنا عمران إنت بتتكلم في 3 محافظات على الأقل، يعني بتتكلم في توطين، في تسكين 2 مليون أسرة، ده استثمارات تانية، سواء للقطاع الخاص أو لشركات التطوير العقاري، بس بنموذج مختلف يعني، لأنك إنت ها تعمل لل.. يعني للناس اللي موجودة.
ال8 نقاط اللي موجودين في اليمين والشمال دول، زي الميكنة الزراعية وزي النقل وزي ده.. أنا عايز أقول لكم، الميكنة الزراعية عشان تيجي تعمل يعني حصاد لمليون فدان، إنتم عارفين المكن المطلوب قد إيه للحصاد ده يا دكتور؟ عارفين المكن قد إيه؟ لمليون فدان من هنا، مش بس على قد الموجود في الدولة المصرية كلها في كل حتة في الريف المصري العادي أو في المناطق اللي إحنا بنزرعها.. لو إنت بتعمل حصاد في فترة زمنية قليلة، طب بس الحصاد؟ لأ، لما تيجي تزرع، فإنت عايز ميكنة زراعية بلا مبالغة بعشرات المليارات من الجنيهات. طيب لما تكون الميكنة دي هيبقى إيه يا دكتور؟ هيبقى فيه تشغيل.
طب التشغيل للناس اللي بتـ.. بتشغل المعدات دي وناس بتعمل صيانة وإصلاح لها وتخزين وقطع غيار، إنت بتعمل حياة تانية. الكلام ده بينطبق على أي حاجة من الموضوع ده. الميكنة الصناعة بتتكلم على بيفوت يبقى صناعة بيفوت يبقى صناعة المواد الخاصة بيها.. بتتكلم على كهربا يبقى نفس الكلام.. بتتكلم على نقل يبقى نفس الكلام.
إوعوا تفتكروا إن إضافة 2 مليون فدان دول أمر بسيط.. ده أمر ينتج عنه تشغيل يعني ملايين وحياة لملايين. فنحط إيدينا كلنا، لما بتكلم على ميكنة أو.. طب حتى حفر الآبار اللي بيقولوا عليها في الشمال تحت دي.. لما تيجي تزرع.. عايز تعمل 600 ألف فدان وتعمل لهم آبار في حتة معينة، عايز تعملهم في قد إيه؟ البير ياخد له ممكن أحسن حاجة 10 – 15 يوم وأكتر حاجة صعبة ممكن بالمكن البسيط تاخد لها شهرين تلاتة..
مدير جهاز مستقبل مصر: سيادتك أقصى حاجة يا فندم.
السيسي: مش كده؟
مدير جهاز مستقبل مصر: أيوة يا فندم.
السيسي: طيب. لو أنا النهارده عايز أعمل.. البير بيعمل 100 فدان، يبقى 6000، 6000 بير، يبقى عايز مكن لحفر 6000 بير، في قد إيه؟ في سنة، ولا في سنتين، ولا في 10؟ عايز تدخل ده إمتى؟ عايز تدخل ال 600 ألف فدان دول إمتى؟ طيب أنا بتكلم الكلام ده ليه؟ يعني بوريكم حجم ال.. النجاح يعني؟ لأ ده أنا عايز أوريكم إن إحنا بنحاول كلنا نعمل حاجة آآ عشان آآ ندخل آآ كميات من الأراضي الزراعية والاستفادة من نقطة من كل نقطة ميه موجودة، سواء كانت آبار أو كانت مياه معالجة زي ما قال، أو مياه آآ النهر يعني.
فالفرص اللي بيتقال عليها دي، دي فرص عمل أخرى داخل المشروع، وهنا محتاجين إن يعني الإعلان عنها وأنا عارف إن فيه قطاع خاص كبير قوي معاك في الميكنة الزراعية، شركة كبيرة قوي إنتم قلتولي عليها، لكن إنتم محتاجين تعملوا ده في كل..
مدير جهاز مستقبل مصر: هذه القطاعات.
السيسي: هذه المجالات.. شكرا جزيلا.
...
السيسي: خليني الأول يا.. يا زملوط إن أنا أعزيك في وفاة شقيقك، البقاء لله سبحانه وتعالى.
محافظ الوادي الجديد: متشكرين يا فندم.
السيسي: وأشكرك على المجهود اللي أنت عامله، وأنا بقول في النقطة اللي.. اللي إحنا افتتحناها النهارده
محافظ الوادي الجديد: تمام سيادتك.
السيسي: إحنا كانت خطة الدولة في الموضوع ده يا دكتور مصطفى إن إحنا نعمل كل محافظاتنا كده، والفكرة كانت كلها ببساطة خالص جزء كبير منها قريب من اللي إحنا عملناه في العاصمة، قلنا إن إحنا نخلي، وهايبقى عندنا أصول كتير قوي ممكن تغطي نسبة كبيرة أو تغطي كل وقد تزيد زي ما حصل عندك.
محافظ الوادي الجديد: صح يا فندم.
السيسي: لأن إنت كانت المحافظة موجودة بأرضها كبيرة قوي داخل متناثرة المديريات على مساحة أكبر داخل أراضي ذات قيمة جوة المحافظة إن كنت أنا فاكر.
محافظ الوادي الجديد: تمام سيادتك.
السيسي: عملنا دي في أرض تانية ما تساويش، أنا آسف يعني، ملهاش قيمة، بالشكل ده عشان نقدر نعمل نقلة، ولكن إحنا كنا قلنا إن إحنا عايزين نعمل ده عشان نربط المدينة أو المحافظة أو المحافظات مع الحكومة بعد ما عملنا ميكنة كاملة لها، يبقى فيه ميكنة داخل المحافظة، ثم فيه ربط ما بين المحافظة وما بين الحكومة ممكين بشكل كامل.
محافظ الوادي الجديد: تمام سيادتك.
السيسي: ده اللي إحنا كنا بنتحرك فيه وحبيت بس أشاور عليه عشان إحنا محتاجين نكم هذه الخطة ونعملها بالفكرة اللي إحنا كنا قلناها في محافظة الوادي الجديد.
أنا مثلا مثلا في أسيوط، ها تجد المحافظة بالمديريات اللي موجودة فيها داخل أراضي ذات قيمة كبيرة قوي، في محافظة زي دي، وفي أسيوط الجديدة، صح كدا؟ طب أنا ممكن أعمل في أسيوط الجديدة الكيان ده، والأراضي التانية اللي موجودة دي تبقى حاجة تانية، تبقى حاجة تانية.
فأنا بشكرك، وبالنسبة للمصنع بتاع ال..
محافظ الوادي الجديد: ال mdf سيادتك.
السيسي: آه، في مصنع زيه هيفتتح كمان شهر في شرق العوينات، بص عليه، شوف المفردات..
محافظ الوادي الجديد: نفس التقنية سيادتك.
السيسي: أنا بتكلم على التكلفة يعني.
محافظ الوادي الجديد: وسيادة اللوا مختار وال... جاهز يا فندم.
السيسي: طيب.
محافظ الوادي الجديد: أنا بطمن سيادتك يا فندم على الحكومة الرقمية، إحنا يمكن آخر مجلس محافظين عملته فيديو كونفرانس مع السيد رئيس الوزرا، وإحنا فيه شركتين من وزارة الاتصالات شغالين معانا، بنربط كل المديريات ويمكن السيدة النائبة نوهت على الموضوع ده، حتى المواطن هيبقى حتى الصندوق اللي سيادتك أمرت نعمله حوكمة، عملناله حوكمة كله أونلاين عن كل مستثمر ياخد الأرض، وهو خارج البلاد بكل تقنية، والحمد لله إحنا مرتبطين ووزارة الاتصالات معانا ووصلت وجهزت المكان للربط بالحكومة الوطنية والتحول الرقمي يا فندم.
السيسي: أنا بشكرك يا زملوط وربنا يوفقك.
محافظ الوادي الجديد: الله يخليك يا فندم.
السيسي: وأنا بس عايز أقول لك إنت كنت قلت لي قبل كدا على مشروع الحرير.
محافظ الوادي الجديد: تمام يا فندم.
السيسي: فماتـ...
محافظ الوادي الجديد: مشروع الحرير يا فندم والله إحنا شغالين فيه مع آخر حاجة جهاز ال...
السيسي: أنا مليش دعوة بقى..
محافظ الوادي الجديد: إن شاء الله هيخلص يا فندم، بإذن الله..
السيسي: أنا بس...
محافظ الوادي الجديد: مع ال 5 مليون نخلة يا فندم هيتفضّل نص مليون معاهم إن شاء الله يكون... بس إحنا اشتغلنا فيه بس مش كميات تصديرية لأن فيه معوقات كتيرة وإن شاء الله دولة رئيس الوزرا ها تحلها لنا مع وزيرة التنمية المحلية سيادتك.
السيسي: المعوقات لو... إيه المعوقات؟
محافظ الوادي الجديد: الاستيراد يا فندم نوع التوت فيه دراسات، فإحنا جبنا خبير هندي وأنا عرضت على مجلس الوزرا والسيد وزير التنمية المحلية وإن شاء الله لينا مع جهاز المشروعات الصغيرة والمتوسطة فعلا لقاء وإن شاء الله هنطمن سيادتك قرب نهاية هذا العام بانطلاقة كويسة لهذا المشروع يا فندم.
السيسي: ربنا يا رب يوفقكم.
محافظ الوادي الجديد: أوامر يا فندم.
السيسي: شكرا يا زملوط.
محافظ الوادي الجديد: إحنا بنشكر سيادتك يا فندم.
السيسي: متشكرين.
محافظ الوادي الجديد: اتفضل يا فندم.
السيسي: شكرا.. شكرا. (تصفيق)