نص كلمة السيسي في الأكاديمية العسكرية المصرية 17/12/2024

1:19

إحنا معنيين إن إحنا بطلبة الحاسبات وطالبات الحاسبات اللي موجودين في مصر، وشايفين عندهم المهارات والكفاءات إنها تمكنهم إن هم يبقوا يعني أكثر تخصصًا وأكثر آآ احترافية في هذا المجال، إحنا مستعدين بالاختبارات اللي هنعملها، كاملة، إن إحنا يبقى في نسبة منهم تبقى موجودة معانا خلال العام ده؟

ده بس حبيت إن أنا أأكده، ويطلع بشكل أو بآخر انهارده يعني بحيث إن إحنا ييجي تشوف هتستأنفوا أو تفتحوا مرة تانية لمدة أسبوع ولا حاجة عشان تدوا فرصة للآخرين، ويبقى إنتوا محتاجين بس لجنة اللي هي هتعمل الاختبارات اللي بتأكد لكو إن اللي إنتو.. لأن هيجيلك كل اللي عنده خريج الحاسبات، لكن إنت عايز، إنت هتدي له ماجستير في التخصص، وأنا كنت قلت الكلام ده قبل كدا للقطاع المدني.

فأنا بتكلم، لو انهارده المعايير اللي اتعملت ساعتها، وإنت أي عدد وأنا بقول وأنا بفتح لكوا الباب، أي عدد ينجح في المعا.. بالمعايير دية في الاختبارات دية، إحنا هنقبله. ندي له الفرصة دية إن هو ياخد الدورة دي.

يتبقى حاجة تالتة وأخيرة. أنا مستعد أقبل من الجامعات، يعني من خريجين، ولا برضه ناس جداد تاني، إن أنا العدد أخليه أضعاف العدد اللي إنتوا بتتكلموا عليه، يعني في التخصص ده، أنا بتكلم على 1000 و 2000 وقد يزيد عن كده في الدفعة الواحدة، بس أنا بتكلم هنا إنتم آآ محتاجين تدرسوا معايا خلال الأيام وال.. والأسابيع القليلة القادمة، وتدوني رأيكم أو رأي الدراسة إيه في إن أنا يبقى في وعاء آخر، وعاء تنظيمي آخر في مكان آخر، بس بنفس أسلوب دراستنا اللي إحنا يعني بأسلوبنا ده، اللي هو إلى حد ما الحياة اللي هي آآ مترتبة مش ها يروح وييجي، لا إحنا ها نقعده لأن إحنا ها ندي له جرعة علمية مكثفة، بس هو لازم يكون محقق آآ بإمكانياته المعايير اللي إحنا حاطينها في الاختيار.

أنا بتكلم على 2000 و 3000 دارس ودارسة في هذا الأمر، ده اللي إنتوا محتاجين تدرسوه وتردوا علية في خلال أسبوع عشان نعلن عنه، وإن كنت أنا هعتبر، بس هتجدوا الرد فعلًا إن القطاع المدني يعني هيبقى مستني، بس إحنا بنقول لهم إن إحنا هنعمل ده، إن شاء الله، بعدد أكبر من كده بكتير، الفكرة هنا هنعلمه وهنطرحه يعني ندي له الشهادة ونسيبه للقطاع المدني، يشتغل هو بقى خلاص إحنا جهزناك أهه، ولا حاجة تانية؟ يعني الجديد في الفكرة اللي بتكلم عليها 3،4 آلاف إنسان، آخده من الوعاء ال.. الوعاء الجامعات ومعاهد وكلام من هذا القبيل، أختار كلمة مناسبة، أديها تأهيل لمدة سنتين، ياخد ماجستير، وبعدين أقول له اتفضل أنا عملت اللي علية معاك في هذا المجال إنت بقيت على مستوى متميز جدًا في المجال، فالباب مفتوح لك إنك تشتغل في هذا الأمر، مع الوضع في الاعتبار إن ممكن تنسقوا مع وزارة الاتصالات، وتنسقوا مع شركات الاتصالات، عشان تقول له إن أنا هطلع لك مستوى معين، هذا المستوى ممكن أوي وهو في الكلية، وهو في الكلية اللي هي كلية داخلية يا أشرف، كلية داخلية يا محمد، كلية إيه؟ آه مش هيروح، مش عشان حاجة، لأن أنا يعني هو النظام بتاعنا بنحاول إن إحنا نعظم ما لدينا وندي له فرصة إن هو ياخد لغة معاه ياخد حاجة تانية بحيث عن يبقى مستوى آآ بنختصر له الوقت، بنختصر الوقت، بدل ما تقعد لك 4، 5 سنين تاخد دورات وتاخد لغة وده، لا أنا هكثف لك المدة، هقعدك سنتين عندي لكن هتاخد لغات لغة إنجليزي فرنساوي وألماني زي ما يكون، بالإضافة للتخصص.

بعد ما.. طب أنا عملت كده ليه؟ الدولة هتعمل ده يا أشرف، والقوات المسلحة تعمله لصالح، لصالح ال.. الشباب ، الشباب اللي عندهم الملكات والمهارات دية، وخريجين الجامعات دية، والشابات. طب كام العدد؟ كام العدد؟ هيبقى الوعاء اللي إنت هتوصله يا محمد إنتوا تقدروا تستوعبوا قعد إيه إقامة وتعليم بس ما تنساش إنك إنت الدفعة هتقعد مش أقل من سنتين، فإنت لو قلت 2000 يبقى إنت بعد سنة هيبقوا 4000 عقبال ما تخرج الدفعة، فإنت عايز على الأقل الوعاء اللي عندك يشيل 4000 ، 4500 لـ 5000 أنا كده خلصت.

أيوة، أنا كلامي للناس اللي بتسمعني دلوقتي في مصر إن إحنا بصدد خلال هذا العام إن شاء الله وهنعلن عنه إن إحنا نستقبل ناس هنعملها اختبارات زي ما بنعمل اختبارات هنا، لكن أنا بقول للناس إحنا هنقبل بـ 2000 لـ 2500 يا.. هه؟ من 2000 لـ 2500 بحيث إن إحنا نديهم خلال سنتين ماجستير وكمان يبقى عندهم فرصة من خلال وزارة الاتصالات اللي هتبقى شريك معانا في الموضوع، والشركات اللي شغالة في المجال إنها تبقى تخش معانا وتدي آآ تدي تكليفات بشغل، والشغل ده هيبقى فرصة للتدريب وقد يكون فرصة أخرى لتكسب اللي هم المـ.. ال.. اللي هيلتحقوا معانا في هذا الأمر.

هنا لو إحنا نجحنا في هذا الأمر، أنا بقول للناس عشان تهتم معايا، مش عشان إنتوا، إحنا بنهتم بشغلنا، لكن أنا بقول كده للناس اللي بتسمعني في القطاع المدني عشان تهتم معايا، إنك إنت ركز معايا في هذا الأمر، لأن ده مش هيبقى متاح سنة ولا اتنين، ده هيبقى مسار إحنا ماشيين بيه لسنين طويلة قادمة إن شاء الله واللي بعدنا يعني إن هم يبتدوا يبقى، يعني أقصد أقول إن المسار ده مش معمول لمرحلة مؤقتة، لأ ده مفتوح. الفرق الجديد إن أنا هعمل ده، هالحق اللي بطرحة للناس وبقوله لهم، أنا هعمله، الدولة هتعمله، الدولة هتنفق عليه بالقوات المسلحة يا أشرف. 

أشرف: حاضر

الرئيس: بمين؟

أشرف: بالقوات المسلحة

الرئيس: خدمة لمين؟

أشرف: للمجتمع

الرئيس: للمجتمع، لأهلنا.

فأنا هعمل ده وأطرحه على.. بالمناسبة، إنت بتحط الشابة والشاب اللي خد الدراسة دي بتحطه في مستوى تاني خالص في التشغيل، بتحطه في مستوى الناس اللي فاهمة الشغلانة دي يعرف إن هو بيتكلم في ، يعني، 40 و50 و60 ألف جنيه وأكتر من كده، مش عايز أبالغ يعني عشان بس ما يبقاش مش ده الهدف، لكن إحنا عشان نلحق ندخل المجال.

ألقيت الكلمة في مقر الأكاديمية العسكرية الجديد بالعاصمة الإدارية الجديدة، حيث شهد الرئيس عبد الفتاح السيسي اختبارات كشف الهيئة للهيئة المتقدمين للالتحاق بالاكاديمية العسكرية المصرية والكليات العسركية.